O Uluai Tamaitai o le Toefuataiga
Sa Olioli Sieni i le Faigamalaga
O tatou pei o Sieni Manning James, e naunau e faamaea la tatou faigamalaga i le faatuatua?
Ata na tusia e Toni Oka
Sa lelavā Sieni Manning James e savali, ae sa musu o ia e taofi.
Sa lava le matua o lona atalii ulumatua, o Sylvester, e savali i autafa o le taavaletoso. Ae o le pepe o Sila, o le sa fanau ao latou faimalaga, sa manaomia pea ona sii o ia. O le 1847, ma o le a le o toe mamao ae i ai le aiga o James ma uluai paionia na taunuu i le Vanu o le aai tele o Sate Leki.
O Sieni e le o se tagata fou i malaga uumi.
I le fa tausaga talu ai, na tuua ai e lona aiga lo latou fale i se aai i sasae e auai faatasi ma le Au Paia i Navu, i le faatausiusiuga o le tuaoi i sisifo. O le faigamalaga sa tatau ona na o ni nai aso i le vaitafe. Ae ona o le tele o tagata uli sa avea o ni pologa i le Iunaite Setete i lena taimi, sa masani ona faaali e le aiga o Sieni ia pepa o loo faamaonia ai lo latou saolotoga. Ma o nisi o nofoaga sa i ai tulafono maumaututu e taofia ai tagata mai le malaga atu i le eria—e aofia ai le totogi o le pasese e oo atu i le $500 mo le tagata toatasi.
Masalo ona o lenei pasese taugata pe atonu foi ona o isi e faailoga tagata, sa mumusu ai le aufaigaluega o le vaa e ave Sieni ma tagata o lona aiga. I le le faavaivai ai, sa latou tuua le tele o a la meatotino ae savavali loa ma ave na’o mea na mafai ona latou siiina.
Sa savavali le aiga o Sieni mo le silia ma le 800 maila (1,287 km). Na latou savavali i aso susu ma po uliuli. Na latou savavali atu i se vaomatua, ma momoe ai i lalo o le lagi matala. Ina ua latou ala ae, sa papae o latou lavalava i le aisa.
“Sa matou savavali seia oo ina leaga o matou seevae, ma sa tiga ma mavaevae ma tafetotoi o matou vae,” sa manatua e Sieni. “… Sa matou ole atu i le Atua le Tama faavavau e faamalolo o matou vae ma sa tali mai a matou tatalo. ”1
A o onosaia lenei malaga faigata, sa usu ai e Sieni ni pese ma ona matua ma ona tei, ma vivii atu i le Atua. Mulimuli ane, ina ua mavae le toeitiiti tolu masina o le savaliga, sa latou taunuu i Navu. I ni tausaga mulimuli ane, ina ua tuua e le Au Paia faamaoni e sopoia laufanua valevalenoa, sa i ai Sieni i le lotolotoi o uluai paionia na amata ona savavali i le ala.