O Leo o le Au Paia o Aso e Gata Ai
“Tuafafine, Ou te Alofa ia te Oe”
E le tatau lava ona tatou maasiasi i le faatinoina o se musumusuga.
I le taimi o se faatalanoaga a o ou auauna atu i se au peresitene o le korama a toeaina, sa ou fesili ai i se uso o le korama pe na ia lagonaina ma galue i se uunaiga faaleagaga. Sa ia mafaufau mo sina taimi ma faasoa mai se aafiaga.
I se tasi aoauli sa ia fufuluina ipu ae ia maua se uunaiga malosi e alu ai e tuitui i le faitotoa o se tuaoi. Sa le malamalama o ia pe aisea, ae o le uunaiga sa mamana ma faanatinati. Sa ia taofia mea sa ia faia ma alu ese atu i le taimi lava lena.
Na taunuu o ia i le faitotoa o lona tuaoi, ma le le iloa po o le a le mea e fai pe tautala atu ai, ma sa tuitui. Sa leai se tasi na tali. Sa ia toe tuitui atu. Sa leai lava se tali. O le faaiuga e leai se tasi sa i ai i le fale, o lea na ia liliu ai e alu, ona toe lagonaina lea o se isi uunaiga.
Sa ia toe savali atu i le faitotoa ma fai atu, “Tuafafine, ou te alofa ia te oe.” Ona ia malaga ese lea.
Sa manatu o ia o se mea e le masani ai, ma sa ia lagonaina sina matamuli i lena aafiaga. Sa ou fai atu ia te ia, e le o taimi uma e tau mai ai e le Alii ia i tatou mafuaaga mo uunaiga, ae e le tatau lava ona tatou maasiasi i le faatinoina. E lei leva ae alu ese lenei uso ina ua mavae le ma faatalanoaga.
I le taimi o se sauniga anapogi ma molimau i le tausaga mulimuli ane, sa savali atu ai i le tulaga se tuafafine ou te leiloa e tuuina atu lana molimau. E ui i loimata, sa ia faamatala mai na alu ese ma le Ekalesia mo ni nai tausaga, ma i lena taimi sa matua faanoanoa o ia ona sa lagona e le mafai ona faaauau.
“Tama Faalelagi, afai e i ai moni lava Oe ma afai E te alofa moni ia te au,” na ia tatalo atu ai, “tau mai loa ia ou malamalama.”
I le taimi lava lena, sa ia faalogoina ai se tuitui i lona faitotoa ona sosoo ai lea ma le isi. Ina ua ia le tali atu, na ia faalogoina se leo o fai atu, “Tuafafine, ou te alofa ia te oe.”
Sa ia fai mai sa lofituina o ia i lagona o le alofa, ma sa ia maua ai se malosiaga fou e fetaiai ai ma lona olaga faigata. Sa ia fai mai e le o lelei mea uma, ae sa alualu pea i luma lona olaga.
Sa leai sau vaega i lenei aafiaga, ae ua faamanuiaina pea au. Sa ou maua se vaaiga manino i le auala na faaalia ai e ni gaoioiga e le fesootai o le faatuatua e silafia i tatou uma e lo tatou Tama oi le Lagi, ma ua Ia valaauina i tatou ia galulue i uunaiga e fesoasoani i Ana fanau. Ou te faafetai mo, ma faapelepele, i lenei malamalama.