Hem I Bin mo Bae I Oltaem Lidim Yumi

Ol brata mo sista blong mi mo mi i bin groap mo stap bilif long God, be famli blong mifala i no bin go long wan jos. Mifala wanwan i mekem wanem mifala i wantem mekem mo no wari blong lanem abaot stamba tingting blong mifala long wol ia.

Afta, jes bifo mi kam wan yangfala, sam long ol famli blong mi oli ded, mo mi stap tingting se sapos bae mi luk olgeta bakegen. Mi tingbaot bubuman blong mi i wonem mifala blong no stap slip tumas from se taem yumi ded, yumi slip blong oltaem, mo hemia i mekem mi wantem save moa. ?Ded i wan tudak ples blong slip we i no save finis?

Taem sol blong mi i lukaotem ansa long wanem i happen afta we yumi ded, wan neba—wan foma bisop blong Jos Ia blong Jisas Kraes blong Ol Lata-dei Sent—i sendem ol misinari blong jos blong hem blong kam mitim mifala. Oli bin tijim sista blong mi, Fiasili, mo mi, gospel blong Jisas Kraes we i bin kambak mo introdiusum Plan blong Sevem Man, we i ansarem evri kwestin blong mi long saed blong ded . . . I stret ia nao!

I no long taem, Fiasili mo mi i bin kasem baptaes. Hem i bin gat 13 yia mo mi bin gat 12 yia.

Papa mo mama blong mitufala i bin glad se mitufala i joenem Jos, be tufalawan i no wantem kam pat long hem. Afta we mitufala i bin kasem baptaes, sista blong mi mo mi i traem bes blong mitufala blong atendem ol miting blong jos oltaem, be i no bin isi, speseli wetem paoa blong fasin blong stap kompit insaed long hom blong mifala. Eksampol. Oltaem mitufala i mas jusum blong go long sakramen miting o blong go long solwota wetem famli blong mitufala.

Be Fiasili mo mi i bin wok blong mekem testemoni blong mitufala wanwan i kam strong. Mitufala i stap tingting se sapos papa mo mama blong mitufala i jes akseptem gospel tu, bae mitufala i no save laef long tu wol. So, mitufala i invaetem ol misinari blong tijim tufala, mo long proses, yangfala brata blong mitufala—mo plante long ol kasen blong mifala we oli stap stap wetem mifala—oli joenem Jos.

I bin tekem longtaem smol long papa mo mama blong mi. Sista blong mi i stap givim seves finis olsem wan ful-taem misinari long Suva, Fiji, taem mama blong mifala i kasem baptaes. Papa blong mifala i bin kam les aktiv blong wan longfala taem, mo i bin wan bigfala glad blong luk tufala i stat blong kambak long jos wetem mifala.

Afta long 2019, mi kasem misin kol blong mi blong go long Filipin, Keson Siti Misin. Blong stap givim seves long ples ia i olsem mi stap long ples we mi bin drim from—bae mi oltaem laekem kastom blong ol man Filipin mo wantem tumas blong lanem lanwis Tagalog. Be misinari eksperiens blong mi i bin tijim mi tru fasin blong Papa mo Mama blong yumi long Heven, mo taem mi gobak hom long Samoa las yia, mi filim wan strong tingting long hat blong mi blong luk famli blong mi i sil tugeta blong taem ia mo taem we i no save finis.

Mifala i gat sam wok blong mekem bifo mifala save kasem gol ia. Papa mo mama blong mi oli niu yet long gospel mo stap gohed blong lanem abaot ol odinens blong gospel blong sevem man. Brata blong mi i stap gohed yet blong faenem rod blong hem—stap faenem se sapos wan misin i stap long fiuja blong hem—mo Fiasili mo mi i gohed blong stap strong nomata ol hadtaem. Mitufala i tingting strong blong “wokbaot wetem strong bilif long Kraes, wetem wan stret mo klin hop, mo wan lav long God,” taem mitufala i traehad blong helpem famli blong mitufala i jenis fulwan.

Samtaem mi stap tingting, olsem wanem nao ol brata mo sista blong mi mo mi i bin faenem gospel mo bin stap strong long evri yia, speseli blong no gat papa mo mama blong mifala long jos blong wan longfala taem. Naoia mi kam blong luksave se Papa blong yumi long Heven i bin stap lidim mifala truaot long ol taem ia. Iven tru ol jalenj blong mifala, mifala i bin filim han blong Hem long wanwan laef blong mifala, mo mi save hemia—semmak olsem we Hem i bin mekem long Ol Man blong Jared long Ita 2:7—Hem bae i no spel kasem taem yumi kasem ol naesfala so blong promes graon ia we oli rere long hem i stap blong yumi.