Stap Folem Rod blong Papa blong Mi

Ol famli blong mi oli gat wan gem long saed blong kastom we oli stap mekem blong gat wan gudtaem. Long ol holidei, ol kam tugeta o ol narafala spesel taem, mifala i laekem blong tekem bot blong angkel blong mi long Tongatapu, men aelan blong Tonga, i go long wan naesfala aelan aotsaed we oli singaotem Pangaimotu. Long ples ia, mifala i pasem fuldei, stap pleplei volibol o pul, kayak mo yes, kakae mo swimswim long solwota.

Taem mifala i kasem Pangaimotu, oli angkarem baot aotsaed nomo long lagun blong hem mo wan smol feri bot i stap tekem ol adalt i go long so. Ol pikinini—ol kasen mo ol brata mo sista blong mi—oli neva laekem blong wet long transpot. Oli laekem moa blong swim aot long bigfala bot i go long so, mo afta long en blong longfala dei blong sot trip ia, bae olgeta evriwan oli swim i go bak long bot.

Taem mi bin yangfala, mi oltaem wantem blong joenem olgeta, be swim ia nao i had tumas long mi from se wota kolosap long bot blong mifala i dip. I mekem mi fraet from leg blong mi bae i no save tajem graon andanit long solwota—mi sua se wan samting bae i holem mi strong mo pulum mi i go daon. Wetem, longfala ples bitwin so mo bot, i luk olsem se i longwe tumas. ?Wanem bae i happen sapos mi taet bifo mi kasem so?

Papa blong mi i save olsem wanem hem i impoten long mi blong mekem swim ia.

Taem we san i stat blong go daon long wan narafala dei, long Pangaimotu, hem i singaotem mi blong go long hem. Bae hem i helpem mi blong swim long so i go long bot.

Papa i wokbaot wetem mi i go bitim ples we i no dip i go long wota we i dip. Taem we mi filim se leg blong mi i nomo tajem graon andanit long mi, mi gat fraet mo traem blong holem hem, be hem i no letem mi. Mi filim nogud bigwan mo wota long ae i foldaon, be papa blong mi i stap long saed blong mi nomo mo leftemap tingting blong mi blong gohed blong swim.

Long wan taem, taem mi stap swingim ol han blong mi mo kik plante long leg blong mi, mi filim se mi no stap muv i go long eni ples. !Mi taet tumas! Papa blong mi i talem long wan kaen fasin se bae mi jenisim posisen blong swim blong mi.

Mi lisin gud nomo long voes blong hem, long taem mi stap pulum win mo stap muv, mi no luksave se mitufala i kasem bot—hariap nomo bitim wanem we mi stap tingting long hem.

Wan gudfala filing blong sakses i kavremap mi afta we mi klaem i go long bot, mo mi kam blong luksave se, samples long rod ia—taem mi stap lukluk nomo long swim blong mi mo long papa blong mi—mi lusum fraet blong mi long dip solwota.

Long ol pas yia, mi bin mekem swim ia i go kam plante taem mo nogat fraet. Wanem we long wan taem i bin had tumas, naoia i kam isi tumas.

Mi tingbaot olsem wanem papa blong mi i lidim mi long fas sakses swim blong mi i go long bot. Hem i bin kaen be i strong. Hem i letem mi filim ol had samting long miwan, be hem i stap kolosap long saed blong mi truaot long ful rod ia. Wanwan taem mi seksek mo go agensem be, hem i gohed blong leftemap tingting blong mi wetem fasin blong save wet longtaem mo lav.

Mi bin lanem long taem ia se Papa blong yumi long Heven i wok long kolosap semmak wei. Hem i save se yumi stap long wol ia blong lan, mo oltaem hemia i nidim yumi blong kamaot long ol ples we yumi filim i isi blong stap long hem. Hem i save se plante long ol jalenj blong yumi long wol ia bae oli had mo bae i so plante mo we yumi mas eksperiensem olgeta yumiwan blong yumi save progres, be oltaem Hem i stap long saed blong lidim yumi mo leftemap tingting blong yumi, mo blong helpem blong tanem ol samting we yumi no strong long hem i kam ol paoa blong yumi.

Taem yumi stanap strong mo winim ol tes blong laef blong yumi wetem tingting i stap daon mo fet, oli save tekem yumi kam kolosap long Papa blong yumi long Heven. Oli save tijim yumi blong trastem tabu lav blong Hem long yumi mo long tingting blong Hem, blong wantem yumi blong gat sakses. Olsem papa blong mi i bin mekem long mi plante yia i pas long Pangaimotu, Papa long Heven i save mekem yumi i kam wan moa gud vesen blong yumiwan mo helpem yumi kasem moa samting bitim we bae yumi no save mekem yumiwan.