Komuniti I Tingbaot Ol Viktim blong Maupiti Siprek long Tabu Seremoni

Jos Ia blong Ol Jisas Kraes blong Lata-dei Sent long Franis Polinesia i holem wan seremoni long Satedei namba 1 Mei blong karemaot wan histri memori hedston mo blong soem respek long ol viktim long wan nogud samting we i bin hapen kolosap 60 yia i pas finis. Seremoni ia I tekem ples long Maupiti, wan aelan we i stap 300 kilometa notwes long Papete.

Stori blong bigfala nogud taem ia i stat long 22 Mei 1963, taem oli bin dediketem wan niufala japel kolosap long aelan blong Huahine. Elda Gordon B. Hinckley we i wan memba blong Kworom blong Olgeta Twelef Aposol long taem ia mo we afta hem i kam presiden blong Jos, i bin prisaed long longfala dei blong seremoni mo gobak long Papete afta long ol seves.

Long naet ia, wan bot we oli singaotem Manuia i bin karem ol memba blong Jos long Huahine i gobak long Maupiti. Long nekis moning, taem bot i stap traem blong kros tru mo pasem koral rif we i raonem aelan, bot i kapsaet long ol strong wef. Fiftin pipol oli bin draon mo Maupiti branj i bin lusum fotin long ol memba blong hem, we i gat ten mama mo fo pikinini.

Oli talemaot nogud samting we i hapen long Elda Hinckley long Papete, mo kwiktaem hem i travel aot long bot long naet i go long Manupiti. Long nekis moning hem i kasem ples, hem i haggem mo krae wetem ol famli taem oli stap harem nogud.

Seremoni ia we i hapen long 1 Mei, 2021 i bin gat ova 150 pipol, we i gat tu ol lida blong Jos, ol memba blong branj, olgeta we oli sef long siprek mo ol memba blong famli blong olgeta we oli bin lus long disasta ia. Wan o moa long ol laen blong ol viktim ia, oli bin ripresentem olgeta long taem ia. Ol filing i bin strong long evri taem blong seremoni ia, speseli taem oli stap ridim nem blong ol victim ia. Evriwan oli serem olsem wanem oli filim, se ol viktim ia, oli stap long taem blong seremoni ia.

Maupiti Kwaea i bin givim miusik long saed blong spirit, we oli singsing long Franis mo lanwis blong Tahiti.

Ol spika, i gat Holly Hinckley Lesan, apu pikininigel blong Presiden Hinckley, we i adresem miting wetem wan mesej we oli rekodem finis long Franis lanwis. Hem i tokbaot hamas eksperiens ia blong Maupiti i minim long apu man blong hem.

“Mi ting se sapos apu man blong mi i stap toktok tedei long ples blong mi, bae hem i serem bigfala lav blong hem long Ol Sent long ol aelan blong solwota. Bae hem i tokbaot laef bakegen long ded blong Sevya we i ril, long wan save we i sua se olgeta we oli lusum laef blong olgeta long rabis dei ia long Maupiti bae oli laef bakegen, mo we bae yumi stap wetem olgeta bakegen sam dei. Ol bigfala nogud taem blong laef long wol ia i no save stopem naesfala rod blong yumi blong kasem laef ia we i no save finis.

Ol seves i bin en wetem wan vidio presentesen we oli bin rekodem finis long Franis mo lanwis blong Tahiti we i kam long Elda Ian S. Ardern, presiden blong Eria Pasifik blong Jos, we i bin toktok insaed long ofis blong hem long Oklan.

Hem i talem, “Taem bigfala nogud taem i kam, mo bae i kam long wanwan long yumi, yumi faenem pis long Doktrin blong Kraes. Doktrin ia i givim hop long yumi se bae i gat wan laef bakegen afta long ded mo we bae yumi laef bakegen. Yumi save tu se ol bubu blong yumi oli impoten long yumi. Plante long olgeta oli no gat wan statiu blong stap onarem olgeta long hem o bae oli no wantem wan, be i tru, yumi onarem olgeta tru long wei we yumi stap laef. Mi save se Lod i no fogetem ol pipol blong Tahiti.”

Afta long program, evriwan we i stap long taem ia oli kam tugeta long ol eria aotsaed long Maupiti japel. Moana Teripaia, Presiden blong Bora Bora Stek mo Mark Banner, Presiden blong Franis Polinesia Misin, i joen wetem Alice Atuahiva, Diputi Meya blong Maupiti mo help blong Elda Sinjoux blong karemaot histri memori hedston. Afta Elda Sinjoux, Eria Seventi blong Franis Polinesia i givim wan prea we i kam tru long hat blong stap tingbaot. Hedston ia i talem stori long tugeta, Franis mo lanwis blong Tahiti, mo i sidaon long graon we i fesem solwota we i raf, ol grin hilsaed mo naesfala waet japel.

Meya blong Maupiti, Woullingson Raufauore, i welkamem delekesen blong ol lida blong Jos we Elda Sinjoux i lidim taem oli kasem ples. “Mi talem tangkyu long Jos Ia blong Jisas Kraes blong Ol Latta-dei Sent blong mekem seremoni ia. Blong mekem hemia i wan gudfala samting tumas from se long wan taem o wan narafala taem, yumi evriwan i gat wan diuti blong tingbaot ol pipol we oli bin stap givim seves wetem yumi.”

Mihimana Pahuiri i lusum waef mo bebi blong hem long bigfala nogud taem ia. “Samting we i hapen ia i wan tru tes mo Jos blong Maupiti bae i save stop blong gro. Be hem i fet blong ol memba we i mekem i posibol blong gohed blong mekem gospel i laef. Mi no bin wan memba blong jos long tetaem ia blong bigfala nogud taem ia, be waef blong mi i wan memba. Mi disaed blong kasem baptaes mekem se mi save go long tempol mo sil wetem waef mo pikinini blong mi.”

Elda Sinjoux i tingting bak long ol toktok blong Aposol we i visit long 1963. “Elda Hinckley i talem, ‘Bae mi neva fogetem Maupiti.’ Long semmak wei, Papa blong yumi long Heven mo Pikinini blong Hem, Lod mo Sevya blong Yumi Jisas Kraes bae i neva fogetem yumi. Bigfala tingting blong hat blong tufala i blong invaetem yumi blong gobak long presens blong tufala afta long laef ia.