Nakonako ma Te Atua ni Kawain te Berita

Ni moan te ririki, I bon miimi nanou n ara kamatebwai n Nakomai, Iriirai are e katuruturua ara iango iaon te kibuntaeka ae ‘Nakonako ma Te Atua’.

Inanon maiura ae bati iai te katabetabe, ti kona ni kairekerekeira ma aron ana namakin Enoka ngke e weteaki iroun te Atua bwa e na takaaruaea te rairannano nakoia Natina¹. E taku Enoka, “E aera ngkai I karekea te akoaki i matam, ao ngai bon te teinimwaane, ao a bane aomata n riribaai; bwa I aki kona n taetae raoi; e aera ngkai ngai am tia mwakuri?”²

Ngkana ti a tia n namakina aio, ti mena inanon te reitaki ae tamaroa. Te bwai ae kakukurei, ti riai n aki nanokaawaki, bwa aio aron ana kaeka te Atua nakon ana titiraki Enoka:

“Waaki nako ao karaoa are I a tia n tuangko, ao akea te aomata ae e na niniiko. Kauka wim, ao e na kanoaaki, ao N na anganiko te konabwai n taetae, bwa a bane aomata ni mena i nanon baiu, ao N na karaoa are I taku bwa e tamaroa. . . .

“ao ko na mena irou, ao Ngai iroum; ngaia are nakonako ma ngai.”³

N te Topical Guide Ni booki aia a kariaiakaki, ti kunea e raka iaon 100 kiibu ae e reke iai te kibuntaeka ae, Nakonako ma Te Atua. Atam e nakonako ma te Atua inanon te nne n aroka i Eten⁴; Enoka e nakonako ma te Atua⁵; Noa e nakonako ma te Atua⁶; Aberaam ao Itaaka a tia n nakonako ma te Atua⁷.

Te kakao bwa tina nakonako ma te Atua e bon tiku naba n arona ni karokoa te bong aio, ni koauana, “E weteia ni kabane bwa a na nakoina ma ni katoonga ana raoiroi,”⁸ ke n atongana riki teuana, nakonako ma Ngaia.

Bwa ti aonga n nakonako ma Tamara are i Karawa ao Natina Iesu Kristo ti riai moa ni kinaia bwa antai ngaiia. Ti na kinaia inanon ara tai n beku ibukia⁹ ao ni kawakin aia tua.

Ti nakonako ma te Atua ngkana ti tangira te Atua ao kaain rarikira¹⁰ ao n mwakuri n ibuobuoki nakoiia n aanga aika ‘ririeta ao n mimitong’. Ti nakonako ma te Atua ngkana tein tarakin te Atua e a reke i moara ao ti rinanon te bitaki ae korakora inanora¹¹. Ti nakonako ma te Atua ngkana ti tei bwa taan kakoaua Ibukina, tabekiiarake raora, n tabe ibukiia ake a kainano ao n nooria bwa akea te kainano iaora¹².

N ririki aika nako, Beretitenti Russell M. Nelson e kabwarabwaraa bwa aekara raoi taraan te ‘Nakonako ma te Atua’ ngke e taekina aio:

“Ngaia are, nakoia membwa n te Ekaretia n tatabemanii ngkami I kangai, tiiku iaon te kawai ni berita. Am kakaonimaki n iira te Tia Kamaiu man karaoan berita aika tabu ma Ngaia ao manga kawakinan berita akanne e na bon kauka mataroan kakabwaia n tamnei ni kabane ao te kakabwaia nakoia mwaane, aine, ao ataei n taabo nako.

“Ngkai te Beretitentii ae boou, I tangiria ni kan waaki ma te toki n ara iango. Ibukin aei, ti taetae nakoimi ngkai man te tembora. Te toki are ti bane n uaiakinna bon te katabuki ma te mwaaka inanon ana auti te Atua, kabaeaki ma ara utu, kakaonimaki nakon berita aika tabu n te tembora are e anganiira te kona n karekea te kabanea n korakora n kakabwaia ma—are bon te maiu ae akea tokina. Otenanti n te tembora ao berita aika ti karaoi ikekei bon ngaia kiingin kakorakoraan maium, am mare ao am utu, ao am konaa n totokoi ana kariirii te buakaka. Am nebonebo inanon te tembora ao am beku ikekei ibukiia am ikawai e na bon kakabwaiako ma rikiraken te kaotioti bon ibukim ao te rau ao e na kakorakoraa am kakaonimaki n tiku iaon kawain te berita.

“Ma, ngkana arona bwa ko a tia n tibanako man touakin kawain te berita, I kaoko ma te kantaninga inanou, ooki, taiaoka. Tera nako tabeaiangam, tera nako am kanganga, iai nnem ikai, n ana Ekaretia te Atua. Ngkoe ao rooro ake a tuai bungiaki ana bon kakabwaiaaki man am mwakuri ngkai n okiran kawain te berita. Tamara are i Karawa e rangi n nano irouia natina, ao E tangiriia bwa ana okira mwengaia are bon Irouna. Aio bon ana kouru ni koaua Ana Ekaretia Iesu Kristo Ibukiia Aika a Itiaki ni Boong aika Kaitira—e na buokiira n tatabemaniira n okira mweengara.”¹³

Ngkai ngaira membwa n Ana Ekaretia Iesu Kristo Ibukiia Aika a Itiaki ni Boong aika Kaitira tia karaoi bwaai ni kabane ni korakorara n iirii aia katooto ara burabeti aika tamaroa man nakonako ma te Atua ni kawain te berita bwa e aonga n ae ni boong aika imwaaira ao te Atua e na weteira bwa Tion ao n mwaneira bwa ana bwai ngaira¹⁴.