Ana Iteraniba te Aono
E na kanga te Tieminarii n Buokai n Tokanikai n te Reirei
N aroia te roro ae tebwi tabun te ririki aika karineiia i bon irouia n Ana Ekaretia Iesu Kristo Ibukiia Aika a Itiaki ni Boong aika Kaitira, I kaaina te tieminarii inanon te maan ae 4 te ririki. Nanon aio are ai bon te kamatebwai ae bati ibukin taekan te aro n ikotaki ma te Taabati ao kamatebwai n te utu. N tabetai bon te taneiai ae e kaangaanga ma kakatai.
I moana au tieminarii n 2017 n ara uoote ae Pare n te Arue Tahiti Titeiki. I bon mena n te koraki 9 n te reirei n te tai anne, ao I bon rangi n ingainga n kaaina te kurubu n kairake.
N au moan ririki, I uti imwain te aoa 5:00 n te karangaina ni katoa bong man te Moanibong ni karokoa te Kanimabong bwa I aonga n roko iaon te tai nakon au tieminarii. I kakaraoi au wareware, ao I bon rangi n kakauongo raoi n tain te kiraati. I moanna n ataia ae te tieminarii e buokai n kananoa au reitaki ma te Atua. N Akeana, I bon aki kona n bwaati au ukeuke ni kabuta n te reirei ni banen raoi au koraki 9.
Inanon uoua te ririki imwiina, I a moanna n aki taua ma nanou n tabeu, I aikoa kakioi au kiraati n te tieminarii ao n ririmwi n angiin te tai. E a bua nanou ae korakora ni kan iriira te tieminarii, ngaia are I aki nang taua ma nanou n au kekeiaki.
Ni bon tokina, ngke I a koraki 4, e a bon rangi ni kangaanga te reirei, ma I aki ataia n te tai anne bwa tera irekereken aio ma au kekeiaki n te tieminarii.
Ngke I a koraki 5, I a moanna n mwairiiri ma raou n reirei are a irekereke ma bwaai ake e katabuaki n ara Ekaretia, n aron te manging ma te moko. E roko naba irou are I a maama ngkana aki tatangirai raraou aikai ao ngkana I aki airiiri ma ngaiia.
Bon imwiina, au bwii n tokin te ririki a bane inano ao ngkana arona bwa N na ukeuke n te ririki anne, I a bon ataia ae N na aki bwaati.
Ngkanne, te buti n aoraki ae te Covid e a bitii maiura, ao I karabwarabwa iai nakon te Atua. Ngke e a manga waaki te tieminarii iaon te tareboon, kanga ai aron ae te riaboroo kaaina naba.
E ngae ngke bon iai naba taai ake I mamaara iai, I motikia bwa N na kekeiaki ao n kataia n irii reirein te tieminarii ma nanou ae koaua, bwa I aonga n buokaki naba iroun te Atua n au bwai n reirei.
Au atinroo ae taan kamaiuai
I karabwarabwa nakoia au karo. Ngke tao akea ngaiia I a tia n kitana te tieminarii ao n iira te kawai are a toua raraou ake tiaki kaain te Ekaretia. Au tia reirei n tieminarii ake a tatangirai, a kamanoai ao n taraia bwa e na teimatoa au reitaki ma te Atua.
Imwiina, au reitaki aika tamaroa ma kairaken te uoote e riki bwa te bwai ae kakawaki inanon maiu. Waaki ni kakukurei a kabooua angiu ngkana arona bwa kanga akea angin te kan kukurei irou. Ibuakoia raraou aikai, iai temanna ae arana Corail Sommers, bon temanna ae e aki momotikitaeka ma e kakauongo n taainako nakoiu ao man kaungaai n kairai man ana banna ni katooto.
N aroia aika kakaokoro, a bane n uarokoai nakon maiu ae baeranti raoi.
Te kekeiaki e anganiira te kaniwanga n taainako
Te kekeiaki n wareware ni katoa bong n boki aika tabu e bon roko raoi n tokina n au kabanea n ririki n te tieminari, are ai bon au kabanea naba n ririki n te reirei ngke I a koraki 6.
Arou n kamatebwai n te tieminarii e karaoai bwa N na barongaaki riki. E ngae ngke I aki rangi ni mateakina te wareware, I keiaki bwa N na riai ni wareware ni katoa bong. Aio e bon kateimatoaa au reitaki ma Tamau are i Karawa—e ngae ngkana te reitaki ae memeere.
N te ririki anne, I bwaati au diploma ma au bwii aika riaon te tamaroa. E reke au beebwa ni kabuti kaa ni bon au moan kakatai raoi. I weteaki bwa N na mitinare i Paris. N taraakina ni kabane, bain te Atua e bon mena inanon maiu man te tai are I mena iai n te tieminarii ao ni bon te reirei.
Ngkana I tanrikaaki, I kakoauaa bwa te Atua e na bon buokiira n taainako ibukina bwa E bon tangiriira.
Te Tieminarii bon ngaia raoi te bwai ae ti kainanoia ngkai kairake ngaira bwa e na buokiira n onimakina te Atua ao n anganna te mwaaka ni maiura. E bon onimakinai n taainako.