Ana Iteraniba te Aono
Ai Tain Onean te Rabwa
Ni banen 2020, I kunea bwa I aki kona n namakina kakukurein te Kiritimati, ngaia are I a ongora nakon ana boki John Bytheway are, Born This Happy Morning1, ni karekea au iango. Ni mwakorona teuana, e tibwauaa ana taneiai teuana ngke e kabooi tenaan rabwa ibukin temanna te aine ae e a bon tibwa kaitibo ma ngaia.
Te Tari Bytheway e taekinna bwa e na bon bae n anganako kakabwaiaana man taekinan ana mwakuri n ibuobuoki aio, ma e kukurei iai bwa e kan tibwauaa te kukurei ae takaburinako ao ana namakin are e teimatoa inanona ngkana e uringa te tai aio. Bon te kauring bwa ti kakabwaia riki ngkana ti anga, nakon are tina anganaki.
Te kukurei ao n te namakin aio bon ngaia raoi ae bua man maiuna n te tai anne. N te Kiritimati anne, I kakoauaa bwa te namakin aio e na buokai n katurua au iango iaon te Tia Kamaiu, ngaia are inanon Ritembwa, I a aki mamatam bwa I aonga n riki bwa te bwai ni mwakuri inanon bain Tamau are i Karawa. I tangiria ni kan buoka temanna—n te aro ae kakuba ke n aki katauraoi—bwa aonga n ataia ae te Atua e tabeakiniia, ao I aonga naba n namakina te rau ao te kukurei ibukin te ka Kiritimati. Ngke I kataia n kabwarabwaraa nakon Tamau are i Karawa bwa tera bukin au aki mamatam, I a taekin naba taeka aikai: “Ko bon ataia, n aron John Bytheway, ao rabwan te kaa”.
I kabanei au bong ake imwiina n kakaea nako au anga n beku ibukiia raou, ao n te taina, ngke I airi ma raraou ae tangiraki, e a taekinna naba bwa kanga e kainanoi rabwan ana kaa aika boou!
E bwaka mwangaiu ma te miimi ao nanou e onrake n te kukurei ngke I ongo ana taeka te Tamnei n tuangai raoi: “Sarah, awakanne am rabwa ao kaekaan am aki mamatam.”
I kaoka ara kakaraki n okira taekan te rabwa ao n kunea bwa raraou aio ma buuna a bon ataia ae a nang riai ni kabouii rabwan aia kaa ni boong rake aikai, a bon riai ni kabouii aia rabwa.
I tuanga taekan au aki mamatam ao n namakinna bwa aio bon kaekaan au aki mamatam ao au tataro iroun Tamau are i Karawa. I a tuanga ngkana I kona n kabooi rabwan aia kaa.
E bon aki bati n karongoaa raraou aio n te tai ae maan, ao imwiina e a kaenga n katoua atuuna. Imwiin tabeua te tai ngke ti kaai n rootaki iai, e kabwarabwaraa nakoiu ao a bon aki kona n karekei aia rabwa aika boou ma a bon rangi ni kainanoia, ma a bon iira te wiirikiriki are a kaai n karekea ngaia ma buuna ao n biriakina reken aia rabwa aika boou e ngae ngke bon akea boona ae tauraoi irouia. Ni bon arona, ngaia te bong are I aki mamatam ibukin au taneiai, ‘ko ataia, n aron John Bytheway ao tenaan rabwa’, taanga aikai a bon aki naba mamatam ibukin te anga bwa ana kanga n kabooi aia rabwa aika boou.
I kona n kakoauaa nakoim bwa I bon aki kantaningaa kaekaan au aki mamatam bwa e na rangi n tawe ao n aekan raoi are I bubutii! Ma ai bon kororaoira aron taina ma kamimiina n arona ana kaeka te Atua nakon ara tataro n tatabemaniira.
Ngkana e toki ikai te kakai aio, e na bon riki bwa au kabanea n taneiai ae i tatangiria “ongo irouna” inanon maiu. E ngae n anne, bon uabong raoi imwiin reken aia rabwa te utu ae kakateke aio, e a manga tarebooniai raraou aio. I bon aki kona n kaekaa ana tareboon n te tai arei, ao I karabwarabwa iai, bwa ngkai I teimatoa n iai bwanaana are e raweaki iaon au tareboon ngke e kabwarabwaraa bwa n te bong arei, ngke e buti n te kaa ma natina, iaan te karau ae rangi ni korakora, tewaana te kaa ae akea tauran ana bureiki e a bon karina naba n toki ao neiei e a bon bureiki naba. E toki aia kaa, ao e ataia n te tai anne bwa ngke tao arona bwa a bon mane naba aia rabwa ao ana bon kuratina te kaa are i moaia. E taku neiei bwa bon te kakai ao e a katoka ana tareboon ma bwanaana ae, “Ngaia are, ko rabwa”.
Ni kaoka te bwai are e taekinna Titita Joy D. Jones e taku, “I bon aki kona n taekinna bwa mai irou kakabwaia ma ana tangira te Atua ae karewerewe, ao ana tangira ae kororaoi, ma o, ai kakaitaura ngai ngkai e kariaiakai bwa N na riki bwa mwakoron ana kamwaninga!”2
E taku te Tari Bytheway, “N te bong aio n te tabo teuana, iai kaain rarikira, raraora, kaain ara uoote, ae kataia n waaki iaon ana rabwa aika a bubuaka. A kona a bon rebwetaua naba n te tai ae e aki kantaningaaki. A kona n ae aia rabwa a irekereke ma aia namakin, tamneia, ke rabwataia, ke [n aron naba ae I a tia n nooria] a kona ni bon ae bon raabwa raoi ni koaua.”3
Bwa ti aonga n buokiira imarenara, ti kona n iira ana kauring Beretitenti Dallin H. Oaks ae, “Baira bon Baina ngkana ti ongo irouna ao n namakinna bwa tina buoka temanna ma irouia Natina.” E tuangiira: “Ngkana ko karekea te namakin ke te wiirikiriki, mwakuriia, e ngae ngkana e aki bootau ma nanom ke n aki boo ma aongina. Mwakuriia. Iai bukina. Tao bon aki ataa bukina, ma kakabwaia ana roko nakoim ao tabemwaang ngkana ko ongo Irouna ao n irii Ana kairiiri.”4