“I Gat Hop,” Liahona,, Septemba 2022.
Welkam long Namba Ia
!I Gat Hop!
I nomata wanem jalenj yumi stap fesem, Jisas Kraes i hop blong yumi. Elda Ronald A. Rasband blong Kworom blong Olgeta Twelef Aposol i stanemap stamba toktok blong namba blong manis ia wetem naes trutok ia long niu atikol blong hem: “Hop mo Kamfot wetem Kraes” (pej 4).
Blong plante papa mo mama, mesej blong hop ia, oli nidim taem oli traem bes blong olgeta blong lukaotem ol pikinini insaed long wan wol we i had. Presiden Russell M. Nelson i bin tijim: “Enemi i stap gat moa faet agensem fet, mo agensem yumi, mo agensem ol famli blong yumi long wan spid we i go antap moa. Blong save laef long saed blong spirit, yumi nidim teknik blong agensem hemia, mo ol gudfala plan” (“Ol Fas Toktok,” Liahona, Nov 2018, 7). Blong sapotem ol papa mo mama long tabu wok ia, Jos, i gohed blong lukaot blong givim ol risos we oli stret mo we oli save yusum.
Long namba blong manis ia, fren blong mi mo mi i serem wan paten blong ol papa mo mama, we i tekem tugeta ol prinsipol blong gospel mo ol gudfala plan we bae i save helpem ol papa mo mama blong krietem strong rilesensip wetem ol pikinini blong olgeta, blong fidim fet blong olgeta, mo blong bildimap yuniti (luk long “Wan Strong Paten blong Mekem Wok Olsem Papa mo Mama” long pej 10).
Tabu Spirit i save lidim yumi i go long hop ia mo help ia we yumi nidim. Elda José A. Teixeira blong Olgeta Seventi i stap tijim olsem wanem Tabu Spirit i save soem rod moa; luk long “Jusum blong Gat Maen long Ol Samting blong Spirit” (pej 40).
Mifala i hop se namba ia bae i helpem yu mo famli blong yu blong faenem hop, filim moa lav, mo gotru moa bigfala glad.
Wetem tru hat,
Maren Daines, JD
Speselis long saed blong Wol Famli Polisi mo Program Divelopmen