“Buk blong Momon Ansa blong Mi,” Liahona, Septemba 2022.
Ol Voes blong Ol Lata–dei Sent
Buk blong Momon Ansa blong Mi
Mi traehad blong “stretem” Mama Wong, be wanem hem i nidim, i simpol i tok blong God we i gat paoa.
Afta we mi bin baptaes long Jun 2002, mi bin serem bilif blong mi wetem mama blong mi. I nomata we mama Wong i stap kam long jos wetem mi, hem i no wantem lanem moa.
Long en, 10 yia afta, Mama Wong i bin jusum blong kasem baptaes. Mi harem gud bigwan. Sore tumas. Sam yia afta, hem i stop blong mekem testemoni blong hem i kam strong moa, mo i stap faenem ol eskius blong no stap kam long jos.
Mi askem strong long hem blong kam long jos, be hemia i mekem mitufala i stap raorao. Long en, mi stop blong pusum hem, blong mekem se bae i no spolem rilesensip blong mitufala.
Long taem blong Oktoba 2019 jeneral konfrens, Presiden Russell M. Nelson i bin invaetem ol memba blong Jos blong “raetem plan blong yumiwan” blong mekem testemoni blong yumi abaot Restoresen i kam strong moa.1 Taem mi bin stap tingting abaot invitesen ia, mi bin filim strong se mi mas mekem wan samting blong ol samting i kam gud moa bitwin Mama Wong mo mi.
Long niu tingting blong Niu Yia, mi komitim miwan se bae mi ridim Buk blong Momon long Mama Wong. Taem hem i talem se ae blong hem i soa, mi stap talem se: “Yu save lisin nomo.” Taem hem i talem se bae hem i go wasem plet, mi folem hem i go long kijin mo gohed blong rid long laod voes long hem.
I hapen se Mama Wong i bin lisin gud, mo i bin tingbaot wanem we mi bin stap ridim. Wetem taem, hem i jusum blong rid hemwan. Mo afta, hem i talem long mi se wan man olbaot bae i no save raetem Buk blong Momon. Hem i no gat tu tingting se, buk ia, i toktok blong God. Long mi, taem mi luk hem we i no gat intres, i go blong wantem ridim, mo testifae abaot Buk blong Momon, hem i wan merikel.
Afta we Mama Wong i bin baptaes, mi bin wari se, nogud hem i joenem Jos from mi nomo. Be naoia, hem i gat wan testemoni we i blong hemwan. Blong plante yia, mi traem blong “stretem” hem, be wanem hem i nidim i simpol tok blong God we i gat paoa.
Mi talem tangkyu from wan profet we i stap laef, we oltaem hem i givim advaes we i stret long taem. Sapos yumi tekem aksen long wanem hem i stap tijim, ol bigfala blesing bae oli kam folem. Eksperiens ia, i soem long mi hamas Lod i wantem blong blesem mi. Wanem mi bin mekem, i blong ridim samfala japta nomo long Buk blong Momon. !Afta Lod i tek ova!