?Mi Mi Wan Yang Adalt Ia Nomo we I Stap Gat Hadtaem blong Faenem Stamba Tingting blong Laef blong Mi? Liahona, Septemba 2022.
Ol Yang Adalt
?Mi Mi Wan Yang Adalt Ia Nomo we I Stap Gat Hadtaem blong Faenem Stamba Tingting blong Laef blong Mi?
Mi filim olsem se mi spolem plan—plan blong miwan, mo plan we God i gat blong mi.
Long namba 25 betdei blong mi, mi stap klinim bedrum blong mi. Rum blong mi i no stap long oda, mo mi stap gohed blong tingting abaot, olsem wanem nao, laef blong mi, i no stap tu long oda. Mi no stap long weaples mi bin ting blong stap long hem taem mi gat 25 yia. Mi no bin stap long ples we mi sapos blong stap long hem.
Mi tingting long olsem wanem mi bin filim taem mi yangfala, taem mi bin kasem petriakel blesing blong mi. Eni taem mi stap rid abaot fiuja blong mi, mi stap luk wan we, kolosap, i stret evriwan. Be mi luksave se mi mi no groap yet blong kam huia mi stap luk. Mo mi stap askem miwan, sapos mi taem mi yangfala, i save luk mi naoia, ?bae hem i glad o no glad?
Nao, wota blong ae i fulap, mi krae. Mi filim se mi spolem gud plan blong laef blong mi. Mi no bin mekem ol bigbigfala mistek, be mi filim tu se mi no gat eni samting blong soem abaot laef blong mi. Mi no bin gat wan stamba tingting. Evri narawan oli faenem rod finis, mo mi mi stap, hemia, mi sidaon long floa blong rum blong mi, mi stap krae, mi filim se ful laef blong mi, mi westem nating nomo.
Mi filim se mi stap miwan, mi konfius mo mi lusum hop. Be, iven long tetaem ia, mi bin save se mi no save stap olsem wan yang adalt ia nomo we i gat hadtaem blong faenem rod blong hem. Taem mi stap toktok wetem ol narawan, mi faenem se i no gat tumas pipol we laef blong olgeta i go stret olsem we oli bin plan from. Mo hemia i helpem mi blong filim se mi no miwan tumas.
Mo tu, i helpem mi blong rimaenem miwan se Papa long Heven i no wantem mi blong filim se mi westem laef. Hem i wantem mi blong “mas wokbaot i go wetem strong bilif long Kraes, wetem wan stret mo klin hop” (2 Nifae 31:20). Hem i biliv long paoa blong mi blong mi jenis mo mi groap tru long paoa blong Atonmen blong Sevya. Setan nomo bae i wantem blong mi talem long miwan se mi mi lusum janis blong mi blong kam huia we Papa long Heven i save se mi save kam.
Save Gud Plan blong Stap Glad
Plante long yumi, samtaem, i filim se i no gat hop long fiuja. Mo hemia, maet i olsem from se yumi andastanem rong plan ia blong God blong stap hapi. Mebi, yumi ting se laef blong yumi i olsem wan vidio gem—wan stori we i sot, we yumi mas folem blong save win. Be, laef i no wok olsem. Evri dei, yumi stap mekem ol joes, yumi stap jenis, yumi stap groap. I no gat eni samting we stap semmak, o i stap olsem nomo. Joes blong yumi bae i neva wan sapraes long Papa long Heven, be oli stap yet olsem ol joes blong yumi. Yumi stap raetem stori blong yumiwan, wetem Hem, taem yumi stap go.
Mo, sapos yumi letem Kraes i stamba mo i en blong stori blong yumi,1 bae yumi save gat tras long yumiwan mo lukluk i go long wan en we i hapi mo i no save finis.
Samtaem, yumi mekem ol mistek, o yumi mestem rod, mo yumi lego yumi i go wokbaot olbaot, we i no gat ples blong go long hem, olwe.
Be hemia i wan gospel blong hop. Wan gospel blong ol samting we oli bin lus, oli faenem bakegen. Hem i wan gospel blong lanem samting. Blong stap fogiv. Blong traem bakegen. Olsem we Elda Neil L. Andersen, blong Kworom blong Olgeta Twelef Aposol i bin tijim: “Fasin blong sakem sin, i no wan bakap plan; hem i plan ia nao.”2
Lav we Papa long Heven i gat long yumi, i stret gud, mo plan we Hem i gat blong yumi, i stret gud tu. Hem i wan plan we i stret gud blong ol pipol we oli no stret gud; hem i plan from wetem kea, mo from Hem i haremsave ol nid blong yumi, mo ol paoa we yumi save kasem. I gat rum insaed long plan blong Hem, blong ol samting we yumi mestem rod from— ones mistek, mo ol stronghed sin, ol wokbaot blong yumi long waelples. Mo i gat rum insaed long plan blong Hem, blong yumi win— mo yumi stap sef evri taem we yumi lukluk i go long Hem, mo traem bakegen.
Stap Faenem Stamba Tingting blong Laef blong Yu
Mi bin spendem fulap taem stat long betdei ia, mo tingting abaot stamba tingting blong laef blong mi. Mi no faenem gud yet. Be mi no filim se mi wari tumas long hem tu. Mi save se God i save mi, mo sapos mi tanem mi i go long Hem, bambae Hem i helpem mi blong gat mining long ples we mi stap long hem naoia.
Mebi bae i gat wan, wan dei, we bae i faenem meresin blong kansa, o bae i putum stop long hanggri blong wol ia, o putum pis long wol ia. Be bae i gat wan, tedei, we bae i leftemap tingting blong wan fren we i stap krae sore, o bae i helpem wan strenja we i gat hadtaem, o bae i prea blong fas taem afta plante yia we i stop. Mo mi ting se evri samting ia, oli minim wan samting—iven evri samting.
Be wanem we i tru, i we, plante long yumi bae i no mekem ol samting we oli gat bigfala glori long laef ia. Be, hemia i no minim se i no gat stamba tingting long laef blong yumi. Stamba tingting blong yumi, long en, olsem ol pikinini blong God, i blong kam olsem Hem. Mo yumi stap groap long stamba tingting ia, taem yumi mekem ol smol samting evri dei, blong folem Jisas Kraes.
Mi bin kam blong laekem gospel tijing ia we i talem se “tru long ol smol mo ol samting we i no strong, ol bigfala samting i kam blong hapen” (Alma 37:6). Taem mi lukluk i gobak long laef blong mi, mi no luk eni samting we i impoten tumas. Be mi luk se i gat plante “smol mo simpol samting” we oli bin mekem samting i defren bigwan. Mo mi save se, tru long gladhat blong Sevya, ol hadwok blong mi, we oli smol mo mi mekem wetem gud tingting, oli stap openem rod blong mi blong stap kam olsem Hem.
I no gat wan rod blong wan, we bae i semmak long hemia blong yu. Be, sapos yu stap traem bes blong yu, blong yu tekem ol step i go from Kraes, rod blong yu i wan gudwan. Krieta we I Gat Olgeta Paoa, i stap biliv long yu; so yu stanap stret, mo yu biliv long yuwan. God i gat plante gudfala samting i stap blong yu, mo iven taem yu filim se yu smol mo simpol, bambae Hem i helpem yu blong kam wan we i moa hae bitim we yu bin tingting long hem.”3