Wan Paten blong Stap Longwe long Filing Ia se Yumi Fas I Stap

Taem mi bin stap traehad blong laef folem gospel taem mi wan yang singgel adalt, bae i save had blong no lukluk long samfala eria blong laef blong yumi we yumi wantem tumas se bae i defren. Samtaem, yumi filim olsem se yumi kasem wan bigfala flat ples long saed blong progres blong yumi. Long mi, ol filing ia, se mi fas i stap, hemia long samfala pat, i kam strong mo afta i go sloslo, mo ol filing ia oli save stap long mi plante dei, manis, mo sloslo, iven plante yia. Oltaem, mi gat plante risen blong mi stap hapi mo stap filim gud abaot laef, be long wan taem, filing ia se mi fas i stap, i kasem mi strong wantaem.

Long tetaem ia, yangfala nefiu blong mi i askem blong spendem taem wetem mi. Mi luksave se hem i nidim blong gat ol gol long laef blong hem, mo hem i askem advaes. Mi no bin filim se mi stap long wan posisen we mi strong inaf blong givim ol waes tingting, be mi bin lisin. Mi bin save se mi save “prea” long God blong kasem help (luk long Alma 34:17–27) mo mi bin prea blong save talem wan samting we i gat mining long hem. Olsem ansa, mi tingbaot Luk 2:52: “Mo Jisas i stap groap moa long bodi blong hem mo long waes blong hem tu. Mo oltaem God i glad tumas long hem, mo ol man tu oli glad tumas long hem.”

Taem mi bin stap traehad blong lukluk nomo long nid blong nefiu blong mi, be i no nid blong mi, wan samting i stat blong jenisim mi. Nefiu blong mi mo mi, i bin tokbaot olsem wanem Kraes i bin groap long saed blong spirit, long saed blong sosol laef blong Hem, long saed blong bodi mo long saed blong waes blong Hem, mo yumi tu i save mekem semmak. Nomata we ol nid blong nefiu blong mi oli bin defren long ol nid blong mi, olgeta fofala eria ia blong stap groap long hem oli bin impoten tumas long mitufala tugeta. Taem mifala i stap tokbaot skripja ia, mi bin luksave se i bin stap ansarem ol kwestin blong miwan, abaot hao nao bae mi nomo fas long laef.

Taem mi bin stap traehad blong stap groap olsem we Sevya i bin groap, lukluk blong mi i jenis, mo jenis ia i tekem sam moa blesing i kam. Olsem we Presiden Russell M. Nelson i talem: “Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi.”¹ Ol hadwok blong mi blong groap moa olsem Jisas Kraes i bin help blong pulum tingting i go longwe long ol situesen we oli kakae tingting blong mi, mo mi lukluk i go moa long ol ples we mi save wok gud moa long olgeta. Mi bin save muv; stat long insaed long mi, mo afta, mi tekem aksen aotsaed.

Mi wantem strong blong lukluk olsem wanem bae mi save groap long wanwan eria we mi tokbaot long Luk 2:52, stat wetem fasin blong go moa long tempol i go kasem wok blong kompit long wan longfala resis blong baeskel.

Pikja

Memfis Tenesi Tempol

Foto blong Tenesi Tempol we i kam long James Whitney Young

Long wanwan eria blong ol gol blong mi, mi luk sam long ol samting ia:

1. Taem mi bin stap wok long wan gol, plante taem, mi bin filim Kraes i mekem mi mi kam strong moa long saed blong spirit, long sosol laef, long saed blong bodi mo long saed blong waes blong mi, evriwan ia, long wan gol nomo.

2. I no hapen plante taem we, wan gol bae i hapen hemwan mo i no tajem eni nara eria blong stap groap—i luk olsem se oli tajem wanwan mo oli bildimap olgeta antap long wanwan long olgeta. Blong kam antap long wan eria, i lidim mi blong kam antap long evri narafala eria. Mo semmak, taem mi no teknot long wan eria, be i spolem evri narafala eria. Mi luksave se wanwan eria, i nidim blong mi givim ful tingting blong mi.

3. Kolosap evri gol, i gat ol nara pipol insaed—blong lanem samting aot long olgeta, o serem tingting, o gat eksperiens wetem olgeta—mo ol gol ia oli mekem rilesensip blong mifala i strong moa.

Oltaem nomo, mi gat janis blong luk mo gat insperesen tru long hao ol nara pipol oli stap groap, mo mi hop se, mi tu, mi save mekem semmak. I no longtaem i pas, mi bin toktok wetem wan fren we i singgel, mo i filim se hem i fas i stap, mo i no glad long sam situesen blong laef blong hem. Mi bin lisin blong andastanem, mo afta, mi bin save serem sam eksperiens.we oli bin helpem mi, mo tu, oli bin poenem wanwan eria blong groap i gobak long Sevya.

I nomata se i no evri eria blong laef we mi bin filim se mi fas i stap plante yia i pas, i bin jenis, be mi bin jenis taem mi bin lan blong lukluk moa long Sevya mo traehad blong groap olsem Hem. Olsem we Presiden Nelson i bin serem, “i gat plante samting we yumi save kontrolem. Yumi putum wanem samting oli kam faswan blong yumiwan, mo yumi disaed hao blong yusum paoa, taem, mo samting we yumi gat. … Yumi jusum huia bae yumi tanem yumi long hem blong kasem trutok mo blong i soem rod.”² I nomata wanem situesen yumi stap long hem, ol eria blong stap groap long hem, we oli stap long Luk 2:52 i save helpem yumi blong jenisim wanem yumi stap putum tingting blong yumi long hem, mo faenem moa glad mo progres tru long Papa long Heven mo Sevya.