“Stap Letem Lod I Lidim Rod blong Laef blong Yu,” Liahona, Septemba 2022.
Ol Yang Adalt
Stap Letem Lod I Lidim Rod blong Laef blong Yu
Mitufala i no save luk se ol samting bae oli go olsem wanem, be taem mi tekem aksen wetem fet, Lod i bin blesem mi.
Relijin i no wan popula samting insaed long haos blong mi taem mi bin stap groap—i nomata papa mo mama blong mi oli stap folem relijin long laef blong tufala, bigfala sik blong papa blong mi, wetem sam moa tes blong laef, i lidim tufala blong aot long relijin we tufala i bin groap insaed long hem. Mi bin gat fo yia taem hem i ded long kansa, mo tu, mi mi laswan long 13 pikinini, mo wido mama blong mi i jes no save bilivim nomo se God bae i letem wan samting olsem i hapen long famli blong mifala.
Be, taem mi kasem 14 yia, mi filim se i gat wan samting we i no stap insaed long laef blong mi. Mi stap askem miwan se sapos mi mi gat wan samting we i moa bigwan we mi mi no save long hem yet. Mi filim olsem Josef Smit, taem “samting i pusum tingting blong mi blong tingting hevi mo maen blong mi i trabol bigwan” (Josef Smit—Histri 1:8). Nomata se, long tetaem ia, mi neva bin harem abaot Josef Smit long tetaem ia, mi stat blong lukluk olbaot, semmak olsem hem, mo mi stap go long ol defren jos, wetem hop ia se bae mi faenem trutok.
Mo mi bin faenem, long wan dei, taem mi bin luk tufala yang man we tufala i werem jaket, oli go long hom blong neba blong mi. Mi wantem tumas blong save, mo mi askem tufala sapos, mi tu, mi save go long apoenmen blong tufala. Afta we mama blong mi i talem yes, mi stat blong toktok wetem ol misinari, mo long en, mi joenem Jos.
Taem mi joenem Jos Ia blong Jisas Kraes blong Ol Lata-dei Sent, i bin helpem mi blong faenem stamba tingting blong laef blong mi, speseli taem mi wan yang adalt, taem mi gat plante desisen blong mekem, mo ol pipol raon long mi oli no bin agri wetem. Be, i nomata se mi mi gat wan stamba tingting mo wan rod blong folem, plante taem mi no save stret se ol samting bae oli wokaot olsem wanem.
Be, taem mi fesem ol samting we mi no save, ol samting we mi no sua long olgeta mo plante jenis, oltaem nomo Papa long Heven i bin soem rod long mi taem mi stap tanem mi i go long Hem. Mi bin lanem sam wei blong dipen long Hem, mo dipen long bilif blong mi we i bin helpem mi blong muv fored mo gohed blong faenem stamba tingting blong laef blong mi.
Stap Muv Fored Wetem Wan Misin
Taem mi kasem yia we plante long ol fren blong mi oli stap rere blong go long yunivesiti, mi stap traem blong tingting se, olsem wanem nao bae mi go long wan misin. Long Jile, evriwan i mas tekem wan tes bifo oli go long yunivesiti. Oli givim tes ia, wan taem nomo long wan yia, mekem se, sapos mi go long wan misin, bae mi stap sloemdaon edukesen blong mi blong tu yia, be tu, bae mi mas wet wan moa yia blong go long skul afta long hemia.
Famli blong mi, speseli mama blong mi, i no agri long wan misin. Long hem, hem i impoten blong mi mas go long yunivesiti blong kasem wan edukesen. Be mi bin biliv se Lod bae i helpem mi blong mekem wanem we i nid, mekem se mi prea, mo mi rere blong statem eni rod.
Taem we bisop blong mi i kam long haos blong mi wetem ol pepa wok blong misin blong mi we mi fulumap finis, mo i askem signeja blong mama blong mi, mama i sapraes we mi no bin talem long hem se mi mi stap muv i go fored long rod ia nao. I tekem taem blong winim tingting blong hem, be Lod i mekem hat blong hem i sofsof, mo i helpem hem blong i andastanem se mi mi wantem go givim seves.
Gospel ia i givim mi stret tingting se mi mi stap mekem raet samting, be sapos nomo mi stap muv i go fored, wan step afta wan step, wetem fet—iven wetem evri kwestin mo samting we mi no save stret—we mi gohed blong progres.
Stap Folem Wan Revelesen afta Wan Revelesen
Blong stap gobak hom afta long misin blong mi, i minim tu blong stap gobak long ples we mi no save gud. Taem mi askem, tru long prea mo fasin blong livim kakae, long Papa long Heven blong soem rod long mi, mi kasem revelesen ia se mi nid blong muv i go long Yunaeted Stet, mo go long Brigham Yang Yunivesiti, we mi luk olsem se i wan samting we i no posibol.
Mi mekem bes we mi save mekem, mo tekem ol bes nekis step. Samtaem, mi filim se mi no go eni ples—mi stap wokhad olsem we mi bin save mekem, be mi no bin save gud se ol hadwok blong mi bae oli helpem mi blong kasem gol blong mi, o no. Be, stamba gol blong mi, i blong folem wanem we Lod i wantem mi blong mekem, mo gol ia, i impoten tumas long mi.
Taem mi mekem ol hadwok ia, wan dei, mi filim insperesen blong go luk gudfala fren blong mi we i blong Yunaeted Stet, mo i stap laef long homtaon blong mi. Mi no bin save se bae ol samting oli go olsem wanem—mo mi go nomo from se Spirit i bin soem rod long mi—be fren blong mi mo papa blong hem, tufala i bin wan tul blong helpem mi blong save wanem blong mekem blong aplae mo kasem visa ia we mi bin nidim blong stadi long BYY. Wetem help blong tufala mo plante bigfala sakrifaes we mama blong mi i mekem blong pem rod blong mi, mi kasem ples ia. I bin wan merikel.
Laef blong mi i bin gohed blong progres tu long semfala wei. Bae mi mekem bes, mo afta, kasem insperesen, wan samting long wan taem, long wanem samting bae mi mekem afta. Long wei ia, mi kasem wok long misinari trening senta, mi faenem ol wei blong pem skulfi blong mi, disaed long wanem stadi blong mekem, mo long en, mi graduet mo mi mared.
Ol ansa we mi bin kasem, oli no kam kwik oltaem, mo mi neva kasem wan ditel plan we i stret gud, be mi kasem ol kwaet toktok ia se Lod i bin glad wetem rod we mi bin stap folem.
Taem we Mi Luk se Revelesen I No Stret
Sam yia afta, mi bin lanem olsem wanem we, blong stap laef folem gospel, i wan sakrifaes we wan i mas mekem. Sapos yumi wantem Lod blong i givim yumi wan stamba tingting mo wan rod blong folem long laef, yumi mas wantem tu blong tekem rod ia.
Afta long skul, ol samting oli no go folem plan we kampani we mi stap wok long hem i plan from, mekem se waef blong mi mo mi i gat tu joes: stap long Yunaeted Stet, o gobak long Jile. Mitufala tugeta i filim klia se mitufala i mas gobak long Jile. Maet i luk se i nomol blong wantem gobak hom, be hemia i bin wan taem we i had tumas. I no gat fulap wok long Jile. Mi gat hadtaem blong salem hom blong mifala. Long saed blong Vatu mo long saed blong mekem rere ol samting, i no bin wan isi samting blong mekem; iven ol famli blong mitufala oli ting se mitufala i no waes.
?So wanem nao yu mekem taem we revelesen we yu kasem, i no foldaon stret wetem wan tingting we i stret? Nomata we i bin had, waef blong mi mo mi i bin save wanem blong mekem. Mitufala i rimaenem mitufala se gospel i mekem mitufala i kasem ples we mitufala i stap long hem. Sapos i no bin Lod, bae mi no gat insperesen ia we i bin helpem mi blong givim seves long wan misin, kasem edukesen blong mi, mo mitim waef blong mi. Mitufala i mas trastem se, i nomata wanem risen i stap, oli bin nidim mitufala long Jile.
Mitufala i lego haos blong mitufala long bisop blong mitufala blong man i save rentem kasem taem hem i save salem, mo mitufala i aot i go. Hem i bin had; be mitufala i bin gat eksperiens blong kasem fulap blesing, mo ol merikel taem mitufala i bin mekem folem singaot blong Lod. Lod i save weaples Hem i nidim yumi long hem, mo weaples yumi save mekem ol bes seves blong stamba tingting blong Hem, mo Hem i blesem yumi from yumi stap obei.
Faenem Ol Ansa Wetem Lod
Mi hop se ol yang adalt tedei bambae oli folem eksampol blong brata blong Jared. Nomata Ol Man blong Jared oli bin save se oli nid blong travel i go long promes graon, oli no bin save stret olsem wanem bae oli kasem ples ia. Taem we brata blong Jared “i singaotem nem blong Lod” (Ita 2:15), Lod i bin givim samfala ansa long hem. Lod i bin talem long hem blong hem i bildim ol sip, mo i soem hem olsem wanem blong givim ea long ol sip ia.
Be afta, Lod i bin askem brata blong Jared kwestin ia: “?Wanem nao yu wantem se mi mas mekem blong yufala i save gat laet insaed long ol sip blong yufala?” (Ita 2:23). Lod i no bin talem long brata blong Jared stret samting blong mekem, be Lod i bin askem hem blong go mo faenem wan ansa blong hemwan.
Laef blong mi i bin wok olsem nao. Samtaem, Lod i givim mi ol klia instraksen. Long sam nara taem, Hem i wantem mi blong go long Hem wetem ol aedia blong miwan. Long eni wei, hem i wan mas blong mi putum Hem insaed long rod blong mi. Blong stap livim kakae, mo stap kaonsel o toktok wetem Lod, oli ol step we i nid blong eniwan we i stap traem blong mekem ol desisen abaot laef blong olgeta.
Long eni yang adalt we i stap lukaotem moa stamba tingting, mi givim advaes ia: Tanem yu i go long Lod blong kasem revelesen we i blong yuwan nomo. Gobak ridim petriakel blesing blong yu plante taem. Mo yu mas wantem blong mekem sakrifaes blong ol samting we oli no impoten tumas long laef blong yu, sapos Lod i stap talem yu se Hem i gat wan stamba tingting we i moa impoten blong yu mekem.
Mi lavem Lod. Gospel i evri samting long mi. Mi save se Lod i stap luk ol paoa we yu save kasem, mo hem i wantem helpem yu blong kasem hae tabu stamba tingting blong yu.