“We Ol Profet we Oli Stap Laef Oli Lidim,” Liahona, Septemba 2022.
Ol Besik blong Gospel
We Ol Profet we Oli Stap Laef Oli Lidim
Ol profet, oli ol man we Papa long Heven i singaotem olgeta blong oli toktok long bihaf blong Hem. Oli stap testifae abaot Jisas Kraes mo stap tijim gospel blong Hem. Ol memba blong Jos Ia blong Jisas Kraes blong Ol Lata-dei Sent oli biliv long ol profet blong bifo, mo blong tedei.
God I Toktok tru long Ol Profet
Ol profet oli kasem revelesen we i kam long God. Taem we ol profet oli kasem insperesen blong tijim yumi, hem i semmak olsem se God i stap toktok i kam long yumi (luk long Doktrin mo Ol Kavenan 1:38). Yumi save trastem se oli stap talem yumi wanem we God i wantem yumi blong save.
Ol Profet Oli Stap Tij Abaot Jisas Kraes
Momon I Stap Raetemsot Histri long Ol Buk, i kam long Tom Lovell
Evri profet oli testifae abaot Jisas Kraes. Oli stap tijim yumi se Hem, Hem i Pikinini blong God. Oli stap tijim yumi abaot laef blong Hem, eksampol blong Hem, mo Atonmen blong Hem. Mo oli soem yumi olsem wanem blong folem Hem mo stap obei long ol komanmen blong Hem.
Ol Responsabiliti blong Ol Profet
Ol profet oli stap tijim gospel blong Jisas Kraes. Oli eksplenem ol blesing we yumi kasem taem we yumi stap obei long olgeta komanmen, mo ol risal we yumi kasem sapos yumi no mekem. Long sam taem, bae oli kasem insperesen blong talem long yumi abaot sam samting we bae oli hapen long fiuja.
Ol Profet blong Bifo
Moses mo Ol Ston blong Ol Komanmen, i kam long Jerry Harston
God i bin tijim ol pipol blong hem tru long ol profet, hemia stat long stat finis. Ol profet we oli bin laef long taem blong OlTesteman, i gat Adam, Noa, Ebraham, Moses, Aesea mo sam moa. I bin gat tu ol profet long medel blong ol pipol we oli tokbaot long Buk blong Momon. Ol profet ia, i gat Lihae, Mosaea, Alma, mo Moronae. Yumi save lanem wanem we oli bin tijim taem we bae yumi ridim ol skripja.
Ol Profet blong Tedei
Josef Smit, hem i fasfala profet blong taem tedei. Hem i bin putumbak Jos Ia blong Jisas Kraes long wol. Russell M. Nelson, hem i profet mo Presiden blong Jos tedei. Ol kaonsela blong hem insaed long Fas Presidensi, mo insaed long Olgeta Twelef, oli stap tu olsem ol profet, ol sia, mo ol reveleta.
Lisin long Profet
Profet i stap toktok long yumi long taem blong jeneral konfrens, mo long ol nara taem. Hem i stap tijim yumi wanem we God i wantem yumi blong save mo olsem wanem blong folem Jisas Kraes tedei. Yumi save faenem ol tijing blong hem insaed long Liahona mo long Churchofjesuschrist.org/study?lang=bis.
Ol Blesing blong Stap Folem Profet
Bae yumi kasem blesing sapos yumi folem ol tijing blong ol profet. Taem we yumi folem profet, yumi save kam blong save se yumi stap mekem wanem we God bae i wantem yumi blong mekem. Yumi save filim pis insaed long laef blong yumi, mo go kolosap moa long Jisas Kraes.