“Elda Esra Taf Benson I Visitim Ol Sent long Polan,” Liahona, Septemba 2022.
Ol Stori we oli kamaot long Saints, Buk 3
Elda Esra Taf Benson I Visitim Ol Sent long Polan
Long wan naes Sandei naet, long Samataem blong yia 1946, Esra Taf Benson mo tufala man we i travel wetem hem, oli draev folem ol kwaet rod blong Selwagi, Polan. Ol raf rod mo ol hevi ren i mekem olgeta tri ia oli taed ful dei, be nogud weta i kam klia, taem ol man ia oli kolosap kasem ples we oli stap go long hem.
Selwagi, long wan taem, i bin pat blong Jemani, mo oli bin save olsem Selbongen. Ol nasonal baondri oli sevetem afta long wo, be, mo plante long sentrol mo Is pat blong Yurop, oli bin kam anda long paoa blong Soviet Yunion. Long 1929, Branj blong Selbongen we i traehad, i bildim fas mitinghaos blong Ol Lata-dei Sent long Jemani. Be afta long sikis yia blong wo, Ol Sent insaed long vilej oli gat hadtaem blong laef i stap.1
Taem we Elda Benson i stap long Polan, hemia nomo hem i olsem wan merikel. I no gat telefon i wok long Polan; hem mo ol wokfren blong hem oli gat hadtaem blong kontaktem ol man blong Jos we bae i helpem olgeta blong mekem ol pepawok oli stret blong oli go insaed long kantri ia. Be afta nomo we oli bin prea strong, mo oli gohed blong gat kontak wetem gavman blong Polan, nao aposol ia i bin save karem ol visa we hem i nidim.2
Taem we jip trak i kam kolosap long mitinghaos long Selwagi, plante long ol pipol long ol rod oli ronwe mo oli go haed. Elda Benson mo ol kompanion blong hem oli stopem trak long fored blong bilding, mo oli jiamaot. Oli talem huia olgeta long wan woman we i stanap kolosap, mo oli askem sapos oli faenem japel blong Ol Lata-dei Sent. Ae blong woman ia i fulap long wota, we oli ol wota blong harem gud. “!Ol brata oli stap ia!” hem i singaot long lanwis Jemani.
Kwiktaem ol pipol oli kamaot biaen long ol doa we oli klos, oli krae mo oli laef from se oli glad. Ol Sent long Selwagi oli no bin toktok wetem ol jeneral lida blong Jos blong tri yia, mo long moning ia, plante long olgeta oli bin livim kakae mo oli bin stap prea se bae i gat wan misinari, o wan lida blong Jos bae i kam visit. Sam aoa i pas nomo, kolosap wan handred Sent oli kam tugeta blong harem aposol i toktok.
Taem we Elda Benson i toktok i go long Ol Sent, tu ami soldia blong Polan oli kam insaed long japel. Kongregesen oli nomo muv, oli fraet; be aposol i mekem saen long ol soldia blong oli kam sidaon long fored blong rum. Long toktok blong hem, hem i tokbaot bigwan hamas i impoten blong stap fri mo gat fridom. Ol soldia oli lisingud, oli stap long jea blong tufala taem las singsing i stap go, mo oli aot, we oli no mekem wan trabol. Afta long hemia, Elda Benson i mit wetem branj presiden mo i lego sam kaekae mo sam mane blong Ol Sent, mo talem gud se bae i gat moa help i stap kam.3
Wan sot taem afta, Elda Benson i bin raet i go long Fas Presidensi. Hem i leftemap tingting blong luk se help blong Jos i kasem Ol Sent long Yurop, bei wari long ol had samting we Ol Sent oli stap fesem yet.
“Maet bae plante oli karem gud samting aot long welfea program blong Jos mo Ol Sent ia mo ol nara Sent long Yurop bae oli save gud program ia,” hem i raetem, “be plante laef oli bin sef, mo ol fet mo strong paoa long tingting blong plante strong memba, i bin kam strong moa bigwan.”4
Ol memba blong Jos long Selbongen, Jemani (we oli singaotem Selwagi, Polan naoia, afta long wo) oli kam tugeta aotsaed long japel blong olgeta long samples long yia 1930.