“Yumi Save Helpem Ol Narawan Oli Filim se Oli Lavem mo Kaontem Olgeta,” Liahona, Sept 2022.
Ol Prinsipol blong Wok blong Givhan
Yumi Save Helpem Ol Narawan Oli Filim se Oli Lavem mo Kaontem Olgeta
Sevya i bin gotru long fasin blong sakemaot man, mo i tijim yumi olsem wanem blong go help.
Sasha i wan yang singgel woman long wan famli wod, we i no isi oltaem. Hem i filim hapi mo glad, be plante taem, hem i defren—mo ol memba blong wod oli save luksave. Olsem plante long yumi, hem i wantem tumas se oli akseptem hem, mo blong hem i pat blong wan samting.
Tomas, wan olfala man insaed long wod, i kasem wok blong i givhan brata blong hem, mo wetem waef blong hem, i stop wan dei blong kam blong save Sasha. Visit i bin defren smol taem storian i kasem se hem i singgel. Be taem tufala i stap storian, Sasha i save luksave se Tomas mo waef blong hem i stap traem blong andastanem situesen blong hem mo hao tufala i save help.
Long wan taem, Tomas i talem: “Mi luk se yad blong yu i nidim sam lav. Bae mi glad blong helpem yu wetem hemia.”
Wok blong Sasha i mekem hem i bisi tumas we hem i no gat taem blong lukaotemgud yad blong hem. Mo antap long hemia, hem i no laekem mekem wok ia. Hem i save olsem wanem blong mekem wok blong yad, mo hem i save se hem i save mekem. Be hem i no jes stap mekem nomo.
I bin gat wan taem we kwestin blong Tomas i spolem filing blong hem. Be Tomas i talem se hem i bin stap long ami mo i andastanem wanem nao wan woman i mas mekem hemwan taem hasban i no stap. Hem i luksave se Tomas i stap lukaotem wan rod nomo blong mekem tufala i fren gud. Tomas i bin stap traem blong joenem eksperiens blong laef blong hem wetem Sasha mo faenem sam samting we oli mekem semmak.
Tugeta saed blong givhan rilesensip ia i blong lanem blong lavem mo akseptem wanwan, long weaples oli stap long hem, mo gat wan naes mo tru frensip.
Mo gras blong Sasha i no luk gud nomo.
Stret Eksampol blong Akseptem Man
Long OlTesteman, Aesea i bin talem profesi se Jisas Kraes bae i save stret se i olsem wanem blong stap defren. Hem i gotru long fasin blong sakemaot man mo no tritim gud man. “Nao yumi lukluk nogud long hem, yumi tanem baksaed blong yumi long hem, Hem i wan man we harem nogud plante taem” (Aesea 53:3). Tru long lav blong Hem we i stret gud, Hem i save olsem wanem blong helpem yumi (luk long Alma 7:12). Hem i stret eksampol blong wei we yumi save go help wetem lav blong akseptem ol narawan, i nomata wanem situesen blong olgeta, o wei we oli luk.
Ol Prinsipol blong Tingting long Olgeta
Taem yu stap lukaotem ol wei blong helpem ol narawan oli filim se oli pat, tingting long ol prinsipol ia we Sevya i bin tijim mo laef folem.
-
Glad blong save ol pipol aotsaed long olgeta we yu yu save olgeta finis (luk long Matiu 5:43–48).
-
No fraet blong yu joen wetem olgeta we oli stap laef o oli stap biliv defren, sapos yu no nid blong salem ol tijing blong Sevya from (luk long Mak 2:14–17; Luk 7:38–50).
-
Evriwan i mas filim olsem se yumi wantem olgeta long Jos (luk long 3 Nifae 18:22–32). Taem oli stap long ples we oli save lanem gospel blong Sevya mo filim lav blong Hem, i save jenisim eniwan.
-
Sevya i save wanem yumi nidim, hemia from Hem i save olsem wanem yumi filim (luk long Alma 7:11–12). Yumi save soem lav taem yumi lukaot blong andastanem ol eksperiens blong ol narawan, mo putum yumiwan insaed long sus blong olgeta.
-
Sevya i bin tekem taem blong ansa long ol nid blong olgeta raon long Hem. Hem i bin stop blong kea long ol narawan, iven we Hem i bin gat ol plan blong stap long nara ples (Luk long Mak 5:22–43).
?Wanem Nao Yumi Save Mekem?
No letem ol defren samting oli stopem yu blong kam blong save huia yu stap givhan long hem. I nomata ol defren samting we yumi gat, i gat ol samting we i semsemmak we yumi gat blong faenem.