“Jes Traem Bakegen,” Liahona, Septemba 2022.
Ol Voes blong Ol Lata–dei Sent
Jes Traem Bakegen
Mi bin stap bisi blong mekem ol gudfala samting, be rilesensip blong mi wetem Lod i stap safa from se mi no bin wantem save long wan samting we i moa impoten.
Taem we mi finisim misin blong mi long Jenuware 2019, mi bin sua se bae i isi long mi blong gohed blong ridim ol skripja. Long fas ples, hemia i tru. Afta wok, bae mi kambak hom, mo ridim ol skripja blong mi, stret long taem. Mi bin hapi blong gat tingting mo givim taem blong ridim ol skripja mo stap lan moa abaot Sevya.
Hemia i bin jenis long Jun 2019 taem we boefren blong mi i kambak long misin blong hem. Mitufala i stat blong deit stret afta, mo afta sikis wik, mitufala i mekem promes blong mared.
Mi bisi blong mekem plan blong mared, stap wok, go long skul, mo spenem taem wetem fiuja man blong mi, nao skripja stadi blong mi i godaon, i go long sam taem nomo long wan wik. From se plante gudfala samting oli pulum tingting blong mi, mi sek be mi nomo tingting strong long rilesensip blong mi wetem Lod.
Hasban blong mi mo mi, mitufala i mared long Novemba 2019. Afta long ol holidei, mi traem bakegen blong stat bakegen long weaples mi bin stop long hem wetem ol skripja. Blong sam manis, hasban blong mi mo mi, i mekem gud blong stadi ol skripja tugeta. Evri moning, blong sam minit, bae mitufala i ridim ol skripja mo toktok raon long lesen blong Kam Folem Mi bifo mitufala i aot blong go wok o go skul.
Afta, KOVID-19 wol sik ia i kam. From se i no gat stret taem blong skul mo wok, mitufala i lusum evri dei fasin blong stadi long ol skripja long moning. Mitufala i stadi wanwan taem, mo rilesensip blong mitufala wetem Lod, i go nogud. Iven afta we oli karemaot ol rul blong muv raon, mo mifala i gobak long Jos, mitufala i gat hadtaem blong stap stadi.
Ol memba blong Jos, plante taem oli gat hadtaem blong ridim skripja evri dei. Laef blong yumi i bisi, mo yumi fesem ol jalenj evri dei. Be, hem i neva let tumas blong stat bakegen.
Presiden Russell M. Nelson i bin talem se: “Lod i no askem yumi blong kam stret evriwan naoia, long taem ia blong progres blong yumi long laef we i no save finis.” Mo hem i ademap: “evriwan long yumi i save mekem gud moa mo stap gud moa.”1
Hasban blong mi mo mi, i komitim mitufala naoia blong ridim ol skripja blong mitufala. Mitufala i no mekem stret evriwan, be mitufala i traem, evri dei, blong mekem testemoni blong mitufala i kam strong moa. Mi mi glad from ol plante janis we Lod i stap givim long yumi blong sakem sin, blong mekem gud moa, mo stap gud moa.