“Wan Dei Afta Narawan,” Liahona, Septemba 2022.
Ol Voes blong Ol Lata–dei Sent
Wan Dei Afta Narawan
Mifala i glad tumas long ol gudfala memba blong wod, we oli bin helpem mifala wetem boe blong mitufala we i gat sik long bren.
Josh long taem blong wan trip long tempol
Foto blong Joshua - hem we i tekem i glad blong serem
Taem we boe blong mitufala Joshua, i gat 18 manis, mitufala i luk se i gat sam samting i no stret long ol aksen blong hem. Josh bae i save talem evri toktok blong evri singsing we hem i luk long televisen, be hem i slo blong lanem blong talem toktok. Wan dei, mama blong waef blong mi i talem se Josh i soem ol saen blong sik long bren. Ol speselis oli talem sem samting.
Waef blong mi, Elizabeth, i karem fulap buk mo stap tijim hemwan abaot sik ia. Mo tu, hem i putum Josh long ol program blong helpem hem. Hem i gat strong tingting se hem i mas gat bes samting blong stat wetem long laef, we mitufala i save givim hem.
Long ol dei we mi stap wari tumas from fiuja, Elizabeth bae i mekem tingting blong mi i kwaet. Hem i talem long mi se mitufala i nidim blong tekem ol samting, wan dei afta narawan.
“Yumitu nidim blong talem tangkyu from evri niu samting we Josh i stap lanem, be i no blong stap lukluk long evri samting we yumi no save abaot fiuja,” hem i talem.
Taem Josh i stap groap, hem i stat blong i no save stap kwaet long jos. Blong mekem se hem i no spolem Praemeri, o spolem ol pikinini, mi stap holemtaet hem long leg blong mi. Hem i kik, i skrasem mi, mo faet wetem mi blong ful tri aoa long jos. Plante taem, mi kambak hom, mi harem nogud mo mi taed bigwan.
“?From wanem bae yumi no jes lego hem long hom mo go long jos, mo wanwan i tekem taem blong stap wetem hem?” Mi traem talem.
Elizabeth i ansa: “Sapos yumi no tekem hem, bae hem i lanem se sapos hem i no stap kwaet, bae hem i aot long jos ia nao.” Mi save se hem i talem stret samting.
Wan dei, mama blong wan nara famli we i gat wan pikinini wetem sik blong bren, i talem long mi: “Taem bae Josh i kasem eit yia, mo i kasem Tabu Spirit, !bae hem i kam swit kwiktaem!”
Mi gat tu tingting long ol toktok blong hem, be taem we hem i kasem eit yia, hem i kasem Tabu Spirit mo hem i bin kam swit—smol.
Taem we Josh i groap i kam antap, hem i kasem prishud. Hem i pasem sakramen, mo hem i bin lanem hamas i impoten blong givim seves. Ol memba blong prishud kworom blong hem, oli bin lanem wan danis blong wan miusik blong ol yia 1980, mo Josh i mekem danis ia long wan pati long wod.
Wod i bin gud tumas long Josh. Ol memba oli bin smael taem bae hem i pasem sakramen, mo semtaem mekem ol muv blong danis ia.
Naoia Josh i gat 17 yia. Hem i gat talen long miusik, mo hem i stap raetem ol singsing. Hem i laekem blong stap aktem ol pat, mo i kamaot plante long ol stej long skul o long komuniti.
Mitufala i talem tangkyu se mitufala i papa mo mama blong Josh, mo serem wokbaot blong hem. Mitufala i no sua se wanem bae i hapen long fiuja, be mitufala i komitim mitufala blong laef fulwan evri dei wetem hem.