I Naes Tumas blong Kam Olfala

Pikja

bubuwoman i haggem apugel

Mi tingbaot se, taem mi smol pikinini, bubuwoman blong mi i gat fulap slak skin long fes blong hem. Ol laen ia i benben long ol kona blong ae blong hem, mo ol smol laen antap long maot blong hem i flasem fes blong hem. Mi askem hem olsem wanem bae mi save mekem blong no gat slak skin.

“Yu no smael,” hem i talem. “Mo yu no krae.”

Mi folem advaes blong hem—blong wan dei. Afta, mi givap. ?Olsem wanem nao bae wan i save laef we hem i no smael, o no krae? Mi disaed se i moa gud se mi gat wan fes we i soem ol laen blong laflaf mo wota blong ae.

Insaed long Buk blong Momon, Lihae i tijim boe blong hem, Jekob, se yumi stap long ples ia, long laef ia, blong gat glad (luk long 2 Nifae 2:25). Be hem i bin tijim tu se, blong save wanem i glad, yumi mas gotru long harem nogud (luk long 2 Nifae 2:22–23). Mi kam blong luk pruf blong tugeta samting ia, glad mo harem nogud, taem i tekem mak blong hem long fes blong olgeta we oli bin laef. Fes blong olgeta i stap karem ol stori blong laef blong olgeta.

Mi agri wetem hem we i talem se: “Ol naes olfala pipol, oli ol wok blong art.”¹ Sam pipol oli developem wan fasin wetem ol yia, we i mekem olgeta oli gud tumas. Eksampol: mi bin lukluk insaed long ol ae blong ol metron wetem waet hea, mo waet klos insaed long tempol, mo wanem i kasem ae blong mi i bigfala laet ia we i saen insaed long ae blong olgeta, mo i saenaot tu long fes blong olgeta we i smael.

Naoia, mi mi stap kam wan olfala woman tu, mo mi stap lanem se i gat samfala glad we oli kam taem wan i kam olfala. Eksampol: Mi kam blong filim gud moa insaed long bodi blong mi. !Mi glad tumas se bodi blong mi i wok yet! Ating mi wokbaot sloslo, mo toktok slo moa bitim bifo. Ating leg blong mi i fatfat smol, mo han blong mi i sopsop moa. Be mi laekem blong tingting se han blong mi i moa sofsof tu taem mi tajem wan samting.

Mi save se mi save gohed yet blong progres mo stap lanem samting, se, “Wanem level blong waes yumi kasem long laef ia, bae hem i stap wetem yumi long taem blong laef bakegen long ded” (Doktrin mo Ol Kavenan 130:18). Mo tu, mi luk fored long ol lesen we mi save lanem yet. Antap long hemia, mi save helpem ol narawan—olsem ol apupikinini blong mi—blong lan aot long ol stori blong laef blong mi we mi save serem wetem olgeta.

Pikja

waef mo hasban i sidaon tugeta

Ol model nao oli stanap long ol foto ia

Hasban blong mi mo mi, i save akseptem mitufala moa, mo save se, mitufala tu, i save lanem samting yet, mo groap tugeta. Mared blong mitufala i kam rij moa from ol strong win we mitufala i fesem tugeta. Ol pikinini blong mitufala oli bin groap blong mekem mitufala i praod, o mekem mitufala i wari, i dipen long dei. Ol smol apupikinini oli tekem glad mo bigfala glad i kam.

Mo taem yumi kam olfala, i kam blong mekem mi tingbaot se laef long wol ia, i no save stap blong oltaem. Naoia, i taem blong mekem olgeta samting ia, we mi minim blong mekem. Sapos i no naoia, ?be wetaem? “Nao luk, laef ia i taem blong ol man oli rere blong mitim God; yes, luk, dei blong laef ia i dei blong ol man oli mekem ol wok blong olgeta” (Alma 34:32). Mi hop se, taem yumi stap kam olfala, bae yumi kam blong luksave se naoia i taem blong talem ol toktok we yumi neva talem, blong hilim ol rilesensip, mo blong mekem ol gol we oli stap yet blong kasem.

Taem mi stap kam olfala, mi tingbaot histri we bae mi lego i go long laen blong mi we oli kam afta long mi. Mi hop se pat blong laef ia, bae i we, taem mi gotru long ol glad mo ol harem nogud blong laef, bae mi faenem waes tingting. Mo from hemia, mi faenem se i naes tumas blong kam olfala.