Te Tai Teuana ae Tabu

Tabeua te ririki n nako, ngke I riki bwa te bitiobi, I kakoaua irouia te kurubu n roronrikirake ake a karekea te kantaninga ae kakaawaki ibukiia ao mwiokoaia mai karawa. A reiakinna bwa te “Aro ni Kiritian ae itiaki ae aki kamara i matan te Atua ae te Tama bon aei, te kakawariia akana a mate tamaia ma aine aika a mate buia, ngkai a rawawata.”¹

Rinanon aia kakawari n ibuobuoki, roronrikirake aikai a tia ni karekea riki te ikikina ma Titita Orpha Cutler. Bon te unaine ae kakateke ae e a moanna ni kerikaaki marurungina are e maeka n ti ngaia n ana tureiram ae uarereke. Kainnanona aika a mwaiti a karekea aia tai ae tamaroa kairake n ataeinimwaane ni ibubuoki nakoina. Waaki tabeua a raonaki ma kaitiakan ana winto, kaitiakan ana tureira, ao ni bon tii tekateka i matan ana ruu ni maroro ma ngaia. Inanon waakin te tai, ataeinimwaane aikai a karekea te reitaki ae teimatoa ma Titita Cutler. E a tia n anai nanoia.

Ngkanne n te bong teuana, e a karekea te rongorongo ae katounako. Imwiin tuoan aorakina ao e a reke irouna te kaentia ae kakaiaki ao n tuangaki bwa e a uarereke ana tai ni maiu. Rikiraken aorakina aei e a rang birimwaaka! Inanon tabeua te wiiki, e a rangi ni mamara rabwatana, ao e a aki kona n ira te bootaki n toa n taina ae wawakinaki iai. Ataeinimwaane aikai a riki bwa te taan ni kamaiu n te maiu n tamnei ibukin Orpha ngkai a karaoi aia kakawari nakon mweengana ao n karaoa man anganna te toa. E kukurei n ana tai ma ngaiia ao riki ana tai ni kabooua ana berita.

Ngkai e tabe n rangi ni kekerikaaki marurungina, e mwaing nakon te komiunite ae uakaan inanon te tienta ni ibuobuoki are e a karekea iai te tararua are e kainnanoia ike te kurubu ae uarereke a kaitibo ni katoa wiiki ibukin te bootaki n toa. N te bong teuana e roko au tareboon man te tienta. Te tia mwakuri e titiraki ngkana I kona ni kairiia ibonga, ke n ana taeka Titita Cutler “ataeinimwaane”, bwa a na kawaria ni karaoa te toa. I tuanga te tia mwakuri bwa ti butimwaea te tibwanga aei ma te karinerine.

N te Tabati, I kaongoia ibonga ana bubuti Titita Cutler. A butimwaea te kakao anne.

Imwiin te bootaki n te Tabati, ti mwananga ni kawaira nakon te tienta n tararua. Inanon ara tai ni buti, ataeinimwaane a karakina te runga n takakaro, aia ukeuke ae iaon kawaina n roko, ao angiin riki aia marooro iaoia ataeinnaine ake a tangiria ni kairiia nakon ana taenti te reirei are imwiina. Ai bon aron te marooro n kairake ae kabuta.

Ngke ti roko n te tienta arei, ti butimwaeaki n te mataroa iroun ana tia tararua Titita Cutler. Ma rannimatana, e taku ma te nakonnano, “Bitiobi Nattress, Orphae e a rikirake ni mamaara. E roroko ae tong, ao I nanokawaki bwa e na bon kona ni bua maiuna!” E reitia n taku, “Te bwai teuana ae tangira bwa butimwaean te toa.”

Imwiin anne e katokai matana iaoia ataeinimwaane ake a tei mai bukiu. A kunnikainiia n te kabaraaki ae mainaina ao a neketai—ataeinimwaane aika a tau mairoun te Atua, ake iai irouiia te nakoanibonga, a karinea te nakoanibonga anne. A bon karaoa ana ibuobuoki te Uea. Ma rannimatana, te tia mwakuri aei e taku, “Taraakimi ai aroia anera!” Imwiina e kairiira nakon ana ruu Orpha. Marurungin Orpha e a bon kananououa. E wene n aki kakamwakuri iaon ana kainiwene. I katorobubua irarikin ana kainiwene, n taua baina, man taku, “Titita Cutler, aio Bitiobi Nattress; I roko ma kain te kooram n te nakoanibonga. Ti a roko bwa tina anga te toa.” E anga moangarena ae beebete ao e katoutoua atuna.

A karaoa iteran te kamronron ibonga ngke a katorobubua irarikin ana kainiwene. Te taribina te kariki e katokaki iaon te ture n toa ae uarereke. E kakabwaiaki, ao ni karinaki ma te taratara raoi inanon wiina mai rarikina. Ti manga katorobubua riki. Teuana te mwangko n toa ae on n te ran e manga kakabwaiaki, ao te timtim n ran e anganaki ma te karaurau.

Aio bon te tai teuana ae tabu. Ngke ti kaina te otenanti, Titita Cutler e moangare ao e wirikiriki ma bwanaana ae beebete, “Kam rabwa.”

I taraia ataeinimwaane aika a tamaroa aikai inanon te ruu. Bon akea kaokoroia ma natin Ereman. N ana taeka Itaia are e kabwarabwara ibukiia ngkai bon, ni koauana, “e angan[iia] akana nimamannei te kona.”² Bon ana taan mwakuri raoi ngaia te Uea.

Ti bane ni kiitana te tienta n tararua anne ma te bitaki. Ti a tia n ira te waaki ae tabu. Titita Cutler e a tia ni karaoa ana berita ae tabu ma te Atua te kabanea n tai inanon maiuna ae mamate are e na bon Ururingnga n tainako. Ni karaoan aei, e kaukaki karawa, ao e kakabwaiaki teuana riki te tai ni karekea Ana berita bwa e na memena Tamneina irouna n tainako—inanon aorakina ao riki ni matena.

Butira n okira mweengara e rang mabu. N tokina temanna te ataeinimwaane e urua te kainabwabu ngke e kangai, “Anne e rang tamaroa.” Ti okirii mweengara ma te atatai ae kabouaki bwa tera raoi ae e nanonaki ni koaua ni katokaan aran te Tia Kamaiu iaora.

Titita Cutler e motirawa tabeua te bong imwiina—ma te kakaonimaki ao te kokoaua nakon ana berita ae tabu.

Tao iai ae e na mimi , man arona, uoua bwaai man koroboki aika a tabu aika aki toki n tataekinaki n te Ekaretia man moan Kaokana man 1830 bon te tataro n toa?

N te aonaaba ae mwaiti arona aei, are a kakai kaoti iai kariiri, ti na aki mwaninga bwaai aika uarereke man beebete are a uota te mwaaka, tautaeka, ao te maiu ae akea tokina. Ti a kaboui ara berita aika tabu n i katoa wiiki ngkai ti butimwaea Ana toa. Ngkai ti karaoia, ti na karekea te rau, ao E na kakabwaiaira ngkai ao n aki toki.