Karekean te Rau n Taai aika Kakamaku

Inanon Eberi 2021, te kauoua ni butin te aoraki ae te Coronavirus are e taona Biiti ni kabuta. Au utu, n aroia aika a mwaiti, ti karaoi nanon bitaki ni kabane ni waekoa riki ibukin irakin nanon babaire ake a kateaki ibukin totokoan butinakon te man aoraki. Ibukina bwa te tabo are e rootaki bon tii aua te aoa te buti raroana man te tabo are ti maeka iai, I taku bwa e aki kona n rootia ara utu, ngkai I kantaningaia bwa e na waekoa n taobaraaki butinakona.

Bon imwain butin te kauoua ni COVID are e orea Biti, ao I a karekea rongorongon maten tibu mairoun tamau. Tamau, are e maeka n iteran Viti Levu mai Maeao, e aki kona n roko n ana taunimate tamana ibukin tiatianakin te mwaingiing iaon Biti ibukin marurungiia taan mwakuri man butinakon te man aoraki. Aio are I a ataia bwa te man aoraki e a rang kaan nakon mweengau ngkai e a kona n roota aroia ni ikotaki au utu ni karekea te raunnano n te bootaki n tau ni mate ibukin tibu te unimwaane.

Te manaoraki e reitinako ni buti ni kabuta Biti. N te tai anne, I bon karaoa naba au bitineti ao ni karaoi mwananga aika uarereke ao n nikirikiri bwa I aonga ni kona ni karekemwane ibukin te utu. Ti reitinako ni mwakuri ao ni karaoi tian bwaai bwa e aonga n teimatoa ni kamanoaki ara utu. E bon kangaanga butimwaean te bitaki ngkai ti aki kona ni kaitibo ao n ikotaki n aron are ti kakaraoia ma ara utu, ni katoa wiikente. E tabe n riki bwa ara kangaanga n te iango ao te namakin ngkai ti aaki kona n ikotaki ao n noori aroia ara utu n rabwatara.

Koauan te manaoraki e roko irou ngke au utu ae uarereke a reke irouia kanikinaean te flu. I iango i bon irou, “Tao bon tii te flu are e bon bubuti,” ma n tokina ti a bane n tuoaki ibukin totokoan butina. N okin mwiin ara tutuo ao a bane n reke iroura: kainnabu, natiu te aine ae waniua ana namwakaina, ao ngai tia reke n te COVID-19.

Reken rongorongon mwiin ara tutuo e bon rotii ara iango, riki ngai ma kainnabau. Namakinan bwaai ake a riki nakoira e a rikirake ni korakroa n te aro are e a maan riki te tai ni kamarurungaki n ataakin te koaua are ti a reke ni manin te Coronavirus. Iangoan aorakira e a karikirakea te maaku, are e rooti ara iango, ara namakin ao maiura n tamnei—ai bon akea nen te onimaki. Imwiin uoua te wiiki ma te manaoraki, ti a ataia bwa ti aki kaota ara onimaki iroun Iesu Kristo ibukina bwa ti kariaia te maaku n arora n iangoa are ti a rang aoraki. Ngaia are, ni kaitaraan anne, ti a waaki ni bita ara iango nakon te Tia Kamaiu ao te mwaaka are e roko man karaoan te mwakuri ma te onimaki Irouna.

Bon te tai are ti karekea iai onimakinan Iesu Kristo ao ni mwakuri iaona, ara iango ao anuara a moanna ni bitaki, ao ara mwakuri a moanna ni booraoi ma ara onimaki. Ti tataro ma nanora ni koaua ao n teimatoa ni kaotia inanon ara tataro are iai ara onimaki iroun Iesu Kristo ao Ana konabwai ni kamarurungiira. Ti a waaki ni wawareki riki koroboki aika a tabu ao n tataekini koroboki aika a tabu inanon te auti ao i bon imarenara.

Ti a moanna riki n tarai itera aika a raraoi ao n reitinako ni kateitei iaon te onimaki. Ti aki manga namakina te maaku ke te raraoma. Ti a kukurei riki ni menara n te auti ao n raonakira i bon iroura. Ngke ti a bon waaki ni kaota ara onimaki iroun Iesu Kristo man karaoan bwaai aikai, ti a nooria bwa marurungira e a kekerake ao tia kona n okira raoi marurungira n te tai ae aki maan imwiina.

I kamatoa ni kakoaua bwa onimakinan Iesu Kristo e kona n uota mwaakan te kamarurung ngkai ti mwakuri ma onimakinana. Ti kona n tokanikai iaon maakura ao ara raraoma ngkana ti katuka ara onimaki ao ara iango iaon te Tia Kamaiu Iesu Kristo. I rang kakaitau ngkai ara utu e kona ni marurung man te COVID n ikotaki ma ana ibuobuoki mwaakan te Tia Kamaiu ni kamarurung.