Te Tangira Ibukin Tonga

Ngke e oki Viliami Nofomuli Nyssen Tonga man ana mition n 2014, e namakina te kukurei ibukin ana tokanikai. E a tia ni beku inanon uoua te ririki n te United States South Carolina Columbia Mition, are e bon mena n iteran te aonaaba raroana mai abana n te Betebeke i Tonga.

Ana beku ae bwanin taina n te mition ibukin ana Ekaretia Iesu Kristo ibukiia Aika Itiaki ni Boong Aika Kaitira, e uringnga ma te kukurei, “bon te taneiai are e a tia ni bita maiu.” Ma Viliami e aki ataia bwa ai bon tibwa moan te ‘bitaki ae korakora’ are e a tia ni katauraoia Tamana are i Karawa ibukina.

Bon imwiin okiran mweengana, e a moana mwakurina n te titoa ni kabonakoi pizza. E a bon tia ni kakarao pizza n ana mwakuri mai imwaina, ao bon te mwakuri ae e rang n tatangiria.

N aroia kairake ake a tuai n iein n te aba, Viliami e iangoia bwa te mwaneka are imwiina e na mwaing nakon te aba ae bubura riki nakon abana—tao n oki nako Amerika—ni uaiakina te maiu ae nakoraoi riki. Mwakurina n te titoa ni pizza e na buokia ni kawakin mwane ibukin te mwaneka are imwiina ae bubura.

Ngkanne, te kabuanibwai, imwiin okina inanon tii aua namwakaina, e motirawa tinan Viliami ae tangiraki. E a tia n rinanon te kangaanga n aorakin te tioka ao a tiku imwiina natina aika itiman, aman mai ibuakoia a bon reirei.

E taonaki n te rawawata Viliami. Ngkai e rinanon te nanokawaki, e iangoia naba tarina ao mwanena aika a uarereke ao e ataia bwa mina ke ana iango are e na mwaing nako tinaniku e na bae ni bitaki.

Viliami e katei ana kouru aika a boou. E tiku i Tonga ni karaoi tibwangan tinana n te mweenga aika a mwaiti. E kakaai rakan riki anga ni karekemwane bwa e aonga ni kona ni karekea te maiu ae tamaroa ibukiia ana utu ao ni katea arona n riki n toronibwai.

E baireia naba Viliami, bwa e na kauka ana titoa ni pizza ae bon ana bwai ni waakin te ririki.

Ao e karaoia.

Inanon Meei 2015, e kauka ‘Ofa ki Tonga’, ana titoa ni pizza ae boou n atuun kawan Tonga i Nuku’alofa. Ofa bon te taetae n Tonga ibukin te tangira. Bon aran naba tinan Viliami.

Ni kauringaan maiuna, Viliami e mimi ni mwanangana are e a tia n rinanona. “Ngkana ko kinaai mai imwain au mition, kona bon bae n tounako bwa I mena ia n te tai aei.

“Ngkekei ngkoa I aki ataia bwa N na mena ia. I tuai man iangoi taai aika a na roko. E aki bane au reirei n te kauarinan, ao tabeman aomata a taku bwa I aki kona ni kabanea au mition. I aki naba koaua iai,” e ngare.

“Ma karaoan au mwakuri ni mitinare e kaota nakoiu te aonaaba ae kaokoro, tein te maiu ae kaokoro. E buokai bwa N na tangira ae mwaiti riki inanon maiu. E reireinai bwa aomata a kona ni karekea ngkana a mwakuri korakora ibukina.

“E kamatoa naba au koaua iroun Iesu Kristo.”

Te kibu are e kamatoatoa Viliami ni boong ni kangaanga imwiin maten tinana e reke n Reirei ao Berita aika Tabu, mwakoro 82:10. “Ngai, te Uea, I bae ngkana kam karaoa ae I taku; ma ngkana kam aki karaoa ae I taku, akea te berita nakoimi.”

Bon te kauring n tainako bwa e kona ni karekei kouru ni kabane aika tamaroa ngkana e teimatoa n ongeaba nakon Ana tua Tamara are i Karawa . . . ao ni koauana, te Uea e a tia ni kakabwaiaa n ae mwaiti ibukin anne.

Man ana karekemwane n ana bitineti ae boou, Viliam e a kona ni boutokaia tarina ao mwanena ngkai a kabanea aia reirei ao ni bon kabooa abana are e katea iai mweengana ae boou ibukiia ana utu. Imwiina, e manga reitaki ma raraona are e a tia ni kinaa man 2015 ao e kunea iroun neienne te tangira inanon maiuna. Ngaia ma Lupe a kabaeaki ibukin te tai aei ao ae akea tokina n te Nuku’alofa Tonga Tembora ni banen 2019.

“Ko ataia, ngke arona bwa I kona n okira arou ni kairake, N na kangai ‘Tabekarake atuum. Iangoi kanoanimii aika bongana. Tai Maaku.’”

Viliami bon te tia kakoaua n te maiu are ngkana ti karaoa ara kabanea n tamaroa are ti konaa, Tamara are i Karawa e na tabena nikirana.