Te Karaunano ae Koaua

Ngke e a koro 10 au ririki, tinau e beku bwa te tia reirei irouia te roronrikirake n te Oakland California Titeiki n te ka-8 n Uoote. Te tairiki teuana inanon te wiiki, ti mena n ara umwantabu ibukin te waaki ni kakukurei n te uoote. Ara waaki ni kakukurei n te Moanrinan e moantaai ni bane, ngaia are I a tiku irarikiia ai tariu ao raraou ngke I tataninga tinau, are e buokiia kain te Roronrikirake n aia Tairiki.

Ti ikaraaba, ma a bon rang mwaiti mwaitira ngaira ataei, te bwaranta e a bon rang ibetutu. Tabeman ataei ake a ikawai riki a tangiria n takakaro i tinaniku ibukina are e mwaawawa riki ikekei, ao ibukina naba bwa e roo riki are i tinaniku nakon are iaan te bwaranta (ai bon imwiin 7:00 n te tairiki n te tai aei).

I aki rang koaua ngkana N na iriia. I tuangiia ngkana ti kona n tiku n takakaro inanona, ma raraou a bon kangai, “[Ti] raoiroi ni mena i tinaniku. A rang mwaiti mwaitira. E na rang n nakoraoi.” I teimatoa, I aki tangiria n reke n te kangaanga, ngaia are I a tuanga tinau ana kariaia ngkana I kona n takakaro i tinaniku.

“Ko aki,” e kaeka tinau. E ngae ngke I aki mwengaraoi n iriia raraou, I bon teimatoa naba n aki kukurei ngkai I aki kariaiakaki n nako tinaniku. Ti rang unga ngkai ti ikotaki. “Bukin tera I aki kona n nako?” I titiraki. Ti ana kaeka tinau bwa e aki tangiria bwa N na takakaro n te roo bwa e rawa n aki kona n noorai.

Ngke I rawa n tuangiia raraou bwa a na waaki n akea ngai irarikiia, I namakina ae I karaoa ae eti. Kaanga ai aron ae te Tamnei e kamatoa ana kauring tinau . . . ma te tai anne e waekoa n rimwiiaki n teuana te kabwaka. E rang kangaanga bwa N na tataraia raraou i tinaniku n akea ngai irarikiia, ngaia are I a kibarake ma ni biri irarikiia, ni kataia n aki ira nanon tinau.

Ngke I roko i tinanikun mataroan te umwantabu, I namakina ae kaanga iai te bai ae tauai ni kaokai. I tei ao I rairaki, ma akea ae e mena ikekei ae taua baiu. I mimi, I kariaia bwa raraou a na kiitana te umwantabu n akea ngai irarikiia, ao imwiina I oki n tekateka n tii ngai i tinanikun te umwanreirei are e mena iai tinau.

Inanon 10 ke 15 te miniti are I tataninga iai bwaran aia Tairiki te Roronrikirake, I kaoka n au iango te bwai are e a tibwa riki. I bon un bwa I aki raoniia raraou i tinaniku, ma I teimatoa n iangoa te namakin n aki rau ngke I iangoia ni kiitana te umwantabu, ibukin ana kaetieti tinau nakoiu bwa N na tiku inanona, ao ni koauana, ibukin te ‘bai’ are e tauai ni kaokai.

I uringa te namakin ae rau are I namakinna ngke I moan baireia bwa N na ongotaeka iroun tinau, ao I ataia bwa ngke I tataningaia, I kona ni manga namakina te Tamnei, are e tuangai bwa I a tia ni—manga—karaoa te rinerine ae eti.

Ni karokoa te bong aei, akea au atatai bwa bukin tera e rang kakaawaki irou bwa N na tiku n te umwantabu n te tairiki anne, ma I aki tabe iai. I bon tii kakaitau ibukin te Tamnei ae Raoiroi are e kairai ao e kairiira ao e karaui nanora, riki ngkana ti aki mataata raoi . . . ao I kakaitau bwa man au ongotaeka, te Tamnei e kariaia bwa tina buti ma te kukurei n okira mweengara imwiin te waaki ni kakukurei n te uoote, n akean ana reirei n takutaku tinau.