“ʻOku Fakamālohia Kitautolu ʻe he Moʻui Fakafalala Pē Kiate Kitá,” Liahona, ʻAokosi 2023.
Ngaahi Tefitoʻi Meʻa Mahuʻinga ʻo e Ongoongoleleí
ʻOku Fakamālohia Kitautolu ʻe he Moʻui Fakafalala Pē Kiate Kitá
ʻOku ʻuhinga ʻa e moʻui fakafalala pē kiate kitá ke tau lava ʻo tokangaʻi ʻa ʻetau ngaahi fiemaʻu mo hotau ngaahi fāmilí. ʻI heʻetau moʻui fakafalala pē kiate kitautolú, ʻoku tau toe malava lelei ange ai ke tokoni ki he ʻEikí mo tokangaekina e niʻihi kehé. Ka ʻoku ʻikai ʻuhinga ʻa e moʻui fakafalala pē kiate kitá ia ke tau fehangahangai toko taha pē mo hotau ngaahi faingataʻaʻiá. Te tau lava ʻo kole ha tokoni mei he ngaahi kaungāmeʻá, fāmilí, kāingalotu ʻo e uōtí pe koló, mo e kau mataotaó ʻi he taimi ʻoku tau fiemaʻu aí.
Ngaahi Tefitoʻi Moʻoni ʻo e Moʻui Fakafalala pē Kiate Kitá
ʻOku fiemaʻu ki he moʻui fakafalala pē kiate kitá ʻa e akó, talangofuá, mo e ngāue mālohí. ʻOku tau fai hotau lelei tahá ke tokangaʻi kitautolu, pea te tau lava ʻo kole tokoni ki he niʻihi kehé ʻo ka fiemaʻu. Ka neongo ia, ke hoko ʻo moʻui fakafalala moʻoni pē kiate kitá, kuo pau foki ke tau ako ke tui kia Sīsū Kalaisi. Pea ʻi heʻetau ngāue ke tokoniʻi kitautolú, te Ne fakamālohia kitautolu.
Moʻui Fakafalala Fakalaumālie Pē Kiate Kitá
Te tau lava ʻo langaki ʻetau moʻui fakafalala fakalaumālie pē kiate kitautolú ʻaki ʻetau ngāue ke fakamālohia ʻetau fakamoʻoni kia Sīsū Kalaisí. ʻOku tau fai ʻeni ʻi heʻetau lotú, ako e folofolá, ʻalu ki he lotú, talangofua ki he ngaahi fekaú, mo fakahoko ha ngaahi meʻa kehe te ne ʻomi kitautolu ke tau ofi ange kia Kalaisi. ʻI hono ʻiloʻi ko ia ʻokú Ne finangalo ke tokoniʻi kitautolú, te ne ʻomi ai ʻa e tui ke tau kei mālohi pē neongo e faingataʻa ʻa e moʻuí.
Moʻui Fakafalala Fakatuʻasino Pē Kiate Kitá
ʻOku kau ʻi he moʻui fakafalala fakatuʻasino pē kiate kitá ʻa e malava ke tokangaʻi ʻetau ngaahi fiemaʻu fakatuʻasino mo hotau fāmilí. ʻOku kau heni ʻa e meʻakaí, fale nofoʻangá, moʻui leleí, mo e ngaahi fiemaʻu kehé. ʻOku tau fakahoko ʻeni ʻaki ʻetau maʻu ha ako lelei, ako pe fakalahi e ngaahi taukei ʻoku fiemaʻú, ngāue mālohi, fakaʻaongaʻi fakapotopoto hotau taimí, mo tokangaʻi lelei ʻetau paʻangá.
Moʻui Fakafalala Fakaeloto pē Kiate Kitá
Ko e moʻui fakafalala fakaeloto pē kiate kitá ko e malava ia ke fakafeangai ki he ngaahi faingataʻa fakaelotó ʻi he loto-toʻa mo e tui. ʻOku tau fepaki kotoa mo ha ngaahi pole mo e ngaahi fakafeʻātungia. Fakamālō ki he ongoongoleleí, ʻoku tau ʻilo te tau lava ʻo fili e founga ke tali ʻaki kinautolú. ʻOku fakatupulaki ʻe heʻetau tali ʻi he tui ki he ʻEikí ʻa ʻetau malava ko ia ke fehangahangai mo e ngaahi faingataʻa kehé ʻaki ha ʻamanaki lelei lahi angé.
Akó
ʻOku totonu ke tau ako maʻu pē. ʻOku finangalo ʻa e ʻOtuá ke tau akoʻi hotau ʻatamaí mo fakaleleiʻi ʻetau ngaahi taukeí ʻi he kotoa ʻo e moʻuí ni pea ki he moʻui ka hokó. Ko e lahi ange ʻetau akó, ko e lahi ange ia ʻetau lava ʻo hoko ko ha ivi tākiekina lelei ange ki he leleí pea tokonaki maʻatautolu, hotau fāmilí, mo kinautolu ʻoku faingataʻaʻiá.
Ngaahi Tāpuaki ʻo e Moʻui Fakafalala Pē Kiate Kitá
Kuo akoʻi mai ʻe he kau palōfitá ko e taimi te tau fakalakalaka ai ʻetau moʻui fakafalala pē kiate kitautolú, ʻe tāpuekina kitautolu ʻaki ha ʻamanaki lelei mo ha melino lahi ange. Te tau lava ʻo tokoni ki hotau ngaahi fāmilí mo e niʻihi kehe ʻoku faingataʻaʻiá. Pea ʻe tāpuakiʻi kitautolu ʻaki ha ngaahi faingamālie lahi ange mo e malava ke hokohoko atu ʻetau fakalakalaká.
Ngaahi Maʻuʻanga Tokoni ʻa e Siasí
ʻE lava ke fokotuʻu ʻe homou siteikí ha ngaahi kulupu moʻui fakafalala pē kiate kita. ʻE lava ke akoʻi atu ʻi heni ʻa e ngaahi tefitoʻi moʻoni ʻo e moʻui fakafalala pē kiate kitá mo e ngaahi taukei hangē ko hono levaʻi hoʻo paʻangá pe kumi ha ngāue ʻoku lelei angé. Te ke lava ʻo maʻu ha ngaahi maʻuʻanga tokoni fekauʻaki mo ia ʻi he Gospel Library. Fili e “Books and Lessons” pea fili leva ʻa e “Moʻui Fakafalala pē Kiate Kitá.”