Kāingalotu ʻe Toko 40—Ngaahi Tāpuaki ʻe 40—ʻIkai Hoko Noa Pē!

Naʻe mahuʻinga ʻa e fakataipe ʻo e mataʻifika 40 ki he kau Hepelū ʻi he kuonga muʻá. ʻOku ʻasi tuʻo 146 ia ʻi he folofolá pea lava ke ne fakafofongaʻi ha ‘vahaʻataimi fuoloa’. Hangē ko ʻení, naʻe nofo ʻa Mōsese ʻi ʻIsipite ʻi ha taʻu ʻe 40, pea ʻi ha taʻu ʻe 40 ʻi he toafá ʻi he taimi naʻá ne tataki ai hono kakaí mei he nofo pōpulá. Naʻe ʻaukai ʻa e Fakamoʻuí ʻi ha ʻaho ʻe 40 hili hono ʻahiʻahiʻi ʻe he tēvoló, mo e ngaahi meʻa peheé. Kuo tatali ʻa e Kāingalotu ʻi he ʻOtu Motu Kukí ʻi ha vahaʻataimi fuoloa ke maʻu honau tāpuaki fakapēteliaké—pea ʻi ʻEpeleli ʻo e 2023, naʻe maʻu ai ʻe ha kāingalotu ʻe toko 40 honau ngaahi tāpuakí. Naʻe lahi ha ngaahi mana naʻe hoko ʻi he uike makehe ko ʻení.

ʻI he konga kimuʻa ʻo e taʻu ní, ʻi he palani ʻa e kau taki ʻo e Misiona New Zealand Auckland ke ʻaʻahi ki ha kiʻi motu mavahe ʻo e ʻOtu Motu Kukí ki ha konifelenisi fakavahe fakavaeuataʻu, naʻa nau fakaafeʻi ai ʻa e Pēteliake ʻo e Siteiki Auckland New Zealand Harbour, Sitīveni Sitēpingi, ke kau fakataha mo kinautolu ke maʻu ai ʻe he kāingalotu ʻi he ʻOtu Motu Kukí ha faingamālie ke maʻu honau tāpuaki fakapēteliaké.

Naʻe tūʻuta ʻa Pēteliake Sitēpingi mo hono uaifi ko Kefí, ʻa ia ʻoku hoko foki ko ʻene sikalaipé, ʻi he fonuá lolotonga ha ʻuha lōvai. Mahalo naʻe pehē ʻe ha niʻihi ʻe loto-foʻi ai ʻa e kakaí mei heʻenau hū ki tuʻá . . . ka naʻe ʻikai. Naʻe loto-fiefia ha ongo ʻeletā kei talavou ke fakafaingamālieʻi ʻa ʻena kaá ke fakaʻaongaʻi ʻe Pēteliake mo Sisitā Sitēpingi lolotonga ʻena ʻi he motú. Naʻe fiefia lahi ʻa e ongo faifekaú ke heka pasikala ʻi he uike ko iá.

Naʻe omi ʻa e Kāingalotú ʻi he ʻuha lōvai ko iá . . . Naʻa nau omi mo ha loto-houngaʻia moʻoni mo e fiefia ʻi he meʻa ʻoku ʻamanaki ke hokó. Naʻa nau omi ke fanongo pea ke ongoʻi ʻa e ʻofa ʻa ʻenau Tamai Hēvaní mo Hono ʻAlo ko Sīsū Kalaisí. Naʻa nau omi ke ako lahi ange fekauʻaki mo honau tuʻunga malavá mo e ngaahi tāpuaki kuo teuteu ʻe he ʻEikí maʻanautolu takitahá. Naʻe kei omi pē ʻa e kakaí—naʻe mālohi fau ʻa e Laumālié, pea naʻe aʻusia ʻe he ongo Sitēpingí ʻa e fiefia ʻoku maʻu ʻi he ngāue maʻá e ʻEikí.

Naʻe angamaheni ʻa Pēteliake Sitēpingi ke foaki ha tāpuaki ʻe fā nai pē ʻi he uike; naʻá ne pehē te ne ʻinitaviu mo tāpuakiʻi ha kakai ʻe toko 15–20, ka naʻá ne ofo ʻaupito ʻi he haʻu ha kāingalotu ʻe toko 40 mei he taʻu 12–74 mei he ngaahi ʻotu motú ki Lalotonga ke maʻu honau tāpuakí.

Naʻe pehē ʻe Sisitā Sitēpingi naʻá na kamata ngāue pongipongia ʻi he ʻaho takitaha pea toki ʻosi pē kuo fuoloa ʻa e poʻulí—pea ʻi heʻena helaʻiá, naʻe tokoniʻi mo fakamālohia kinaua ʻe he ʻEikí ke na lava ʻo fakakakato kotoa ʻa e meʻa naʻá na fakahokó.

Naʻe kamata ʻena aʻusiá ʻi Fēpueli ʻo e 2023 ʻi he tūʻuta mai ʻa ʻEletā Tōnila Uaiti mo Sisitā Kolōtia Uaiti ki he ʻOtu Motu Kukí ke ngāue fakafaifekau ʻi ha feituʻu naʻe ʻikai ha Pēteliake Fakasiteiki ai. ʻI ha kalasi semineli pongipongi, naʻá na fanongo ai naʻe talaange ʻe ha fānau ako ʻe toko 14 ki heʻenau faiakó ʻoku teʻeki maʻu honau tāpuaki fakapēteliaké. Naʻe fai hono vakaiʻi pea ʻikai fuoloa kuo fakamafaiʻi ʻa Pēteliake Sitēpingi ke folau ki he ʻOtu Motu Kukí ke foaki ʻa e ngaahi tāpuaki naʻe fiemaʻú.

Naʻe pehē ʻe ʻEletā mo Sisitā Uaiti naʻá na lotua ʻa e ongo Sitēpingí ke na aʻu ange—ki he ʻOtu Motu Kukí, pea naʻe tonu ʻaupito ʻa e taimí—naʻe fakahoko ha konifelenisi fakavahefonua ʻi he taimi ko iá, naʻe lolotonga tutuku ʻa e akó—naʻe ʻi ai foki ha feʻauhi soka fakafonua ʻa e toʻu tupú ʻi he uike hokó naʻe omi ai ha ongo kulupu toʻu tupu siasi ʻe ua ki he feʻauhí—pea naʻe lava ke maʻu honau ngaahi tāpuakí.

Naʻe pehē ʻe Pēteliake Sitēpingi ʻoku foaki ʻa e ngaahi tāpuaki fakapēteliaké ki he kau mēmipa moʻui taau ʻo e Siasí pea ʻoku ʻi ai ha faleʻi fakataautaha mei he ʻOtuá. Naʻá ne pehē, “ʻOku fakataumuʻa ʻa e tāpuaki ko ʻení ke hangē ha mape hala ʻoku tokoni ke tataki ha tokotaha ʻi heʻene moʻuí.

ʻI heʻeku hoko ko ha pēteliaké, ʻoku ʻikai haʻaku tāpuaki ke foaki. ʻI he hilifaki hoku ongo nimá ki he ʻulu ʻo ha tokotaha, ʻoku ou maʻu ha ueʻi mo ha fakahā maʻanautolu ʻi he mālohi ʻo e Laumālie Māʻoniʻoní, ʻa ia ʻoku hoko leva ia ko honau tāpuakí.

ʻOku ʻikai fiemaʻu ke pelupelu lelei mo fakangaloki ʻa e ngaahi tāpuakí ni, pea ʻoku ʻikai fiemaʻu ke fakaʻesia ia pe pulusi. ʻOku fiemaʻu ia ke lau, muimuiʻi pea fakamahuʻingaʻi, pea ʻe tokoni ia ki ha tokotaha ʻi hono ngaahi taimi faingataʻa tahá, pea te ne tataki ia ʻi he ngaahi tuʻunga kehekehe ʻo e moʻuí.”