Ko ha Tokotaha Ballerina naʻe Tataki ʻe he Laumālié peá ne Maʻu ai ha Founga Taʻeʻamanekina

ʻOku pehē ʻe Pianikā Kānovale, mei Senē ʻAositelēlia, “Naʻe kamata ʻeku ballerina ʻi heʻeku taʻu fitú koeʻuhí naʻá ku fie hoko ko ha pilinisesi.” Hili siʻi pē mei he kamata ʻene ako ballerina, naʻá ne ʻilo ʻoku ʻikai tokanga ʻa e māmani paleliná ia ki hono tauhi ʻo e ʻaho Sāpaté. Naʻe pau ke ne fili ʻa e meʻa ke ne faí.

ʻI he hoko ʻa Pianikā ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻá ne fāifeinga ke fakaʻatāʻatā ʻa e ʻaho Sāpaté mei he ngāué mo ha ngaahi ʻekitivitī kehe te ne taʻofi ʻene maʻu lotú. Neongo pe ko e sipoti pe fakaʻaliʻali, ko e fili ʻe he Kāingalotu ʻo e Siasí ke fakaʻataʻatā ʻa e ngaahi ʻekitivitī ko ʻení mei he ʻaho Sāpaté ʻoku faʻa faingataʻa fakaeongo ia.

ʻI he ʻikai loto ʻa Pianikā ke tukuhifo ha tahá, ʻi heʻene ʻilo ʻe fakahaka ʻa e ngaahi konga ʻi he ʻaho Sāpaté ʻoku ʻikai ke ne ʻi aí, naʻá ne faingataʻaʻia foki mo ia. Naʻe pehē ʻe heʻene faiakó, “He ʻikai fiemaʻu koe ʻe ha kautaha; ko e hā ka nau fili ai koe kae tuku ha taha ʻoku lava ʻo ballerina ʻi he ʻaho Sāpaté?”

Ka naʻe manatu ʻa Pianikā ki heʻene kei taʻu fitú ki haʻane talanoa mo ʻene faʻeé fekauʻaki mo e ballerina ʻi he ʻaho Sāpaté. ʻI he ʻikai ke ne lava ʻo fakahoko ha ngaahi sivi mo ha ngaahi fakaʻaliʻalí, naʻe tokoni ʻena ngaahi talatalanoa ko iá ke mahino kia Pianikā ʻoku mahuʻinga ange ʻa e fakahōifua ki he ʻOtuá.

Naʻá ne ako ʻi he Marni’s School of Performing Arts ʻo aʻu ki heʻene taʻu 14, naʻá ne ikuna leva ha faingamālie ki he Polokalama Pre-Professional ʻi he National College of Dance ʻi Niukāsolo, ʻa ia naʻe houa ʻe ua mei hono ʻapí. ʻI he taʻu ʻe tolu naʻe hokó, naʻe nofo ʻa Pianikā ʻi ha ʻaho ʻe nima ʻi he uike ʻi Niukāsolo, ko ha aʻusia naʻá ne teuteuʻi ia ki heʻene hiki tokotaha pē ki Niu ʻIoke Siti, USA.

Neongo naʻe ʻikai teitei ballerina ʻa Pianikā ʻi ha ʻaho Sāpate, ka ʻi hono taʻu 17, naʻe tali ia ki he ʻapiako Ballerina ʻiloa ʻi Niu ʻIoke ko e Ballet Academy East, ʻa ia naʻá ne maʻu ai ʻa e faingamālie fakafiefia ke ako ʻa e founga pālei ko e Balanchine.

Naʻe ʻikai fakafiefia maʻu pē. ʻOku pehē ʻa Pianikā, “Naʻe ʻi ai ha ngaahi taimi ʻi Niu ʻIoke, ʻi heʻeku mamaʻo mei hoku ngaahi kaungāmeʻá mo e fāmilí kotoa, naʻá ku ongoʻi tuenoa ai. ʻI heʻeku tangi ʻi ha pō ʻe taha . . . ʻoku ou manatu ki haʻaku lotu ki heʻeku Tamai Hēvaní ʻo kole kiate Ia [ke Ne fāʻofua mai kiate au]. He ʻikai toe ngalo ʻiate au ʻa e ongo fakamāfana naʻá ku ongoʻi ʻi hoku lotó. Neongo naʻe lahi ange ai ʻeku tangí, ka ko ha ngaahi loʻimata ʻo e fiefia, pea naʻe mole ʻeku ongoʻi tuenoá.”

Hili ha taʻu nai ʻe ua, naʻe tāpuni ʻe he COVID-19 ʻa Niu ʻIoke pea foki ai ʻa Pianikā ki ʻapi, ʻa ia naʻe pau ke ne kumi ha ngāue, pea mo feinga ke kei ako pālei pē. Kimui ange, naʻá ne fakakaukau ʻi he faʻa lotu ke ʻalu ʻo ngāue fakafaifekau taimi kakato, ka naʻe ueʻi ia ke hiki ki Melipoane ʻa ia naʻá ne ʻamanaki ai ʻe lava ʻo hū ki he Australian Ballet Company.

Naʻe toe hoko leva ʻa e ngaahi fakangatangata ki he nofo maʻú, pea fakaʻamu ʻa Pianikā ke toe ballerina. Naʻe kamata ke ne ballerina holo pē ʻi he pāká, koeʻuhí ke kiʻi hū ki tuʻa mei hono ʻapí, ka naʻe fokotuʻu ange ʻe heʻene faʻeé ke ʻahiʻahi fakaʻaliʻali maʻá e kakaí hili ʻa e ngaahi fakangatangata ki he nofo maʻú. ʻI he kamataʻangá, naʻe pehē ʻe Pianikā ʻoku fakavalevale ʻa e foʻi fakakaukaú, ka ʻi hono poupouʻi foki ia ʻe hono ngaahi kaungāmeʻa ʻi he siasí, naʻá ne ʻahiʻahi fakahoko ia.

Naʻe fakahaka ʻe Pianikā ha ngaahi tauʻolunga ballerina ʻi hono loki nofo totongí, peá ne ʻalu atu leva ki he ngaahi hala ʻo e loto-koló ke fakaʻaliʻali ai. “ʻI he kamataʻangá, ko ha meʻa fanongo pē ʻi hoku telingá naʻá ku maʻú, ka naʻá ku kamata fakaʻaliʻali pē ai. Naʻe faifai peá u maʻu ha ʻū sipika. Mei ai, naʻá ku ako ʻa e fanga kiʻi tokoni mo e founga kotoa pē ʻo e fakaʻaliʻali ki he kakaí: ko hono fakaʻaongaʻi ʻo e kouní mo hono fusi maeaʻi ha feituʻu ke hoko ko ha siteisí . . . fakaleleiʻi ʻo e ngaahi haká . . . mo hono [tokangaʻi] ha haʻofanga kakaí. Naʻe hoko ʻa e fakaʻaliʻali ki he kakaí ko ha māmani foʻou moʻoni kiate au.”

Naʻe kei fakaʻamu pē ʻa Pianikā ke hū ki ha kautaha ballerina. Lolotonga ʻene fakaʻaliʻali ki he kakaí, naʻe kei hokohoko atu pē ʻene akoakó mo e feinga ke hū ki ha kautahá. Naʻe fehuʻi ange ʻe ha kautaha ʻe taha naʻa nau mālieʻia ai, “Ko e hā ʻoku ʻikai . . . ke ke fakaʻaliʻali ai ʻi he Sāpaté, peá ke toki ʻalu ki he lotú?” ʻI he kei tuʻu maʻu ʻa Pianikā ʻoku mahulu atu hono tauhi ʻo e Sāpaté ʻi he ʻalu pē ki he lotú, naʻe mole ai ʻa e faingamālie ko iá.

ʻOku pehē ʻe Pianikā, “Naʻá ku loto moʻoni ke u fakaʻaliʻali fakapalōfesinale.” Naʻá ne fakahā foki ki he Tamai Hēvaní ʻi heʻene ngaahi lotú ʻe mātuʻaki lelei ʻaupito ki he kau ballerina kei īkí kapau te ne hū ki ha kautaha ballerina kae ʻikai ngāue ʻi he Sāpaté. “ʻI heʻeku toe fakakaukau atu ki aí, ʻoku ou kata ʻi heʻeku feinga ke talaange ki he Tamai Hēvaní ʻa e meʻa naʻe leleí.”

ʻOku fakalaulauloto ʻa Pianikā ki ha lēsoni naʻe akoʻi ʻe ʻEletā D. Toti Kulisitofasoni: “ʻOku ʻikai totonu ke tau fakakaukau ʻoku hangē ʻa e palani ʻa e ʻOtuá ko ha mīsini fakatau ʻo e ʻunivēsí ke tau (1) fili atu pē ha tāpuaki ʻoku fiemaʻu, (2) fakahū atu ʻa e lahi ʻo e ngaahi ngāue leleí, pea (3) maʻu taimi totonu leva ʻa e meʻa naʻe fiemaʻú.”¹

ʻOkú ne pehē, “Naʻá ku ʻilo naʻe finangalo ʻa e Tamai Hēvaní ke u faiva. ʻOku ou ʻilo naʻá Ne finangalo ke u fāifeinga ke hū ki ha kautaha ballerina, ka ʻi he fakalau ʻa e taʻú naʻe fakaʻau ke mahino ʻaupito mai naʻe ʻikai te Ne teitei talaʻofa mai te u hū ki ha kautaha.”

ʻI he tūlifua ʻa Pianikā ki heʻene ngaahi fakaʻānaua ke ngāue ki ha kautahá kuó ne ʻai ia ke hoko ko ha tokotaha ballerina taukei, ka ʻi Māʻasi ʻo e 2022, kuó ne moʻui pē ʻiate ia mei heʻene fakaʻaliʻali ki he kakaí—ko ha founga kuó ne aʻusia ai ha ngaahi ola taʻeʻamanekina.

Lolotonga haʻane faiva ʻi ha ʻaho ʻe taha, ʻokú ne pehē, “Naʻá ku fakatokangaʻi ʻa e fofonga fiefia ʻa ha kiʻi taʻahine taʻu 13 . . . Kuó u aʻusia ha meʻa tatau mo e kiʻi taʻahine ko iá, pea ʻoku ou ʻilo ʻa e ongo ko iá. ʻOku ou lava ʻo ʻai ʻa e kakaí ke nau malimali mo tangi; he ʻikai ke u teitei liliu ia ki ha toe meʻa ange . . . kuó u loto maʻu pē ke tokoni ki he niʻihi kehé . . . ko ʻeni kuo ʻomi ʻe he Tamai Hēvaní ha faingamālie ke u tokoni ai ʻi he founga makehe ange!”

Naʻe mei fakafiefia kapau naʻá ku hū ki ha kautaha, ka ʻoku ou pehē ʻoku toe fakafiefia ange ʻeku tauhi ʻEne ngaahi fekaú.”

Naʻe pehē ʻe Palesiteni Lāsolo M. Nalesoni, “ʻOku tupu mei he talangofuá ʻa e lavameʻá. ʻOku tupu mei he talangofua kakató ha ngaahi mana.”²

ʻI hono toe fakaongo ʻe Pianikā ʻene ngaahi leá, ʻokú ne pehē: “Kuo folofola mai ʻa e Tamai Hēvaní, ‘Kapau te ke tauhi ʻeku ngaahi fekaú, te u fakahā kiate koe ha ngaahi mana’.

ʻOku ou falala nai kiate Ia? ʻIo!”