« ដង្វាយដ៏ល្អបំផុតរបស់យើង » លីអាហូណា ខែ មករា ឆ្នាំ ២០២៤ ។
សំឡេងពួកបរិសុទ្ធថ្ងៃចុងក្រោយ
ដង្វាយដ៏ល្អបំផុតរបស់យើង
នៅពេលយើងឧទ្ទិសឆ្លងព្រះវិហារមួយ យើងកំពុងទូលទៅកាន់ព្រះអម្ចាស់ថា « នេះជាដង្វាយរបស់យើង ។ វាគឺល្អបំផុតតាមដែលយើងអាចធ្វើទៅបាន » ។
ប្រហែលពីរសប្តាហ៍មុនពេលការឧទ្ទិសឆ្លងឡើងវិញនៃព្រះវិហារបរិសុទ្ធ វ៉ាស៊ីងតោន ឌី. ស៊ី. នៅខែ សីហា ឆ្នាំ ២០២២ ចៅហ្វាយរបស់ខ្ញុំ និងខ្ញុំបានកត់សម្គាល់ឃើញថាដើមឈើស្នែងអឺរ៉ុបមួយដែលនៅតាមផ្លូវទៅកាន់ព្រះវិហារបរិសុទ្ធមើលទៅមិនមានសុខភាពល្អទេ ។ វាមានស្លឹកតិចនៅផ្នែកកណ្តាលនៃដើមឈើនោះ ហើយមានមែកដ៏ស្លេកស្លាំងមួយចំនួន ។
ក្នុងនាមជាអ្នកថែទីធ្លាព្រះវិហារបរិសុទ្ធ ខ្ញុំមានការព្រួយបារម្ភថាទីធ្លាព្រះវិហារបរិសុទ្ធដ៏ស្រស់ស្អាតនោះបានត្រៀមខ្លួនជាស្រេចហើយ លើកលែងតែកន្លែងដ៏តូចមួយនោះ ។ ដើមឈើនោះនៅជាប់នឹងប្រភពទឹកនៅជិតច្រកចូលព្រះវិហារបរិសុទ្ធ ។
យើងមានដើមឈើបម្រុងដែលមានសុខភាពល្អដុះនៅក្បែរនោះ ហើយយើងបានពិភាក្សាអំពីលទ្ធភាពនៃការផ្លាស់ប្ដូរយកដើមឈើដែលមានសុខភាពល្អវិញ ។ ប៉ុន្តែដំបូងយើងត្រូវតែយកផ្លូវដើរ និងស្មៅនៅក្បែរនោះចេញ ហើយបន្ទាប់មកផ្លាស់ប្តូរទីតាំងបាញ់ទឹក និងខ្សែអគ្គិសនីដែលរត់កាត់តំបន់នោះ ។ ការភ័យខ្លាចដ៏អាក្រក់បំផុតរបស់ខ្ញុំគឺថា យើងនឹងយកដើមឈើដែលឈឺនោះចេញ ប្តូរដាំដើមឈើថ្មីជំនួសវិញ ហើយមិនមានពេលដើម្បីធ្វើឲ្យអ្វីៗទាំងអស់នៅជុំវិញដើមឈើនោះមើលទៅស្រស់ស្អាតសម្រាប់ការឧទ្ទិសឆ្លងឡើងវិញនោះ ។
ពេលខ្ញុំប្រាប់ប្រពន្ធខ្ញុំ ខារ៉ូលីន ថាយើងប្រហែលជាត្រូវផ្លាស់ទីដើមឈើនោះ នាងបានឆ្លើយ ៖ « គ្រាន់តែកាត់មែកដែលស្លេកស្លាំងទាំងនោះ ហើយខ្ញុំនឹងបបួលបងប្អូនស្រីព្រះគម្ពីររបស់ខ្ញុំនៅទូទាំងប្រទេសដើម្បីអធិស្ឋានសម្រាប់វា ។ ព្រះវិហារបរិសុទ្ធជារបស់ព្រះអម្ចាស់ ។ ទ្រង់នឹងប្រទានពរដល់ដើមឈើនោះ » ។
ខារ៉ូលីនមានមិត្តភក្តិមួយក្រុមដែលនាងហៅថា បងប្អូនស្រីព្រះគម្ពីររបស់នាង ដែលជាសមាជិកនៃសាសនាចក្រដែលធ្លាប់រស់នៅក្នុងវួដជាមួយគ្នា ។ ពួកគេបានសិក្សា ចូរមកតាមខ្ញុំ ជាមួយគ្នារហូតដល់ពួកគេទាំងអស់គ្នាបានប្ដូរទីលំនៅ ប៉ុន្តែពួកគេបន្តទាក់ទងគ្នា ។ ពេលត្រូវការការអធិស្ឋាន ពួកគេហៅគ្នាទៅវិញទៅមក ។
បន្ទាប់ពីខារ៉ូលីនបានប្រាប់ពួកគេអំពីដើមឈើដែលឈឺនោះ ពួកគេបានប្រាប់កូនៗរបស់ពួកគេ និងសមាជិកគ្រួសារផ្សេងទៀត ។ ខារ៉ូលីនមិនបានដឹងថា មានមនុស្សប៉ុន្មាននាក់បានអធិស្ឋានឲ្យដើមឈើនោះទេ ប៉ុន្តែនាងមានជំនឿថា ព្រះវរបិតាសួគ៌នឹងស្តាប់ការអធិស្ឋានរបស់ពួកគេ ។
ក្នុងពេលតែប៉ុន្មានថ្ងៃប៉ុណ្ណោះ ដើមឈើនោះបានដុះស្លឹកថ្មីបំពេញនៅផ្នែកដែលអត់សូវមានស្លឹកនោះ ។ ខារ៉ូលីនបាននិយាយ ៖ « ពិតណាស់វាមើលទៅល្អជាងមុន » ។ នាងបានផ្ញើរូបភាពដើមឈើនេះទៅកាន់បងប្អូនស្រីព្រះគម្ពីររបស់នាង ដោយប្រាប់ពួកគេថា « មើលចុះព្រះអម្ចាស់ឆ្លើយតបយើងហើយ ! »
ខ្ញុំបានដឹងថា មនុស្សកំពុងអធិស្ឋានឲ្យដើមឈើនោះ ដូច្នេះខ្ញុំក៏មិនភ្ញាក់ផ្អើលដែរ ។ ខ្ញុំក៏បានដឹងផងដែរថា ក្នុងពេលឆាប់ៗនេះ ប្រធាន រ័សុល អិម ណិលសុន នឹងប្រសិទ្ធពរដល់ព្រះវិហារបរិសុទ្ធ និងទីធ្លាព្រះវិហារបរិសុទ្ធក្នុងអំឡុងពេលអធិស្ឋានឧទ្ទិសឆ្លងរបស់លោក ។ ដើមឈើនោះមិនអីទេ ។
យើងមានអំណរគុណចំពោះព្រះអម្ចាស់ដែលបានគោរពដង្វាយ និងសេចក្ដីជំនឿរបស់យើង ។