“ʻOku Tokoniʻi Fēfē Kitautolu ʻe he Loto-Houngaʻiá ke Tau Faʻa Kātakí?,” Liahona, Fēpueli 2024.
Haʻu, ʻo Muimui ʻIate Au
ʻOku Tokoniʻi Fēfē Kitautolu ʻe he Loto-Houngaʻiá ke Tau Faʻa Kātakí?
ʻOku hoko ʻa e ngaahi faingataʻá ki he kakai kotoa pē ʻo tatau ai pē pe ʻoku nau angatonu pe taʻe-angatonu. ʻE ʻilonga ʻa e faikehekehé ʻi he founga ʻoku tau fili ai ke tali ʻa e ngaahi faingataʻá pea mo e meʻa ʻoku tukutaha ki ai ʻetau tokangá.
Ko e Tokanga Taha ki he Loto-Houngaʻiá
ʻI he pekia ʻa ʻIsimelí, naʻe tengihia ʻe hono ngaahi ʻofefiné ʻene pekiá, ka naʻa nau toe tangi lahi foki “koeʻuhi ko honau ngaahi faingataʻaʻia ʻi he feituʻu maomaonganoá” (1 Nīfai 16:35). Kuo kātekina ʻe he kau fafiné ni ha ngaahi faingataʻa lahi, ka ʻi he tukutaha ʻenau tokangá ʻi honau ngaahi faingataʻaʻiá, naʻe tupu ai haʻanau lāunga ki he palōfitá (Līhai) pea ngalo ai honau ngaahi tāpuakí (vakai, 1 Nīfai 16:36).
Naʻe foua ʻe Nīfai ʻa e ngaahi faingataʻa tatau ka naʻe ʻikai ke ne lāunga, naʻa mo e taimi naʻe motu ai ʻene kaufaná pea ʻikai lava ke maʻu ʻe he kulupú ha meʻakai ʻi ha kiʻi vahaʻataimí (vakai, 1 Nīfai 16:18–22). Naʻá ne tali ia ʻi he faʻa kātaki mo e tui.
ʻI he taimi naʻe valokiʻi ai ʻe he ʻEikí ʻa e ngaahi ʻofefine ʻo ʻIsimelí mo honau ngaahi husepānití, naʻa nau fakatomala pea “taʻofi ai (ʻenau) ʻitá” (vakai, 1 Nīfai 16:39). Pea naʻa mo hono kai ʻe he ngaahi ʻofefine ʻo ʻIsimelí ʻa e kakanoʻi manu matá ʻi he feituʻu maomaonganoá, naʻa nau fakaivia lahi ai ʻenau fānaú “ʻo nau sino mālohi, ʻio, ʻo tatau mo e kau tangata; pea kamata ke nau kātakiʻi ʻa ʻenau fonongá pea ʻikai ke toe ʻi ai ha ngaahi lāunga” (1 Nīfai 17:2).
Neongo naʻe hokohoko atu ʻa e kulupú ke “fepaki mo e ngaahi faingataʻaʻia lahi ʻi he feituʻu maomaonganoá” (1 Nīfai 17:1), ka naʻe fakatokangaʻi ʻe Nīfai “hono lahi ʻo e ngaahi tāpuaki ʻa e ʻEikí kiate [kinautolú]” (1 Nīfai 17:2).
ʻOku tokoniʻi kitautolu ʻe he loto-houngaʻiá ke tau sio ki he ngaahi tāpuaki ʻa e ʻEikí neongo pe ko e hā hotau ngaahi faingataʻaʻiá.