Naʻá Ne ʻIate Au Maʻu Pē

ʻĪmisi

fefine loto-mafasia ʻoku lue

Tā fakatātaaʻi ʻe Trina Dalziel

Hili ha māhina ʻe tolu mei hono fāʻeleʻi ʻema pēpē fika nimá, naʻe holoki ʻe hoku husepānití ʻene maʻu vāhenga lolotongá ke kamataʻi ha ngāue maʻuʻanga moʻui foʻou mo kamata ʻene ako ʻunivēsití. Naʻe fiemaʻu ai ke mau hiki ki ha siteiti ʻe taha. ʻI heʻeku ongoʻi faingataʻaʻia fakapaʻanga mo fakatuʻasinó, pea nofo mamaʻo ʻi ha feituʻu foʻoú, ne kamata ke u ongoʻi loto-mafasia lahi.

Naʻe faingataʻa ʻa e ʻalu ki he lotú. Naʻá ku ʻalu pē, ka naʻá ku mavahe vave mei he ngaahi fakatahá ke ʻoua naʻá ku fetaulaki mo e ngaahi fehuʻi fiefia hoku ngaahi mahení fekauʻaki mo ʻeku fakafeangainga mo e ngaahi liliú. Naʻa nau ʻamanaki mai ke u fai atu ʻa e talí ʻi he loto-fiefia tatau, ka naʻe ʻikai ke u maʻu ha tali pehē. Naʻe faʻa talanoa ʻa e kāingalotu ʻo e uōtí fekauʻaki mo ʻenau monūʻia mo e fiefia ke maʻu ʻa e ongoongolelei ʻo Sīsū Kalaisí. Ko e hā e meʻa naʻe fehalaaki ʻiate aú?

Naʻá ku fua hoku fatongiá, pea naʻá ku fakamuʻomuʻanima pē ʻa e lotú mo e lau folofolá. Ka naʻe hangē naʻe ʻikai ke u ongoʻi ʻoku nau “ʻaonga ʻaupito” kiate aú.¹

Hili ha meimei taʻu ʻe taha mei ai, naʻe kamata ke mole atu ʻa e loto-mafasiá. Naʻe fakafou ʻi ha fanga kiʻi liliu iiki fakaeʻatamai, fakatuʻasino, fakasōsiale mo fakalaumālie, ʻa e kamata māmalie ke u tupulakí.

Hili ha ngaahi māhina mei ai, naʻe ʻikai ke u toe ongoʻi loto-mafasia, naʻá ku lotu ʻi he taimi ne u ongoʻi lōmekina ai ʻi he fifili mo e houngaʻia koeʻuhí ko e ngaahi tāpuaki ʻo hono moʻui ʻaki ʻo e ongoongoleleí. Naʻá ku ongoʻi naʻe ʻikai taau mo au ke u mohu tāpuekina. Ko e ʻOtuá naʻá Ne foaki mai ʻa e meʻafoaki fakalaumālie ʻo e tuí mo ha loto-holi ke ʻiloʻi Iá. Naʻá ku ngāueʻi pē ʻa e loto-holi naʻá Ne foaki kiate aú.

Naʻá ku lotu ʻo pehē, “Ko e hā ʻoku taau ai mo au ha ngaahi tāpuaki koeʻuhí ko hono fai ʻo e ngaahi meʻa naʻá Ke ʻosi fakatō ki hoku lotó ke u fie fakahokó?”

Naʻá ku ʻohovale ʻi Heʻene tali ʻeku lotú ʻi he taimi pē ko iá ʻaki ha ngaahi manatu melie mei he kuohilí.

“Fēfē ʻa e ngaahi taimi naʻá ke fekumi ai kiate Au neongo naʻe fakamamahi mo faingataʻá? ʻA e taimi naʻá ke fakavaivaiʻi ai ho lotó ki Haʻakú, naʻá ke kei haʻu pē ki he lotú, peá ke kei tokoni pē ki Heʻeku fānaú?” Naʻá ku ongoʻi mei he Laumālié, “ʻE hoku ʻofefine, ʻoku tāpuekina lahi koe ʻi hoʻo faivelengá—ʻi hoʻo fili Aú ʻo aʻu ki he taimi naʻe ʻikai ke ke loto ai ki aí.”

Naʻá ku pehē naʻe ʻuhinga ʻa e faivelengá ki hono maʻu maʻu pē ʻa e ngaahi fua ʻo Hono Laumālié. Kuó u ʻilo ʻeni ʻoku ʻuhinga ʻa e faivelengá ki he mateaki mo e angatonu kiate Ia—ʻo tatau ai pē pe ko e hā. ʻOku ʻikai liliu ʻa e moʻoni ʻa e ʻOtuá ʻi he tūkunga ʻo ʻeku lava pe taʻemalava ʻo fanongo pe ongoʻi Iá. ʻI he ngaahi taimi ʻo e fiefiá pe mamahí, kapau te u nofo mo Ia, te Ne ʻiate au maʻu pē.