“Ko e Hā ʻe Lava ke Akoʻi Mai ʻe he Palani ʻa e ʻOtuá fekauʻaki mo Iá?,” Liahona, Fēpueli 2024.
Haʻu, ʻo Muimui ʻIate Au
Ko e Hā ʻe Lava ke Akoʻi Mai ʻe he Palani ʻa e ʻOtuá fekauʻaki mo Iá?
ʻI hono akoʻi ʻe Sēkope hono kakaí fekauʻaki mo e palani ʻo e fakamoʻuí, ʻokú ne fiefia ʻi he meʻa kuo ʻomi ʻe he ʻOtuá maʻatautolú, tautautefito ki hono ikunaʻi ʻo e mate fakatuʻasinó mo fakalaumālié. ʻE lava ke tokoniʻi kitautolu ʻe he ngaahi fakafetaʻi mo e ngaahi akonaki ʻa Sēkopé ke tau fakatokangaʻi ha niʻihi ʻo e ngaahi ʻulungaanga fakalangi ʻo e ʻOtuá. ʻI he taimi ʻoku tau fakatokangaʻi ai hono fakaʻaongaʻi ʻe he ʻOtuá ʻa e ngaahi ʻulungaanga ko ʻení ke faitāpuekina ʻetau moʻuí, te tau lava ʻo fakatupulaki ha vā fetuʻutaki vāofi ange mo Ia.
Ngaahi ʻUlungaanga Faka-ʻOtuá
ʻI hoʻo ako ʻa e 2 Nīfai 9, fakakaukau ke ke fekumi ki he ngaahi ʻulungaanga faka-ʻOtua naʻe fakahīkihikiʻi ʻe Sēkopé.
ʻE lava fēfē ʻe he ngaahi ʻulungāngá ni takitaha ʻo ʻomi kiate kitautolu ʻa e fiefiá?
-
Poto (veesi 8)
-
ʻAloʻofa (veesi 8, 19, 53)
-
Manavaʻofa (veesi 53)
-
Angalelei (veesi 10)
-
Maʻongoʻonga (veesi 17, 40)
-
Fakamaau Totonu (veesi 17)
-
Māʻoniʻoni (veesi 20)
-
ʻIkai ke Kākā (veesi 41)
Muimui ʻi he sīpinga ʻa Sēkopé pea fakafonu ʻa e konga ʻoku ʻataá ʻaki ʻa e ngaahi ʻulungaanga kuó ke mamata ʻoku fakatātaaʻi ʻe he ʻOtuá: “ʻOiauē hono ʻikai ke maʻongoʻonga ʻa e ________ ʻa hotau ʻOtuá.”
Fakatokangaʻi ʻa e fekauʻaki ʻa e ngaahi ʻulungaanga ko iá mo e meʻa kuo fai ʻe he ʻOtuá. Ko e hā ha ngaahi meʻa maʻongoʻonga kuó Ne fai koeʻuhí ko Hono tuʻungá?