“ʻE Lava Fēfē Ke Tau ‘Nofo ʻi he Fiefiá’?,” Liahona, Fēpueli 2024.
Haʻu, ʻo Muimui ʻIate Au
ʻE Lava Fēfē Ke Tau “Nofo ʻi he Fiefiá”?
ʻI he moʻuí ni, ʻoku tau faʻa fakahoko ai ʻa e fehalaaki ʻo e tui ko e fiefiá ko hono fakahoko pē ha ngaahi meʻa fakafiefia pe ʻikai hoko ha ngaahi palopalemá. Ka neongo ia, fakatatau ki he Tohi ʻa Molomoná, ʻoku lahi ange ʻa e fiefia tuʻuloa ʻi heʻete hoko ko ha tokotaha ʻoku muimui ʻia Sīsū Kalaisí.
Naʻe pehē ʻe Nīfai, “Naʻa mau nofo ʻi he fiefia” (2 Nīfai 5:27). Ka naʻe ʻuhinga nai ia naʻa nau fiefia koeʻuhí he naʻe faingofua ʻenau moʻuí? ʻIkai! ʻOku fakamatalaʻi ʻe Nīfai ʻi he 2 Nīfai 4 ha ngaahi palopalema naʻe fakatupu loto-mamahi kiate ia. ʻOku tau ako ʻi he vahe 5 ʻa e meʻa ʻoku kau ʻi he fiefia moʻoní.
Ngaahi Tupuʻanga ʻo e Fiefiá
ʻE lava fēfē ʻe he ngaahi meʻá ni takitaha ʻo ʻomi kiate kitautolu ʻa e fiefiá?
-
Fāmilí mo e ngaahi fetuʻutaki vāofí (vakai, 2 Nīfai 5:6)
-
Talangofua ki he ngaahi fekaú (vakai, 2 Nīfai 5:10)
-
Ngāué mo e moʻui fakafalala pē kiate kitá (vakai, 2 Nīfai 5:11, 14, 15, 17)
-
Moihū ʻi he temipalé (vakai, 2 Nīfai 5:16)
-
Ngāue fakaetauhí (vakai, 2 Nīfai 5:26)
Ko e Hā ʻa e Fiefia Moʻoni?
“ʻOku feinga ha kakai tokolahi ke maʻu ʻa e fiefiá mo e lavameʻá ʻi ha ngaahi ʻekitivitī ʻoku fehangahangai mo e ngaahi fekau ʻa e ʻEikí. …
“ʻOku fekumi ha niʻihi ki ha ngaahi meʻa pē ke fiefia ai ʻi he moʻuí. ʻI he hoko ʻeni ko ʻenau tefitoʻi taumuʻá, ʻoku nau tuku ai ʻa e fiefia fakataimí ke ne tohoakiʻi kinautolu mei he fiefia ʻoku tuʻuloá. ʻOku nau kaihaʻasi meiate kinautolu ʻa e fiefia tuʻuloa ʻo e tupulaki fakalaumālié, ngāue tokoní, mo e ngāue mālohí.
“ʻI heʻetau feinga ko ia ke fiefiá, ʻoku totonu ke tau manatuʻi ko e founga pē taha ki he fiefia moʻoní ko e moʻui ʻaki ʻa e ongoongoleleí. Te tau maʻu ʻa e fiefia ʻoku nonga mo taʻengatá ʻi he taimi ʻoku tau feinga ai ke tauhi ʻa e ngaahi fekaú, lotua ha ivi, fakatomala mei he ngaahi angahalá, kau ʻi he ngaahi ʻekitivitī langaki moʻuí, mo fakahoko ha ngaahi ngāue tokoni ʻoku ʻaongá.”1