“Usa ka Lig-on nga Pundasyon: Pagtudlo sa mga Anak bahin sa Pamahayag sa Pamilya,” Liahona, Abr. 2024.
Usa ka Lig-on nga Pundasyon: Pagtudlo sa mga Anak bahin sa Pamahayag sa Pamilya
Sa usa ka kalibotan nga nagtudlo og daghan kaayong lainlaing pilosopiya ug gani mga dili tinuod mahitungod sa pamilya, kinahanglan tudloan nato ang mga anak sa doktrina sa pamilya diha sa mahangtorong plano sa Langitnong Amahan.
Kapin sa 25 ka tuig na ang milabay, si Presidente Gordon B. Hinckley (1910–2008) mibasa sa “Ang Pamilya: Usa ka Pamahayag ngadto sa Kalibotan” diin ang Unang Kapangulohan ug Korum sa Napulog Duha ka Apostoles maisogon nga mipahayag sa klaro nga mga kamatuoran kabahin sa pamilya nga mao ang sentro sa plano sa Dios alang sa Iyang mga anak nga lalaki ug mga anak nga babaye.1
Nianang panahona, ingon og ang kadaghanan sa kalibotan miuyon sa unsay iyang gisulti. Karon, daghan sa mga baroganan nga klaro kaayo kaniadto gihagit karon. Si Presidente Dallin H. Oaks, Unang Magtatambag sa Unang Kapangulohan, mipasabot, “Klaro diha sa atong pamahayag sa pamilya, ang mga miyembro sa Ang Simbahan ni Jesukristo sa mga Santos sa Ulahing mga Adlaw napanalanginan og talagsaon nga doktrina ug nagkalain-lain nga mga paagi sa pagtan-aw sa kalibotan.”2
Ang pagsabot ug pagtuo sa plano sa Langitnong Amahan sa kaluwasan ug sa mahinungdanong tahas nga buhaton sa pamilya diha niana nga plano naghatag kanato og usa ka lig-on nga pundasyon. Ang awit sa Primary nagpasidaan, “Ang way kaalam nagtukod og balay, ug ang ulan mibuhagay”3 … ug ang balay diha sa balas nahugno! Daghan sa mga pilosopiya sa kalibotan kalabot sa pamilya gitukod diha sa balas o gani sa mga dili tinuod, mao nga importante nga magmatngon.
Usa ka importante kaayo nga butang nga atong mabuhat sa pagtabang sa atong mga anak sa pagsugakod sa mga hagit sa kataposan nga mga adlaw mao ang pagtabang kanila nga makabaton og klaro nga pagsabot sa mga kamatuoran nga klarong gisulti diha sa pamahayag. Ang pagbaton og usa ka lig-on nga pagsabot niadto nga mga baroganan ug usa ka pagpamatuod sa katinuod niini motabang sa atong mga anak sa paghupot sa ilang mga tinuohan nga labing importante. Sa usa ka pakigpulong nga giulohan og “Mga Tigpanalipod sa Pamahayag bahin sa Pamilya,” si Sister Bonnie L. Oscarson kanhi Kinatibuk-ang Presidente sa Young Women, maisogon nga mihagit kanato: “Ang tanan … makapanalipod sa plano sa Ginoo nga gihulagway diha sa pamahayag bahin sa pamilya. Kon kini plano sa Ginoo, kinahanglan nga ato usab kini nga plano!”4
Aniay pipila ka ideya nga mahimong makatabang samtang kamo motudlo sa inyong mga anak sa importansiya sa pamilya diha sa mahangtorong plano sa Langitnong Amahan.
Pagmemorya
Usa ka nindot kaayo nga paagi nga mahimong mahinumdoman kanunay kini nga mga kamatuoran diha sa mga hunahuna sa atong mga anak mao ang pagsag-ulo niini. Nadasig ko sa mga bata sa Primary sa akong ward sa California nga magkaubang misag-ulo sa pamahayag. Matag bulan mobarog sila ug mosaysay sa mga seksiyon sa pamahayag hangtod nga nasag-ulo nila kini tanan.
Makadasig kita sa atong mga anak ug mga apo sa pagsag-ulo sa pamahayag. Mahimo gani nga adunay ganti! Kon kamo wala pa makasag-ulo niini sa inyong kaugalingon, makalingaw kining buhaton og dungan!
Samtang gipadako namo ang among mga anak didto sa Habagatang California latas sa tanang politikanhong kasamok nga naghagit sa tradisyonal nga kaminyoon, ilang nakat-onan og maayo ang mga pulong nga, “Ang kaminyoon tali sa usa ka lalaki ug usa ka babaye gi-orden sa Dios.” Ug gisubli nila kadto nga mga pulong kadaghan sa dihang gipangutana mahitungod sa ilang mga tinuohan.
Ang pagbaton niini nga mga pulong nga nasabtan og maayo diha sa mga hunahuna sa atong mga anak motabang kanila samtang mag-atubang sila og mga sitwasyon diin sila tingali adunay mga pangutana sa ilang kaugalingon o pangutan-on mahitungod sa ilang mga tinuohan. Ang hugpong sa mga pulong nga adunay kamatuoran mas sayon nga mosantop sa ilang mga hunahuna (tan-awa sa Juan 14:26).
Panaghisgotan
Sa panimalay ang atong mga anak mahimong magkat-on sa kamatuoran ug magkat-on kon unsaon sa pagpasabot sa ilang mga hiyas ug mga baroganan. Ang paghimo niini nga mga panaghisgotan molig-on sa ilang mga pagpamatuod bahin sa pamilya ug motugot sa Espiritu sa pagpamatuod sa mga kamatuoran nga ilang nadunggan.
Samtang aduna kita niini nga mga panaghisgotan, importante kaayo nga atong isulti ang mga kamatuoran gikan sa pamahayag sa tataw ug walay pagbasol nga paagi. Sama pananglit, kita nagtudlo nga ang kaputli sa dili pa ang kaminyoon ug ang pagkamaunungon pagkahuman higpit nga mga sumbanan: “Ang Dios misugo nga ang sagrado nga mga gahom sa paglalang pagagamiton lamang tali sa lalaki ug babaye, kinsa legal nga naminyo isip bana ug asawa.” Kita nagtudlo nga ang sekswal nga kaputli mopanalipod kanila.
Makatabang nga ipapangutana ang mga bata ug ipahatag ang ilang mga opinyon samtang aduna kita niini nga mga panaghisgotan. Pangutan-a sila, “Unsa kaha ang gipasabot sa mga propeta ug apostoles sa dihang miingon sila, ‘Kami mopamatuod sa pagkabalaan sa kinabuhi ug sa iyang pagkamahinungdanon diha sa walay kataposan nga plano sa Dios’? Ngano kaha nga importante kini?”
Ang among pamilya naapil gayod og maayo sa mga paningkamot sa komunidad ug sa politika agi og suporta sa pamilya, mao nga kanunay kami nga naghisgot mahitungod niini nga mga butang ug adunay daghang emosyonal nga mga panag-istoryahanay diin gipakigbahin ug gidebatehan ang mga opinyon. Isip resulta, ang matag usa sa among mga anak nahimong masaligon sa ilang kaugalingon nga mga tinuohan ug sa ilang abilidad sa pagpahayag niini.
Sama pananglit, ang akong kinamanghoran nga anak nga lalaki mikuha og klase sa biyolohiya [biology] gikan sa usa ka magtutudlo kinsa dayag nga nakigbatok sa atong mga tinuohan. Ang magtutudlo mihagit kaniya, “Nasayod ba ang imong inahan nga anaa ka sa akong klase?”
“Oo, sir,” mitubag siya.
Mga usa ka bulan ang milabay gipangutana nako ang akong anak nga lalaki, “Kumusta man ang imong klase sa biyolohiya?”
“Ma, gihagit ko sa magtutudlo kada adlaw,” siya mitubag.
Nasagmuyo ko. “Mahimong paundangon dayon ka namo niana nga klase!” Miingon ko.
“Ayaw lang, Ma,” mitubag siya. “Kada adlaw iyang hagiton ang akong mga tinuohan, ug kada adlaw gisubli nako kon unsay akong gituohan,” siya mipasabot. “Ug hapit kada adlaw dunay usa ka tawo nga moduol kanako human sa klase ug magpasalamat kanako. Nagsulti sila nga nagtuo sila sama kanako apan nahadlok og maayo sa pagsulti og bisan unsa.”
Mapasigarbohon kaayo ko kaniya sa pagkahimong lig-on sa atubangan nianang direkta nga mga hagit ug mga pangutana.
Sa kataposan sa semestre, ang magtutudlo miduol kaniya. “Aw, kinahanglang hatagan ko ikaw og pasidungog,” siya miingon. “Nakahimo ka og nindot nga buhat sa pagbarog alang sa unsay imong gituohan.”
Ang pagbaton niadtong tanang panaghisgotan sa pamilya nakaandam kaniya og maayo.
Pag-Drama-Drama
Sa kalibotan karon, ang doktrina sa pamilya gihagit ug gikwestiyon kada adlaw. Ang pag-drama-drama makatabang sa atong mga anak nga mahimong mas lig-on sa ilang hugot nga pagtuo ug pagsabot.
Mahimo kamong mag-home evening diin inyong ma-drama-drama ang mga panag-istoryahanay mahitungod sa piho nga mga pangutana. Sama pananglit, ang inyong anak nga lalaki mahimong mo-drama-drama sa papel sa usa ka higala nga nangutana, “Ang inyong simbahan ba nag-aprobar sa kaminyoon sa managsamang sekso?” Ang inyong anak nga babaye mahimong mao ang magpasabot, “Ang atong mga lider miingon, ‘Ang pamilya gi-orden sa Dios. Ang kaminyoon tali sa lalaki ug babaye mahinungdanon ngadto sa Iyang walay kataposan nga plano.’ Mao kini ang akong gituohan, apan nakasabot ko nga ang uban mahimong lahi og gituohan.”
Mahimo kamong mangutana, “Para ninyo importante ba ang mga papa?” Tungod kay pamilyar sila sa pamahayag sa pamilya, ang inyong mga anak naghunahuna, “Pinaagi sa balaan nga plano, ang mga amahan mao ang mangulo sa ilang mga pamilya diha sa gugma ug sa pagkamatarong ug may kapangakohan sa pagsangkap sa mga kinahanglanon sa kinabuhi ug sa pagpanalipod sa ilang mga pamilya.” Usa ka anak mahimong motubag pinaagi sa pagsulti, “Importante kaayo ang mga papa sa pag-atiman sa ilang mga pamilya ug sa pagpabilin kanato nga luwas. Ang akong papa usa ka bantogan nga papa—mapasalamaton kaayo ko alang kaniya!”
Kini nga mga drama-drama mahimong mahagiton sa sinugdanan, apan samtang magpadayon sa pagpraktis ang inyong mga anak, ang mga tubag mas sayon nga moabot. Ang mga anak nga nakapraktis sa usa ka tubag mahimong mas masaligon ug klaro sa ilang mga tubag ug dili maratol ug segurado kon unsaon sa pagsulti ang unsay ilang gituohan.
Pagpalambo og Lig-on nga mga Pagpamatuod
Samtang tabangan nato ang atong mga anak nga magtuon ug ilakip ang mga baroganan nga makita diha sa pamahayag, mopalambo sila og lig-on nga mga pagpamatuod sa importansiya sa mga pamilya, kaminyoon, mga ginikanan, ug kinabuhi.
Sa Oktubre 2017 nga kinatibuk-ang komperensiya, si Presidente Oaks mipamatuod:
“Ang pamahayag sa pamilya usa ka pahayag sa mahangtorong kamatuoran, sa kabubut-on sa Ginoo alang sa Iyang mga anak [kinsa nagtinguha og kinabuhing dayon]. Kini ang basehanan sa pagtudlo ug pamaagi sa Simbahan sulod sa 22 ka tuig ug magpadayon kini alang sa umaabot. Ikonsiderar kini, itudlo kini, sunda kini, ug kamo mapanalanginan samtang magpadayon kamo ngadto sa kinabuhing dayon.
“Kwarenta ka tuig na ang milabay, si Presidente Ezra Taft Benson mitudlo nga ‘ang matag henerasyon adunay mga pagsulay ug kahigayonan sa pagbarog ug pagpamatuod sa kaugalingon niini.’ Nagtuo ko nga ang atong kinaiya ngadto sa ug sa paggamit sa pamahayag sa pamilya usa sa mga pagsulay alang niini nga henerasyon. Ako nag-ampo alang sa tanang mga Santos sa Ulahing mga Adlaw sa pagbarog nga lig-on niana nga pagsulay.”5
Sama sa gisulti sa awit sa Primary, “Ang tawong maalam nagtukod og balay, didto ibabaw sa kabatohan. … Ang balays’ bato wa maguba.”6 Makatabang kita sa atong mga anak nga mahimong lig-on sa ilang pagsabot sa pamilya ug sa mga kamatuoran sa plano sa kaluwasan. Mamahimo kining talagsaon nga panalangin ngadto kanila ug sa paglig-on sa ilang hugot nga pagtuo samtang magpuyo sila latas niining mahagiton nga kataposang mga adlaw.
Ang tagsulat nagpuyo sa Utah, USA.