Digital Lamang: Mga Young Adult
Gibati og Kamingaw? Aniay 3 ka Giya nga Naghimo og Kalainan alang Kanako
Ang tagsulat nagpuyo sa Cuneo, Italy.
Ang pagkamiyembro sa Simbahan sa Italy mahimong mamingawon, apan nakakat-on ako nga wala gayod ako mag-inusara.
Nagpuyo ako sa usa ka gamay nga lungsod sa Italy, diin adunay upat lamang ka single adult sa akong branch.
Kadaghanan sa mga tawo dinhi nagbansay og Katolisismo, busa sila konektado pinaagi sa ilang gipakigbahin nga mga tinuohan. Kasagaran nakong gibati nga wala ako sa hustong lugar isip usa ka miyembro sa Ang Simbahan ni Jesukristo sa mga Santos sa Ulahing mga Adlaw.
Kini sayon nga bation sama nga ako nag-inusara kon maningkamot nga mahimong mas mahisama sa Manluluwas. Naghimo ako sa labing maayo sa pagsunod Kaniya. Ako gustong modawat sa mga pagdapit ni Presidente Russell M. Nelson sa “buntoga ang kalibotan”1 ug sa “paghunahuna og celestial,”2 apan usahay ako nawad-an og kadasig kon bation nako nga ako nagbarog nga nag-inusara sa akong pagtuo.
Hinoon, kon ang kamingaw moabot, pipila ka mga nabatasan nagtabang kanako sa pagpadayon sa unahan uban sa hugot nga pagtuo. Aniay tulo ka giya nga nagtabang kanako sa pagbuntog niana nga kamingaw.
Himoa ang Pagbasa sa mga Kasulatan nga usa ka Batasan
Kon akong bation ang hilabihan kamingaw, mohunong ako sa makadiyot sa pagtawag ngadto sa Langitnong Amahan pinaagi sa pag-ampo. Sultihan ko Siya kon unsay akong gibati ug dayon ablihan ang akong mga kasulatan. Sa usa ka paagi, ako kanunay nga makakaplag sa mga kamatuoran nga akong kinahanglang madunggan diha niana nga higayon.
Samtang ang mga bersikulo dili sa kanunay mohulagway sa akong eksakto nga kahimtang, ang mga kamatuoran diha niini mopuno sa akong kasingkasing uban sa paglaom ug kahamugaway. Ang kamingaw nagkagamay kon ako adunay hilom nga mga higayon sa pagpamalandong sa mga pulong sa karaang mga propeta kinsa nagpamatuod ni Kristo.
Sila kanunay nga nagpahinumdom kanako nga ako gihigugma, nga ang Ginoo nagpakabana sa akong mga kahimtang, ug nga ang mga butang mahimong OK.
Ang paghimo og batasan sa kanunay nga pagbasa sa akong mga kasulatan ug sa pag-ampo, bisan kon kini malisod, nagtabang kanako sa pagbati og mas malipayon, mas masaligon, ug mas konektado ngadto sa Espiritu.
Kon atong dapiton ang Manluluwas nganhi sa atong mga kinabuhi pinaagi sa pagtuon sa mga kasulatan, Siya sa kanunay anaa diha, nagpahinumdom kanato kon kinsa kita ug sa pagkonektar kanato ngadto sa Langitnong Amahan.
Hinumdomi ang Makatubos nga Gahom ni Jesukristo
Ako sa kanunay modangop ngadto ni Jesukristo sa pagpangita og kapasayloan ug kalinaw. Apan ako usab miabot sa pagsabot nga Siya makahatag kanako og suporta kon ako mobati nga nag-inusara.
Gipasabot ni Elder Jeffrey R. Holland nga sa dihang ang Manluluwas nag-antos diha sa Tanaman sa Getsemani, “Siya [mi]tuaw diha sa kataposang kamingaw, ‘Dios ko, Dios ko, nganong gitalikdan mo ako?’ [Mateo 27:46].”
Si Elder Holland mipadayon: “Personal nako kini nga pagtuo nga sa tanang mortal nga pangalagad ni Kristo ang Amahan wala pa gayod sukad mahimong suod kaayo sa Iyang Anak kay sa niadtong kinasakitan nga kataposang gutlo sa pag-antos. Bisan pa, aron ang kinadak-ang sakripisyo sa Iyang Anak tingali maingon ka hingpit kay kini boluntaryo man ug nag-inusara, ang Amahan sa mubong higayon mitangtang gikan kang Jesus sa kahupayan sa Iyang Espiritu, mitangtang sa Iyang personal nga presensya. … Kadto gikinahanglan, sa pagkatinuod mao kadto ang sentro sa kamahinungdanon sa Pag-ula, nga kining perpekto nga Anak kinsa wala gayod makapamulong og dautan, wala makabuhat og sayop, wala makahikap og mga hugaw nga butang, kinahanglang masayod kon unsay bation sa ubang tawhanong kaliwat—kitang tanan—kon kita makabuhat sa ingon nga mga sala.”3
Tungod niini, nahibalo Siya kon unsaon sa pagtabang kanato (tan-awa sa Alma 7:11–12). Siya nahibalo sa eksakto kon giunsa nato sa pagbati.
Gilakaw kana nga dalan ni Jesukristo nga nag-inusara aron kita dili kinahanglan nga mohimo sa mao. Ang pagkat-on mahitungod Kaniya ug sa pagtutok diha sa Iyang makatubos nga gahom naghatag kanako og kahupayan, paglaom, ug kalig-on sa pagpadayon sa unahan uban sa hugot nga pagtuo.
Pagmabination sa Imong Kaugalingon
Kon bation ko ang kamingaw, ang pagmabination sa akong kaugalingon naghimo og dako kaayong kalainan. Akong amumahan ang akong salabutan sa mga positibo nga mga hunahuna tungod kay akong naamgohan nga ako mao ang tawo kinsa ako mogahin sa nahibilin sa akong kinabuhi! Busa, kinahanglan ako magbaton og maayong relasyon uban sa akong kaugalingon.
Ang kamingaw mosamot lamang ka mas grabe kon kita dili mabination sa atong mga kaugalingon.
Gitagad ko ang akong kaugalingon sama sa usa ka higala. Nagpahinumdom ako sa akong kaugalingon kon kinsa ako ug nga bisan tuod ako dili hingpit, kanunay akong makahinulsol ug magpabiling maninguha sa pagsunod ni Kristo. Si Elder Gary E. Stevenson bag-ohay midapit kanato sa “hunong kon motan-aw kamo sa inyong kaugalingon sa samin. Hunahunaa sa inyong kaugalingon, o isulti og kusog kon gusto ninyo, “Wow, tan-awa ko! Talagsaon ako! Ako usa ka anak sa Dios! Siya nakaila kanako! Siya nahigugma kanako! Ako gigasahan—sa Espiritu Santo isip akong makanunayon nga kauban!’”4
Busa, akong buhaton. Motan-aw ako sa salamin ug mosulti sa akong kaugalingon niini nga mga butang. Ug unya ako mokatawa tungod kay gibati ko nga murag buang, apan gibati ko usab ang ka mas may pagsalig, gihigugma, ug konektado ngadto sa Espiritu.
Kon ikaw imong kaugalingong higala, dili gayod ikaw mobati nga ikaw walay usa ka higala.
Wala Ka Gayod Mag-inusara
Usahay bation ko nga ako lamang usa ang nagsinati og pipila ka hagit. Apan nagpahinumdom ako sa akong kaugalingon nga adunay daghan kaayo nga batan-ong hamtong sa tibuok kalibotan kinsa anaa sa sama nako nga sitwasyon. Bisan kon wala ako makaila kon kinsa sila, sila naningkamot usab sa pagbarog uban ni Kristo.
Wala ako mag-inusara.
Si Elder Alan T. Phillips sa Seventy bag-ohay miingon: “Daghang tawo mobati nga nabug-atan, nag-inusara nahilayo, o naluya. … Ang pagkahibalo nga kitang tanan mga anak sa Dios ug mga sakop sa Iyang mahangturong pamilya mopahiuli sa pagbati nga nahisakop ug may katuyoan.5
Ang Langitnong Amahan nahigugma kanato. Nakahatag Siya kanato sa mga himan sa pagkonektar kanato ngadto Kaniya, sa Iyang Anak, ug sa usag usa. Kita kinahanglan lamang nga maghinumdom sa paggamit niini.
Siya nakaila kaninyo. Siya nag-uban kaninyo. Ayaw pagpakawala og paglaom. Pun-a ang inyong kinabuhi sa Espiritu, ug hinumdomi nga isip anak sa Dios, kamo nahisakop sa Iyang mahangturong pamilya.
Kamo wala gayod mag-inusara.