Pagtukod og Malungtarong Gugma: Usa ka Giya sa Pag-atubang og mga Hagit Samtang anaa sa usa ka Relasyon

Gustavo: Sa among unang date, gilista ni Claudiana ang pipila sa importanting mga butang nga gusto niya kanako nga mahibalo mahitungod kaniya.

1. Dili siya gusto nga makigdate aron lamang maka-boyfriend. Gusto niya nga makakaplag og usa ka tawo kinsa nangita alang sa usa ka relasyon nga sa kadugayan mogiya ngadto sa kaminyoon.

2. Gusto siya og usa ka kapikas kinsa nakigbahin sa iyang mga bili ug mga tinuohan.

Niana nga panahon, ako dili usa ka miyembro sa Ang Simbahan ni Jesukristo sa mga Santos sa Ulahing mga Adlaw. Giklaro ni Claudiana nga, bisan tuod og dili niya ipamugos ang iyang tinuohan ngari kanako, mituo siya nga ang pagpakigbahin og mga bili mogiya ngadto sa usa ka mas maayo og mas malipayon nga kaminyoon.

Claudiana: Naguol ako nga si Gustavo maghunahuna nga ako buang sa pagsulti kaniya niini nga mga butang diha sa among unang date. Apan ako gusto kaniya nga mosabot sa akong mga gipaabot ug nga ako dili mogahin og panahon sa usa ka relasyon nga matapos sa kapakyasan. Mirespeto si Gustavo sa akong mga sumbanan ug nainteresado sa akong tinuohan—ug tungod niini, ako andam sa paghatag kaniya og higayon. Ang paghimo sa akong mga gipaabot og klaro mitugot kanamo nga magsinabtanay sayo sa among relasyon ug milig-on sa among pasalig ngadto sa usag usa kon ang panahon magkalisod.

Claudiana: Sa kinalisdan sa akong sakit, ang akong hugot nga pagtuo misugod sa pagkahuyang. Nagtuo ako nga ang Langitnong Amahan wala maminaw sa akong mga pag-ampo, ug ako naghunahuna kon unsay akong nahimo nga angay niini nga pag-antos. Sa panahon sa usa ka paghiling sa ospital, diha ako sa grabe nga kasakit nga nagtuo ako nga padulong na ako nga mamatay. Niini nga higayon, nahadlok ako alang sa akong kinabuhi ug sa akong umaabot, apan gibitad ako ni Gustavo ug mipahinumdom kanako sa mga butang nga akong natudlo kaniya og balik sa dihang siya nag-imbestigar sa Simbahan.

“Karon ang panahon sa pagbansay niadtong mga pagtulon-an,” siya miingon. “Ikaw kinahanglang magbaton og hugot nga pagtuo.”

Akong nahunahuna ang Ether 12:12: “Kay kon wala ang hugot nga pagtuo taliwala sa mga katawhan ang Dios dili makahimo og milagro taliwala kanila; busa, siya wala mopakita sa iyang kaugalingon hangtod human sa pagsulay sa ilang hugot nga pagtuo.” Mitabang si Gustavo kanako sa pagtuo diha sa usa ka milagro—kon wala siya, mahimong ako mawad-an og paglaom. Mipahinumdom siya kanako sa mahangturong gugma ug sa makahatag og gahom sa Langitnong Amahan ug ni Jesukristo ug nga ako dili halayo sa ilang gisaad nga mga panalangin. Ako walay kataposan nga mapasalamaton nga siya mitabang sa paghupot sa kalayo sa hugot nga pagtuo nga buhi diha kanako.

Si Gustavo wala lamang misuporta (ug nagpadayon sa pagsuporta) kanako sa espirituhanong paagi, apan siya usab misuporta kanako sa emosyonal nga paagi. Sa dihang ako nasakit, ang mga tawo nalooy kanako ug mibati og kahadlok alang kanako, apan si Gustavo wala. Natural lamang, naminaw siya sa akong mga kaguol ug migakos kanako kon ako mihilak, apan siya usab miawhag kanako, nangomedya kanako, ug mipagawas kanako sa balay kon ako nasubo. Si Gustavo usa ka kahayag ngari kanako atol niining mangitngit nga panahon ug mitabang sa pagsilsil og pagsalig diha kanako nga gikuha sa akong sakit.

Kon ang inyong importante nga kauban nakigbisog, buhat og mga butang nga mobayaw kanila. Ipakita kanila nga kamo nabalaka mahitungod kanila. Pagsuporta kanila kon sila malipayon ug sa panahon nga sila magul-anon. Tabang kanila sa pagpalig-on sa ilang relasyon ngadto sa Langitnong Amahan ug ni Jesukristo. Nagbuhat si Gustavo niini nga mga butang. Ang iyang pagkamalaumon ug gugma mitabang kanamo sa pagtukod og usa ka relasyon nga misugakod sa akong sakit.

Gustavo: Ang sakit ni Claudiana dili lamang mao ang among kalisod. Samtang kami nakig-date, dihay mga panagsang panahon sa panaglalis tali kanamo. Usa ka adlaw mihukom kami nga manglingkod ug mag-istoryahanay mahitungod sa mga butang nga among gibuhat nga nakapasakit o mihimo sa usa nga dili komportable.

Kini nga panag-istoryahanay mihimo og dako kaayo nga kalainan tungod kay kami nahimong nakaalinggat sa mga kinaiya nga kami walay ideya nga nag-apektar sa among koneksiyon. Kini imposible ang pagbasa sa hunahuna sa laing tawo, busa kini importante nga magmatinuoron mahitungod sa unsa ug unsa ang wala molihok sa among relasyon. Samtang si Claudiana ug ako nagpadayon sa paghimo sa among mga panginahanglan nga mahibaloan ngadto sa usag usa ug naghangyo sa Langitnong Amahan alang sa panabang sa pagbuntog sa among mga kahuyang (tan-awa sa Ether 12:27), nakahimo kami sa pagdala og mas maayo sa panaglalis ug sa mga walay panag-uyon.

Sila ni Claudiana ug Gustavo: Isip mga miyembro sa Simbahan, kini sayon sa paglaom nga ang Dios mosulti sa eksakto kon kinsa ang minyoan ug dayon mohatag kanato og usa ka hingpit nga relasyon. Ang kamatuoran mao, bisan og ang Langitnong Amahan makabuhat “og maayo sa tanang butang uban kanila nga mga nahigugma [Kaniya]” (Mga Taga-Roma 8:28), Siya naghatag pag-ayo og bili sa atong kabubut-on sa paghimo niini nga mga desisyon alang kanato.

Si Presidente Dieter F. Uchtdorf, kanhi Ikaduhang Magtatambag sa Unang Kapangulohan, miingon:

“Ang talagsaong mga kaminyoon gitukod sa tinagsa-tagsa, matag adlaw, sa tibuok kinabuhi.

Ug kana maayo nga balita.

Tungod kay bisan unsa ka tab-ang ang inyong relasyon tingali sa kasamtangan, kon padayon kamong maningkamot nga mas magmabination, mapuanguron, maminaw, magsakripisyo, masinabtanon, ug sa pagkadili hakog, sa katapusan usa ka gamhanan nga piramide mosugod sa pagtubo.

“Kon kini ingon og mokabat sa kahangtoran hinumdomi: ang malipayon nga kaminyoon gituyo aron molungtad sa kahangtoran!”¹

Kon kamo anaa sa usa ka relasyon uban sa usa ka tawo kinsa nagsinati og seryosong mga kabalaka sa panglawas o ubang mga panlimbasog nga mahimong moapektar sa inyong kaugmaon, tuo sa gahom sa Dios nga motabang. Mainampoong pakigtambag Kaniya ug paningkamot og pagpadayag alang sa inyong talagsaong mga kahimtang nga mahibalo kon unsaon sa pagpadayon sa unahan. Samtang inyong i-apil ang Langitnong Amahan ug si Jesukristo sa inyong relasyon, hupti ang inyong mga pakigsaad, tutoki ang inyong gipakigbahin nga mga bili, suporta sa usag usa, ug i-prayoridad ang komunikasyon, kamo usab makatukod og usa ka gugma nga molungtad.