Digital Lamang
Akong Nahimo ang Tanan isip usa ka Ginikanan. Sa Unsang Paagi ang Akong mga Anak Nakahimo Gihapon sa Pagbiya sa Simbahan?
Ang tagsulat nagpuyo sa Utah, USA.
Sa dihang pipila sa akong mga anak mibiya sa kalihokan sa Simbahan, akong gihunahuna kon nganong ako wala magsinati sa gisaad nga mga panalangin sa tanan nga mga kalihokan sa ebanghelyo nga among nabuhat nga nag-uban isip usa ka pamilya sa mga tuig nga nanglabay. Tulo ka pakigpulong sa kinatibuk-ang komperensiya mitabang kanako sa pagpadayon sa unahan uban sa hugot nga pagtuo.
Sa dihang ako nahimong usa ka ginikanan, gibati ko ang bug-at nga responsibilidad sa pagsuporta sa akong mga anak diha sa dalan sa pakigsaad ug sa paghimong siguro nga sila misunod sa plano sa Langitnong Amahan.
Sugod sa akong ten-edyer nga mga tuig, akong namatikdan ang tambag ngadto sa mga ginikanan sa hapit tanan nga kinatibuk-ang komperensiya, lakip ang mosunod:
-
Si Presidente Ezra Taft Benson (1899–1994) misulti kanamo nga kon kami “mosugod og usa ka seryoso nga pagtuon” sa Basahon ni Mormon, kami “makakaplag og mas dakong gahom sa pagsalikway sa tintasyon[,] … sa gahom sa paglikay sa paglingla[,] … [ug] sa gahom sa pagpabilin diha sa higpit ug hiktin nga dalan.”1 Busa ako nahibalo nga ang akong pamilya mobasa sa Basahon ni Mormon isip usa ka pamilya sa matag adlaw.
-
Gitudlo sa pamahayag sa pamilya nga ang “mga ginikanan adunay sagradong katungdanan sa pag-amuma sa ilang mga anak sa paghigugma ug sa pagkamatarong, … ug sa pagtudlo kanila sa paghigugma ug pag-alagad sa usag usa, [ug sa] pagsunod sa mga sugo sa Dios[.] … Mga bana ug mga asawa—mga inahan ug mga amahan—adunay tulubagon sa atubangan sa Dios sa pagtuman niini nga mga kapangakohan.”2
-
Nagpahinumdom kanato si Presidente M. Russell Ballard (1928–2023) nga aron sa “pagpanalipod ug pagpatunhay ug paglig-on sa atong mga panimalay ug mga pamilya sa kalibotan nga nagbira og maayo sa pikas nga direksiyon,” kinahanglan kita nga “kanunaya gayod sa paghimo ang pag-ampo sa pamilya ug senemanang mga family home evening[,] … itudlo ang ebanghelyo ug ang sukaranang mga hiyas diha sa inyong panimalay[, ug] … pagmugna og makahuluganong mga bugkos sa panimalay nga mohatag sa inyong mga anak og ilhanan nga mas lig-on pa kaysa ilang makit-an sa ilang kaedad o sa eskwelahan o bisan asa man.”3
Isip usa ka batan-ong inahan, ako mihubad tanan niini nga mga panudlo nga nagpasabot nga kini akong responsibilidad sa pagluwas sa akong mga anak. Akong gibati nga kon akong buhaton kining tanang mga butang uban sa akong pamilya niana ang akong mga anak dili madutlan sa mga tintasyon ug mga hulga sa ilang mga pagpamatuod.
Hinoon, sulod sa milabay nga pipila ka tuig samtang ang akong mga anak nakaatubang og nagkadaghang mga hulga sa ilang mga pagpamatuod ug ang pipila nakahunong sa pagsimba, gibati ko nga ako giluiban. Natingala ako kon nganong kami ingon og wala nagsinati sa saad ni Presidente Benson nga ang akong mga anak pagapanalipdan uban sa gahom sa pagsalikway sa tintasyon ug paglingla ug magpabilin diha sa higpit og hiktin nga dalan.
Akong giatubang ang Abril 2022 nga kinatibuk-ang komperensiya uban sa usa ka bug-at nga kasingkasing. Laing anak mipahibalo pa lamang kanako nga siya nakigbisog sa iyang pagpamatuod. Misugod ako sa pagtan-aw og kinatibuk-ang komperensiya nangutana sa samang pangutana nga wala madugay gipamulong ni Elder Adrián Ochoa sa Seventy sa iyang Sabado sa hapon nga pakigpulong, “Misalir ba ang Plano?”4 Sa akong hunahuna, nahadlok ako nga kini wala.
Giampo nako nga mahibalo kon unsay akong mabuhat sa pagtabang sa akong mga anak sa pagtinguha sa pagbalik ngadto sa pag-apil sa simbahan. Sa labing maayo dihadiha dayon. Ang mga tubag miabot atol sa kinatibuk-ang komperensiya. Apan ang mga tubag nga miabot dili mao ang unsay akong gipaabot.
Tulo ka leksiyon mitabang kanako sa pag-usab sa akong kasingkasing.
Leksiyon 1: Dili ako makahimo sa paglakaw sa dalan sa akong mga anak ngadto sa langit.
Sa buntag sa Dominggo, si Elder D. Todd Christofferson sa Korum sa Napulog Duha ka Apostoles miingon:
“Ang uban wala makasabot sa mga saad sa Dios sa pasabot nga ang pagkamasulundon ngadto Kaniya mosangpot og mga sangpotanan sa gipiho nga panahon. Sila tingali maghunahuna, ‘Kon ako makugihong magserbisyo og full-time nga misyon, ang Dios mopanalangin kanako og malipayon nga kaminyoon ug mga anak’ o ‘Kon ako maglikay nga maghimo og buluhaton sa eskwelahan atol sa Igpapahulay, ang Dios mopanalangin nako og maayong mga grado’ o ‘Kon ako mobayad sa ikapulo, ang Dios mopanalangin nako niana nga trabaho nga akong gusto.’ Kon ang kinabuhi dili mahitabo niining paagiha o sumala sa gidahom gayod nga eskedyul, sila mobati nga gibudhian sa Dios. Apan ang mga butang dili awtomatik nga mahitabo. Kita kinahanglan nga dili maghunahuna sa plano sa Dios nga sama sa cosmic vending machine diin kita (1) mopili sa gitinguha nga panalangin, (2) mosuksok sa gikinahanglan nga gidaghanon sa maayong mga buhat, ug (3) ang gi-order moabot dayon.
“Ang Dios sa tinuod motuman sa Iyang mga pakigsaad ug mga saad sa matag usa kanato. Kita dili kinahanglan nga mabalaka niana [tan-awa sa Doktrina ug mga Pakigsaad 82:10]. Ang makatubos nga gahom ni Jesukristo—kinsa mikunsad ubos sa tanang mga butang ug unya mikayab ngadto sa kahitas-an [tan-awa sa Doktrina ug mga Pakigsaad 88:6] ug kinsa aduna sa tanang gahom sa langit ug sa yuta [tan-awa sa Mateo 28:18]—makasiguro nga ang Dios makatuman ug motuman sa Iyang mga saad. Importante nga atong tahuron ug sundon ang Iyang mga balaod, apan dili ang tanang panalangin nga pinasikad base sa kamasulundon sa balaod [tan-awa sa Doktrina ug mga Pakigsaad 130:20-21] giporma, gidesinyo, ug may tagal sumala sa atong mga gilauman. Kita maningkamot sa atong labing maayo apan kinahanglan nga itugyan ngadto Kaniya ang pagdumala sa mga panalangin, temporal ug espirituwal.”5
Nakapaniguro ako nga ako nakabati og susama nga mga pagtulon-an kaniadto, apan niini nga higayon kini miigo og lawom ngadto sa akong kasingkasing. Niini nga panahon andam ako sa pagpaminaw niini, ug nagkinahanglan ako sa pagpaminaw niini.
Napahinumdoman usab ako sa usa ka mas unang kinatibuk-ang komperensiya nga mensahe gikan ni Presidente Dieter F. Uchtdorf, kaniadto Ikaduhang Magtatambag sa Unang Kapangulohan:
“Dili kita makaangkon sa atong agianan ngadto sa langit; ang gipangayo sa hustisya nagbarog isip babag, diin kita walay gahom sa pagbuntog sa atong kaugalingon.
“Apan ang tanan wala mawagtang.
“Ang grasya sa Dios mao ang atong importante ug walay katapusang paglaom. …
“Ang kaluwasan dili makuha pinaagi sa pagkamasulundon; kini gipalit pinaagi sa dugo sa Anak sa Dios [tan-awa sa Mga Buhat 20:28].”6
Nasayod ako niini. Ako nasayod nga ako dili makaangkon sa akong kaugalingong dalan ngadto sa langit. Apan sa pipila ka rason, akong gihunahuna ang akong kamasulundon makapaangkon sa akong mga anak sa dalan ngadto sa langit. Kon mas magtuon ako sa pakigpulong ni Elder Christofferson ug sa uban, mas akong maamgo nga ako gilingla sa bakak ni Satanas nga wala kinahanglana sa akong mga anak ang usa ka Manluluwas kutob nga ako usa ka “perpekto nga ginikanan.” Samtang ako mituon ug namalandong niadtong mga pakigpulong, mitabang kanako ang Espiritu sa pagsugod og sabot nga ang tanang buhat sa pagpanalipod sa akong mga anak batok sa tintasyon ug paglingla ug sa pagsuporta sa ilang mga pagpamatuod mahinungdanon apan dili mogarantiya nga ang akong mga anak magpabilin diha sa dalan sa pakigsaad.
Ang kabubut-on importante nga bahin sa plano sa Langitnong Amahan. Kitang tanan nahatagan sa gasa sa pagpili alang sa atong mga kaugalingon, bisan kon kana nagpasabot nga ang atong mga anak mahimong magpili sa pagtalikod sa unsay gitudlo kanila. Bisan sa ingon, ang Ginoo kanunay nagtabang ngadto sa iyang nahisalaag nga mga anak diha sa gugma, ug isip yutan-ong mga ginikanan kita makahimo sa sama.
Sa Oktubre 2018 nga kinatibuk-ang komperensiya, si Elder Dale G. Renlund mitudlo:
“Bisan og gusto sa Dios nga maanaa kita sa dalan sa pakigsaad, mihatag Siya kanato sa dignidad sa pagpili.
“Sa tinuod, ang Dios nagtinguha, naglaom, ug naggiya aron ang matag usa sa Iyang mga anak magpili alang sa iyang kaugalingon. Dili Siya mopugos kanato. Pinaagi sa gasa sa kabubut-on, ang Dios nagtugot sa Iyang mga anak ‘sa pagbuhat alang sa ilang mga kaugalingon ug nga dili pagaaghaton.’ [2 Nephi:2:26].”
Nakaplagan ko ang dakong kahupayan sa unsay sunod nga gisulti ni Elder Renlund:
“Bisan unsa kita kadugay nga nahilayo sa dalan o unsa ka layo kita nga nahisalaag, sa higayon nga modesisyon kita sa pag-usab, ang Dios motabang kanato nga makabalik [tan-awa sa Alma 34:31]. Gikan sa panglantaw sa Dios, pinaagi sa sinsero nga paghinulsol ug sa pagpadayon sa unahan uban ang pagkamakanunayon kang Kristo, sa higayon nga mabalik na sa dalan, sama ra kini nga wala gayod kita mopalayo. Ang Manluluwas mobayad sa atong mga sala ug mopalingkawas kanato gikan sa umaabot nga pagkunhod sa kalipay ug mga panalangin.”7
Nasayod ako nga tanan kita nagkinahanglan sa Manluluwas. Kini nga kamatuoran nagdala kanako og lawom nga kahupayan. Samtang kini nagpabilin nga akong responsibilidad ang pagtudlo sa akong mga anak ug ang pagsuporta kanila diha sa dalan sa pakigsaad, kini dili akong buhat ang pagluwas sa akong kaugalingon o sa akong mga anak. Kana buhat sa Manluluwas, ug Siya nagbuhat niini sa hingpit nga paagi. Kini mao ang buhat ug Iyang himaya sa Langitnong Amahan ang “pagpahinabo sa pagka-imortal ug sa kinabuhing dayon sa tawo” (Moises 1:39). Siya adunay usa ka plano sa kaluwasan alang sa tanan Niyang mga anak. Ako kinahanglang mosalig sa Iyang plano, dili sa akong plano. Ug ako kanunay naninguha sa paghinumdom nga Siya magtuman sa Iyang mga saad sa pagpanalipod ug paglig-on sa atong mga pamilya. Ako adunay hugot nga pagtuo nga Siya kanunay nga nagdapit sa akong mga anak sa pagduol ngadto Kaniya, ug Siya mohupay ug molig-on kanako samtang ako maningkamot sa pagbuhat sa sama.
Leksiyon 2: Ang paghulat diha sa Ginoo makahimo og usa ka sagradong dapit.
Ang ikaduhang leksiyon nga akong nakat-onan mao ang gikan ni Sister Amy A. Wright, Unang Magtatambag diha sa Primary nga Kinatibuk-ang Kapangulohan, kinsa namulong dihadiha dayon human ni Elder Christoffersson. Mitudlo siya:
“Kasagaran atong makit-an ang atong mga kaugalingon, sama sa bakol nga makililimos diha sa ganghaan sa templo, mapailubon—o usahay walay pailob—‘[nag]hulat diha sa Ginoo [Isaias 40:31].’ Naghulat nga ayohon sa pisikal o sa emosyonal nga paagi. Naghulat alang sa mga tubag nga modulot sa labing lawom nga bahin sa atong mga kasingkasing. Naghulat alang sa usa ka milagro.”8
Ang akong pag-ampo nga moadto ngadto nianang kinatibuk-ang komperensiya mao ang dihadiha dayon nga mga resulta. Nasayod ako nga kini dili tinuoray, apan wala nako damha ang pagkat-on og mga leksiyon mahitungod sa importansya sa paghulat.
Mipadayon si Sister Wright: “Ang paghulat sa Ginoo mahimong usa ka sagrado nga dapit—usa ka dapit sa paghashas ug paghapsay diin kita makaadto sa pagkahibalo sa Manluluwas diha sa lawom ug personal nga paagi. Ang paghulat diha sa Ginoo mahimo usab nga usa ka dapit diin atong makita ang atong mga kaugalingon nga mangutana, ‘O Dios, hain ba ikaw?’ [Doktrina ug mga Pakigsaad 121:1]—usa ka dapit diin ang espirituwal nga kamalungtaron nagkinahanglan kanato sa paggamit sa hugot nga pagtuo diha ni Kristo pinaagi sa tinuyo nga pagpili kaniya og usab ug usab ug usab.”9
Nakahatag ako niini nga konsepto og daghang paghunahuna sukad niana nga kinatibuk-ang komperensiya. Ang pagkat-on sa paghulat, sa pagmapailubon sa akong mga anak ug sa ilang mga pagpili, ug sa pagsalig nga ang Ginoo sa kanunay nangita kanila nagkinahanglan og daghang paningkamot sa akong bahin. Ako nangandoy nga kini ingon ka yano sama sa paghimo og pagpili sa usa ka higayon sa pagtuo ug dayon mapuno uban sa kalinaw sulod sa nahibilin sa akong mga adlaw, samtang ako nag-ampo nga ang akong mga anak mopili sa pagkab-ot ngadto sa Manluluwas ug sa paggamit og hugot nga pagtuo diha Kaniya. Apan kini dili ingon niana nga paagi alang kanako. Pipila ka adlaw kini bation ang mas kasayon sa pagtugyan ngadto sa pagka-nawad-an og paglaom ug pagkakulang sa kadasig, sa pagbiya tungod kini ingon og sama nga “ang plano wala mosalir.” Kini nagkinahanglan og dakong paningkamot ug espirituwal nga kamalungtaron sa pagbansay og hugot nga pagtuo ug sa pag-amuma og paglaom diha sa plano sa Langitnong Amahan kon akong makita ang akong mga anak nga naghimo og mga pagpili nga wala magpakita sa balaang mga kamatuoran nga akong gitudlo kanila. Gani, sa matag adlaw nga ako nagpili sa paglaom ibabaw sa pagkakulang og kadasig, ako nagpili Kaniya. Usab ug usab ug usab.
Kini nga panlimbasog nakadala kanako nga mas maduol ngadto sa Dios. Kini nakahimo kanako sa pagduol ngadto Kaniya pinaagi sa pag-ampo. Kini nakatutok sa akong pagtuon sa kasulatan. Kini nakapaduol kanako ngadto sa templo. Labaw sa tanan, kini naghimo kanako nga hilabihan kamapasalamaton alang sa Pag-ula ni Jesukristo. Ako mapasalamaton kaayo nga nahibalo nga Siya nahigugma sa akong mga anak ug nga Siya mihatag sa Iyang kinabuhi alang kanila.
Ang pagkat-on sa paghulat diha sa Ginoo nahimong usa ka sagradong dapit alang kanako. Kini nakahimo og usa ka paghashas nga kasinatian. Ang pagtuon niini nga mga pakigpulong sa kinatibuk-ang komperensiya ug pagtutok sa akong pagtuon sa ebanghelyo nakapalawom sa akong pagsabot sa doktrina ug nakapalig-on sa akong hugot nga pagtuo. Ako nagkat-on linya sunod sa laing linya, lagda sunod sa laing lagda sa pagsalig diha sa Ginoo ug sa plano sa Langitnong Amahan sa katubsanan samtang nag-ampo gihapon nga ang akong mga anak mopili sa pagsunod ni Jesukristo ug sa Iyang ebanghelyo. Ug ako nagpaabot sa sunod nga kinatibuk-ang komperensiya sa pagdugang ngadto sa akong pagkat-on ug sa akong pagpamatuod.
Leksiyon 3: Ang Dios nakahatag og paagi sa pag-usab sa mga babag ngadto sa mga tikanganang mga bato.
Ikatulo nga pakigpulong nga mihatag kanako og paglaom niana nga komperensiya mao ang kang Elder Larry S. Kacher. Samtang akong natun-an kini nga pakigpulong, kini nakatudlo kanako sa gamhanang paagi. Akong nakat-onan nga ang Ginoo nagtugot kanato sa pagsinati sa mga kalisod sa kinabuhi aron sa pagtabang kanato sa pagduol ngadto Kaniya. Gitudlo ni Elder Kacher nga “adunay pagkayano diha sa pikas habig sa mga kakomplikado sa kinabuhi samtang kita magpabilin nga ‘[makanunayon] diha ni Kristo magbaton sa usa ka hingpit nga kahayag sa paglaom’[2 Nephi 31:20].
“Tipik sa katuyoan sa kinabuhi mao ang paghimo niining potensiyal nga babag nga mamahimong butang nga makatabang kanato nga mopadayon sa unsay akong gitawag og ‘hagdanan sa hugot nga pagtuo’—usa ka hagdanan tungod kay kini nagsugyot nga ang hugot nga pagtuo wala mag-urong. Kini mahimong molambo o mokunhod sumala sa mga pagpili nga atong himoon.”10
Ako nakatubo pinaagi niini nga pagsulay sa akong hugot nga pagtuo. Sa akong gamay nga kaalam, ako gustong mopanalipod sa akong mga anak gikan sa mga pagsulay sa kinabuhi. Apan hikawan ko ba ang akong mga anak niining sama nga pagtubo? Diha sa gamhanang kaalam sa Dios, Siya nakahatag og usa ka dalan alang kanato sa pagsunod, sa Iyang plano sa kaluwasan. Samtang kita naglawig niana nga dalan, atong masugatan ang mga hagit nga nagsulay sa atong hugot nga pagtuo diha sa Langitnong Amahan ug ni Jesukristo. Kini anaa kanato sa paggamit sa atong kabubut-on sa pagpili sa pagsunod ni Kristo diha sa atong kaugalingong hagdanan sa hugot nga pagtuo, nagtugot sa atong mga pagsulay nga mahimong tikanganang mga bato kaysa mga babag. Nagpahinumdom kanato si Elder Kacher nga ang “atong kauswagan usa ka mahangturon.”11
Ang istorya sa akong mga anak wala pa mahuman. Ang plano sa Dios sa kaluwasan tinuod, ug ako nagkinahanglan nga magbaton og hugot nga pagtuo diha sa Iyang plano ug pagsalig sa Iyang katuyoan. Samtang ang akong mga anak nagpadayon sa paggamit sa ilang kabubut-on, ako naningkamot sa paghinumdom nga ang Ginoo mopadayon sa pagtabang kanila ug nga Siya motabang kanila sa pagbalik kon sila mopili sa pagbuhat sa mao. Siya gamhanan sa pagluwas.
Ako nagkaplag og paglaom diha sa Mga Proverbio 3:5–6:
“Salig sa Ginoo sa bug-os mong kasingkasing; ug ayaw pagsalig sa imong kaugalingong salabotan.
“Sa tanan nimong mga dalan ilha siya, ug siya magamando sa imong mga agianan.”
Ako nakasiguro nga adunay uban nga nagsinati sa ilang kaugalingong mga pagsulay sa hugot nga pagtuo. Ang inyo mahimong sama sa akoa, o kamo mahimong nakigbisog uban sa laing mga pangutana. Mahimo ba akong mosugyot nga dad-on ninyo ang inyong mga kabalaka ngadto sa Ginoo sa dili pa ang kinatibuk-ang komperensiya ug usab pinaagi sa nagpadayong pagtuon sa kinatibuk-ang komperensiya ug sa mga kasulatan. Pagbutang og paningkamot sa “pagpaminaw Kaniya,”12 dayon salig Kaniya sa pagtudlo kanimo sa unsay imong kinahanglang madunggan. Ako nahibalo nga Siya nahigugma kanato ug nga Siya aduna sa gahom sa pagluwas kanato ug sa pagluwas sa atong mga anak samtang kita—ug sila—matag indibidwal magpili sa pagduol ngadto Kaniya diha sa hugot nga pagtuo.