Pagpakigsulti sa Langitnong Amahan pinaagi sa Pag-ampo

Imahe

Presidente Russell M. Nelson

“Pagmainampoon. Tawag diha sa Dios alang sa kalig-on nga imong gikinahanglan samtang ikaw naghago nga makugihon nga mahimong mas maayo nga bersyon sa imong kaugalingon—usa ka mas maayong disipulo ni Jesukristo, usa ka mas mahayag nga siga sa kalibotan. Kay ‘kadtong nagahulat sa Ginoo magabag-o sa ilang kusog; sila manlupad pinaagi sa mga pako ingon sa mga agila; sila manalagan, ug dili makapuyan; sila manlakaw, ug dili mangaluya’ (Isaias 40:31).”

Imahe

Presidente Russell M. Nelson

“Niining Nasudnong Adlaw sa Pag-ampo, ako nagpamalandong sa nagkausab nga kahulogan diha sa atong katilingban bahin sa hugpong sa mga pulong nga ‘mga hunahuna ug mga pag-ampo.’ Alang sa kadaghanan, usa gihapon kini ka sinsero nga pagpahayag og pahasubo ug kabalaka. Alang sa uban, kini natan-aw ingon nga usa ka pagbati sa kakulang og lihok diha sa atubangan sa trahedya.

“Ako adunay lig-ong pagtuo nga ang pag-ampo alang niadtong nanginahanglan makapahimuot sa Dios; sa tinuod, Siya misugo kanato nga modangop ngadto Kaniya ug mag-ampo alang sa uban! Hinoon, kini akong kaugalingong kasinatian nga kon ako mangayo sa Dios diha sa pag-ampo alang sa direksiyon kon unsay akong mabuhat sa pagtabang sa pagpangalagad, pagbayaw, paghigugma, ug pagsuporta niadtong nanginahanglan, Siya nagtubag niini nga mga pag-ampo uban sa piho ug yano nga mga butang nga ako makahimo gayod sa pagpanalangin sa usa sa Iyang mga anak.

“Ako nagdapit kaninyo sa paghunahuna kon sa unsang paagi ang inyong mga hunahuna ug mga pag-ampo makapasiugda aron ang Dios modasig ug mogiya kaninyo ngadto sa mga buhat sa kamabination, kalooy, ug kamanggihatagon. Hunahunaa kon unsa ka daghan nga kaayohan ikaw makahimo dinhi sa kalibotan—ug diha sa imong kaugalingong pamilya, eskwelahan, ug trabahoan. Samtang naninguha kita nga mahimong Iyang mga kamot sa pagpang-ayo ug pagtabang, kita sa siguro mohimaya sa Ginoo.”

Imahe

Presidente Henry B. Eyring

Adunay daghang nagbasa niini karon kinsa gibati ang dinalian nga panginahanglan alang sa usa ka panalangin og personal nga pagpadayag gikan sa atong mahigugmaong Langitnong Amahan.

“Alang niadtong anaa sa naguba sa gubat nga lugar sa kalibotan, kini mahimong seryosong panginahanglan nga mahibalo kon balhinon ba ang pamilya ngadto sa luwas nga dapit o magpabilin kon asa sila. Alang sa daghan kini pag-ampo aron mahibalo kon unsaon pagtabang sa Ginoo ang pagluwas sa usa ka nawalang karnero.

“Nasayod kitang tanan nga ang tawhanong paghukom ug lohikal nga hunahuna dili igo sa pagkuha og mga tubag ngadto sa mga pangutana nga importante kaayo sa kinabuhi. Nagkinahanglan kita og pagpadayag gikan sa Dios. Ug dili usa lamang ka pagpadayag sa panahon sa kalisod, apan nagkinahanglan kita og kanunay nga gibag-ong dagayday.

“Ang Langitnong Amahan nagpaminaw sa imong mga pag-ampo. Siya naghigugma kanimo. Nakaila Siya sa imong ngalan. Si Jesus mao ang Kristo, ang Anak sa Dios, ug atong Manunubos. Ako nagsaad nga Siya magbubo og pagpadayag diha kanatong tanan pinaagi sa Espiritu Santo samtang kita naningkamot sa Iyang paggiya.”

Imahe

Elder Dieter F. Uchtdorf

“Bisan asa kita, ikaw ug ako makalakaw diha sa dalan sa pagkadisipulo karon. Magmapainubsanon kita; mag-ampo kita ngadto sa atong Amahan sa Langit uban sa tibuok natong kasingkasing ug ipahayag ang atong tinguha sa pagpaduol og maayo ngadto Kaniya ug magkat-on kabahin Kaniya.”

Imahe

Elder Dieter F. Uchtdorf

“Usa sa among unang mga miting sa India mao ang usa ka debosyonal sa New Delhi Stake atol diin ang pambukas nga pag-ampo mitandog sa akong kasingkasing–ug sa kasingkasing ni Harriet—og lawom.

“Ang pag-ampo, gihatag ni Sister Dorothy Elisabeth Mehra, usa ka kinasingkasing nga pangamuyo sa usa ka putli nga anak sa Dios ngadto sa atong Amahan sa Langit nga mihimo og lawom nga espirituhanong pambukas ngadto sa mga mensahe sa kagabhion.

“Gisugdan niya uban sa usa ka pangamuyo ngadto sa Langitnong Amahan sa paglig-on kaniya ingon nga kini mao ang unang higayon sa iyang kinabuhi nga nag-ampo sa ingon nga kahimtang. ‘Palihog tabangi ako, aron ako walay bisan unsa nga matang sa problema sa pagsulti og gamay nga pag-ampo nganha kanimo,’ mipahayag siya og kusog gikan sa iyang kasingkasing.

“Nag-asoy sa iyang kasinatian, si Sister Mehra miingon nga siya gusto lamang nga ‘makigsulti ngadto sa Dios’ tungod kay siya ‘nagkurog sa kahadlok.’ Gibati niya ang Espiritu isip usa ka balaang panabang nagbalita og tubag sa iyang pag-ampo. Samtang siya mihilom, ang iyang pag-ampo lig-ong midala sa Espiritu, ug mipuno sa balay tigumanan.

“Ang iyang yano, sinserong pag-ampo mitandog og daghan. Akong naamgohan nga unsay among nadungog usa ka kinasingkasing nga panagsultihanay uban sa Langitnong Amahan. Dili ba mao kana unsa ang pag-ampo?

“Wala madugay akong nahibaloan nga ang pag-ampo ni Sister Mehra naggikan sa usa ka pagpamatuod nga nakatubo sukad sa 2011 sa dihang una niyang nahimamat ang mga misyonaryo diha sa panimalay sa iyang higala sa New Delhi. Ang paagi nga ang mga misyonaryo namulong mahitungod ni Jesukristo mitandog kaniya. Sa 2012, nabunyagan siya uban sa iyang duha ka anak nga babaye ug may kabilinggang anak nga lalaki.

“Sa malumong pag-inistoryahanay human sa miting, mihangyo kanako si Sister Mehra sa pag-ampo alang sa iyang anak nga lalaki, ug malipayon akong misaad nga akong himoon. Ang iyang hugot nga pagtuo ug tinuohan diha sa pag-ampo simbolikanhon sa mga miyembro sa Ang Simbahan ni Jesukristo sa mga Santos sa Ulahing mga Adlaw sa India.”

Imahe

Elder Ronald A. Rasband

“Si Melanie ug ako mao pa lamang ang pagsaulog sa among ika-50 nga anibersaryo sa kasal kauban sa among pamilya, naglakaw diha sa mga dalan sa yuta nga gihimo sa atong Manluluwas nga balaan.

“Tungod kay kini usa ka biyahe sa pamilya—ug dili opisyal nga buluhaton sa Simbahan—gusto ko nga mahimong papa ug bana apan usab sa pagtuman sa akong calling isip usa ka Apostol nga mahimong usa ka espesyal nga saksi sa Ginoo, bisan hain ako. Giampo nako nga ang Dios mobutang og mga kasinatian ug mga tawo diha sa akong dalan aron ako mahimong himan sa Iyang mga kamot—ug Iyang gidungog ang akong mga pag-ampo.

“Usa sa ingon nga ehemplo mao ang usa ka grupo sa batan-ong mga boluntaryo nga makitawhanon. Wala kami magdahom nga mahimamat ang kadaghanan sa mga sakop niini nga grupo sa Caesarea Philippi. Ako mipamatuod ngadto kanila nga sama sa Apostoles sa karaan nga misangyaw didto nga si Jesus mao gayud ang Kristo ug ang Anak sa buhing Dios, ako usab makahatag sa akong ligdong nga pagsaksi sa sama. Ug mapainubsanong gibuhat ko ang mao!

“Sa pagkasunod adlaw, gisugdan ko ang akong buntag uban sa pag-ampo nga ako mabutang diha sa dalan ni bisan kinsa nga nanginahanglan sa akong gugma o pagpamatuod, dayon ako sa hustong paagi magiyahan. Ang dapit diin among giplano nga adtoan alang sa paniudto sirado, busa kami miadto og laing dapit. Dili pa dugay human kami milingkod, ang tibuok grupo sa batan-ong mga boluntaryo nga makitawhanon sa miaging adlaw misulod usab. Ang ilang mga plano sa paniudto nabalhin usab. Among nahibaloan nga usa sa batan-ong mga lalaki mihilak sa miaging gabii tungod kay napakyas sa higayon nga mahimamat ang usa ka Apostol. Ang pag-ampo namong duha gidungog, ug ang Dios mipahimutang sa among mga dalan nga mag-abot—alang sa usa ka tawo.

“Ang Dios nagdungog sa atong mga pag-ampo. Siya nagtubag sa usa. Pinaagi sa balaang desinyo, siya naggiya sa mga detalye sa atong mga kinabuhi. Nahigugma siya matag usa ug tagsa-tagsa kanato pag-ayo. Ingon nga si Jesukristo nangalagad ngadto niadtong diha sa Balaang Yuta [Holy Land] 2,000 ka tuig ang milabay, Siya naghimo sa sama alang kanato karon, bisan hain kita.

“Mapasalamaton ako nga nahimong usa ka saksi ngadto sa Iyang gahom ug sa Iyang gugma, sa paghimo sa tanang mga butang nga posible ngadto kanila nga nagtuo. Mahimo unta kini nga mao alang sa matag usa kanato samtang atong ibutang ang atong mga kinabuhi ug mga paglaom diha sa Iyang mga kamot.”

Imahe

Elder Ulisses Soares

“Diha sa saba nga kalibotan nga naglibot kanato, kini malisod sa pagdungog sa mga tubag sa mga pangutana nga atong gipangutana sa Ginoo. Si Rosana ug ako bag-ohay nga nagsinultihanay kauban sa mga young adult sa St. George [Utah, Estados Unidos] mahitungod sa pipila sa ilang mga pangutana.

“Ang akong pagdapit kanila ug ang akong pagdapit kaninyo mao nga sa kanunay dad-a ang inyong sinserong mga pangutana ngadto sa atong Langitnong Amahan diha sa pag-ampo. Mangayo, mangita ug manuktok, sa ingon nga paagi, mao ang usa sa kahibulongang mga gasa nga gitanyag kanato sa dihang kita gipadala nganhi sa yuta. Samtang atong gipunting ang atong mga kinabuhi diha ni Jesukristo, makaplagan nato ang mga tubag sa lawom ug mahinungdanong mga kabalaka sa atong mga kalag.

“Pipila sa mga pangutana nga atong nadawat diha sa debosyonal nagtutok kon unsaon nato sa pagsagubang ang mga pagsulay; unsay atong kinahanglang buhaton sa pagpabilin diha sa dalan sa pakigsaad, ug unsaon nato sa pagbati sa gugma sa Manluluwas alang kanato?

“Pasultiha ako nga ang pagsunod sa Manluluwas mao ang kanunay nga tubag ngadto sa mga pangutana sa kinabuhi. Ang kasingkasing sa Manluluwas puno sa kalooy. Kanunay siya nga andam sa pagtabang ug sa pagsuporta kanato. Samtang kita mas magpaduol ngadto Kaniya ug itugyan ang atong mga kaugalingon sa espirituhanong paagi ngadto sa Iyang pag-amuma, Siya makahimo sa atong mga palas-anon nga magaan. Nag-ampo ako nga kamo makakita sa inyong mga pagsulay pinaagi sa mga mata sa hugot nga pagtuo, ug dili mobiya.

“Bisan unsa tingali ang inyong mga pangutana, hibaloi nga ang Ginoo nakadungog kaninyo ug naglakaw kauban kaninyo. Samtang niana kamo naglakaw uban Kaniya, nagpanalangin Siya kaninyo uban sa Iyang espiritu, nagtabang kaninyo sa pagkakita sa mga butang sa klaro nga paagi, ug nagpuno Siya kaninyo sa Iyang gugma.”

Imahe

Sister Tracy Y. Browning

“Ang Primary nga awit karon nga akong kanunay nga gihunahuna makaplagan diha sa Children’s [Song]book sa pahina 25. Ug kini mao ang ‘I Love to Pray.’ Wala ba kamo makagusto niana nga ulohan? Kini nag-ingon,

“Gusto ko kaayo kini nga awit tungod kay malipayon ug nagpahinumdom kini kanako nga ako gustong mag-ampo, nga kini dili usa ka buluhaton. Kini dili usa ka butang nga buhaton ko lamang ug dalion sa paghuman sa sinugdanan ug sa kagabhion sa matag gabii. Apan ako makakaplag og hingpit nga kalipay sa pagpakigsulti ngadto sa akong Langitnong Amahan tungod kay Siya buot nga maminaw gikan kanako sa matag adlaw.

“Ug ang kasulatan nga atong makaplagan nga nagtambag kanato mahitungod kon nganong kita kinahanglang mahigugma sa pag-ampo makaplagan diha sa Alma 37:37, diin kita gitudloan nga kita kinahanglan nga ‘magpakitambag uban sa Ginoo sa tanan nimo nga buhaton, ug siya moagak kanimo alang sa kaayohan; oo, kon ikaw mohigda sa gabii higda ngadto sa Ginoo, nga Siya mobantay diha kanimo sa imong pagkatulog; ug kon ikaw mobangon sa buntag himoa nga ang imong kasingkasing puno sa mga pasalamat ngadto sa Dios.’

“Ang Dios nagtinguha sa pagpanalangin kanato sa matag adlaw samtang kita moduol ngadto Kaniya pinaagi sa pag-ampo. Ug ako nagdapit kaninyo karon sa pagpakigsulti ngadto sa inyong Langitnong Amahan diha sa ngalan sa atong Manluluwas, si Jesukristo, ug tan-awa kon unsaon Niya sa pag-agak kanimo alang sa kaayohan.”