“Unsa Pa ang Akong Mahimo alang sa Akong mga Anak nga Babaye,” Liahona, Abr. 2024.
Mga Tingog sa mga Santos sa Ulahing mga Adlaw
Unsa Pa ang Akong Mahimo alang sa Akong mga Anak nga Babaye?
Gusto nakong mapalig-on sa espirituhanong paagi ang akong mga anak nga babaye, busa midangop ko sa Langitnong Amahan diha sa pag-ampo.
Litrato sa maayong kabubut-on sa tagsulat
Ako nagtudlo sa samang eskwelahan nga gitambongan sa akong mga anak nga babaye. Matag adlaw kinahanglang magdali kami sa pagpanglakaw sa alas 6:00 sa buntag. Sa among pag-abot, moadto ko sa akong lawak-klasehanan ug sila moadto sa ilang mga lawak-klasehanan.
Human sa eskwelahan, magdali kami sa pagpamauli, mangaon, ug moadto dayon sa laing mga kalihokan, sama sa mga leksiyon sa Young Women ug musika. Ang akong bana mao ang presidente sa elders quorum, mao nga busy usab siya kaayo.
Mibati na ko nga ang among pamilya busy na kaayo. Wala na mi panahon alang sa personal, tiunay nga panaghisgotan mahitungod sa ebanghelyo, gawas lang sa mga Dominggo.
Gusto ko nga ang akong mga anak nga babaye makaugmad og lig-on nga mga pagpamatuod sa Manluluwas nga si Jesukristo ug sa Iyang ebanghelyo—sugod karon, samtang sila batan-on pa. Isip ilang mga ginikanan, ang akong bana ug ako nasayod nga kana nga responsibilidad amoa (tan-awa sa Doktrina ug mga Pakigsaad 68:25). Ako nakahukom sa pag-ampo mahitungod niini.
“Gawas sa pagpahigayon og family home evening ug paghatod sa among mga anak nga babaye ngadto sa simbahan,” ako nangutana sa Langitnong Amahan, “unsa pa ang among mahimo?”
Ang tubag nga akong nadawat mao ang pagbasa sa mga kasulatan sa buntag ug paggamit sa musika. Mao nga, sa pagpadulong sa eskwelahan sa kada buntag sa among van, akong gisugdan sa pagpatukar og mga himno ug uban pang mga tukma nga mga musika. Dayon, sulod sa pipila ka minutos human kami miabot sa eskwelahan, misugod kami sa pagbasa og dungan sa mga kasulatan, maghisgot sa ebanghelyo, ug mag-ampo sa dili pa moadto sa klase. Bisan ang akong singko anyos gustong moapil.
Maanindot kini nga butang ang makakita sa akong mga anak nga nagbasa ug nagpamatuod bahin ni Jesukristo ug makakita sa akong mas magulang nga mga anak nga babaye, 9 ug 12, nga andam sa pagtabang sa kinamanghoran, 5, aron magbasa sa mga kasulatan.
Human nga kami midugang sa among mubo nga debosyonal ngadto sa among nagkapuliki nga tulumanon, nangutana ko sa akong mga anak nga babaye “Unsa man ang inyong hunahuna?” Ang ilang mga tubag nakatandog sa akong kasingkasing.
“Ako dunay pasulit karon, ug gikulbaan kaayo ko,” miingon ang usa nila. “Apan nakahinumdom ko karong buntaga nga kita makapangayo sa Dios alang sa tabang. Militok ko og pag-ampo sa akong kasingkasing, nangayo ngadto Kaniya sa pagtabang kanako nga makalma, ug Siya mihimo.”
Ang lain nag-ingon, “Mamá, nakaila ko og usa ka batang babaye nga walay makig-istorya. Akong nahinumdoman gikan sa among debosyonal nga gihigugma sa Dios ang tanan, mao nga ako mihukom sa pagpakigsulti kaniya ug mahimo nga iyang higala.”
Ako mapasalamaton kaayo sa Langitnong Amahan sa pagtabang kanako nga mahimong mas maayo nga makatuman sa akong tahas isip usa ka inahan. Ako nasayod nga Siya motubag sa pag-ampo ug naghatag kanato sa ebanghelyo sa paghimo kanato nga malipayon.