“3 ka Butang nga Atong Makat-onan gikan ni Kristo mahitungod sa mga Relasyon,”Liahona, Abr. 2024.
Mga Young Adult
3 ka Butang nga Atong Makat-onan gikan ni Kristo mahitungod sa mga Relasyon
Samtang magpalig-on ug magpalawom kita og mga relasyon sa uban, makakaplag kita og mas dako nga katagbawan ug hingpit nga kalipay.
Christ Visits the Nephites [Si Kristo Nagbisita sa mga Nephite], ni Minerva Teichert
Nakahunahuna ba kamo sukad mahitungod kon giunsa ni Jesukristo pagpalambo og mga relasyon ngadto sa uban? Hunahunaa kini. Kanunay Siyang nahibalo sa mga tawo sa palibot Kaniya (tan-awa Lucas 8:43–48; 19:2–10; Juan 1:47–50). Misabot Siya sa mga tawo (tan-awa sa Juan 11:31–36). Mitabang Siya kanila ug naningkamot sa pagkuha sa ilang mga palas-anon (tan-awa sa Lucas 8:26–36; Juan 5:5–9).
Bisan diha sa Basahon ni Mormon, si Jesukristo pisikal nga miadto sa mga Nephite ug midapit kanila sa pagduol ngadto Kaniya “tagsa-tagsa” (3 Nephi 11:15).
Ang pagtabang, pagpangalagad, ug pagsabot sa uban usa ka mahinungdanon nga bahin kon kinsa si Kristo. Ug tungod Kaniya, kita adunay usa ka ehemplo nga pagasundon kon maningkamot sa pagpalig-on og mga relasyon ngadto sa mga tawo sa palibot kanato. Aniay tulo ka butang nga atong makat-onan mahitungod sa mahangturon nga mga relasyon gikan sa ehemplo ni Jesukristo:
Neither Do I Condemn Thee [Dili Usab Ako Maghukom Kanimo], ni Eva Timothy
1. Ang mga Relasyon Mopanalangin Kanato Karon ug sa Sunod nga Kinabuhi
Walay bisan kinsa nga gusto nga mobati nga nag-inusara. Usa sa labing importante nga mga butang nga atong mabuhat dinhi sa yuta mao ang pagpalambo og mga relasyon nga mosuporta kanato latas sa lainlaing mga panahon sa kinabuhi ug motabang kanato nga molahutay hangtod sa kataposan.
Si Presidente Dieter F. Uchtdorf, kaniadto nagserbisyo isip Ikaduhang Magtatambag sa Unang Kapangulohan, mitudlo nga “samtang atong ipaabot ang atong mga kamot ug mga kasingkasing ngadto sa uban inubanan sa sama kang Kristo nga gugma, adunay maanindot nga butang nga mahitabo kanato. Ang atong kaugalingon nga espiritu mamaayo, mas molambo, ug mas molig-on. Kita mamahimong mas malipayon, mas malinawon, ug mas madawaton sa mga paghunghong sa Balaang Espiritu.”1
Ang atong mga relasyon dili lang mopanalangin kanato dinhi sa yuta apan adunay mahinungdanon nga papel usab sa pagtabang kanato nga makakab-ot og kahimayaan.
Samtang nagserbisyo isip usa ka Area Seventy, si Elder Kevin J Worthen miingon, “Usa sa mga katuyoan niini nga mortal nga kinabuhi … mao ang pagpalambo sa mga kahanas ug mga hiyas nga gikinahanglan aron sa pag-establisar og malungtaron, malipayon nga mga relasyon.”2
Gusto ni Kristo nga kita anaa sa langit uban Kaniya. Siya miingon, “Kon atua na ako didto ug makaandam nag dapit alang kaninyo, mobalik ako ug kuhaon ko kamo aron bisag asa ako, atua usab kamo” (Juan 14:3). Makasunod kita sa Iyang ehemplo samtang mag-amuma kita og mga relasyon nga atong madala ngadto sa langit. Atong makat-onan sa Mga Saysay sa mga Hilisgotan sa Ebanghelyo nga “Ang mga miyembro sa Simbahan wala kaayo naghanduraw sa kahimayaan pinaagi sa mga imahe sa unsay ilang makuha ug mas pinaagi sa mga relasyon nga anaa sila karon ug kon sa unsang paagi kadto nga mga relasyon mahimong maputli ug mabayaw.”3
Imbes nga mobati nga ingon og naglatas kita nga nag-inusara sa kinabuhi, atong makaplagan nga ang atong mga relasyon mahimong mga kuta sa kahilwasan ug kahupayan. Samtang sundon nato ang ehemplo ni Jesukristo sa pag-amuma sa atong mga relasyon, makasinati kita og mas dako nga kalipay ug kamaya niini nga kinabuhi ug sa umaabot nga kinabuhi.
In Remembrance of Me [Sa Paghinumdom Kanako], ni Walter Rane
2. Ang mga Relasyon Angayan sa Paningkamot
Kon gibati ninyo nga ingon og ang pagpalig-on og mga relasyon nagkinahanglan og pipila ka paningkamot, wala kamo mag-inusara.
Si Elder Worthen miingon: “Ang positibo nga mahangturon nga mga relasyon adunay presyo. Aron tinud-anay nga makahigugma sa uban, kinahanglan kita nga mahimong huyang sa bag-o nga mga paagi. Ang ato mismong gugma ug pakabana sa uban nagpasabot nga maapektohan kita sa ilang mga aksiyon ug mga kahimtang sa mga paagi nga usahay lisod sa espirituwal nga paagi … Apan ang resulta angayan sa bili.”4
Ang mahinungdanon nga mga butang dili gayod sayon moabot, ug kana naglakip sa relasyon nga gimugna sa Manluluwas uban kanato pinaagi sa Iyang maulaong sakripisyo. Nahibaloan Niya nga ang kasakit nga Iyang masinati angayan niini. Ang Iyang dako nga gugma alang kanato nagdasig Kaniya sa pagpadayon bisan kon nangutana Siya kon aduna bay laing paagi (tan-awa sa Mateo 26:39).
3. Si Kristo Motabang Kanato
Tingali kamo naghunahuna, “Nasayod ko nga importante ang mga relasyon! Apan dili kaayo ko maayo sa pagpakighigala.”
Nakasabot si Kristo. Nasayod Siya kon unsa ka lisod ang pagpakighalubilo ug ang mga kahadlok sa usahay atong giatubang kon maningkamot sa pakigkonektar sa uban, ilabi na sa usa ka kalibotan nga nahimong digital kaayo.
Siya misaad, “Ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27).
Si Kristo motabang sa paggiya kanato kon kita adunay usa ka andam nga kasingkasing. Ug samtang kita mosunod sa Iyang ehemplo, kita gihatagan og usa ka saad nga sa kataposan “kita mahisama kaniya” (Moroni 7:48)—ug kini naglakip sa pagkahimong mas manggiloy-on ug sa pagpalambo og makahuloganon nga mga relasyon sa paagi nga Iyang gibuhat.
Samtang kita magtinguha Kaniya, atong makaplagan nga kita gilibotan og mga oportunidad alang sa maanindot nga mga relasyon ug mga koneksiyon sa uban.
Mary Heard His Word [Si Maria Namati sa Iyang Gitudlo], ni Walter Rane