Digital Lamang
Paglig-on sa mga Pagbati sa Kalinaw diha sa mga Relasyon
“Kon kita mosunod sa Prinsipe sa Kalinaw, kita mahimong Iyang mga tigpasiugda og kalinaw.”1
Sa wala pa mag-antos si Jesukristo sa Getsemani, gihupay Niya ang Iyang mga disipulo pinaagi sa pagsulti, “Kaninyo ibilin ko ang kalinaw, kaninyo ihatag ko ang akong kalinaw: hatagan ko kamo niini dili sama sa hinatagan sa kalibotan. Kinahanglan dili magkaguol ang inyong kasingkasing, ni magtalaw” (Juan 14:27; tan-awa usab ang mga bersikulo 26–31).
Isip mga sumusunod ni Jesukristo, usa sa atong mga tumong mao ang pagsunod sa Iyang ehemplo aron kita makabalik ngadto sa atong Langitnong Amahan ug mopuyo uban Kaniya sa kahangtoran.
Gitinguha sa Manluluwas ang pagtabang sa uban nga magsinati og kalinaw. Sa unsang paagi kita usab makapalambo og kalinaw sa atong mga relasyon?
Si Elder Ulisses Soares sa Korum, sa Napulog Duha ka Apostoles miingon, “Samtang maningkamot kita sa pagpalambo sa mga kinaiya nga sama sa Manluluwas, kita mahimong mga instrumento sa Iyang kalinaw sa kalibotan sumala sa sundanan nga Siya Mismo ang mi-establisar.”2
Ang pagpalambo sa mga kinaiya ni Kristo usa ka paagi nga kita mahimong makakaplag og kalinaw sa mga relasyon ngadto sa uban ug sa atong mga kaugalingon. Sa ubos mao ang pipila sa mga ehemplo ni Jesukristo nga naggamit sa Iyang mga kinaiya sa pagpakigbahin sa Iyang kalinaw.
Gugmang Putli ug Gugma
Upat ka adlaw human sa pagkamatay ni Lazaro, miadto si Jesus ngadto ni Maria ug Marta samtang sila nagbangutan. Bisan tuod Siya nahibalo nga hapit na Niya nga buhion si Lazaro gikan sa pagkamatay, Siya dihay dakong kalooy alang sa managsoong babaye, ug si “Jesus mihilak” (Juan 11:35). Mipakita Siya og mahinungdanong ehemplo sa paglihok diha sa putling gugma ug andam sa “pagbangutan uban niadto nga nagbangutan” (Mosiah 18 9).
Si Presidente Russell M. Nelson nag-ingon: “Ang putli nga gugma ni Kristo mao ang tubag sa panagbingkil nga nakahasol kanato karon. Ang gugma nga putli mo-impluwensya nato ‘sa pagtambayayong sa usag usa nga mga alantuson,’ [Mosiah 18:8] kay sa maghatag og kalisod sa usag usa. Ang putli nga gugma ni Kristo nagtugot kanato nga ‘mobarog ingon nga mga saksi sa Dios sa tanan nga mga panahon ug diha sa tanan nga mga butang’ [Mosiah 18:9]—ilabi na sa lisod nga mga sitwasyon. Ang gugma nga putli motugot nato sa pagpakita sa unsa nga paagi ang mga lalaki ug mga babaye mosulti ug molihok alang ni Kristo—ilabi na kon giatake og grabe nga pagpanaway.”3
Walay pagsapayan sa sitwasyon nga kita anaa, makapili kita sa pagtan-aw sa uban ug sa atong mga kaugalingon isip mga anak sa Dios. Bisan tuod og kita mahimong dili hingpit nga nakasabot kon unsa ang gisinati sa uban o mahimong kita adunay lahi nga pagsabot kay sa ubang tawo, makapadayon kita sa paghigugma ug pagserbisyo kanila uban sa Kristohanong gugma nga putli ug kalooy.
Pagpasaylo
Samtang nag-antos diha sa krus dayon sa hapit na Siya mamatay, miingon si Jesus ngadto kinsa milansang Kaniya sa krus, “Amahan, pasayloa sila; kay wala sila makasabot sa ilang gibuhat” (Lucas 23:34).
Sa kinabuhi, mahimong napasakitan kita sa uban. Ug usahay kita mao ang nakaingon sa sakit sa uban. Kon magpabilin nga wala mahatagi og pagtagad, kining sakit nga mga panghitabo makadaot sa atong mga relasyon. Pinaagi sa Pag-ula ni Jesukristo, kita makaangkon og kalig-on sa pagbaton sa pailob sa pagpasaylo ug sa pagpangayo og pasaylo. Samtang kita nagbuhat sa mao, ang uban ug ang atong mga kaugalingon makasinati ug makapakigbahin sa kalinaw ug gugma nga si Kristo nagtanyag.
Gitudlo ni Presidente Nelson: “Ang pagpasaylo dili lamang usa ka higayon nga buhat apan usa ka nagpadayon nga proseso nga nagkinahanglan og pailob, kalooy, ug pagsabot. Kini dili kanunay sayon ang pagpasaylo niadtong kinsa nakapasakit kanimo. Makadawat ka og kalig-on gikan ni Jesukristo. … Nagdapit ako kaninyo sa paghinumdom sa baroganan sa kapitoan pil-on og kapito ug ilugway ang pagpasaylo ngadto sa usa ka tawo kinsa nakasala kanimo. Samtang imong buhaton, si Jesukristo mohupay kanimo sa kasuko, pagdumot, ug sakit. Ang Prinsipe sa Kalinaw magdala kanimo og kalinaw.”4
Kini importante nga hinumdoman, ilabi na sa mga kahimtang sa pang-abuso, nga ang “pagpasaylo wala magpasabot sa pagkalimot sa sala nga nahimo o magpakaaron-ingnon nga kini wala gayod mahitabo. Kini wala magpasabot nga ikaw nagtugot sa pang-abuso sa pagpadayon. Kini wala magpasabot nga kini posible alang sa tanang mga relasyon nga mamaayo. Ug kini wala magpasabot nga ang sad-an dili patubagon sa iyang mga binuhatan. Kini nagpasabot nga ang Manluluwas makatabang kanimo sa pagpasaylo.”5
Samtang kita nagbuhat sa pagpalambo og Kristohanong mga kinaiya, kita makagamit niini sa paglig-on sa kalinaw sulod sa atong mga relasyon.
Si Presidente Nelson miingon:
“Kon kita mosunod sa Prinsipe sa Kalinaw, kita mahimong Iyang mga tigpasiugda og kalinaw. …
“Kon kamo seryoso mahitungod sa pagtabang sa pagpundok sa Israel ug mahitungod sa paglig-on og mga relasyon nga molungtad hangtod sa mga kahangtoran, karon mao ang panahon sa paghunong sa kaligutgot. Karon mao ang panahon sa paghunong sa pag-insister nga ang imong paagi maoy matuman o walay mahitabo. Karon mao ang panahon sa paghunong sa paghimo og mga butang nga makapahimo sa uban nga magkinto tungod sa kahadlok nga ikaw masuko. Karon ang panahon sa paglubong sa inyong mga hinagiban sa gubat [tan-awa sa Alma 24:19; 25:14]. Kon ang inyong mga pulong napuno sa mga panginsulto ug mga akusasyon, karon mao ang panahon sa paghunong niini [tan-awa sa 1 Mga Taga-Corinto 13:11]. Kamo mobarog isip lig-on nga lalaki o babaye sa espirituhanong paagi diha ni Kristo.”7
Pinaagi sa pagka-tigpasiugda og kalinaw, kita makasaksi sa uban nga nag-ani sa mga panalangin nga moabot gikan sa Prinsipe sa Kalinaw, si Jesukristo.