“Nganong Moserbisyo man Kita?” Liahona, Abr. 2024.
Nagkatigulang nga Matinud-anon
Nganong Moserbisyo man Kita?
Gipakigbahin sa mga miyembro kon sa unsang paagi ang pagserbisyo nakatabang kanato sa paglambo, sa pagpaminaw sa Espiritu, ug sa pagkahimong usa ka instrumento sa mga kamot sa Ginoo sa pagpanalangin sa kinabuhi sa uban.
Mihunong na ba kamo sukad aron sa pagpangutana sa inyong kaugalingon kon nganong moserbisyo man kita? Dali ra nga malinga sa ka-busy sa kinabuhi ug sa pagserbisyo sa Simbahan, apan aduna bay mas lawom nga kahulogan ngadto sa atong inadlaw-adlaw nga mga buhat? Ang pagserbisyo nagtudlo kanato mahitungod sa atong kaugalingon. Kon kita maminaw ngadto sa Espiritu, kita makasuhid sa atong kapasidad sa paghigugma ug sa pagkahimong mas manggihatagon. Ang Espiritu magtudlo kanato samtang kita magserbisyo, ug kita mas mahiuyon sa atong kaugalingon ug sa uban.
Ang mosunod nga mga miyembro nagpakigbahin kon unsa ang ilang nakat-onan pinaagi sa serbisyo.
Mga litrato sa maayong kabubut-on sa mga tagsulat
Ang Espiritu Mogiya sa Atong Pagserbisyo
Among gikompleto ang tanan nga mga porma alang sa usa ka full-time nga misyon sa wala pa nagsira ang kalibotan tungod sa COVID-19. Dili kami ganahan nga moadto sa natad sa misyon ug mapauli lang og balik, mao nga kami nakigkita sa among presidente sa stake ug sa presidente sa misyon sa Arcadia California Mission, diin kami nagpuyo, aron masuta kon makaserbisyo ba kami sa lokal. Kami natawag dayon nga mahimong mga koordinitor sa puy-anan.
Pipila lang ka semana human kami nagsugod, ang eroplano nga puno sa mga misyonaryo mipauli gikan sa tibuok kalibotan, mahimong ma-release gikan sa ilang mga misyon o idestino pag-usab sa Estados Unidos. Ang gidaghanon sa full-time nga mga misyonaryo sa Arcadia mission mitubo gikan sa 180 ngadto sa 250. Nagkapuliki kami sa pagpangita og panimalay alang sa tanan, apan ang Espiritu migiya kanamo.
Ang mga kasinatian sa kinabuhi ingon og gigiyahan sa Ginoo sa pag-andam kanamo alang sa mga oportunidad sa pagserbisyo. Tungod sa Relief Society, ako nasayod nga ang mga sister sa nagpalibot nga mga stake makatabang sa paglunsad og mga komperensiya sa Zone. Sa dihang ang usa ka batang babaye nga walay panimalay mitunga diha sa bakanan sa opisina sa misyon, nakahibalo ko og lokal nga mga tinubdan nga makahatag kaniya og tabang. Ang akong bana, si Mike, aduna usab mga koneksiyon sa area aron makapangita og mga solusyon sa ingon og dili masulbad nga mga problema, gikan sa pagpangita og mga swimming pool alang sa bunyag sa gawas hangtod sa pag-ayo sa mga hugasanan sa plato.
Si Mike ug ako miserbisyo tungod kay kami misaad sa paghalad sa among panahon ug mga talento ngadto sa Ang Simbahan ni Jesukristo sa mga Santos sa Ulahing mga Adlaw. Usa kadto ka panalangin sa paghigugma sa among 250 ka mga misyonaryo, ug kami mapasalamaton alang sa oportunidad. Ang pagserbisyo nakadala kanamo nga mas mapaduol ngadto ni Kristo (tan-awa sa Moroni 7:44–48).
Debra ug Mike O’Neil, California, USA
Ang Family History ug Pagserbisyo sa Templo Naghatag Kanato og Hingpit nga Kalipay
Sa wala pa ang pagpahinungod sa Rio de Janeiro Brazil Temple niadtong 2022, ang among Relief Society gusto nga motabang sa mga pamilya nga maandam ang mga ngalan alang sa pagbukas. Pinaagi sa personal nga mga miting ug online nga mga leksiyon, kami mitabang sa tanan sa pagpangita sa ilang mga katigulangan.
Ang akong labing dako nga kalipay mao ang makita ang matag pamilya nga nangandam alang sa templo. Ang akong kalag napuno sa gugma alang sa Manluluwas ug sa pagpasalamat nga makahimo sa pagtabang sa uban nga makonektar ang ilang mga pamilya pinaagi sa mga ordinansa sa templo.
Izabel de Queiroz Martins Silva, Rio de Janeiro, Brazil
Ang Pagserbisyo Makapanalangin Niadtong anaa sa Panginahanglan
Kami bag-ohay lang miserbisyo isip international relations nga mga misyonaryo, nagtrabaho uban sa mga diplomat nga langyaw diha sa United Nations. Mapaubsanon kaming mibati nga napanalanginan nga mahimamat ang daghan kaayong mahigugmaon, maamumahon nga mga tawo gikan sa tibuok kalibotan nga nagtinguha sa pagserbisyo sa ilang mga tagilungsod.
Kami adunay kahigayonan sa pagpakaylap sa mga pundo sa Dan-agi ang Kalibotan nga Makina sa Pagpanghatag ngadto sa mga tigdawat sa tibuok kalibotan, pinaagi sa UNICEF (United Nations Children’s Fund) ug CARE (Cooperative for Assistance and Relief Everywhere).
Among mabati ang Espiritu samtang kami misulti sa mga lider nga ang among mga apo nga babaye nagserbisyo og misyon sa Guatemala ug mitabang sa paghatod og mga manok, nga gipalit pinaagi sa mga Makina sa Pagpanghatag, niadtong anaa sa panginahanglan. Pagkanindot nga panalangin ang masayod nga ang mga pamilya adunay mga makaon nga mga itlog o mabaligya sumala sa ilang gipangandoy.
Brent ug Julie Hill, New York, USA
Si Elder Dieter F. Uchtdorf sa Korum sa Napulog Duha ka Apostoles nag-ingon nga ang Ginoo “nagdapit kanato nga mamahimo Niyang mga kamot, sa pagbuhat og maayo.”1 Pagkanindot nga pribilehiyo alang kanato nga makaserbisyo alang sa Manluluwas. Samtang kami namalandong sa kahulogan sa among pagserbisyo, ang kahayag sa Manluluwas mogiya kanamo ngadto sa mas maayong pagsabot sa Iyang gugma.
Ang tagsulat nagpuyo sa Utah, USA.