“Kami Mao ang mga Misyonaryo”

Imahe

babaye nga naggunit og libro ug nagtimbaya og tulo ka misyonaryo

Paghulagway pinaagi ni Brian Call

Ang akong mga ginikanan ganahan sa pagpakigbahin sa pulong sa Dios. Regular silang mihatag og mga kahon nga adunay mga kopya sa Bag-ong Tugon ngadto sa kasilinganan, mga bilanggoan, mga ospital, ug mga eskwelahan.

Isip kabahin sa mga paningkamot sa akong mga ginikanan, ang akong amahan mikanta, mibasa sa mga kasulatan, mipamatuod ni Jesukristo, ug mitapos sa pag-ampo. Tungod kay naapil sa niana nga kasinatian isip usa ka bata, nakapalambo ko og usa ka tinguha sa pagserbisyo sa Dios.

Apan, sa dihang ang akong amahan nahiagom og atake sa kasingkasing, ang unsay among gitawag og “pagsangyaw sa ebanghelyo” natapos. Dili ko makapanghatag og mga kopya sa Bag-ong Tugon sa akong kaugalingon, mao nga nangayo ko og pagtugot sa akong amahan nga mangita og usa ka misyonaryo nga simbahan.

Sa dihang nagpangedaron og 15, nagsugod ko sa pagpangutana mahitungod sa doktrina, bunyag, ikapulo, ug organisasyon sa simbahan. Ang akong amahan miingon nga walay simbahan karon ang nagbuhat sa mga butang sama sa gitudlo sa Manluluwas. Apan kon makakaplag ko og ingon niana nga simbahan, miingon siya, kinahanglang mopasakop ako niini.

Pipila ka tuig ang milabay, ako adunay kasungian sa usa ka kauban sa trabaho. Sa dihang mibisita siya sa among balay aron mangayo og pasaylo, mibilin siya og usa ka libro nga giulohan og Ang Atong Panulundon: Usa ka Mubong Kasaysayan sa Ang Simbahan ni Jesukristo sa mga Santos sa Ulahing mga Adlaw. Diha niini, nabasa nako ang mahitungod sa pagkamartir ni Propeta Joseph Smith. Kini nga istorya nakatandog kanako og maayo.

Nakakaplag usab ko og usa ka litrato sa duha ka batan-ong lalaki nga nagsul-ob og puti nga mga polo, mga korbata, ug mga name tag. Gipakigbahin nila ang ebanghelyo ni Jesukristo sa tibuok kalibotan. Naghunahuna ko kon aduna bay ingon niana nga mga misyonaryo sa akong lungsod.

Nianang gabhiona nag-ampo ko ug mihangyo sa Dios sa pagtabang kanako sa pagpangita sa Iyang misyonaryo nga simbahan. Pagkasunod adlaw nangita ko sa mga misyonaryo. Gisusi nako ang matag tawo nga akong nakit-an kinsa nagsul-ob og puti nga polo, apan wala milampos.

Gawas sa akong panimalay paglabay sa pipila ka adlaw, nakakita ko og tulo ka tawo nga nagsul-ob og puti nga mga polo, mga korbata, ug mga name tag! Midagan ko sa sulod, gikuha ang libro, ug giapas sila.

Sa dihang naabtan nako sila, usa kanila nangutana, “Makatabang ba kami kanimo?”

“Kini nga basahon gikan ba sa inyong simbahan?” Nangutana ko.

“Oo, amoa kini nga libro,” madasigon siyang mitubag. “Kami mao ang mga misyonaryo.”

Human sa pipila ka semana sa pagkat-on mahitungod sa gipahiuli nga ebanghelyo, nabunyagan ko isip usa ka miyembro sa Ang Simbahan ni Jesukristo sa mga Santos sa Ulahing mga Adlaw. Usa ka tuig ang milabay nabunyagan ang akong amahan.

Tungod kay gusto gihapon ko nga moserbisyo sa Ginoo—usa ka tinguha nga nagpabilin kanako sukad sa bata pa ko—nagsugod ko sa pag-andam sa pagserbisyo og full-time nga misyon. Pagkadako nga kalipay nga akong nabati sa adlaw nga akong nadawat ang akong kaugalingong tawag nga mahimong usa ka full-time nga misyonaryo!