Ko e Taumuʻa Faka-ʻOtua ʻo e Malí

Tau fakakaukau angé ki he ʻuluaki mali ko ia naʻe fakahoko hili hono fakatupu ʻo e māmaní. Naʻe ʻosi fakatupu ʻa ʻĀtama, ko e ʻuluaki tangatá, fakataha mo e fanga manu ʻo e vaó pea mo e fanga manupuná pea mo e ngaahi meʻa moʻui kotoa pē ʻi he funga ʻo e māmaní. ʻOku tau vakai leva ki he meʻa ko ʻeni naʻe hikí, ʻoku pehē ai: “Pea naʻe folofola ʻa [e ʻEiki] ko e ʻOtuá, ʻOku ʻikai lelei ke toko taha pē ʻa e tangatá: te u ngaohi kiate ia ha tokoni ʻoku taau mo iá.” Hili hono ngaohi ʻe he ʻEikí ʻa ʻIví, naʻá ne “ʻomi ia ki he tangatá. Pea naʻe pehē ʻe ʻĀtama, ko e hui ʻeni ʻo hoku ngaahi huí, mo e kakano ʻo hoku kakanó: ʻe ui ia ko e Fefine, koeʻuhí naʻe toʻo ia mei he Tangatá. Ko ia ʻe tuku ange ai ʻe he tangatá ʻa ʻene tamaí mo ʻene faʻeé, kae pīkitai ki hono ʻunohó: pea te na kakano taha pē.” (Sēnesi 2:18, 22–24.) … ʻI he lava kakato ʻa e mali ko iá, naʻe fekau leva ʻe he ʻEikí kia kinaua ke na “fanafanau, mo fakatokolahi, mo fakafonu ʻa māmani, pea pule ki ai.” (Sēnesi 1:28.)

Ko ha mali ʻeni naʻe fakahoko ʻe he ʻEikí ki ha ongo sino taʻe-faʻa-mate, he naʻe ʻikai moʻulaloa ʻa hona sinó ki he maté ʻo aʻu ki he taimi naʻe toki hū mai ai ʻa e fai angahalá ki he māmaní. Naʻá Ne ngaohi ʻa kinaua ke na hoko ʻo taha pē, ʻo ʻikai ki he nofo taimí pē, pe ki ha vahaʻa taimi pau; ka naʻe pau ke na taha ʻo aʻu ki he taʻengatá. … Naʻe ʻikai hoko ʻa e maté ia ko hano vete ki-naua; ka ko ha kiʻi māvahevahe fakataimi pē. ʻI heʻena Toetuʻu ki he moʻui taʻe faʻa maté, te na toe fakataha ai pea ko ha haʻi taʻe-ngata ia he ʻikai ke toe motuhi. “He ʻoku hangē ʻoku mate kotoa pē ʻia ʻĀtama, ʻe pehē foki ʻe moʻui kotoa pē ʻia Kalaisi.” (1 Kolinitō 15:22.)

Kapau naʻá ke muimui lelei ki ha fakamatala fekauʻaki mo e ʻulu-aki mali ko ʻeni naʻe faí, ta kuó ke ʻosi mateuteu ke mahino kiate koe ʻa e fakahā ko ia naʻe fai ki he Siasí ʻi hotau kuongá ʻo pehē:

“Kapau ʻe fakamaʻu ʻe ha tangata mo ha fefine ʻi heʻeku leá, ʻa ia ko ʻeku fonó, pea ʻi he fuakava foʻou mo taʻengatá, pea ʻoku faka-maʻu ia kia kinaua ʻe he Laumālie Māʻoniʻoni ʻo e talaʻofá, ʻe ia ʻa ia kuo paní, ʻa ia kuó u vaheʻi ki ai ʻa e mālohí ni pea mo e ngaahi kī ʻo lakanga taulaʻeikí ni. …, ʻe fai kia kinaua ʻi he ngaahi meʻa kotoa pē ʻa ia kuo hilifaki kia kinaua ʻe heʻeku tamaioʻeikí ʻi he nofo taimí pea fai atu ʻi hono kotoa ʻo e nofo taʻengatá; pea ʻe mā- lohi fakaʻaufuli ia ʻo ka na mamaʻo mei māmani; pea te na faka-laka hake ʻi he kau ʻāngelo mo e ngaahi ʻotua kuo fokotuʻu aí, ʻo maʻu hona hakeakiʻí mo e nāunau ʻi he ngaahi meʻa kotoa pē ʻo hangē ko ia kuo fakamaʻu ki hona ʻulú.” (T&F 132:19.) …

Ko e nofo mali ki taimi mo ʻitānití, ko e hala hangatonu mo fāsiʻi ia (ʻoku lau ki ai ʻi he folofolá) “ʻa ia ʻoku fakatau ki he hake-akiʻí mo e hoko atu ai pē ʻo e ngaahi moʻuí, pea ʻoku ʻilo ia ʻe he tokosiʻi,” ka “ʻoku fālahi ʻa e matapaá, pea laulahi ʻa e hala ʻa ia ʻoku fakatau ki he ngaahi maté; pea ʻoku ʻi ai ʻa e tokolahi ʻoku hū ai.” (T&F 132:22, 25.) Kapau ʻe lava ʻe Sētane mo ʻene kau taú ʻo fakalotoʻi kimoutolu ke mou ʻalu atu ʻi he hala fālahi ʻo e mali fakaemāmaní ʻa ia ʻoku ngata pē ʻi he maté, ta kuó ne ikunaʻi ki-moutolu ʻi homou faingamālie ke aʻusia ʻa e tuʻunga māʻolunga taha ʻo e fiefia taʻengatá ʻa ia ʻoku fou ʻi he nofo malí pea e tupu-laki ʻi he taʻengatá kotoa. Kuo totonu ke ʻosi mahino kia kimou-tolu he taimí ni ʻa hono ʻuhinga naʻe folofola ai ʻa e ʻEikí ʻo pehē kuo pau fakahoko ʻe he tangatá ʻa e fuakava foʻou mo taʻengata ʻo e malí kae toki lava ke ne maʻu ʻa e tuʻunga māʻolunga taha ʻi he nāunau faka-Silesitialé. Kapau ʻe ʻikai te ne fai ia, ʻe ʻikai te ne lava ke maʻu ia. (T&F 131:1—3)²

Ko kinautolu ʻoku moʻui taau pea fakahoko e fuakava foʻou mo taʻengata ʻo e mali temipalé ki taimi mo ʻitānití, te nau fakatoka ʻe kinautolu ʻa e ʻuluaki maka-tuliki ʻo ha ʻapi fakafāmili taʻengata ʻi he puleʻanga fakasilesitialé ʻa ia ʻe tolonga ʻo taʻengata. Ko honau fakapalé ko e “fakalahi ʻaki ʻa e nāunau ki honau ʻulú ʻo taʻengata pea taʻengata” (vakai ki he ʻĒpalahame 3:26).³

Kapau ʻe fakapapauʻi [ʻe he toʻu tupú] mei he momeniti pē ʻoku nau mali aí ʻe kamata pē mei he taimi ko iá ʻo fai mai ʻa ʻenau fakapapauʻi mo fai ʻa e meʻa kotoa pē te nau lavá ke nau takitaha fai ʻa e ngaahi meʻa ʻoku totonú ke nau fiefia kotoa ai, ʻo aʻu pē ki heʻenau feilaulauʻi ʻa e ngaahi meʻa ʻoku nau fiefia aí, ʻa honau ngaahi uʻá, mo ʻenau ngaahi holí, ʻe fakaleleiʻi ai pē ʻa e ngaahi palōpalema ia ʻo ʻenau feinga ke feangainga mo e nofo malí, pea ʻe hoko ʻa honau ʻapí ko ha ʻapi fiefia moʻoni. ʻOku faka-tupu ʻa e ʻofa ʻoku lahí ʻe he feilaulau ʻoku lahi, pea ko e ʻapi ko ia ʻoku fakahā fakaʻaho ai ʻa e tefitoʻi moʻoni ʻo e feilaulau koeʻuhi ko e lelei ʻa e tokotaha takitahá, ko e ʻapi ia ʻoku nofoʻia ʻe ha ʻofa ʻoku lahí.⁴

ʻOku hanga mei muʻa ha ngaahi fiefia ʻoku toe lahi angé, ʻio, ha ngaahi loto hohaʻa ʻoku lahi ange ia ʻi ha meʻa kuó ke aʻusia, he ke mou manatuʻi ʻoku fakatupu ʻe he feilaulau laí ha ʻofa ʻoku lahi angé, pea ko e fakapapauʻi fakaʻaho ko ia ke fiefia ʻi he ngaahi meʻa ʻoku totonú, te ne hanga ʻe ia ʻo langa hake ha makatuʻunga pau ʻo ha ʻapi fiefia. Kuo pau ke fakatou loto ʻa e ongo tafaʻakí ke fai ʻa ia ʻe lelei maʻá e tokotaha koeé kae ʻikai ke fai fakatafaʻaki taha pē pe fai ʻi he siokita. Kuo pau ke feongoʻi ʻaki ʻe he huse-pānití mo e uaifí ʻa e ngaahi fatongiá mo e ngaahi ngafá ke na fe-akoʻi ʻaki ʻiate kinaua. ʻOku ʻi ai ha meʻa ʻe ua mei he ngaahi meʻa ʻoku nau maumauʻi he ʻahó ni e nofo malu ʻa e ngaahi ʻapí, ko e ʻikai ʻaupito ongoʻi ʻe he husepāniti kei talavoú ia ʻa honau tufa-kanga kakato ke tauhi ha fāmilí pea mo e kalo ʻa e ngaahi uaifi kei talavoú ia mei he nofo fakamātoato hifo ʻo ohi hake ha fāmili mo faʻufaʻu ʻo ha ʻapí.⁵

ʻOku hulutuʻa e fiefia ʻa e nofo malí, ka ʻoku lōmekina ia ʻe he ngaahi fatongia mafatukituki taha ʻe ala tō mai ki ha tangata mo ha fefine ʻi he moʻui fakamatelié ni. Ko e ongo faka-ʻOtua ko ia ʻokú ne fakatupu ha fie feohi mo ha taha ʻi he faʻahinga ʻe tahá (opposite sex), ʻa ia ʻoku maʻu ʻe he tangata mo e fefine kotoa peé, naʻe fakataumuʻa mai ia ʻe hotau Tupuʻangá ke hoko ko ha holi māʻoniʻoni koeʻuhí ko ha taumuʻa māʻoniʻoni—ʻo ʻikai ke fakafiemālieʻi ia he ko ha faʻahinga ongo pē ʻo e kakanó pe ko ha holi kovi fakakakano pē ʻi he ngaahi feohi ʻoku faí, ka ke faka-tatali ia ko hano fakahaaʻi ʻo e ʻofa moʻoní ʻi he haʻi toputapu ʻo e nofo malí.⁶

Kuo tā tuʻo lahi ʻeku pehē ange ki ha niʻihi kei talavou ʻi he ʻōlita ʻo e malí: ʻOua ʻaupito naʻa mou taʻe mapuleʻi e ngaahi ongoʻi ʻofa ʻo hoʻomou nofo malí. Tuku ke ulo maama ʻa hoʻomou ngaahi fakakaukaú ʻo hangē ko e huelo ʻo e laʻaá. Tuku ke langaki moʻui ʻa hoʻomou ngaahi leá pea ke fakatupulaki mo fakafiefia ʻa hoʻomou ngaahi feohí, ʻo kapau ʻoku mou loto ke tanumaki e lau-mālie ʻo e ʻofá ʻi hono kotoa ʻo hoʻomou nofo malí.⁷

ʻOku ʻi ai e taimi ʻe niʻihi ʻi heʻemau fefononga ʻaki ko ia ʻi he Siasí, ʻe haʻu ha husepāniti mo hono uaifí kia kimautolu ʻo fehuʻi mai pe ʻe ʻikai nai ke lelei ange kapau te na takitaha maʻana ʻo kumi hana ongo hoa te na alāanga angé, koeʻuhí he ʻoku ʻikai ke na feʻunga kinaua he nofo malí—ka ko e ongo meʻá ni naʻá na mali temipale. ʻOku mau pehē atu kia kinautolu kotoa ʻoku pehení, ko e taimi kotoa pē ʻoku tala mai ai ʻe ha ongo meʻa ne na mali ʻi he temipalé kuó na fepāhia ʻaki aí, ko ha fakamoʻoni ia ʻoku ʻi ai ha taha ʻiate kinaua, pe ko kinaua fakatouʻosi pē, ʻoku taʻe faitotonu ki heʻena ngaahi fuakava ʻi he temipalé. Ka ai ha ongo meʻa ne na mali ʻi he temipalé pea ʻokú na tauhi totonu ʻa ʻena ngaahi fuakavá, ʻe toe tupulaki ange ʻa ʻena feʻofaʻakí, pea ʻe toe loloto ange ʻa e ʻofa ʻokú na maʻu ʻi he taʻu nimangofulu ʻo ʻena nofo malí, ʻi he ʻofa ko ia naʻá na maʻu he ʻaho naʻá na mali ai he fale ʻo e ʻEikí. ʻOua naʻa mou maʻu hala ia.⁸

Ko kinautolu ʻoku ō ki he funga ʻōlita ʻo e malí ʻoku fonu ʻofa ʻa honau lotó, te mau lea kia kinautolu ʻi he moʻoni, kapau te nau tauhi totonu ʻa ʻenau ngaahi fuakava ʻi he temipalé, ko e hili ha taʻu ʻe nimangofulu mei heʻena malí, te na fepehēʻaki: “Kuo pau pē naʻe ʻikai ke ta ʻiloʻi ko e hā koā e ʻofa moʻoní he taimi naʻá ta mali aí, he ʻoku lahi ange ʻeta feongoʻiʻakí ʻa kitaua he ʻahó ni!” Pea ko e meʻa ia ʻe hokó ʻo kapau te na muimui ʻi he akonaki ʻa hona kau takí pea talangofua ki he ngaahi fakahinohino māʻoniʻoni mo toputapu ʻoku fakahoko ʻi he ouau ʻo e temipalé; te na tupulaki ʻo toe haohaoa ange ʻi heʻena ʻofá ʻo aʻu pē ki he kakato ʻo ʻena ʻofá ʻi he ʻafioʻanga ʻo e ʻEikí.⁹

Ko e meʻa noa pē ʻa e ngaahi fehalākí, ngaahi tōnounoú mo e ʻikai matamatalelei fakatuʻasinó ia ʻi hono fakafehoanaki atu ki he fisifisimuʻa ʻo e ʻulungāanga leleí, ʻa ia ʻoku tuʻuloa pea tupulaki hono fakaʻofoʻofá he fakalau ʻa e taʻú. Te mou lava foki ʻo nofo nonga ʻi homou ngaahi ʻapi fiefiá ʻi hoʻomou hoholo ʻo motuʻa angé ʻo kapau pē te mou fekumi pē ki he ʻulungāanga maʻa mo mahuʻinga ʻokú mou takitaha maʻú, ʻa ia ʻoku fie maʻu pē ke faka-ngingila ʻe he lavameʻá mo e tōnounoú, faingataʻá mo e fiefiá ke toki ulo pea fetapaki neongo e pō kaupōʻuli tahá.”¹⁰

ʻOku ʻi ai hamou niʻihi ʻoku ʻikai hamou hoa ʻi ʻapi he taimí ni. ʻOku ʻi ai hamou niʻihi kuo mole ʻa e uaifí pe husepānití pe kuo teʻeki maʻu hamou hoa. ʻOku mou ʻi he fungavaka tatau pē mo ha niʻihi fakaʻeiʻeikitaha he Siasí—ʻoku nau faivelenga, loto-toʻa, mo vilitaki ke moʻui ʻaki e ngaahi fekau ʻa e ʻEikí, tokoni ki hono langa ʻo e puleʻangá ʻi he māmaní, pea mo tokoniʻi homou kāingá.

Oku lahi ʻaupito ha ngaahi lelei te mou maʻu mei he moʻuí ni. ʻAi ke ke maʻu ha mālohi mei hono fakahoko hoʻo ngaahi pole-takí. ʻOku lahi ʻaupito ʻa e ngaahi founga ke fakahoko ai ʻení, ʻi hono tokoniʻi kinautolu ʻoku mou ʻofa aí, pea mo fakahoko lelei e ngaahi ngāue ʻoku ʻoatu ʻi hoʻomou ngāueʻangá pe ʻi ʻapí. ʻOku ʻoatu ʻe he Siasí ha ngaahi faingamālie lahi maʻamoutolu ke toko-niʻi ʻaki ha ngaahi laumālie ke nau maʻu ʻa e fiefia ʻo e moʻui taʻe-ngatá, ʻo fuofua kamata pē ʻi homou laumālié.

ʻOua naʻa mou tuku ke takihalaʻi kimoutolu ʻe he ongoʻi faka- ʻofaʻia ʻiate kita peé pe ko e ongoʻi loto-foʻí ke mou afe ai mei he hala ʻoku mou ʻilo ʻoku totonú. Fakatafoki hoʻo fakakaukaú ki hano tokoniʻi ʻo e niʻihi kehé. ʻOku ʻuhinga makehe kia kimoutolu e folofola ko ia ʻa e ʻEikí ʻo pehē: “Ko ia ʻoku kalofaki ʻene moʻuí, ʻe mole ia ʻiate ia: ka ko ia ʻoku mole ʻene moʻuí koeʻuhi ko aú, ʻe maʻu ʻe ia ia.” (Mātiu 10:39.)¹¹

ʻOku ʻikai ke fakamaauʻi ʻataʻatā pē kitautolu ʻe he ʻEikí mei heʻe-tau ngaahi ngāué ka ʻi he ngaahi fakakaukau ʻo hotau ngaahi lotó. … Ko ia ai, ko e [kakai fefine] ʻoku ʻikai ke nau maʻu e ngaahi tāpuaki ke hoko ko ha uaifi pe ko ha faʻē ʻi he moʻui ní— ʻa kinautolu ʻoku nau pehē ʻi honau lotó, kapau naʻá ku lava, naʻá ku fai ia, pe te u foaki atu ʻo kapau naʻá ku maʻu, ka he ʻikai te u lava he ʻoku ʻikai ke u maʻu iá—ʻe tāpuakiʻi kimoutolu ʻe he ʻEikí ʻo hangē pē naʻa mou fai iá, pea ʻe totongi fakafoki kia kinautolu ʻi he maama kahaʻú ko ʻenau loto-holi ke maʻu e ngaahi tāpuaki māʻoniʻoni naʻe ʻikai lava ke nau maʻu koeʻuhí he naʻe ʻikai ko ha foʻui ia ʻonautolu.¹²

Ko kimoutolu ʻa e ngaahi uaifi ʻoku mou fakaʻānaua naʻe mālohi homou ngaahi husepānití ʻi he Siasí, ʻo mou fakaʻamu naʻa nau ʻi heni he ʻahó ni kae ʻikai ke nau loto-ʻita pe tāufehiʻá, ʻo mou fifili pe ko e hā nai ʻe lava ke fai ke ʻi ai ha ʻaho. …temou fakataha ai mo kinautolu ʻi he temipale ʻo hotau ʻOtuá. Pea pehē foki mo ki-moutolu ngaahi husepāniti ʻoku fakaʻamu pehē ange mai ne mou ʻi heni mo homou uaifí. ʻOku mau pehē kia kimoutolu kapau te mou faivelenga ʻi he falala ʻoku mou maʻú, mo ʻofa ʻi homou huse-pānití pe uaifí, pea mou lotu maʻu pē ʻi he poʻulí, pongipongí, mo e ʻaho mo e pō, ʻe fakamālohia kimoutolu Kāingalotu ʻo e Siasí ʻe he mālohi ʻo e Laumālie Māʻoniʻoní, ʻa ia ʻoku ʻi ai haʻamou totonu ke mou fiefia ai ʻa kimoutolu kuo papitaiso pea moʻui faivelengá. ʻE hanga ʻe he mālohi ko iá, ʻo ʻai kimoutolu ke mou lava ʻo faka-vaivaiʻi e ngaahi fakafepaki ʻa homou hoá pea ʻomi tataki mai ʻa ki-nautolu ke nau toe ofi ange ki he tuí.¹³

ʻE ʻi ai hamou niʻihi te mou fakakaukau kimoutolu ke mali ki tuʻa ʻi he Siasí ʻo mou fakaʻamu loto pē te mou fakaului mai ho-mou hoá ki hoʻomou ngaahi tui fakalotú. ʻE lahi ange homou ngaahi faingamālie ke mou fiefia ʻi hoʻomou nofo malí ʻo kapau te mou fakaului ia kimuʻa pea toki fakahoko ʻa e malí.¹⁴

Ko e moʻoni ʻoku fakafalala ʻa e lelei ʻo e ʻapi ʻo e Kau Māʻoniʻoni ʻi he Ngaahi ʻAho Kimui Ní ʻi he founga mali naʻe faʻu ʻaki e ʻapi ko iá. Ko e mali ko ia ʻoku fakahoko pē ki he nofo māmaní pea mo e taimi ní, ʻe tokanga taha pē ia ki he ngaahi meʻa ʻo e māmani ko ʻení. Ko e mali ko ia ʻoku fakahoko ki he taʻengatá, ʻe kehe ʻaupito pē hono faʻungá mo hono fakavaʻé ia ʻoʻona. …

…Koe moʻoni, ʻoku tau ʻiloʻi foki ʻoku ʻikai ʻomi e ngaahi tā- puaki ia ʻoku tau fekumi ki aí ʻi heʻetau tuʻu hake pē ʻo ʻalu ki he temipalé taʻe fai ʻa e teuteu totonu ʻi he tapa kotoa peé. Ko e mali taʻengatá ʻoku makatuʻunga ia ʻi ha tuʻunga matuʻotuʻa mo fakapotopoto pea mo ha mateaki ʻa ia—kapau ʻe fakatahaʻi mo e ʻenitaumení mo e ngaahi ouaú—te nau lava ʻo fakaava ʻa e ngaahi matapā ʻo e langí kae malingi hifo kia kitautolu ʻa e ngaahi tāpuakí.

… ʻOku ʻikai ko e mali temipalé ko ha feituʻu pē ia ʻoku faka-hoko ai ʻa e ouaú; ka ko ha fakataukei kakato ia ki he moʻuí, nofo malí pea mo e ʻapí. Ko e tuʻunga māʻolunga taha ia ʻo hono faʻu-faʻu ʻo e ngaahi tōʻonga ʻulungāanga ki he Siasí, anga-maʻá, pea mo ʻetau fetuʻutaki fakafoʻituitui mo e ʻOtuá—pea mo ha toe ngaahi meʻa kehe pē. Ko ia ai, ʻoku ʻikai feʻunga ʻa hono malangaʻi ʻataʻatā pē ʻo e mali temipalé. Kuo pau ke ngāue mo ʻetau ngaahi efiafi fakafāmili ʻi ʻapí, ngaahi kalasi seminelí, ngaahi ʻinisititiutí mo e ngaahi houalotú ʻo fakataumuʻa ki heni—- ʻo ʻikai ʻi he ako-naki pē—ka ʻi hono fakahaaʻi ko e tui fakalotu mo e ngaahi faka-kaukau ko ia ʻo e mali temipalé, te nau ʻomi ʻi he moʻuí ni mo e taʻengatá ʻa e ngaahi meʻa ʻoku fie maʻu moʻoni ʻe ha kakai toko-lahí. Kapau te tau fakahoko lelei e ngaahi meʻá ni, te tau lava ʻo fakaʻaliʻali atu ai e faikehekehe ʻo e “māʻoniʻoní mo ia ʻoku koví” [vakai ki he ʻIsikeli 44:23] koeʻuhi ke lava ʻe he ngaahi ongo faka-faʻē mālohi ko ia ʻoku maʻu fakanatula ʻe he fānau fefiné ʻo ueʻi ʻa e finemui ʻoku veiveiua ʻi heʻene fili ki he ngaahi ongo māʻoniʻoní pe ko e hala ʻoku fekumi pē ki he fakalatá. ʻI hono fakatahaʻi ʻo e fakaʻutoʻuta moʻoní mo e ngaahi lēsoni ʻoku akó, te tau lava ke fakaʻaliʻali ai ki he talavoú ko e founga ʻa e māmaní ko e founga ia ʻa e valé—neongo ʻene hā ngali fakaʻofoʻofá pea neongo e ʻasi ngali poto ʻa hono kau tangata hā manumanumelié; ko e hala ia ʻo e mamahí; ko e hala ia ʻe iku ʻo nau fakafehalaakiʻi ai e ngaahi holi naʻá ne maʻú ke ʻi ai hano ʻapi pea mo maʻu ʻa e ngaahi fiefia ʻo e hoko ko e tamaí.¹⁵

Neongo ʻoku ʻikai lava ke veteki kotoa ʻa e ngaahi palōpalema ʻo e moʻui ní ʻi he mali temipalé, ka ko e moʻoni, ko kinautolu ʻoku hū ki ai ʻi he moʻui tāú, ʻoku hoko ia ko ha fakaū mo e malu- ʻanga pea mo ha fakamaʻunga ki he laumālié ʻi he taimi ʻoku tō takutaku ai ʻa e ngaahi matangi ʻo e moʻuí. …

Ko e meimei taʻu ʻeni ʻe uofulu ʻa ʻeku aʻusia ha ngaahi meʻa fakaʻofoʻofa, ʻo ʻeku nofo ʻi he uike takitaha ʻi he niʻihi ʻo e ngaahi ʻapi lelei taha ʻo e Siasí, pea kehe ʻaupito ʻi he meimei uike kotoa pē, ʻa ʻeku lava ʻo mamata ki ha niʻihi ʻo e ngaahi ʻapi ʻoku ʻikai ke ʻi ai ʻa e fiefiá. Kuó u ʻosi maʻu ha ngaahi fakakaukau aofangatuku mei he ngaahi meʻa ko ʻeni kuó u mamata aí: ʻUluakí, ko e ngaahi ʻapi fiefia tahá ʻa e ngaahi ʻapi ko ia naʻe mali temipale ʻenau ongo mātuʻá. Ko hono uá, ʻoku ola lelei taha ʻa e mali temipalé kapau naʻe fakahoko ʻe he husepānití mo e uaifí ʻa e ngaahi ouau topu-tapu ʻo e temipalé ʻokú na maʻa mo haohaoa, ʻi he sino, fakakau-kau, pea mo e loto. Ko hono tolú, ʻoku toputapu taha pē ʻa e mali temipalé ʻi he taimi ko ia kuo ʻosi akoʻi lelei ai kia kinaua ʻa e ngaahi taumuʻa ʻo e ʻenitaumeni toputapú pea mo e ngaahi ngafa ʻo e husepānití mo e uaifí ʻi hono tauhi ʻo e ngaahi fakahinohino naʻá na maʻu ʻi he temipalé, ʻo kamata pē mei heʻena malí. Ko hono faá, ko e ngaahi mātuʻa ko ia kuo nau fakamaʻamaʻaʻi ʻa ʻenau ngaahi fuakava ʻi he temipalé, ʻoku ʻikai ha ʻamanaki ia ʻe toe lelei ange ʻa ʻenau fānaú ʻiate kinautolu ko e tupu pē mei heʻenau tā sīpinga koví.

ʻI he ʻahó ni, kuo hanga ʻe he ngaahi ākenga foʻou ʻo e valá, kā- kaá, ngaahi fakangalingalí, pea mo e ngaahi meʻa fakaholo-mamata ʻo e māmaní, ʻo fakakeheʻi e ngaahi fakakaukau māʻoniʻoni fekauʻaki mo e ʻapí pea mo e nofo malí, pea aʻu pē ki he ouau foki ʻo e malí. Monūʻia ʻā ka ko e faʻē fakapotopoto ʻokú ne mamata tonu ki heʻene tama fefiné ʻi ha ʻata toputapu ʻi he loki sila fakalangí, ʻa ia ʻoku mavahe ia mei he ngaahi meʻa fakamā- mani kotoa pē, pea ʻoku fepukeʻaki nima ai ʻa e taʻahine mali mo e tangata mali kei talavoú ʻi he funga ʻōlita toputapú ʻi he ʻao ʻo e ngaahi mātuʻá pea mo e ngaahi kaumeʻa mamae ʻo e fāmilí. Fakafetaʻi ki he ʻOtuá koeʻuhi ko e faʻē ko ia ʻokú ne fakahā ange ki heʻene tama fefiné ko e feituʻu ʻeni ʻi he māmaní ʻoku ofi taha ki he langí, ʻoku fetuʻutaki ai ha loto ʻe ua ʻi ha feʻofaʻaki ʻokú ne kamata ha fehokotaki ʻo taha pē ʻa ia ʻokú ne fakafepakiʻi e ngaahi haʻahaʻa ʻo e faingataʻá, loto-mamahí, pea mo e ngaahi ʻamanaki taʻe hoko ʻoku fakatupu maumaú, peá ne ʻomai ʻa e meʻa mahu- ʻinga taha ʻokú ne ueʻi ʻa e lotó ke aʻusia ai ʻa e ngaahi lavameʻa kāfakafa taha ʻi he moʻuí!¹⁶

ʻOfa ange ʻa e ʻOtuá ke tāpuakiʻi ʻa e ngaahi ʻapi ʻo e Kāingalotú pea ke nau maʻu ha fiefia heni pea mo ha fakavaʻe ke maʻu ai ʻa e hakeakiʻi ʻi he nāunau silesitialé ʻi he maama ka hoko maí.¹⁷