Ko e Lami naʻe Tāmateʻi Talu mei he Kamataʻanga ʻo e Māmaní

Naʻe fakaʻaongaʻi ʻe ʻĀtama mo ʻIvi … ʻa ʻena tauʻatāina ke filí pea ʻi hona loto moʻoni pe ʻonaua, ʻi heʻena kai ʻa e fua ʻo e ʻakau, ʻa ia naʻe tuʻutuʻuni ke ʻoua naʻá na kaí; tuʻunga ai ʻa ʻena moʻulaloa ki he fono ʻa Sētané. ʻI he talangataʻa ko iá, ne tauʻatāina ai ʻa e ʻOtuá ke ne fakahoko kiate kinaua ha fakamaau. Naʻe pau ke na ʻilo ne ʻikai ngata pē ʻi he hoko ʻa e ʻOtuá ko ha Tamai ʻaloʻofá, ka ʻoku toe hoko ia ko ha Tamai ʻoku fakamaau totonu, pea ʻi heʻena maumauʻi ʻa e fonó naʻá na haʻisia leva ke maʻu ha tautea pea ko ia ne kapusi ai kinaua mei he ngoue fakaʻofoʻofa ko iá. Ne hoko heni kiate kinaua ʻa e ngaahi fetōʻaki kotoa pē ne maʻu ʻe he kakai matelié ʻo fāi mai mei he taimi ko iá. Naʻe pau ke na ʻilo ai ne tuʻunga ʻi heʻena talangataʻá ʻa ʻena maʻu ʻa e tautea ʻo e fakamaau totonú. Naʻe tuku ai kinaua ke na maʻu ʻa e maá ʻi he kakava hona matá, koeʻuhí he kuó na hoko ʻo kakano.

… Ne hoko kotoa ai ko hona tufakanga ʻa e mamahí, faingataʻaʻiá, pea mo e maté, ka ne hoko mai ʻa e mamahi ko iá, ʻo hangē pē ko e ngaahi meʻa ne tau foua talu mei ai ʻo aʻu mai ki he taimi ní, fakataha mo e ʻilo mo e mahino naʻe ʻikai ke tau meimei maʻu tuku kehe pē ʻi he mamahí. …

… Makehe mei he kaunga ʻa e Hingá kia ʻĀtama mo ʻIví, ʻi heʻene fakatupu ke hoko ha liliu ʻiate kinauá, ne toe uesia ʻe he liliu ko iá ʻa e natula kotoa ʻo e tangatá, ʻa e ngaahi fakatupu kotoa ʻo natulá, ʻa e ngaahi fakatupu kotoa ʻo e fanga monumanú, ʻakaú,—he ne liliu ʻa e faʻahinga meʻa moʻui kotoa pē. Naʻa mo māmani ne moʻulaloa mo ia ki he maté. … ʻOku ʻikai lava ʻe taha ia ʻo fakamatalaʻi ʻa e founga ʻo ʻene hokó, pea ka ʻi ai ha taha ʻe feinga ke ne fakamatalaʻi, ʻe mavahe atu ia mei he meʻa kuo folofola ʻaki ʻe he ʻEikí kia kitautolu. Ka ne hoko ha liliu ki hono kotoa ʻo e fakatupu, ko ia ne ʻikai moʻulaloa ki he maté ʻo aʻu mai ki he taimi ko iá. Talu mei ai ne hokosia ki he meʻa kotoa ʻi natula ha tuʻunga hōloa māmālie kae ʻoua kuo hokosia ʻa e mate fakamatelié, pea ʻi he hili ʻo iá, ne fie maʻu ke fakafoki ʻa e ngaahi meʻa kotoa ki hono tuʻunga totonú ʻo fakafou ʻi ha tuʻunga toetuʻu. …

… Ko e taha ʻo e ngaahi malanga maʻongoʻonga taha, ka te u pehē ko e malanga nounou taha ia kuo fai ʻe ha taha, ne fai ia ʻe he Faʻē ko ʻIví. …

“Ka ne taʻe ʻoua ʻeta maumau fonó pehē, ʻe ʻikai ai pē [ke] ta maʻu ha hako, pea ʻikai foki ʻiloʻi ʻa e leleí mo e koví, mo e fiefia ʻo hota huhuʻí, pea mo e moʻui taʻengata ʻa ia ʻoku foaki ʻe he ʻOtuá ki he kau talangofua kotoa peé” [Mōsese 5:11].

ʻOku totonu ke tau pehē, ʻo fiefia fakataha mo ʻIvi ʻi he Hingá, he kuó ne fakaʻatā ke hoko mai ʻa e ʻilo ʻo e leleí mo e koví, ʻo ne fakaʻatā ke hoko mai mo e fānaú ki he moʻui fakamatelié, ʻo ne fakaʻatā ke maʻu ʻa e fiefia ʻo e huhuʻí mo e moʻui taʻengata ko ia ʻoku foaki ʻe he ʻOtuá ki he kakai kotoa peé.

Pea naʻe pehē mo ʻĀtama, ʻo tāpuakiʻi ʻaki ʻa e meʻa-foaki ʻo e Laumālie Māʻoniʻoní, “ʻo fakamālōʻia ʻa e ʻOtuá … pea naʻe fakafonu ia, ʻo ne kamata ke kikite ʻo kau ki he ngaahi fāmili kotoa pē ʻo e māmaní, ʻo ne pehē: Ke monūʻia ā ʻa e huafa ʻo e ʻOtuá, he ko e meʻa ʻi heʻeku faiangahalá, kuo fakaʻā ai hoku matá, pea te u maʻu ʻa e fiefia ʻi he moʻuí ni, pea te u toe mamata ʻi he kakanó ki he ʻOtuá” [Mōsese 5:10] …

ʻOfa ke foaki mai ʻe he ʻEikí ʻEne mahino ki he tuʻunga māʻolunga ko ʻeni kuo hoko kia kitautolú, pea tuku ke tau fakalāngilangiʻi ʻi heʻetau fakakaukaú mo ʻetau ngaahi akonakí ʻa e tukufakaholo maʻongoʻonga ko ia kuo tuku mai ʻe ʻĀtama mo ʻIvi kia kitautolú, he ne tuʻunga ʻi he meʻa ne na foua ʻi heʻena ngāueʻaki ʻena tauʻatāina ke filí, ne na kai ai ʻa e fua ʻo e ʻakau naʻá ne ʻoange ʻa e tupuʻanga ʻo e moʻui fakamatelié pea hoko mai ai kia kitautolu, ko hona hako ʻo aʻu mai ki he ngaahi toʻutangata ʻo taimí, ʻa e tuʻunga maʻongoʻonga ko ia ʻoku tau lava ai mo kitautolu ʻo maʻu ʻa e fiefia ʻo e huhuʻí, pea mo mamata ai ʻi he kakanó ki he ʻOtuá mo maʻu ʻa e moʻui taʻengatá.³

Naʻe kapusi ʻe he ʻEiki ko e ʻOtuá ʻa ʻĀtama mei he Ngoue ko ʻĪtení koeʻuhí ko ʻene talangataʻá. Naʻá ne fehangahangai ai mo e mate fakalaumālié. … Kae vakai ʻoku ou pehē kiate kimoutolu, ko au ko e ʻEikí ko e ʻOtua, ne u tuku kia ʻĀtama mo hono hakó ke ʻoua te nau mate ʻi he mate fakaemāmaní kae ʻoua ko au ko e ʻEiki ko ʻe ʻOtuá, [te u] fekau atu ha kau ʻāngelo ke fakahā kiate kinautolu ʻa e fakatomalá mo e huhuʻí, tuʻunga ʻi he tui ki hoku ʻAlo pē Taha naʻe Fakatupú, ke lava ke fokotuʻu hake ia ʻi he moʻui taʻengatá [vakai, T&F 29:41–43]. … ʻI hono kapusi ʻo ʻĀtama mei he Ngoue ko ʻĪtení, ne fehangahangai ai mo e mate fakalaumālié, ʻa ia ko e fakamavaheʻi ia mei ha toe fetuʻutaki vāofi mo e ʻao ʻo e ʻEikí.⁴

Ko e hē ne fekauʻi mai ai ʻa e Fakamoʻuí ki māmaní? Ne tali ʻe he ʻEikí tonu pē ʻa e fehuʻi ko iá ʻi he lolotonga ʻo ʻene ngāué ʻo ne pehē: “He naʻe ʻikai fekau ʻe he ʻOtuá hono ʻAló ki māmani ke fakamalaʻia ʻa māmani; ka koeʻuhí ke moʻui ʻa māmani ʻiate ia” [Sione 3:17.] …

Fakahaofi mei he hā? Huhuʻi mei he hā? ʻUluakí, ke fakahaofi mei he mate fakamatelié ʻi he toetuʻu ʻo e maté. Ka ʻi he tafaʻaki ʻe tahá ʻoku fakahaofi kitautolu ʻi he founga tatau pē ʻe heʻene feilaulau fakaleleí. ʻOku fakahaofi kitautolu mei he angahalá.⁵

ʻOku ʻuhinga ʻa e fakamoʻuí ia ki he Kau Māʻoniʻoni ʻi he Ngaahi ʻAho Kimui Ní ke fakatauʻatāinaʻi mei he pōpulá pea mei he ngaahi nunuʻa ʻo e angahalá tuʻunga ʻi ha tauʻatāina fakalangi, ke tukuange mei he angahalá mo e malaʻia taʻengatá tuʻunga ʻi he Fakalelei ʻa Kalaisí.

ʻOku ʻikai ke u tui ʻoku toe ʻi ai ha feituʻu ʻe fakamatalaʻi lelei ange ai ʻa e palani ʻo e Fakaleleí ka ko e ngaahi tohi ne fai ʻe Sēkopé, ʻo hangē ko ia ʻoku ʻi he Tohi ʻa Molomoná, 2 Nīfai vahe 9. ʻOku ou fie ʻomi ia ki hoʻomou tokangá mo kole atu ke mou toutou lau fakalelei ʻa e fakamatala mahuʻinga ko iá: …

“ʻOiauē, hono ʻikai ke lahi ʻa e ʻaloʻofa ʻa hotau ʻOtuá, ʻa e Toko Taha Māʻoniʻoni ʻo ʻIsilelí! He ʻokú ne fakahaofi ʻa ʻene kau māʻoniʻoní mei he fuʻu meʻa koví, ʻa ia ko e tēvoló, mo e maté, mo heli, mo e ano ʻo e afi mo e makavela, ʻa ia ko e fakamamahi taʻengatá.

“ʻOiauē, hono ʻikai ke lahi ʻa e māʻoniʻoni ʻa hotau ʻOtuá! He ʻokú ne ʻafioʻi ʻa e meʻa kotoa pē, pea ʻoku ʻikai ha meʻa ka ʻokú ne ʻafioʻi ia.

“Pea te ne hāʻele mai ki māmani koeʻuhí ke ne fakamoʻui ʻa e kakai fulipē ʻo kapau te nau tokanga ki hono leʻó; he vakai, te ne kātakiʻi ʻa e ngaahi mamahi ʻa e kakai kotoa pē, ʻio, ʻa e ngaahi mamahi ʻa e kakai moʻui kotoa pē, ʻa e kakai tangatá mo e kakai fefiné fakatouʻosi, pea mo e fānaú, ʻa kinautolu ʻoku kau ʻi he fānau ʻa ʻĀtamá.

“Pea te ne kātakiʻi ʻa ʻeni koeʻuhí ke hoko ʻa e toetuʻú ki he kakai fulipē, koeʻuhí ke tuʻu ʻa e kakai fulipē ʻi hono ʻaó ʻi he fuʻu ʻaho fakamaau lahí.

“Pea ʻokú ne tuʻutuʻuni ki he kakai fulipē kuo pau ke nau fakatomala mo papitaiso ʻi hono huafá, ʻo maʻu ʻa e tui haohaoa ki he Toko Taha Māʻoniʻoni ʻo ʻIsilelí, pe ʻe ʻikai lava ke fakamoʻui kinautolu ʻi he puleʻanga ʻo e ʻOtuá.

“Pea kapau ʻe ʻikai te nau fakatomala pea tui ki hono huafá, ʻo papitaiso ʻi hono huafá, pea kātaki ʻo aʻu ki he ngataʻangá, kuo pau ke nau malaʻia; he kuo folofola pehē ʻe he ʻEiki ko e ʻOtuá, ko e Toko Taha Māʻoniʻoni ʻo ʻIsilelí” [2 Nīfai 9:19–24] …

ʻOku fakamatalaʻi heni … fakamoʻui fakafoʻituitui, ʻoku hoko ki he toko taha fakafoʻituitui kotoa pē, ʻo fakatatau mo hono ʻulungāangá pea mo ʻene tōʻonga moʻuí. Ka ʻoku tau toe maʻu foki mo e meʻa ko ia ʻoku tau ui ko e [fakamoʻui] “fakalūkufuá”, ʻa ia ʻoku hoko ki he faʻahinga kotoa ʻo e tangatá, ʻo tatau ai pē pe ʻoku nau lelei pe kovi, koloaʻia pe masiva, pe ko e taimi fē ne nau moʻui aíʻoku tatau ai pē ia. Te nau maʻu kotoa ʻa e ngaahi tāpuaki ʻo e Fakaleleí pea mo e ngaahi tāpuaki ʻo e toetuʻú ne foaki kia kinautolu ko e meʻa foaki taʻe totongi tuʻunga ʻi he feilaulau fakalelei ʻa e Fakamoʻuí. …

Ko ia ai, ko e ngaahi tefitoʻi akonakí ni, kuo ʻomi mahino, ʻe lava ke fakahaofi ʻa e faʻahinga kotoa ʻo e tangatá ʻi he mālohi ʻo e fakaleleí, ʻo hangē kuo mate kotoa pē ʻia ʻĀtamá, ʻe pehē ʻe moʻui kotoa pē ʻia Kalaisi ʻo ʻikai ha taha ʻe tō mei ai. Naʻa mo e ngaahi foha ʻo e malaʻiá ne nau fakahoko ʻa e angahala taʻe malava ke fakamolemolé te nau toetuʻu fakataha mo e taha kotoa pē ʻi he hako ʻo ʻĀtamá. … ʻOku tau maʻu ʻeni ʻi he Ngaahi Tefito ʻo e Tuí: “ʻOku mau tui ʻe fakamoʻuiʻi ʻa e tangata kotoa pē ʻi he Fakalelei ʻa Kalaisí, tuʻunga ʻi he talangofua ki he ngaahi fono mo e ngaahi ouau ʻo e Ongoongoleleí.” [Ngaahi Tefito ʻo e Tui 1:3.]⁶

Naʻe fakamamafaʻi ʻe he ʻEikí hono mahuʻinga ʻo e ʻilo ki he Fakamoʻuí pea mo hono misiona fakalangí ʻi ha meʻa ʻe taha, ʻi heʻene folofola ki he kau Fālesi ne haʻohaʻo takai ʻiate iá, ʻo hangē ko ia ne nau faʻa fakahoko ʻi heʻenau feinga ke fakamaaʻi pe ke fakaʻefihiaʻi iá, “Ko e hā [hoʻomou fakakaukau] ki[a] Kalaisí?” [Mātiu 22:42.] …

ʻI he lolotonga ʻo ʻene ngāué naʻe ʻi ai ha niʻihi naʻe taʻe tui ka naʻa nau fakahā ha ngaahi meʻa kau ki he ʻEikí. ʻI hono fonua ko Nāsaletí, ne nau manuki ai ʻo pehē:

“ʻIkai ko e foha ʻeni ʻo e tufungá? ʻikai ʻoku ui ʻene faʻeé ko Mele? mo hono ngaahi kāingá ko Sēmisi, mo Sose, mo Saimone, mo Siutasi? … Pea nau tūkia ʻiate ia.” [Mātiu 13:55, 57.] …

ʻI he tafaʻaki ʻe tahá, … ne pehē ai ʻe hono kau muimuí ʻo hangē ko Pitá, ko e māʻolunga taha ʻi he kau ʻaposetoló: “Ko koe ko e Kalaisí, ko e ʻAlo ʻo e ʻOtua moʻuí” (Mātiu 16:16)—pea meia Maʻata naʻá ne pehē, “ʻIo, ʻEiki: ʻOku ou tui ko koe ʻa e Kalaisí, ko e ʻAlo ʻo e ʻOtuá, naʻe pau ke haʻu ki māmaní.” (Sione 11:27.) Pea mei ha taha ʻo ʻene kau ākongá, ʻi he hili ʻo ʻene mamata mo ala ki he ʻEiki kuo Toetuʻú, ne fakamahinoʻi ʻe Tōmasi ʻene fakamoʻoní ʻaki ʻa e ngaahi lea mahinongofua ko ʻení: “ʻE hoku ʻEiki mo hoku ʻOtua”! [Sione 20:28.] …

ʻOku ou fakakaukau he taimí ni ki ha meʻa fehangahangai ʻe ua ne hoko. Ko haku kaumeʻa mamae ne ne maʻu ʻa e pōpoaki: “ʻOku mau loto mamahi ke fakahā atu kuo mālōlō ho fohá ʻi he taú.” Ne u ʻalu ki hono ʻapí, peá u sio ai ki he fāmili mamahí ni, ne nau maʻu ʻa e meʻa kotoa pē ne lava ke fakatau mai ʻe he paʻangá—ʻa e koloá, tuʻunga māʻolunga, ʻa e ngaahi meʻa ko ē ʻe lau ʻe he māmaní ʻoku fakaʻeiʻeikí, ka ko ʻeni kuo uesia ʻenau ʻamanakí mo ʻenau fakaʻamú, ʻo nau feinga ke piki ki ha meʻa he ʻikai ke nau lava ʻo maʻu maʻu ai pē ʻo faai mai mei he taimi ko iá, pea ʻoku ngali he ʻikai pē ke nau toe maʻu. Naʻe ʻikai ke nau maʻu ʻa e fakafiemālie naʻe mei lava ke nau maʻú.

ʻOku ou fakafehoanaki ʻeni mo ha meʻa ne u sio tonu ai ʻi he Falemahaki ʻo e Siasí (LDS Hospital) ʻi ha māhina ʻeni ʻe ono mei ai, ʻi he fakatōtōlaʻā ai ha taha ʻo ʻetau kau palesiteni fakamisiona faivelenga mo ʻofeina. Naʻe taulōfuʻu ʻa e langá, ka naʻe ʻi hono lotó ha fiefia koeʻuhí he naʻá ne ʻilo ʻoku faʻa ako ʻa e tangatá ke talangofuá ʻi he faingataʻá, pea mo ha totonu ke feohi mo ia ne mahulu atu ʻa ʻene faingataʻaʻiá ʻi ha toe meʻa kuo foua ʻe ha taha. Naʻa mo ia, naʻá ne ʻilo ʻa e mālohi ʻo e ʻEiki ne toe tuʻú.

ʻOku totonu ke tau fai ʻa e fehuʻi ko ʻení kia kitautolu he ʻahó ni, ko e tali ia ki he fehuʻi ne fai ʻe he ʻEikí kia kinautolu ʻi hono kuongá, “Ko e hā hoʻomou fakakaukau kia Kalaisí?” ʻOku totonu ke tau fehuʻi ʻo hangē ko ʻetau lea ʻoku fai he kuonga ní, “Ko e hā ʻetau fakakaukau kia Kalaisí?” pea toe ʻai ia ke fakafoʻituitui ange ʻo pehē, “Ko e hā ʻeku fakakaukau kia Kalaisí?” ʻOku ou pehē nai ko e Huhuʻi ia ʻo hoku laumālie moʻuí? ʻOku ou pehē nai ʻo ʻikai ha toe veiveiua ʻi heʻeku fakakaukaú, ko e toko taha ia ne hā ki he Palōfita ko Siosefa Sāmitá? ʻOku ou tui nai ko Ia naʻá ne fokotuʻu ʻa e Siasí ni he funga māmaní? ʻOku ou tali nai ia ko e Fakamoʻui ʻo e māmaní? ʻOku ou fai pau nai ki heʻeku ngaahi fuakava, ʻi he vai ʻo e papitaisó, ʻa ia ko ʻeku mahinó, ʻoku ʻuhinga ia te u tuʻu ko e fakamoʻoni kiate ia ʻi he taimi kotoa pē, ʻi he meʻa kotoa pē, pea ʻi he feituʻu kotoa pē, te u ʻi ai, pea naʻa mo e maté?⁷

ʻE tāpuekina kitautolu ʻe he ʻEikí ʻo fakatatau mo e tuʻunga ʻo ʻetau tauhi ʻEne ngaahi fekaú. Ne pehē ʻe Nīfai:

“He ʻoku mau ngāue tūkuingata ke tohi, ke fakalotoʻi ʻa ʻemau fānaú mo honau kāinga foki ke nau tui kia Kalaisi, mo fakalelei ki he ʻOtuá; he ʻoku mau ʻilo ko e meʻa ʻe fakamoʻui ai ʻa kitautolú ko e ʻaloʻofa, ʻo ka hili ʻa ʻemau fai ʻa e meʻa kotoa pē ʻe ala faí.” (2 Nīfai 25:23.)

ʻE hanga ʻe he taʻataʻa ʻo e Fakamoʻuí, mo ʻEne fakaleleí, ʻo fakahaofi kitautolu, ʻo ka toki ʻosi haʻatau fakahoko ʻa e meʻa kotoa pē te tau lava ʻo fai ke fakahaofi ai kitautolú ʻi hono tauhi ʻo ʻEne ngaahi fekaú. Ko e ngaahi tefitoʻi moʻoni kotoa ʻo e ongoongoleleí ko e ngaahi tefitoʻi moʻoni ia ʻo e talaʻofá ʻoku fakahā mai ai ʻa e ngaahi palani ʻa e Māfimafí kia kitautolú.⁸

Kuo pau ke fai ʻe he toko taha taki taha ʻa e meʻa kotoa pē te ne lava ke fakahaofi ai ia mei he angahalá; hili ia pea te ne toki lava ke lau haʻane totonu ki he ngaahi tāpuaki ʻo e huhuʻi ʻa e Tokotaha Māʻoniʻoni ʻo ʻIsilelí, ke fakahaofi ʻa e faʻahinga kotoa pē ʻo e tangatá tuʻunga ʻi he talangofua ki he fono mo e ngaahi ouau ʻo e ongoongoleleí.

Naʻe ʻikai ngata pē ʻi hono fai ʻe Sīsū ʻo e fakalelei maʻae ngaahi maumau-fono ʻa ʻĀtamá ka mo e ngaahi angahala ʻa e faʻahinga kotoa ʻo e tangatá. Ka ko e huhuʻi mei he ngaahi angahala fakafoʻituituí ʻoku fakafuofua ia mei he ngaahi feinga fakatāutahá, ʻa ia ʻe fakamāuʻi ʻo fakatatau mo ʻene ngāué.

Kuo ʻosi fakamahinoʻi ʻe he folofolá neongo ʻe hoko ʻa e toe-tuʻú ki he taha kotoa, ko kinautolu pē ʻe talangofua kia Kalaisí te nau maʻu ʻa e ngaahi tāpuaki lahi ange ʻo e fakamoʻui taʻengatá. Ne pehē ʻe Paula ʻi heʻene lea ki he kakai Hepeluú “peá ne hoko ko e tupuʻanga ʻo e moʻui taʻengatá kiate kinautolu kotoa pē ʻoku talangofua kiate iá” (Hepelū 5:9) …

Ko ʻeku fakaʻānaua māʻulaló, pehē ange mai ke mahino kakato ange ki he tangata ʻi he potu kotoa pē hono mahuʻinga ʻo e fakalelei ʻa e Fakamoʻui ʻo e faʻahinga kotoa ʻo e tangatá, ʻa ia ne ne foaki mai ʻa e palani ʻo e fakamoʻui ʻokú ne taki atu kitautolu ki he moʻui taʻengatá, ʻa ia ʻoku ʻafio ai ʻa e ʻOtuá mo Kalaisí.⁹