Tokanga ki he Talafekau Moʻoni ʻa Sīsū Kalaisí

Manatuʻi ʻoku ʻikai ko e Palesiteni ʻo e Siasí ʻoku ʻulu ki he siasi ko ʻení. Ko e ʻulu ki he siasí ni ko e ʻEikí, ʻa Sīsū Kalaisi, ʻa ia ʻokú ne pulé. … Lolotonga ʻa e ngaahi moveuveu kotoa ko ʻeni ʻoku hokó, ʻoku lava pē ke tau ʻiloʻi fakapapau ʻokú Ne fakahinohino kitautolu, pea ʻoua naʻa ngalo ia ʻiate kitautolu.⁴

“Ko [Sīsū] ko e ʻulu ia ki he sinó, ko e Siasí: ʻa ia ko e kamata ʻanga, ko e ʻuluaki tupu mei he maté; koeʻuhi ke māʻolunga taha pē ia ʻi he ngaahi meʻa kotoa pē.” (Kolose 1:18.) Ka neongo ia, ko e moʻoni, ko e kuonga kotoa pē naʻe ʻi he māmaní ai ʻa ʻene ongoongoleleí pea ʻosi fokotuʻu ʻa hono Siasí, naʻe fakanofo pea foaki ʻe he ʻEikí ʻa e mafai ki he tangata pē ʻe taha ʻi he kuonga peheni takitaha ʻa ia naʻe ui ia ko e palesiteni ʻo e Siasí, pe ko e palōfita, tangata kikite mo e tangata maʻu fakahā ki he Siasí. ʻOku ʻikai ke hanga ʻe he ngaahi hingoá, pe ko hono foaki ko ʻeni ʻo e mafaí ʻo ʻai ʻa e tokotaha ko iá ke hoko “ko e ʻUlu ʻo e Siasí,” he ko e hingoa ko iá ʻoku ʻo Sīsū Kalaisi ia. Ka neongo ia, ʻokú ne ʻai ʻe ia ʻa e tokotaha ko ʻení ke ne hoko ko e tangata lea maʻá e ʻOtuá pea ko e tokotaha ia ʻokú ne fai e ngāue ʻa e ʻOtuá pea ʻokú Ne folofola mai ai ki hono kakaí ke ʻomi ha ngaahi fakahinohino, ke foaki mai pe ke taʻofi ʻa e ngaahi tefitoʻi moʻoní mo e ngaahi ouaú, pe ke fakahoko mai ai ha ngaahi fakatokanga. …

… Ko e palesiteni ʻo e Siasí ko e tokotaha ia ʻokú ne tauhi ʻa e Fale pe ko e Puleʻanga ʻo e ʻEikí. ʻOku tuku ki hono nimá ʻa e ngaahi kī ki hono tafaʻaki kotoa pē. Fakatatau mo e fakahinohino ʻa e ʻEikí, ʻokú ne foaki ʻa e ngaahi kī ʻo e mafaí ki he kau mēmipa kehe ʻo e Siasí ke nau fai papitaiso, ke nau malanga ʻaki ʻa e ongoongoleleí, ke hilifaki honau ngaahi nima kia kinautolu ʻoku puké, ke nau tokangaʻi pe ke nau faiako ʻi he ngaahi lakanga kehekehe. ʻOkú ne foaki ki he tokosiʻi pē ʻa e mafai ke nau pule ʻi he ngaahi ouau ʻo e ngaahi temipalé pe ke nau fakahoko ai ʻa e ngaahi malí koeʻuhi “ke nonoʻo ia ʻi māmani pea ʻi he langí.”⁵

Ko e palōfitá ko ha tokotaha ia ʻoku ueʻi ʻe he laumālié pea fakanofo fakalangi ke ne fakahā mai mo fakaʻuhingaʻi ʻa e faka-kaukau pea mo e finangalo ʻo e ʻOtuá. ʻOkú ne maʻu ʻa e ngaahi kī ki he puleʻanga ʻo e ʻOtuá ʻi hotau kuongá ni, ʻo hangē ko ia ne foaki kia Pita ke ne hoko ai ko e taki ʻo e Siasí ʻi he māmaní ʻi hono kuongá.⁶

Tuku muʻa ke u lau atu kia kimoutolu ha meʻa naʻe hiki [ʻe Palesiteni J. Lūpeni Kalake, ko e Siʻí] ke lea ʻaki ʻi ha fakatahaʻanga kehe ia: “Kuo pau ke tau manatuʻi. … ko e Palesiteni pē ʻo e Siasí, ʻa e Taulaʻeiki Lahi Pulé,. … ʻokú ne maʻu ʻa e totonu ke maʻu e ngaahi fakahā ki he Siasí, ʻo tatau ai pē pe ko e ngaahi fakahā foʻou pe ko ha fakatonutonu, pe ke ne fakamafaiʻi ʻa hono fakaʻuhingaʻi ʻo e ngaahi folofola ʻe fakaʻaongaʻi ʻe he Siasí .…Ko ia tokotaha pē ʻa e tangata lea ʻa e ʻOtuá ʻi he māmaní maʻá e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa e Siasi moʻoni pē ʻe tahá. Ko ia tokotaha pē te ne fakahā ʻa e faka-kaukau pea mo e finangalo ʻo e ʻOtuá ki hono kakaí. ʻOku ʻikai ha ʻōfisa ʻo ha toe Siasi kehe ʻi he māmaní ʻokú ne maʻu ʻa e totonu pea mo e mafai māʻolunga ko ʻení.” [Church News, 31 Siulai 1954, 10.]⁷

Ko e tokotaha pē kuo fakamafaiʻi ke ne ʻomi ha faʻahinga tokā- teline foʻoú ko e Palesiteni ʻo e Siasí, pea ko e taimi ʻokú ne fai ai iá, te ne fanongonongo ʻo pehē ko e fakahā ia mei he ʻOtuá, pea ʻe tali ia ʻe he Fakataha Aleaʻanga ʻo e Toko Hongofulu Mā Uá pea poupou ki ai ʻa e kāingalotu ʻo e Siasí.⁸

Ko e tali tonu mo faingofua ʻoku totonu ke fai kia kinautolu ʻoku nau fai ʻa e fehuʻi ko ʻení: ʻOku founga fēfē hono fili e Palesiteni ʻo e Siasí? ko hano lau ange ʻa e tefito ʻo e tui hono nimá: “ʻOku mau tui ʻoku totonu ke uiuiʻi ʻa e tangatá ʻe he ʻOtuá ʻi he kikité, pea mo e hilifaki ʻo e nimá ʻe kinautolu pē ʻoku maʻu ʻa e mafaí, koeʻuhi ke malangaʻaki ʻa e Ongoongoleleí mo fai hono ngaahi ouaú.”

ʻOku kamata pē ʻa e uiuiʻi ʻo ha taha ke ne hoko ko e Palesiteni ʻo e Siasí ʻi he taimi ko ia ʻoku uiuiʻi ai ia, fakanofo, pea vaheʻi ke ne hoko ko e mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. Ko e faʻahinga ui peheé ʻoku fakahoko ia ʻi he kikite, pe ko hono fakalea ʻe tahá, ʻoku fai ʻaki ʻa hono ueʻi ʻe he ʻEikí ki he tokotaha ʻokú ne maʻu ʻa e ngaahi kī fakapalesitenisií, pea mo hono fakanofo mo vaheʻi ʻi he hilifaki ʻo e nimá ʻe kinau-tolu ʻoku maʻu ʻa e mafai tatau, ʻokú ne ʻomi ai ʻa e ʻAposetolo taki-taha ke ne kau ʻi ha kōlomu ʻo e lakanga fakataulaʻeikí, ko ha kau tangata ʻe toko hongofulu mā ua ʻoku nau maʻu ʻa e lakanga faka- ʻaposetoló.

Ko e ʻAposetolo takitaha kuo fakanofo ʻi he nima ʻo e Palesiteni ʻo e Siasí, ʻa ia ʻokú ne maʻu ʻa e ngaahi kī ʻo e puleʻanga ʻo e ʻOtuá fakataha mo e kau ʻAposetolo kehe kuo ʻosi fakanofó, kuo foaki kiate ia ʻa e mafai ʻo e lakanga fakataulaʻeikí ʻa ē ʻoku fie maʻu kae lava ke maʻu ʻa e lakanga kotoa pē ʻi he Siasí, ʻio, ʻo aʻu ki he la-kanga fakapalesitenisī ki he Siasí hono kotoa ʻo kapau naʻe uiuiʻi ia ʻe he maʻu mafai pulé pea poupouʻi ʻi hano hikinimaʻi ʻe he kā- ingalotu ʻo e Siasí.

… Ko ʻene pekia pē ha Palesiteni, ʻoku hoko he taimi pē ko iá ʻa e tuʻunga fakapule hoko haké, ʻa e Kōlomu ʻo e Kau ʻAposetolo ʻe Toko Hongofulu Mā Uá, ko e mafai pulé ia, pea hoko he taimi pē ko iá ʻa e Palesiteni ʻo e Toko Hongofulu Mā Uá ko e Palesiteni Leʻoleʻo ʻo e Siasí kae ʻoua leva kuo fakanofo mo hikinimaʻi ʻi he founga totonú ha Palesiteni ʻo e Siasí ki hono lakangá. …

ʻOku fokotuʻu mo poupouʻi maʻu pē ʻa e kau mēmipa kotoa ʻo e Kau Palesitenisī ʻUluakí pea mo e Toko Hongofulu Mā Uá ko e “kau palōfita, kau tangata kikite, mo e kau tangata maʻu fakahā.”. … ʻOku ʻuhinga ʻeni ʻe lava ʻe ha taha pē ʻo e Kau ʻAposetoló kuo fili pea fakanofo ke ne puleʻi ʻa e Siasí ʻo kapau “kuo fili ʻe he siasí [ ʻa ia kuo fakaʻuhingaʻi ʻeni ke ʻuhinga ki he Kōlomu kakato ʻo e Toko Hongofulu Mā Uá], tuʻutuʻuni mo faka-nofo ki he lakanga ko iá, mo poupouʻi hake ʻe he falala mo e tui mo e lotu ʻa e siasí,” ko e toʻo ia mei ha fakahā fekauʻaki mo e te-fitó ni, makatuʻunga pē he meʻa ʻe taha, ʻa ia ko ʻene hoko ko e mēmipa pule, pe ko e Palesiteni, ʻo e kōlomu ko iá (vakai ki he T&F 107:22).⁹

Ko e taimi ko ia naʻá ku hoko ai ko ha mēmipa kei talavou ʻo e Fakataha Aleaʻanga ʻo e Toko Hongofulu Mā Uá, ko e ʻuluaki fokotuʻutuʻu foʻou ʻo e Siasí naʻe fakangofua ke u kau ki aí ko e taimi ko ia naʻe pekia ai ʻa Palesiteni [Hiipa J.] Kalānite. … pea ui ʻe he Palesiteni [foʻoú] ʻa hono ongo tokoní pea na ʻalu atu ki hona ongo nofoʻanga ʻi muʻa ʻi he lokí, naʻá ku maʻu ha fakamoʻoni ʻi hoku lotó ko e kau tangata ʻeni kuo finangalo ʻa e ʻEikí ke nau hoko ko e Kau Palesitenisī ʻo e Siasí. Naʻe pehē fau hono mālohi ʻo ʻeku ongoʻi iá ʻo hangē pē naʻe kailangakiʻi mai ʻa e foʻi moʻoni ko iá ʻi hoku loto telingá.

… Kuo teʻeki ai ke ului moʻoni ʻa e kāingalotu ʻo e siasí ni kae ʻoua kuo nau ʻiloʻi fakapapau ʻoku tataki atu ʻa kinautolu ʻi he hala totonú, pea nau ʻiloʻi fakapapau ko e kau tangata ko ʻeni ʻa e ʻOtuá ko e kau tangata ia kuo ueʻi fakalaumālie pea kuo fakanofo totonu kinautolu ʻe he toʻukupu ʻo e ʻOtuá.¹⁰

ʻOku fakahā mai [ʻe he ʻEikí] ʻa e fonó pea ʻokú Ne fili pe faka-nofo ʻa e kau ʻōfisá pea ʻokú Ne maʻu foki ʻa e totonu ke ne valo-kiʻi, fakatonutonu, pea aʻu pē ki Heʻene toʻo ʻa kinautolu mei ai ʻi Heʻene faʻiteliha. Ko ia ʻoku ʻaonga ai ke ʻi ai maʻu pē ha [fetuʻu-taki] ʻiate Ia mo Hono Siasí ʻi he fakahā fakahangatonu. Tau vakai angé ki he ngaahi sīpinga mei he ngaahi kuonga kotoa ko ia ʻoku hā ʻi he folofolá ke sīpinga ʻaki ʻa e ngaahi meʻa naʻe hoko ki muʻa ʻa ia ʻoku tatau mo e ngaahi moʻoni naʻa tau lau ki ai ʻanenaí. Naʻe kamata ʻa e fokotuʻutuʻu ko ʻeni ʻo e founga fai ʻo e puleʻí ʻi ʻĪteni. Naʻe fakanofo ʻe he ʻOtuá ʻa ʻĀtama ke ne puleʻi ʻa e māmaní peá Ne foaki ange ki ai ʻa e fonó. Naʻe tolonga ʻene hokohoko maí meia ʻĀtama kia Noa pea meia Noa kia Melekisēteki, ʻĒpalahame, ʻAisake, Sēkope, Siosefa, Mōsese, Samuela ko e palōfitá, Sione, Sīsū, mo ʻEne Kau ʻAposetoló, pea ko kinautolu takitaha ko ʻení naʻe fili kotoa kinautolu ʻe he ʻEikí kae ʻikai ko e kakaí.

Ko e moʻoni ʻoku ʻi ai ʻa e leʻo ʻo e kakaí ʻi hono puleʻi ʻo e pule- ʻanga ʻo e ʻOtuá, ka ʻoku ʻikai ko kinautolu naʻa nau foaki ʻa e mafaí, pea ʻe ʻikai foki ke nau lava ʻo toʻo ia. Hangē ko ʻení: Naʻe ʻikai ke fili ʻe he kakaí ʻa e kau ʻAposetolo ʻe toko hongofulu mā ua ʻa Sīsū Kalaisí, pea ʻe ʻikai foki ke nau lava ʻo toʻo ʻa honau tuʻunga fakaʻaposetoló meiate kinautolu ʻaki haʻanau hikinimaʻi ia. Hangē pē ko e founga naʻe puleʻi ʻaki ʻa e puleʻangá ʻi he kuonga muʻá, ʻoku pehē pē hono toe fakafoki mai ki he kuonga ní. Naʻe ʻikai ke fili ʻe he kakaí ʻa e Palōfita mo e ʻAposetolo ma- ʻongoʻonga ko ia ko Siosefa Sāmita ʻo e onopōní, ka naʻe fili ia ʻe he ʻOtuá, ʻi he founga tatau pē naʻá Ne fili ai ʻa e niʻihi kehe ʻi muʻa ʻiate iá—ʻo fai ʻeni ʻaki ʻa e meʻa hā mai pea ʻaki pē ʻa Hono leʻó mei he langí.¹¹

ʻOku ʻi ai e meʻa ʻoku mahino kiate au ʻi heʻeku fakakaukau atu ki he taimi lolotonga ʻeku fua ʻa e fatongia ko ʻení (ko e palōfitá) peá u ofi feʻunga ki he Kau Takí ʻi he ngaahi taʻu lahi ko iá, ʻa ia ʻoku tokangaʻi maʻu pē ʻa e tokotaha ʻokú ne fua ʻa e fatongia ko ʻení ʻe Ia ko ʻEne ngāué ʻeni ʻoku tau faí. ʻE ʻikai ʻaupito ke Ne tuku ha taha ʻi he fatongiá ni ke ne taki halaʻi ʻa e siasi ko ʻení. Ko e meʻa pau ia. Ko e taimi ko ē ʻoku ou fakakaukau atu ai ki he founga ʻoku aʻusia ai ʻe ha tangata ha tuʻunga fakatakimuʻa ʻi he Siasí, ʻoku ou fakakaukau atu au ki he ngaahi meʻa ko ia ne u aʻu-sia ʻi he taʻu ʻe tolungofulu mā taha mo e kongá, pea mo e ngaahi meʻa kotoa pē naʻe hoko mai ki heʻeku moʻuí—he toki polo-kalama tōtō atu moʻoni ia ki hoku akoʻí! Ko e taimi ko ē naʻe faka-hoko ai ʻa e fetongi ʻi he Kau Palesitenisī ʻUluakí, naʻa ku fakafehoanaki ia mo e founga ʻoku fili ai ʻe he ngaahi faʻahi faka-politikalé ʻa e palesiteni ʻo e ʻIunaiteti Siteití, pe ko hono fakanofo ʻo ha tuʻi, ke u sio angé ki he founga ʻoku fai ai ʻa e ngaahi fetongi ko ʻeni ʻi he palani ʻa e ʻEikí taʻe ʻi ai ha loto kovi pea taʻe ʻi ai ha feʻiteʻitani. Kuo ʻosi maau e palaní pea ʻoku ʻikai ha fehālaaki ia ʻa e ʻEikí, ko ia kuó Ne fakahā mai ia kia kitautolu.¹²

Mahalo ko e ʻaho ʻeni ke tau fakakaukau fakamātoato hifo ai, ke tau manatu ki he meʻa kuo ʻosi fakahā mai ʻe he ʻEikí kia ki-tautolú. ʻOku ʻi māmani ʻa ʻene kau palōfitá he ʻahó ni, pea kapau ʻokú ke fie ʻilo ʻa e fakahā fakamuimui taha kuo ʻomi ki he kakaí ni, toʻo mai ʻa e lipooti konifelenisi fakamuimui tahá ʻo lau faka-lelei ia kae fakatautefito ki he meʻa naʻe lea ʻaki ʻe he Kau Palesitenisī ʻUluakí. …Te ke maʻu ai ʻa e folofola lelei taha mo fakamuimui taha kuo haʻu mei heʻetau Tamai Hēvaní. ʻOku ʻikai fie maʻu ke tau fakafalala ʻataʻatā pē ki he meʻa ʻoku ʻi he ngaahi tohitapu ʻa e Siasí. ʻOku fakalahi atu ʻaki ki he meʻa ʻoku tala mai ʻe he folofolá ʻa e ngaahi meʻa ko ia ʻoku tala mai ʻe he kau palō- fita ʻo e ʻaho ní kia kitautolu ʻi heni pea ʻi he taimi ní, pea ʻoku ʻatautolu ia ke tau fanongo mo talangofua ki ai kapau ʻoku tau loto ke fakamoʻui ʻa kitautolu ʻi he moʻunga ʻo Saioné ʻi he taimi ʻoku hoko mai ai ʻa e ngaahi faingataʻá ni.¹³

ʻOku lahi ʻene hoko he ʻahó ni ʻa e taimi ʻoku lea mai ai ʻa ho-tau kau takí ʻi honau mafaí, ʻoku tuʻu hake ha taha ia ʻo fakafetau ki ai mo ne pehē ange, “Ko e fē ha feituʻu te u maʻu mei ai ha mafai te ke lava ʻo lave ki ai ʻi he meʻa ʻokú ke lea ʻakí?” ʻOku mau mei pehē atu kimautolu ia, “ʻAlu ʻo toe lau ʻa e lea ʻa e taki lolo-tonga ʻo e Siasí fekauʻaki mo e meʻá ni, pea te ke maʻu ai ʻa e mafai kotoa ko ia ʻoku totonu ke ke fekumi ki aí, he ko e founga ʻeni ia ʻa e ʻEikí. ʻOku ʻi heni ʻa ʻEne palōfitá, pea ʻoku lahi tatau pē hono fie maʻu ʻo e fakahaá mo hono fie maʻu ʻo e palōfitá pea ʻoku fuʻu hā mahino mai ʻaupito pē ʻeni ia ʻo hangē ko ia ʻi ha toe kuonga fakakōsipeli ʻi he māmaní.”¹⁴

Ko e maluʻi pē ʻoku tau maʻu ko e kāingalotu ʻo e siasí ni ko ʻetau fai pau ki he meʻa naʻe folofola ʻaki ʻe he ʻEikí ki he Siasí ʻi he ʻaho ko ia naʻe fokotuʻu ai ʻa e Siasí. Kuo pau ke tau ako ke tau tokanga ki he ngaahi folofola pea mo e ngaahi fekau ʻe tuku mai ʻe he ʻEikí ʻo fakafou mai ʻi Heʻene palōfitá, “ʻo ka ne ka maʻu ia, pea ʻaʻeva ʻi he māʻoniʻoni kakato ʻi hoku ʻaó;. … ʻo hangē ko e lea ia mei hoku ngutu ʻoʻokú, ʻi he kātaki mo e tui kotoa pē” (T&F 21:4–5). ʻE ʻi ai e ngaahi meʻa ia ʻe niʻihi ʻe fie maʻu ki ai ʻa e kātakí mo e tuí. Mahalo he ʻikai te ke saiʻia koe ʻi he meʻa ʻoku ʻomai mei he maʻu mafai ʻo e Siasí. Mahalo ʻe fepaki ia mo hoʻo-mou ngaahi fakakaukau fakapolitikalé. Mahalo ʻe fepaki ia mo hoʻomou ngaahi fakakaukau fakasōsialé. Mahalo ʻe ʻikai ke lelei ia ki ha niʻihi ʻo e ngaahi meʻa ʻi hoʻomou moʻui fakasōsialé. Ka ʻo kapau te mou fakafanongo ki he ngaahi meʻa ko ʻení ʻi he faʻa kā- taki mo e tui ʻo hangē pē ko ha lea ia mei he fofonga ʻo e ʻEikí, ʻoku ʻi ai ʻa e talaʻofa “ʻe ʻikai ke ikuna ʻa kimoutolu ʻe he ngaahi matapā ʻo helí; ʻio, pea ʻe fakamovetevetea atu ʻe he ʻEiki ko e ʻOtuá ʻa e ngaahi mālohi ʻo e fakapoʻulí ki muʻa ʻiate kimoutolu, pea pule ke ngalulululu ʻa e ngaahi langí koeʻuhi ko hoʻomou leleí, pea mo e lāngilangi ʻo hono huafá” (T&F 21:6).¹⁵

Kia kimoutolu ʻa e Kāingalotu ʻo e Siasí ʻi he feituʻu kotoa pē, ʻe ʻamoutolu ʻa e talaʻofa ko iá [T&F 21:4–6] ʻo kapau te mou mui-mui ki he takimuʻa kuo fokotuʻu ʻe he ʻEikí ʻi he lotoʻi Siasí, ʻo mou tokanga ki heʻenau akonakí ʻi he faʻa kātaki pea mo e tui foki.¹⁶

Falala ki he Palesiteni ʻo e Siasí ke ne ʻoatu homou fakahino-hinó. Pea kapau ʻ e ʻi ai ha taimi ʻe hoko ai ha fepakipaki, mou fakafanongo pea muimui ʻi he Palesitení ʻo kapau ʻoku mou loto ke mou ʻaʻeva ʻi he māmá.¹⁷

Kapau ʻoku fie maʻu ʻe hotau kakaí ke tataki atu kinautolu ʻi he malu lolotonga ʻa e ngaahi taimi [faingataʻa] ko ʻeni ʻo e kākā mo e ngaahi talanoa taʻe moʻoní, kuo pau ke nau muimui ʻi honau kau takí pea nau fekumi ke maʻu e fakahinohino ʻa e Laumālie ʻo e ʻEikí kae lava ke nau fakaʻehiʻehi ai mei hono maʻu kinautolu ʻe he kakai kākā olopoto, ʻa ia ʻoku nau feinga ke fakatokangaʻi ʻa ki-nautolu pea maʻu mo hanau kau muimui ke fakahoko ʻa ʻenau ngaahi fakakaukau pē ʻanautolú pea mo ʻenau ngaahi taumuʻa ʻa ia ʻoku ʻikai ke faʻa lelei.¹⁸

Naʻe ʻi ai foki ha kakai tokolahi ʻi he ngaahi ʻaho naʻe moʻui ai ʻa e ʻEikí ʻa ia naʻe ʻikai ke nau tali ko e ʻAlo Ia ʻo e ʻOtuá. Naʻe pehē ʻe ha niʻihi, “Ko e foha pē ia ʻo Siosefa, ko e tangata tufungá.” Pea pehē ʻe he niʻihi, “Ko ha Pilinisi ia ʻo Pelisipupe,” ʻa ia ko hono ʻuhingá, ko e foha ia ʻo e tēvoló. Ko e taimi naʻá Ne fai ai ha niʻihi ʻo e ngaahi meʻa mana ko ʻení ne nau pehē, “Ko e tangata faʻa inu uaine ia,” ʻa ia ko ʻenau ʻuhingá naʻa ne inu ha uaine mālohi. Ko e kiʻi tokosiʻi pē naʻa nau pehē, “Ko Ko e ko e Kalaisí, ko e ʻAlo ʻo e ʻOtua moʻuí.” (Mātiu 16:16.) Ko e hā hono ʻuhinga naʻe ʻikai ke lava ai ʻe he tokotaha kotoa ʻo ʻiloʻi ko e ʻAlo Ia ʻo e ʻOtuá?

ʻOku tau hiva ʻo pehē,, “ʻOku ou fakaʻamu ange ne u ʻi ai mo Ia, ʻi Heʻene fua ʻa e fānau valevalé ʻi Hono umá.” [Vakai ki he “‘Oku ou Fakakaukau ‘i Heʻeku Lau ‘a e Talanoa Mālie Ko Iá,” Tohi Hiva ‘a e Fānaú, 35.] ʻOku tokolahi hotau kakai ʻe ʻikai pē ke nau tali ʻe kinautolu Ia ʻo hangē ko e ʻikai ke nau tali ʻa e ngaahi tokā- teline ʻoku ʻoatu mei he kau faiako ʻoku nau akoʻi ʻa e ngaahi meʻa ʻo e māʻoniʻoní naʻe ʻomi mei he Fakamoʻui tataú pē. Ko e taimi ʻoku ʻikai ke tau tali ai ʻa kinautolu ʻoku nau fakafofongaʻi Ia hení, ʻe ʻikai pehē ʻe toe faingofua ange haʻatau tali ʻa e ʻEikí tonu ʻo ka Ne ka hā mai. …

ʻI heʻeku kei ngāue fakafaifekaú, naʻe tuʻo taha ʻemau ō ʻa ki-mautolu kau faifekaú mo homau palesiteni fakamisioná ki he Fale Fakapōpula Kātesí. Naʻa mau ongoʻi ʻa e faʻahinga ʻātakai ʻo e feituʻu ko ʻeni naʻe fakapoongi ai ʻa e Palōfitá mo hono tokoua ko Hailamé, ko ia naʻa mau kole ange ai ke ne toe fakamatala muʻa ki he ngaahi meʻa naʻe hokó ʻo aʻu ki hono fakapoongi kinauá. Naʻe ongo ki hoku lotó ʻa e lea ko ʻeni ʻa e palesiteni fakamisioná, “Ko e taimi ko ē naʻe pekia ai ʻa e Palōfita ko Siosefa Sāmitá, naʻe tokolahi ʻa e faʻahinga naʻa nau mate fakalaumālie ai pē mo ia. Pea ko e meʻa pehē pē ʻoku hoko ʻi he taimi kotoa ʻoku fetongi ai ʻa kinautolu ʻoku nau tataki ʻa e puleʻanga ʻo e ʻOtuá. Ko e taimi naʻe pekia ai ʻa Pilikihami ʻIongí, naʻe tokolahi ʻa e faʻahinga ia naʻa nau mate fakalaumālie fakataha pē mo ia, pea pehē kia Sione Teila, pea mo e taimi kotoa pē ʻoku pekia ai ha Palesiteni ʻo e Siasí.”. …

Ko e taimi ʻe niʻihi ʻoku tau mate fakalaumālie pea tau faka-mavahe ai kitautolu mei he maama fakalaumālie haohaoá ʻo ngalo ai ʻiate kitautolu ʻoku ʻi ai ha palōfita heni he taimí ni pea ʻi he ʻahó ni.¹⁹

ʻE lava ke fakatātaaʻi ʻa e tuʻunga ʻoku ʻi ai ʻa e kau talafekau ko ʻeni kuo fakakoloa mei langí ʻo nau fakafofongaʻi ʻa e ʻEikí ʻi he mā- maní ʻi he kuonga fakakōsipeli kotoa pē ʻaki ʻa e meʻa ko ʻeni naʻe fakamatala ki ai ha tokotaha naʻe fononga atu ki ʻIulope tokelau. Naʻe mavahe ʻa e tokotaha fononga ko ʻení ʻi ha vaka mei Sitokiholomi, Sueteni, ʻo ne fononga atu ʻi he Tahi Polotikí. Ke aʻu ki aí kuo pau ke folau atu ʻa e vaká ʻo fakalaka ʻi ha fanga kiʻi motu ʻe lau afe pe lahi ange ai. Naʻe tuʻu pē ʻa e tokotahá ni ʻi he kaokao muʻa ʻo e vaká kuo kamata ʻita koeʻuhí he naʻe hangē kiate ia ko e halanga vaka ʻeni naʻe ʻikai hano ʻaonga. Ko e hā naʻe ʻikai ke nau fou atu ai ʻo ofi ki he motu ko ʻení pe ko ha toe motu naʻe fakaʻofoʻofa ange ʻi he ngaahi motu naʻe fili ʻe he ʻeikivaká ke nau fou atu aí? Naʻe mei ʻosi ʻene kātakí peá ne pehē hifo pē kiate ia, “Ko e hā e meʻa ʻoku pehē ai e motuʻa ʻeikivaká? Kuo ʻikai koā ke ne kei ʻilo ʻe ia ʻa e halá?” Fakafokifā naʻá ne fakatokangaʻi ha ngaahi fakaʻilonga ʻi he halanga vaká naʻe ʻasi hake pē hangē nai ha ngaahi kauʻi taufalé he fukahi tahí. Kuo ʻosi fakatotoloʻi lelei ʻe ha tokotaha ia ʻa e ngaahi potu tahí ni peá ne fakaʻilongaʻi ʻa e halanga vaka malu taha ke folau ai ʻa e ngaahi vaká. Pea ʻoku pehē tofu pē ʻa e hala ʻo e moʻuí ni ʻi heʻetau fononga atu ko ia ki he moʻui taʻe faʻamaté mo e moʻui taʻengatá. Kuo ʻosi hanga ʻe he “kau ʻenisinia ʻa e ʻOtuá” ʻo fakahinohino mai ʻa e hala ʻoku malu taha mo fakafiefia tahá ʻaki ʻenau muimui ki ha mape kuo ʻosi tā ʻi he langí, pea kuo nau ʻosi fakatokanga mai kia kitautolu ʻo kau ki he ngaahi feituʻu ʻoku fakatuʻutāmakí.²⁰

ʻE ueʻi ʻe he ʻEikí ʻa ʻEne kau tamaioʻeikí ke nau tataki totonu ʻa Hono siasí. ʻE maʻu ʻe Heʻene kau palōfitá ʻa e ueʻi mei he ʻEikí ke nau lea ki he kāingalotu ʻo e Siasí ʻo pehē, “Ko ʻeni ʻa e halá, ke ke ʻalu ʻi ai” (Īsaia 30:21). Pea aʻu pē ki he ngaahi taimi faingataʻa ʻe hoko mai ʻi he ngaahi ʻaho ʻoku tau moʻui aí, ʻo hangē ko ia kuo fakamatalaʻi mai ʻi he fakahā ʻo e ʻaho ní, ko e meʻa ʻoku finangalo ʻa e ʻEikí ke tau sio ki aí ko ha kakai ʻoku tuʻu maʻu taʻe ueʻia pea fefeka. ʻOku mou manatuʻi naʻá Ne folofola ki Heʻene kau ākongá, “Ka ʻe tutuʻu ʻa ʻeku kau ākongá ʻi he ngaahi potu toputapú, pea ʻe ʻikai ueʻi ʻa kinautolu” (T&F 45:32).²¹