Na Lewa Maqosa, e Yavu ni Bula Sautu

E na gauna oqo, au vakabauta e yaloqu dina ni dua na vuna bibi ni yaloleqaleqa vei keda—au vakabauta talega ni tarai keda raraba na leqa oqo— sa sivia na veika era vinakata na tamata ka ra sega ni rawata mai na veika era rawata. Sa rui sivia na nodra dinau, volitaka na nodra vale, na nodra iteitei, kei na veika kece e nodra, me ra rawa ni veiqati tiko kina kei ira na kai nona, me ra dau veisivisivi ka dau vakaraitaka na nodra iyau, me ra dau cicivaka talega na nodra bisinisi e na dinau ni sa kena ivalavala tu edaidai e vuravura.…

… E levu vei keda eda sa dinau oti … me da rawata kina se me da vaka na irairai ni kai noda, ke me da sega mada ni vakayacora na ka oqo, ka bula ga e na veika e da rawata, ka biutan i toka vakatikitiki e so me vakayagataki e na gauna e namaki kina se eda leqa kina, ka me vakayacora oya, eda na tamata nuitaki ka galala e na vanua oqo.… Na ka ga au kauwaitaka, ni’u via raica … na veika ga e da na volia ni dua na dola na kena isau me saumi sara e dua na dola se dua na kena isausaumi me tautauvata kei na dua na dola, me da sauma sara me da kua ni vakaleqai kina se me laki volitaki kina na noda vale, ka vakaicolacolataki kina o keda se o ira na luveda. O ira kece na tamata era bula tu e na dinau era sa tokara sara tiko ga na isele takelo e domodra kei ira talega na nona matavuvale.…

O sa bau raica e dua na tamata e dau dinau, volitaka na nona vale, vauci tu e na dau na veiyalayalati vakailavo, me galala tu, lewai koya tu vakataki koya, ka marau tiko me vaka ikoya e dau sauma na veika e vinakata e na veigauna e lako voli kina? Me da bula ga mai na veika e da rawata, ka vakadabera na yavu e da rawa ni tauyavu kina ka rawa talega ni tauyavu kina o ira na luveda era na muri mai, me ra kua tale ni sausaumi ki na dinau eda a dinautaka tu. Au kila vinaka niu sega ni vunautaka tiko na ivakavuvuli ni kosipeli ni veika vakailavo vakavuravura. Au vakabauta talega niu sa vakarawarawataki meu beitaki ni makawa na noqu rai,dau mamaqi,ka duadua tu ga na noqu itovo ni rai. Na veika oqo e cokai kina o koya e vunauci ira na tamata me ra bulataka ga na bula era rawata.… e na so na gauna sa sega sara ga ni dua na ka eda rawa ni cakava kina, me da sa na dinau ga. Ke sa leka ga na iqila e sa na luvu ga na waqa.… Io au se sega ga ni vakabauta e na vukudra na luveda era bula tiko oqo me ra mai vakabobulataki baleta tiko na icolacola ni noqu dinau e sa mai nodra oga.⁴

E na vakalougatataki o Saioni … ke vakamacalataki vakamatata vei ira na Yalododonu Edaidai, vei ira na gone kei ira na qase na ca ni dinau! E na rairai beka e so na icolacola ni kena vakadonui ni soli na nomu vale me vakadeitaki ni sausaumi ni nomu dinau kei na rarawa e lako vata mai, oqo e na rawa ga ni kila o koya sa volitaka na nona vale kei na qele me rawata kina e so na ilavo—o koya ga e na kila na veivakabobulataki kei na kena rerevaki—ka muria mai ni sa oti na kena veitalanoataki e na vakakila na bibi ni colacola.⁵

E na gauna ni sautu, … e dodonu sara vei ira na Yalododonu Edaidai me ra vakagalalataki ira mai na dinau.… Au vosa me baleta na veika oqo ni dua na sala vinaka au kila me’u sauma na noqu dinau vua na taciqu, na kai noqu, se vei ira na noqu itokani vakabisinisi, me’u sausaumi mada iliu vua na Turaga. Au na rawa sara ni sauma e levu na noqu dinau vei ira na kai noqu ni oti na noqu sausaumi vua na Turaga, kau na sega ni rawata kevaka au sega ni cakava rawa, sa rawa mo ni cakava vakakina. Ke o vinakata mo sautu, ka tagane kei na marama galala ka tamata galala, mo sauma taumada na nomu dinau vua na Kalou, ka qai sauma na nomu dinau vei ira na kai nomu.⁶

E sa kena gauna oqo me ra vulica sara vakavinaka na tamata na veika vakailavo, me sa tekivu talega me ra vakayagataka vakamaqosa na nodra ilavo me ra galala ka duilewai ira vakataki ira..…Ke me da vakayacora ga na noda itavi, ni da lewena na lotu ni Yalododonu Edaidai, ka dau maninitaka na noda ilavo, e na yaga vakalevu sara vei keda, na noda cakacaka e na vakalougatataki keda, e na vuavuai vinaka na vuata e bula mai na noda qele ka na levu talega na kakana e na rawati mai kina e da na marautaka sara vakalevu; e na vakalougataki ira na luvena era vakabauta na Kalou.… E sa gauna oqo me da qarauna vinaka na ilavo eda vakayagataka. E sa kena gauna talega oqo me muduki kina na vakayagataka na ilavo e na veika e sega na betena kei na veika vakavuravura. Io me da dau loloma. Me da kakua ni veivakacacani.… Me da kua ni lako vua na noda itokani e dinau tu vei keda ka laki taroga vakaukauwa vua na ilavo e dinautaka tu vei keda, ke tukuna o koya mo wawa mada vakalailai, me da qai biuti koya ivale ni veivesu, e da kaya mada ga. Nanuma tiko na vosa vakaibalebale ni iVakabula e na ulutaga oqo, ka mo dau loma soli ka dau lomani ira na kai nomu [raica Maciu 18:23–35].⁷

Qarauna na nomu iyaya me kua ni dinautaki. Tovolea mo sauma taucoko na nomu dinau e na kena gauna totolo duadua ka vakagalagalataki mai kina, na sala ga oya e na matau kina vei ira na lewe ni nona Lotu na veiyalayalati ni Kalou, era na mai tamata vutuniyau kina e vuravura. Io oqo e na sega ni vaka kina ke o sa mokititaka na nomu vale se na nomu qele, na nomu dinau sa sivia sara ka sa sega ni sauma rawa; e na laki vakavuna ga na rogorogo ca ni yacamu ka sa sega ni vakatarai mo dinau tale ni o sa sega ni sauma rawa na nomu dinau.⁸

Era sa vunauci vakawasoma na Yalododonu Edaidai me ra qarauna vinaka na nodra vale me kua ni vakaleqai e na dinau, e na leqa kina o koya, na watina kei ira na luvena e na dela ni veika vakailavo.… Ke me ra vulica na Yalododonu Edaidai na lewa maqosa kei na veivakadreti ni lesoni era sa vulica oti, e na dredre sara ni ra na temaki, e tu wavokiti keda, me da mokititaka kina na noda vale, na vanua ni nodra bisinisi, na qele, na nodra iteitei me ra rawa ni vutuniyau kina.…

Na veivakasalataki e soli oqo e baleti ira tiko na lewa tiko na kena mokiti ni nodra vale e na vuku ni lavo e na rawata mai kina, ka sega ni baleti ira na vakasaqara tale e dua na sala vei ira na isoqosoqo dau tara vale, me ra vakavale ka sausaumi tiko e vei vula. Na ikarua ni gaunisala e vakamacalataki tiko oqo e na vakavuna kina na lewa maqosa, na kena imatai e na vakavuna kina na yalo ni vakasabusabu.⁹

Ni vosota sara ni’u kaya, ni ra se tiko e lewe levu ka se tiko ga vei ira na ivakatagedegede ni vakasama kei na yalodra se vinakata tiko ga na veika vaka vuravura.… Ni sa levu na nodra iyau ka vakawelei ira na itavi ni kena qarauni e salavata kaya mai, e na rawarawa sara ni ra guiguileca … na Kalou e dodonu me ra vakanuinui vua e na gauna era vutuniyau kina kei na gauna talega era vakaloloma tu kina ka dravudravua.¹⁰

Ke tiko e dua e ke e vinakata me dinau taka e dua na ka, … au via vakasalataki koya me kua, me masulaka mada ka vakasamataka sara vakavinaka ni bera ni soli vua na dinau. E dua tale na kena ivakamacala oqo, mo kakua ni dinau. Kevaka e tiko na nomu dinau, mo sauma sara vakatotolo.¹¹

Na ilavo e dua na ka me ra qarauna vinaka sara na tamata, na kena vakayagataki me vakayagataki sara vakavinaka, me sega kina na kena vakayagataki vakamaqosa, e na yali mai na nona taga, me vakaga na manumanu vakatabana e na drotani mai vei iko.¹²

Au via vakabibitaka tale vei i ra na Yalododonu Edaidai me ra qarauna sara vakavinaka na kena vakayagataki na nodra ilavo ka tovolea sara me kua na dinau. Tiko tani mai na dinau, ka tiko vakayawa sara, o na galala kina vakailavo ka galala talega vakayalo.¹³

E tiko na malumalumu vei ira na tamata—ka … na malumalumu oqo e kaukauwa—e dau nanumi koya ga, me vakaceguya kina na yalona, me rawata kina na nona inaki, e so e sega ni kauwaitaka na kena isau. Veitalia na ca e na kauta mai vei ira na so, e na tovolea ga o koya me rawata na nona inaki, na nona vinakata me vakacerecerei koya se kaukauwa kina ka me tosoya talega kina na nona dau kocokoco. Oqo e so na cala e na tabagauna oqo. Oqo e dua na malumalumu e sega ni rau tautauvata kina na tamata kei na nona iVakavuvuli, ka wasei koya tani mai vua na Kalou kei na dina, e laki vakavuna talega me sa lewai koya se me sa nona lawa. Oqo e cala.¹⁴

Na tamata vuku … e na golea tani mai e na sala era tiko kina na tamata era vakasaqara tu na veika taleitaki vakavuravura. E na sega ni vakabobulataki koya se me dinautaka na nona motoka se e so tale na veika sau levu me rawa kina ni tautauvata na nodra iwalewale kei ira na tamata era taleitaka na veika ni gauna oqo.…

Na veika e na yaco ni da vakasaqara na marau se na veika eda taleitaka se na noda tovolea vakaukauwa me da tautauvata kina kei ira na vutuniyau e na laki vakavuna kina me da laki vakayacora kina e so na cakacaka tawa dodonu me ivurevure ni lavo me vakamamautaka kina na noda inaki. Oqo na itekitekivu ni ivalavala ca vakailavo. E levu na sala ni lawaki e dau vakayagataki me rawa kina na ilavo, se na veika e da vinakata, e rawa ni laki tini sara e na kena lasutaki na noda itokani ka lawakicataki me rawa kina na ilavo me vakaceguya na yalomu e na veika o vinakata se taleitaka.¹⁵

Au lomani koya na tamata vutuniyau e lomana vakalevu cake na nona ilavo ka sega ni lomana na Kalou.… E na dua na siga e na vakarautaki na noda bibi, e na kilai kina ke da lomana taumada vakalevu na veika vakavuravura mai na noda lomana na Kalou.… E tukuna na Turaga e na dredre sara vua e dua e vutuniyau me curuma yani na matanitu vakalomalagi. E sega ni baleta ni vutuniyau na tamata oqo—ni sa nakita na Turaga me da vutunuiyau duadua mai vei ira na tamata. E sega sara ni dua na kena ca ke da vutuniyau. Na cala e sega ni baleta ni tiko vei keda na ilavo. E da dau rogoca ni dau tukuni tu “Na ilavo e vu ni veika ca.” Io oqo e sega ni dina. E sega ni tukuni e na ivolanikalou. Era kaya sa vu ni ka ca kecega na daulomana na ilavo [raica 1 Timoci 6:10].¹⁶

Na ka rerevaki au raica rawa e na nodra gaunisala na Yalododonu Edaidai oya na veika e na yaco ni levu tu na noda iyau—oya na dokadoka kei na viavia levu, na nanumi koya ga ka sa guilecava kina na Kalou, na noda sa sega ni kauwaitaka na itavi tabu kei na noda cakacaka vua kei ira na noda itokani; oqo e baleta tale tiko ga na levu ni nona veivakalougatataki vakavuravura o koya e na nona loloma e vakatikora vei keda. E dau tukuni tu e na gauna ni leqa e da via qarava kina na Turaga, e na gauna e da tiko sautu kina e da sega sara ga ni nanumi Koya. Au vakila na lasu e tiko oqo e dua na ka rerevaki e da sotava tiko e na gauna oqo.¹⁷

E da na vakalougatataki vakalevu ke meda solia na veivakacegui kei na marau vei ira na tamata ka me kua vei keda. Ia na yalo kei na kaukauwa e tiko e vuravura e na gauna oqo, e sega ni rai e dau ciqomi vakamamada. Na tamata ni vuravura e na gauna oqo era sa dui qarava ga na veika e kauta mai vei ira na ka ga era taleitaka. Era sega ni kauwaitaka ni ra na taura vakacava na veika era taleitaka, io me ra taura ga. Me vaka na veika kece na koula kei na ilavo e rua na ka e taleitaki ka marautaki vakalevu. E na vica na yabaki mai muri era na kacivi tani mai ivuravura oqo, e na biu laivi tu mai na veika era taleitaka me vaka na nodra iyau. Era na sega ni kauta rawa na nodra iyau baleta ni nona na vuravura. E na gauna era sa tiko kina e na daku ni iubi era na sega ni tara rawa tale kina na veika e dau vakamarautaki ira. E na lako tani kina na vu ni veika era dau taleitaka tu …

Na cava e tiko e vuravura e rawa ni solia e levu na marau se na veika taleitaki me vaka na noda kila ni sa vosoti na noda ivalavala ca; Me da tucake ka vakadonui mai kina vua na Kalou na Tamada Vakalomalagi; ni da sega ni cala vua e dua na tamata: ka da vakagalagalataki keda mai na dinau, se na veika vakailavo; ka da sega ni bobula e vuravura se vei ira talega na kai noda? Oqo e solia vei keda na marau levu mai na veika e rawa ni solia vei keda na vuravura. Na ilavo e sega ni solia rawa. Na iyau vakavuravura e na sega ni sosomitaka rawa na marau oqo vei ira na tamata.¹⁸

E dua na ka au kila, oya me da vakaqara me da kila vinaka na ivakavuvuli ni kena vakayagataki na ilavo. Me da vakayagataka kina vakavinaka na vuku, na lewa kei na kila ka e da rawata mai e na veika vakavuravura kei na vakayalo talega.… E da sa rui kocokoco. E sega ni dodonu “me ra dui qarauni ira ga na tamata,” io e lewe levu sara vei keda era se vinakata tiko ga me ra taukena. E da vinakata e lomada me noda na veika kece e taukena se tiko vua na kai noda, e da gadreva se sega. Me rawa ni da vakataka na kai noda, me rawa na noda veimaliwai vinaka kei ira, me ra vei maliwai vinaka na luvena yalewa kei na luvemu yalewa, kei na luvemu tagane kei na luvena tagane, e dodonu me vinaka talega na noda vale ka me sau levu talega na kena iyaya, … kei na kena gacagaca lalai tale e so e da rawa ni sauma se sauma rawa na kai noda, se sega. E dua na ka lialia dina oqo ka cala talega.…

… Me ra vulica kece o ira na Yalododonu Edaidai—vakabibi vei ira na gone ni Isireli me ra vulica—me ra vakaitavi taucoko e na kena vakavinakataki na vuravura era bula vata tiko kina, kevaka era rawa ni rawata. Me da tovolea kece e na noda igu me da vakayavora na veika vinaka. Ke da rawa ni vakayacora na veika oqo e na yaga na noda bula tiko. E na vakalougatataki keda na Kalou e na noda cakacaka kei na noda sasaga; ke me da veiyaloni e na noda cakacaka vaka vuravura kei na cicivaki ni noda bisinisi e na ivakavuvuli dodonu, e na vinaka sara vei keda o vuravura ka na vinaka talega na noda mai taukena tiko. E na yaga sara kina vakalevu na noda mai qarava ka vakacerecerea tiko na matanitu ni Kalou; e na levu sara na ka eda na vakayagataka e na nodra sa soqoni na dravudravua e na kena tarai cake o Saioni, me yaga vei ira na Yalododonu ka me na yaga talega vei keda.¹⁹

Me da vakamuria na ivakaro ni Kalou, me qarauni kina na veika e noda … , na sausaumi ni noda dinau, me da tagane ka yalewa galala, ka sega ni da vakabobulataki, me vaka e lewe levu vei keda edaidai. E levu vei keda e vakabobulataki tu vakailavo, e na dredre sara vei keda na levea; io kevaka eda rawa ni vakagalagalataki keda mai kina e na sala savasava, me da tovolea sara e na noda igu taucoko; ni sa na yaco mai na veikacivi ni kaulotu e da rawa ni kaya kina, “Io au sa vakavakarau tu kau vinakata meu lako,” e qai cava tale, “E sega ni dua au dinau tu vua, e tiko vei au na ilavo me’u vakayagataka, ka vakarautaka talega vei iratou na noqu matavuvale.”²⁰

Au vakabauta ni noda itavi se noda bisinisi me da vakavakarautaki keda e na gauna ni dravuisiga, na mate edau veitauvi, na cagi laba kei na uneune kei na gauna talega e na loka mai kina na vanua, oya ni sa sivita mai na iyalayala ni ua na wai. Me da na vakayacora vakacava? … Ni da vulica ka vakayacora vakadodonu na ivakavuvuli ni kena vakayagataki na ilavo e na noda bula, kei na itovo ni veiwekani kei na loloma e na sala eda rawa ni veivukei kina vakaveitacini, ka duavata, ni dua e malumalumu ni baleta na nona vinakata na ka, e na rawa mai na kaukauwa ni nona itokani me vukei koya se vakacegui koya. E dua na iyalayala e yalataka na Turaga vei ira na Nona tamata, me vaka e volai tu e na ivola ni Vunau kei na Veiyalayalati, dou sa vutuniyau sara ni dou sa rawata na bula tawamudu [raica V&V 38:39]. E na rawa vakacava na veika oqo ni veisiga kece ga e da sa vakayagataka na ilavo e da rawata, ka kerekere tale tiko vei ira na kai noda? …

… Me da dau cakacaka vakagugumatua ka qarauna na kena maroroi vinaka na noda ilavo. Me da kakua ni vakaukauwataka na noda vakabauta e na noda iyau, se me da cakava me vaka na noda kalou, mei cavai? Na ka ga e da rawa ni vakayacora e na gauna e da sa sotava kina na gauna dredre, me da vakayacora na veika e vinakati e na gauna oya kei na itavi era vakaitavitaki kina na tamata ni Kalou me ra vakayacora e na ivakatagedegede sara icake na inaki i koya sa Cecere sara e na vanua.²¹