Au Kila ni Bula Tiko na Noqu Dauveisorovaki

E da sa kila vinaka na italanoa kei na itukutuku me baleta na iVakabula me vaka sa volai tu e na Veiyalayalati Vou; ni sa sucu mai vua na gone yalewa; e susu mai na kedra maliwa na tacina tagane, kei na levu ni ka taleitaki e vakayacora ni se lailai mai na kaukauwa ni Nona lumuti kei na ilesilesi; kei na nona vakavulici ira na loya kei na vuniwai e na vale ni soro kei na valetabu, ka vakasavi ira na tovolea me ra vakacalai koya e na vosa. E da sa kila vinaka na kaukauwa e vakaraitaka e na nodra vakabulai na tauvimate, rai na mataboko, nodra rogo na didivara, na nodra vakasavasavataki na vukavuka, ka vakavuna na nodra kaila e na mamarau na lokiloki.

E matata vei keimami na ivakavuvuli e vakavulica; e vaka vei au e na sega ni gadrevi tale me dua na ivakadinadina me baleta na cecere i Jisu Karisito mai na ivakavuvuli e vakavulica, me ra daulomani o ira na dauvakayagataki ira vakaca se vakacacani ira na tamata, ka me ra veisausaumi e na vinaka ki na ca. Me yacova mai na gauna ni kua na ivakavuvuli e vakavulici tiko e vuravura, oya na, “me kenai sau na mata na mata, me kenai sau ni bati na bati.” [Maciu 5:38.] Oqo na ivakavuvuli ni tabagauna sa oti. Io,e vakavulica o Jisu na veibasai ni veika oqo. E vakadreta vei iratou na nona tisaipeli me ra kakua ni sosomitaka na ca kina ca, ka me ra sausaumi na ca kina vinaka. “… ia kevaka e dua sa sabica na balumu i matau, vagolea vua na yasana ka dua.” [Maciu 5:39.] E se vou e vuravura na ivakavuvuli oqo. E sega ni duavata na ivakavuvuli oqo kei na lutu tani mai ni tamata. … Io, e sega ni vaka na tamata. E sega ni rawa na tamata me vakavulica na ivakavuvuli ka bulataka e na nodra dui bula ke sega na veivakauqeti kei na kaukauwa mai lomalagi.

“Sa kalougata ko ira sa yalomalumalumu: ni sa nodra na matanitu vakalomalagi.

“Sa kalougata ko ira sa dautagi: ni ra na vakacegui.

“Sa kalougata ko ira sa yalomalua: ni ra na taukena na vanua.

“Sa kalougata ko ira sa viakania ka viagunuva nai valavala dodonu ni ra na vakamamautaki.” [Maciu 5:3–6.]

Wilika na Vunau e na Ulunivanua [raica na Maciu 5–7], ka tarogi iko ke a sivia se tiko e cake mai na veika e vakavulica na tamata. Ka vakadeitaka vei au e na vakabauta ni o Jisu e sega ni tamata walega, e Kalou o koya ka vakavatuka tu vakayago. Oqo na ivakavuvuli ni bula tawamudu, kena bula tiko na tamata e na sega ni mate rawa; kena taubale, e na taubale o koya e na gaunisala vinaka; ke a mani vakamuria, e na kila o koya na dina, e na vakagalalataki koya talega kina na dina.

E na gauna eda sa yacova yani kina na siga ni Nona veilewai, e na dua vei ira e digitaka me iApositolo ka me nona ivakadinadina, e qai vuki me vakatakila na Turaga kivei ira na nona meca. Era lako mai ka kauta mai na nodra iseleiwau kei na nodra iyaragi me mai vesu na tamata ni sautu, na tamata e vakatabuya na ivalavala kaukauwa, o koya e se bera vakadua ni laveta cake na Domona se Ligana vei ira na tamata savasava kei ira na vinaka, se na dua tale na tamata, vakavo saraga me baleta na nodra ivakavuvuli ca kei na ivalavala ca—era lako mai me ra mai kauti koya vakavesu ka veiwalitaki na nona veilewai, me ra rawa ni kunea e dua na cala me ra vakacacani koya kina ka vakamatei koya.

E na dua na gauna, ni a vakavulici ira tiko na tamata me baleta na ivakavuvuli kilikili ka vakadinadinataka talega ni o koya e Luve ni Kalou, era tomi vatu me ra virilaki koya kina. E qai tukuna o Jisu, “… E vuqa na cakacaka vinaka ka’u a vakatakila vei kemudou mai vei Tamaqu; a cava na cakacaka vei ira oqo dou sa vakaviriki au kina?” [Joni10:32.] E se sega ni vakayacora e dua na cakacaka ca vei ira; na veika kece ga e vakayacora e vinaka; ia era vakaqara me ra vakamatei koya. E na gauna e kidava kina o Pita e ucuna mai na nona iseleiwau ka taya laivi na daligana na italai ni bete levu, E tarovi koya o Jisu ka kaya, “daramaka tale na nomui seleiwau ki na kena taga: ni ra na mate e nai seleiwau ko ira kece era sa taura nai seleiwau.” [Maciu 26:52.] e na gauna ni nona veilewai, e vakasewasewani kina, e moku, e qai vakaisalataki e na isala votovotoa, ka qai vosa vakacacani, e sa sega tale ni vakatakila, ka soli yalona yani vei ira era sa vakaleqai ni sa vakadonuya na Kalou me ra vakamavoataki koya na tamata ivalavala ca

Era sa qai kauti koya mai kina vanua e vakavulica kina na ivakavulivuli me mai vakatovolei ka vakadinadinataka na dina ni nona ivakavuvuli. E na gauna talega ni nona sa vakarawarawataki e na kauveilatai, E tagicaka, “I Tamaqu, kakua ni cudruvi ira; ni ra sa sega ni kila na ka era sa kitaka.” [Luke 23:34.] Au taro mada, e dina beka oqo? Ke dina, au rawa ni kaya ni sega ni dua na tamata e na rawa ni veisautaka na vosa vakaoqo, e na gauna oqo; e vinakati kina na kaukauwa kei na yalo tabu, na loloma, na yalo veivosoti, solisoli kei na veivosoti ni Kalou duadua ga. Au vakadinadinataka vei iko ni o koya e rawa ni kerea na Kalou me vosoti ira na tamata era sa vakararawataki koya ka sega ni vakataka na Kalou. Ke sega tale ni dua na ivakadinadina kei na kena e tiko oqo me baleta na inaki vakalotu i Jisu Karisito, qo mada ga e rawa ni vakadeitaka vei au ni o Jisu e Dauniveisorovaki ni vuravura. E vakavulica ka dauvakaraitaka e na Nona bula na ivakavuvuli e rawa ni vueta kina na vuravura.…

O Jisu … a vako e na kauveilatai. E ratou kauta sobu mai na yagona na Nona itokani, e ratou mai savata ka ologa vinaka sara e na dua na isulu lineni savasava ka laki vakadavori koya sara e na dua na ibulubulu vou ka se bera sara ni dua na yago e vakadavori kina. Ni bera ni vakayacori vua na veika oqo, e sa vakavulica oti o koya vei ira na nona tisaipeli ni na vakamatei na Luve ni Tamata. E tukuna vakaoqo o koya, “A ka oqo sa lomani au kina ko Tamaqu, ni’u sa solia na noqu bula, me’u kauta tale. Sa sega e dua sa kovea oqo vei au, ia ka’u sa solia vakai au ga, Au sa rawata me’u solia, ia kau sa rawata me’u kauta tale.” [Joni 10:17–18.] e lako mai o Koya me mai vakayacora na veika era sa parofisaitaka na parofita; ni sa qai mai mate kecega e na vuku i Atama, e na vakabulai kece talega e na vuku i Karisito [raica talega 1 Koronica 15:22].… Ke a lako mai na ivalavala ca e vuravura me baleta na cala ni dua na tamata, ka mai tarai ira kece na tamata na ivalavala ca oya ni sega ni bale vei ira, oya e sega ni dodonu, e sega talega ni dodonu me ra mai vakabulai e na leqa oqo mai na cala ni dua na tamata? Oqo na inaki e a vakarautaki mai na ivakatekivu, e sega tale ni dua na ka e tiko kina, na kilikili ga. E solia na nona bula o Jisu me rawata kina na veika oqo. E mai vakamatei vei ira na tamata yalo ca, na dauveibeitaki vakailasu, o ira era sogota na matadra kei na yalodra mai na ivakavuvuli dina, e vakavulica.

E na gauna sa bulu oti kina, e da wilika e na ivolanikalou, e na imatai ni siga ni macawa e veisiko yani o Meri na yalewa ni Makitala ki na ibulubulu; sa raica sara ni sa tosoi tu na vatu ni bulubulu ka sa yali na yagona. Ni rai yani ki loma e sa raica sara e rua na agilosi e rau vakaisulu vulavula tu, “e dua ki uluna, ka dua ki yavana,” [Joni 20:12]:

“A rau sa kaya vua, Yalewa, ko sa tagi e na vuku ni cava? Sa kaya vei rau ko koya, E na vuku ni ra sa kauta tani na noqu Turaga, ia ka’u sa sega ni kila na tikina era sa vakotori koya kina.

“Ni sa qai vosa vakaoqo, sa vuki vakanadaku, ka raici Jisu ni sa tu, ia sa sega ni kila ni sai Jisu.

“Sa kaya vua ko Jisu, Yalewa, ko sa tagi e na vuku ni cava? ko cei ko sa vakasaqara? Sa nanuma ko koya ni sai vakatau-ni-were-, a sa kaya vua, Kevaka ko sa kauti koya tani, tukuna saka vei au na tikina ko sa vakotori koya kina, ka’u na qai laki kauti koya tani.

“Sa kaya vua ko Jisu, i Meri! Sa vuki ko koya, ka kaya vua, Raponai! (a kenai balebale Vakavuvuli).

“Sa kaya vua ko Jisu Kakua ni tarai au; ni”u sa bera ni lako cake vei Tamaqu: ia mo lako vei ira na wekaqu, ka kaya vei ira, Au sa lako cake vei koya sa Tamaqu, ka Tamamudou; vei koya sa noqu Kalou, ka nomudou Kalou.” [Joni 20:13–17.]

A sa qai lako yani o Meri ka laki tukuna vei ira na tisaipeli ni a raica na Turaga ka a rairai talega vei iratou.

Raica, me da vakasamataka na gauna oqo. Sa tiko oqo na itukutuku dina me baleta na nona veisiko o Meri ki na ibulubulu, ka raica i kea e rua na agilosi, ka raica talega ni sa tucake tu na iVakabula. E tiko talega na nona ivakadinadina baleti rau na italai mai lomalagi, e vakadeitaka talega na Luveni Kalou ni sa tucake tale na Dauveisorovaki. E vakasavui sobu mai vei keda na nona vosa me ivakadinadina. O na veibataka? O vakatitiqataka na nona ivakadinadina? … Ni oti oya e qai siviti rau na tisaipeli e rau a lako tiko i Emeo, ka salavata keirau; io, “a sa vakabuwawataki na matadrau me rau kakua ni kilai koya.” [Luke 24:16.] e tarogi rau o Jisu na cava era yalo rarawa kina, e rau qai kaya: “O iko duadua beka na vulagi mai Jerusalemi, ka sega kina ni kila na veika sa qai yaco kina e na gauna oqo.” [Luke 24:18.] Ni vakalailai ga sa dola na matadrau, ka rau qai kilai Koya.

Ni oti oqo e sa qai rairai vei ira na Nona tisaipeli. E dua vei iratou na tisaipeli sa rogoca ni sa tucake tale o Jisu, e tukuna ni sega ni vakabauta me yacova ni sa raici Koya ka me tara talega na mawe ni ivako e loma sarena kei na ligana. E tautauvata vakacava o Tomasi kei ira na tamata edaidai. E na gauna e rairai yani kina vei iratou na nona tisaipeli o Jisu e sa tiko kina vata kei ira e na gauna oya o Tomasi.

“Sa qai kaya vei Tomasi ko koya, Dodoka mai na nomui qaqalo, ka raica na ligaqu: ia dodoka na ligamu ka daramaka ki na sarisariqu: ia mo kakua ni vakatitiqa, mo vakadinata ga.

“A vosa ko Tomasi ka kaya vua, Noqu Turaga ka noqu Kalou.

“Sa kaya vua ko Jisu, Ni ko sa raici au, Tomasi, ko sa vakadinata: sa kalougata ko ira era sa sega ni raica, ka ra sa vakadinata.” [Joni 20:27–29.]

E qaravi iratou na Nona tisaipeli o Jisu e na gauna sa tucake tale mai kina, ka vakadeitaka talega e na nodratou vakasama ni sega ni vakaisini ira tiko, ni Luveni Kalou dina o koya, e sa tucake tale mai na mate ki na bula tawamudu. E ratou sega ni raica e na matadratou dina. Eda dau raica e levu na ka e na matada dina, e rawa ni lasu oya. Eda na rairai rogoca e daligada, e rawa talega ni lasu oya. Na noda vakila na veika e rawa ni cala e na veika eda nanuma.… Ia, me’u tukuna vei iko e na gauna e na vakaraitaki koya kina o koya sa Cecere vei ira na tamata, e vakayacora e na kaukauwa vakayalo tabu, e sega e na mata vakatamata se e na rogo vakatamata talega. E vosa o Koya vei ira na tamata me vaka e vosa tiko vua ni sega ni vakayago; E vosa o Koya vei ira na yalo. Io, ke vosa vei iko na Kalou sa Cecere sara ka vakadinadinataka na nona dina e na kaukauwa ni Yalo Tabu, … o na kila me vaka ni kila talega na Kalou. E sega ni dua na ka o vakabauta walega; oqo e dua na ka e sa vakadewataki sobu yani vei iko, e na yalomu ga ka so na gauna e dau cala se lasutaki; io, o koya ga e na vakaraitaka na Kalou e yalomu, kina yalona bula, ki na bula tawamudu ni tamata, me vaka ni tawa vakarusai rawa ni Kalou, ka tawamudu.

E na mataqali sala vata sara ga oqo e dolava kina o Jisu na matadra kei na kila ka vakayalo ni nona tisaipeli ni oti na nona Tucake tale, me ra kila kina ni o koya e Turaga ka Karisito. Era sa kila ni sa tucake tale mai na mate. Era kila talega ni o koya e Luveni Kalou bula, baleta ni sa vakaraitaka vei ira na Kalou. Ia, e rawa ni ra tukuna ni sa tukuna na dauniserekali,

“Rogo talei tu vei au:

Au sa kila ni bula tu.” [“Noqu Dauveisorovaki,” Sere # 38.]

… O cei e rawa ni vakamacalataka na marau kei na yalo vakacegu e na kauta mai ki na yalo ni tamata o koya sa taura oti na ivakadinadina oqo ni Kalou Cecere? E sega ni rawa ni dua na tamata e rawa ni veisautaka. Au na sega ni vakamacalataka vei iko. E sega ni dua na vosa vakatamata e rawa ni vakamacalataka. E na rawa walega ni vakilai. E na rawa walega ni kilai me tuka ni tamata. E na sega ni vakamacalataki rawa na marau ni tamata e na gauna era na taura kina na ivakadinadina mai vua na Yalo Tabu.…

E sa vosa oti vei au na Yalo Tabu ni Kalou—e sega i daligaqu, e sega i mataqu, ki na yaloqu, e na tiki ni yagoqu bula kei na tikiqu tawamudu,—e vakaraitaka talega vei au ni o Jisu na Karisito, na Luveni Kalou bula. Au via solia na noqu ivakadinadina vei iko ni’u kila ni bula tiko na noqu Dauveisorovaki. Kau tomana tale yani, ni’u kila ni’u na raici Koya tale e na Vuravura oqo, au na raici Koya me vakataki koya ga.… E na lesu mai o koya me mai veisiko tale e vuravura; E na sega ni vaka na nona lako mai e liu, e na gauna oqo e na kaukauwa kei na lagilagi levu, ka na vakacola sau vei ira na yalo ca kei ira na sega ni tiko vei ira na yalo vakalou ka sega ni talairawarawa kina ivunau ni Yalo, io, vei ira na yalo kaukauwa me baleta na dina ka sogota na nodra kila ka ki na nodra ivakadinadina na italai ni Kalou. Era na veilewai; sega ni baleta na veika era rogoca e daligadra se na veika era raica e matadra, era na lewai ga e na veika kilikili era sa vakayacora, era na vakarusai baleta ni sa cinavi o vuravura, ka ra taleitaka na butobuto mai na rarama. … E sa vakaraitaka vei au na Turaga na veika oqo. E na vakasinaita na yaloqu e na nona ivakadinadina, me yacova ni sa sega na vakatitiqa.…

E tiko na nodra ivakadinadina na tisaipeli i Karisito e na vanua vaka Esia kei na nodra ivakadinadina na tisaipeli i Jisu e na vanua oqo, era vakadinadinataka talega na dina vata ga oya. E na gauna eda sa taura kina na Vunau kei na Veiyalayalati, e lewena tiko mai na raivotu kei na ivakadinadina ni Kalou vei ira na nona tamata kei ira na Yalododonu e na tabagauna oqo, na ikatolu ni ivakadinadina ni veika oqo. Me itoma ni veika oqo,… e sa tiko vei keda na ivakadinadina ni Yalo Tabu e yaloda, eda na sega ni lasutaka; Vei ira kece na sa taura na nodra ivakadinadina mai na veivakauqeti ni Yalo Tabu e na sega ni rawa me lasutaki. Na Yalo Tabu ni Kalou e sega ni rawa ni vakadinadinataka na veika e sega ni dina. Io, kevaka o sa taura na ivakadinadina ni Yalo Tabu e lomamu, o sa na kila ni bula tiko na noda Dauveisorovaki.…

… Au solia yani oqo vei kemuni na noqu ivakadinadina ni bula tiko na noqu Dauveisorovaki. Au nuitaka mo na kunea e lomamu na ivakadinadina oqo.… Kevaka e da na veilomani ka veirokorokovi, eda na rawa ni vakayacora na inaki ni Kosipeli ni Luveni ni Kalou, na ivakavuvuli i Jisu, e sa vakarautaki tu me sorovaka ka vakabula na vuravura ka me ra kau lesu mai na tamata ki na iserau ni Kalou, e dua na ka eda rawa ni taura ka marautaka taucoko, oqo na noqu masu.