Ciqomi ni iVakadinadina i Jisu Karisito

Au kila ni ivakavuvuli kece ni Kosipeli eda sa ciqoma sa isolisoli uasivi ni Kalou vei ira na luveni tamata. Na isolisoli ni vuku, na isolisoli ni kila ka, na isolisoli ni parofisai, na isolisoli vakavosa, na isolosoli ni veivakabulai, na isolisoli ni ivakadinadina, kei na isolisoli ni kila na ka e nakita o koya sa Cecere sara me mai noda ke da na talairawarawa ki na ivakavuvuli ni bula kei na veivakabulai.³

E na sega ni taukena na tamata na islosoli… ni ivakadinadina ni Yalo Tabu ni Kalou Bula ki yalodra, [vakavo ga] ke ra vakasaqara. Oqo na ivakavuvuli: Dou kerekere, ka na soli vei kemudou: dou vakasaqara, ka dou na kunea; dou tukituki, ka na dolavi vei kemudou [raica Maciu 7:7–8]; ke o vinakata na vuku, mo kerea, me vaka e vakayacora o Solomoni; ke o vinakata na vuku kei na ivakadinadina ni Yalo Tabu e lomamu mo vakasaqara e na yalo dina. Vakarautaki iko mo kilikili ka rawa ni ciqoma kina, e na qai lako mai me isolosoli ni Kalou, ka me vakalesui tale vua na vakavinavinaka.⁴

[Na ivakadinadina] e dau yaco mai vei keda … baleta na noda duavata kei na ivakavuvuli ni veitaratara mai vua na Kalou ki vei keda na tamata. E da vakabauta, e da veivutuni ka vakatutusa me baleta na noda ivalavala ca, e da na vakayacora ga na veika e vinakata na Turaga me bokoci kina na noda ivalavala ca, me da taura kina na isolisoli ni Yalo Tabu. E na duavata na noda vakasama kei na Yalo Tabu ni Kalou, e na sala sa vakarautaka na Kalou me vakaraitaka kina na yalona vei ira na luveni tamata.

E na gauna oqo e na ka taleitaki vua e dua me rawata vakayalo na ivakadinadina me baleta na ilesilesi vakalou ni Luveni Kalou kei na lesilesi vakalou talega ni Parofita o Josefa Simici.… E da vakila e yaloda na dina ni ivakavuvuli e vakalesuitale mai vua na Parofita o Josefa Simici, ka vakila vakalailai ni da dau tovolea meda veitaratara kei na Yalo Tabu ka rogoca na domona ni vosa vei keda. Na Yalo Tabu ni Kalou e dau vosa ki yaloda. E sega ni dau vosa wale vei keda na Turaga, io e na gauna e dau vosa mai kina erau dau veitaratara ga kei na tikida vakatuka; na yalo ni tamata e dau ciqoma na veika e via tukuna na Kalou vei ira na luvena, o koya gona me da dau duavata kei koya me rawa ni da ciqoma kina.⁵

Me da taukena na cina oqo [ni ivakadinadina] e na vakatakila, e da na sega ni rawa ni vakayacora e na noda vuku yadua. E na vakarautaka na vuku kei na kila ka na Kalou, e na dusimaka vei keda na sala kina dina ke vaka me da vakanuinuitaka vua, me kua vei ira na tamata.⁶

Na isolisoli ni Kalou, ke sega ni kauwaitaki se vakayagataki vakatawa kilikili e na biuti keda, e na sega talega ni tiko vata kei koya na ivakadinadina ni dina o koya sa taura oti, ke sega ni vakayagataka na isolisoli tabu oqo me yaga e na nona toso iliu kei na veika raraba.⁷

Na vakadeitaki ni veika oqo, e rawa mai e na noda talairawarawa kina vakayagataki ni ivakavuvuli ni bula tawamudu, e na dau vakadeitaki tiko ga, me vaka e liu, mai “na vunau e na vunau kei na vosa e na vosa,” mai na ivakatakila ni Yalo Tabu, e drodro tu ga ka ivurevure tawayalani ni kila ka, ni reki kei na marau, ka toso ka voleka vua na Kalou, ka vakavuna me tautauvata na kena irairai kei na nona Dauniveibuli.⁸

Sa noda iliuliu o Jisu, o koya na noda ivakaraitaki. Me da vakamuria na sala e dusimaka kevaka da vinakata me da bula, ka bulavata kei koya e na nona matanitu. Me da talairawara vua ka vakabauti koya, ni da kila ni o koya na iVakabula kei vuravura.

E sega ni dua na kena dredre vei au me’u vakabauta na veika oqo; Au wilika e na iVolatabu na veika e vakayacora, e vunautaka ka vakaraitaka. Au na sega ni vakabauta ni dua na tamata dodonu, turaga se marama yalo dina, e tiko vua na kila ka, e rawa ni wilika na kosipeli e na Veiyalayalati Vou kei na ivakadinadina e soli me baleta na iVakabula, ka sega ni vakabekataka ni sai koya dina oya. Ni o ira kece na tamata dodonu ka yalo dina e tiko e na Yalo Tabu, e na vakadinadinataka e na loma ni tamata na vosa ni Kalou; ni ra sa wilika na itukutuku veivakauqeti oqo, e na yalo dina kei na yalo raramusumusu, ka sega kina na veivakaduiduitaki kei na vakasama lasulasu e vu mai na noda itovo kei na veivakavuvuli cala, e na vakadinadinataka na Yalo Tabu ni Turaga na vosa e vu mai ka caudre e lomada dina, o koya gona, au vakabauta kina ni o Jisu na Karisito, na iVakabula, na luvena dua bauga na Tamada; oqo talega au rawata mai na kena wiliki tiko na iVolatabu.

Ia, me da vakanuinui kina iVolatabu me baleta na noda gugumatua kei na kila ka? Sega, me da vakavinavinaka mada ga vua na Turaga ni sega. Na cava tale e tiko me da wasea kina na kila oqo ka vakadeitaka kina na ivakadinadina oqo? E sa tiko vei keda na iVola i Momani, na “i titoko i Ifereimi,” soli vei keda mai na kaukauwa ni Kalou, ka vakadinadinataki koya, ka vakaraitaka talega na veika me baleta na nona cakacaka kei na nona veivosaki kei ira na lewe ni vanua oqo, e na gauna e tucaketale mai kina e na mate, e na nona mai sikova na vanua oqo me raici ira kina na “lami tale e so,” me ra mai umani vata kina me dua na matanitu, me ra mai nona talega ka nodra ivakatawa levu o koya. Me ikuri ni veivakadeitaki e tiko e na iVola, sa tu kina nona ivakadinadina o koya e vakadewataka, ka dregata na nona ivakadinadina e na nona dra; kei iratou talega na vakadinadina tale e so, ka ivakadinadinataka talega ivuravura raraba ni ratou raica na peleti kei na veika e ceuti tu kina, ka vakadewai mai kina na iVola.…

Oqo e rua na ivakadinadina—Na iVolatabu kei na iVola i Momani, erau vakadinadinataka e dua vata ga na dina, ni o Jisu na Karisito, ni mate ka qai bula tale, ni sa vorata na ivau ni mate ka tucaketale. E tiko vei ira na Yalododonu Edaidai na ivakadinadina tale e so oqo, ka sa ikuri na kena e tiko vei ira na lotu vaKarisito tale e so, ka ra sega ni vakabauta na iVola i Momani.

E sa kena levu beka oqo? Sega. E tiko talega oqo e so na ivola, na Vunau kei na Veiyalayalati, e lewena tiko na ivakatakila mai vua na Kalou ki vua na parofita o Josefa Simici, o koya a bula e na itabagauna oqo. Oya na vosa i Karisito, e tusanaka kina ni o koya ga ka lako mai vei ira na Jiu, ka laveti cake e na kauveilatai, ka vakadavori e na ibulubulu.… A vorata na mate ka tucake mai na ibulubulu. Oqo, e dua tale na ivakadinadina ni dina vakalou; io, eratou sa mai lewe tolu kina na ivakadinadina. E na gusu ni dautukutuku e le rua se le tolu e tukuni vei keda e na tauyavu kina na veika kece; mai na ivakadinadina talega ni le rua se le tolu e da na lewai kina se vakarusai.

Ia, e na vakacegui au beka oqo? E na rawa, kevaka au na sega ni taura tale na ikuri ni rarama se na kila ka. Io, e na gauna e sa na rarama levu mai kina, e na rawa me mai noqu, kau na sega ni mai mamau e na veika oqo ka lailai. E da na sega ni vakacegu se marau me lako yani oqo, vakavo saraga ke da na ciqoma na rarama taucoko kei na veivakalougatataki e vakarautaki vei ira na kilikili. …

E sa soli vei keda na kaukauwa me da kila na veika oqo. Sa tukuna na Kalou me na vakaraitaka na veika oqo vei keda; e na inaki oqo e sa soli kina na Yalo Tabu vei ira kece e dodonu me nodra, mai na nodra ivakadinadina, ka vakadinadinataka na Tamada kei na Luvena, ka taura na veika ni Kalou me vakaraitaki vei ira na tamata. Na vakabauta e tiko vei keda e na noda vakarokorokotaka na dina ka vakadeitaka na Yalo Tabu, e solia talega vei keda na veivakadeitaki dina, e na vukuna e da kila kina, sega ni o koya e sa tukuni vua, io vei koya e sa raica, vakila, rogoca, ka kila vakataki koya.

E na noqu mai tucake e matamuni na taciqu kei na ganequ, ni’u sa suwai malumalumu e na liga ni Kalou. Au vakadinadinataka, e sega wale ga mai na kila e vure mai na ivola, oqo mai na nona ivakatakila na Kalou vei au, ni o Jisu na Karisito. Au kila ni bula tiko na noda Dauveivueti; Au kila ni dina ga ni na vakarusa na yagoqu na ulo ia au na raica tale na Kalou niu sa vakayago tale, kau na raici koya tale vakataki au. Oqo na rarama sa tarai au mai, ka sa mai tiko e yaloqu kei na noqu vakasama, e na vukuna au sa mai vakadinadinataka kina, e na noqu kila au sa mai tukuna kina. …

Au tiko duadua beka? Sega; era le udolu vakaudolu edaidai era rawa ni vakadinadina taka oqo. O ira talega era kila vakataki ira; e sa vakaraitaka vei ira na Kalou, era sa taura talega na Yalo Tabu, ka sa vakadinadinataka talega e lomadra, me vakataki au era sega ni vakatau tiko e na ivola se e na nodra vosa na tani, ni ra sa ciqoma talega na kila ka mai vua na Kalou me vakataki ira, ka kila me vaka era kila ka rai me vaka na nodra rai me baleta na veika rawarawa ka taleitaki.⁹

E da veitalanoataka tiko na iVakabula, o Jisu na Luveni Kalou, e da na vakabulai ka vakarurugi vua, ka sa vakadeitaki na noda ivakadinadina e na yavu ni dina tawamudu e na gauna e tiko kina e yaloda na Yalo Tabu i Karisito.

Au via kaya yani vei kemuni na tuakaqu kei ira na ganequ, ke tiko e dua na tamata e vuravura ka sa ciqoma vakatitobu ka vakavuku e yalona na loloma i Karisito ka vakalevu cake mai vei au, au na taleitaka sara meu raici koya, au vinakata talega m’eu veimaliwai kei na tamata oqori. Na Karisito e iVakabula dina ni yaloqu, na iVakabula ni tamata kece. E solia na nona bula me da vakabulai kina, e voroka na ivau ni mate, e sa coqa ka qaqa mai na ibulubulu, ka vakauqeti keda me da muri koya. E sa tucake tale mai na mate,ni a mai soli koya me mai noda sala ni vakabulai, na rarama kei na bula ni vuravura, au vakabauta e na yaloqu taucoko na ka oqo. Au sega walega ni vakabauta, io me vaka ni’u kila ni cila na matanisiga, io au kila talega na noda vakabauti koya e vakauqeti keda me da vakayacora na veika vinaka ka sega ni veika ca; ni’u kila talega na vinakata na bula savasava, na veidokai, na dodonu, me yalo dina ka kilikili, me kua na veika ca, au sa mai kila kina mai na ivakadinadina e rawa kina vei au meu ciqoma ni o Jisu na Karisito, na Luve ni Kalou bula, na iVakabula kei vuravura.

Io mai na veika kece oqo, kei na veivakadeitaki e tiko e yaloqu, na kila ka au sa ciqoma mai vua, kevaka au na tu vakadua e ke, na vinaka cava e na kauta mai vei au? E na cava na kena yaga na kila ka e tiko oqo vei au? E na yaga walega vakacava vei au na kila ka oqo? E na yaga vei au na veika oqo, ni sa tiko vei au na nona ivakadinadina kau sa ciqoma oti talega e yaloqu na ivakadinadina ni yalotabu ni Kalou bula, ni o Jisu na Karisito, kau sa mai tu vakadua eke ka sega tale ni toso iliu, na noqu ivakadinadina e yaloqu e na kuria na noqu vakarusai tawamudu. Baleta na cava? Baleta ni sega walega ni noqu itavi me’u kila ni o Jisu na Karisito, io me tiko ga vei keda na kaukauwa ni nona veivakauqeti ni yalo tabu e yaloda. E sega walega me tiko na nona ivakadinadina e yaloda, e dodonu talega meda vakayacora na veika e vakarota vei keda, kei na cakacaka kilikili e vakayacora, me da rawata kina na veivakabulai e maroroi tu e na vuku ni luvena kevaka era vakayacora na veika kilikili ka vakabauta; o ira kece na sega ni yacova yani era na lutu dina. “Ko ira kecega sa kaya vei au, Turaga, Turaga, e na sega ni curu ki na matanitu vakalomalagi; ko koya ga sa cakava na loma i Tamaqu sa tiko mai lomalagi.” [Maciu 7:21.]

E tukuna na iVakabula: “Era na lewe vuqa e na kaya vei au e na siga ko ya, Kemuni na Turaga, Na Turaga keimami a sega li ni vakavuvuli e na yacamuni? ka vakasevi ira na na tevoro e na yacamuni? Ka kitaka na cakacaka- mana e vuqa e na yacamuni? Ia ka’u na qai tukuna vei ira, Au sa sega sara ni kilai kemudou; dou lako tani vei au koi kemudou sa daukitaka nai valavala ca.” [Maciu 7:22–23.] Baleta na cava? Baleta ni o tukuna ni o lomani au, mai na tebe ni gusumu ni, o tukuna ni o ciqomi au, mai gusumu, se mai na nomu vosa, io o sega ni vakayacora na veika au vakarota vei iko; o sega ni veivutunitaka na nomu ivalavala ca, o sega ni lomana na Kalou e yalomu taucoko, e na nomu namuna taucoko, o sa lutu talega mai e na nomu lomani ira na kai nomu me vaka ko lomani iko, o sa sega talega ni papitaiso mai vei koya e tiko vua na kaukauwa me veipapitaisotaki me baleta na bokoci ni ivalavala ca; ka sa sega talega ni o ciqoma na isolisoli ni Yalo Tabu mai na veitabaki; ka sega talega ni wilivata kei ira na noqu tamata; ko sega ni mai lewe ni noqu qele ni lami; o sa sega talega ni wili kei ira na sa digitaki, kau sa sega ni kilai iko, “o koya sa ca kina vua sa kila me caka vinaka, ke sega ni kitaka.” Ke da kila meda vakayacora na veika vinaka ka qai sega ni vakayacora e sa ivalavala ca. (Jemesa 4:17). Oqo e na yaco vei ira na vakabauta wale ga. O vakabauta, ia na cava o sega ni vakayacora kina na veika e vinakati kina? …

… E na sega ni se rauta vei iko ni o kila ni o lewe ni Yalododonu Edaidai e na nomu bulataka tiko na nomu bula, e na bula oqo na nomu cakava tiko na veika se na nomu itavi o se vakatotomuri ira … na sega ni vakabauta na Kalou kei na ilesilesi tabu i Jisu Karisito. Era na sega ni vakayacora rawa na veika oqo. E na vakayagataki iko na tevoro, e na liutaki iko cala o koya, ka na vakarusai iko ke o na sega ni veivutunitaka na veika o cakava se vakayacora e sega ni veiganiti se tautauvata kei na kosipeli sa vakavulici vei iko.¹⁰

E na taqomaki keda e na veigauna kece na ivakadinadina savasava.¹¹

Kemuni na tuakaqu kei na ganequ, au vinakata me’u solia na noqu ivakadinadina vei kemuni; ni’u sa taura na veivakadeitaki ka sa mai noqu bula tiko oqo. E sa mai tiki ni yaloqu; e tawana na vei vanua lala kece e yaloqu; me’u rawa ni talaucaka yani kina vei ira na tamata ka marautaka ni’u rawa ni tukuna yani ki vuravura raraba, ni sa vakaraitaka vei au na Kalou ni o Jisu na Karisito, na Luveni Kalou bula, na Dauveivueti ni vuravura.¹²

Au sa vakadeitaka na yaloqu vei [Jisu Karisito]. E vuabale na lomaqu kei na yaloqu e na noqu lomani koya. E sa yavutaki na noqu vakanananu ki na Nona cakacaka lagilagi kei na Nona ivakavuvuli. E sega vua na ivalavala ca; E sega ni dua na duka e tauvi koya, ka tiko talega vua na kaukauwa kina bula tawamudu; E sa dolava na sala mai na ibulubulu ki na bula tawamudu vei au kei ira kece na luveni tamata. Na noqu vakanuinui Vua e tawamudu. Na noqu lomani Koya e sivia kece na veika e vuravura, e na gauna e tiko kina vei au na Yalo Tabu ni Kosipeli me kena dodonu ga, ni o Koya au na vakaliuca. Vei ira kece sa lakova na noda vuravura oqo, e cecere duadua o koya. Sa mai noda cina o Koya, ka noda dauniveidusimaki, kei na ivakaraitaki, ka sa noda itavi me da vakamuri Koya.¹³