Vakavakarau Kina iKarua ni Lako mai i Karisito

Me baleta na … lewa ni Kalou e seqai vakarau sovaraka e na vei vanua, ke era vinakata na tamata … wilika mada na veika sa tukuna tu mai iliu o ira na parofita me baleti ira, vakabibi na veika e mai vakaraitaka na agilosi o Moronai, e na gauna e vosa tiko kina vua na Parofita o Josefa Simici, e na itekitekivu ni tabagauna oqo, Au nanuma era na vakacegui ka vakadeitaki talega na yalodra, ke tiko vei ira na vakabauta, ni vakatulewa sa lako mai oqo e sega walega ni rai se vakanananu, se me dua na ka e sa kilai ka vakasavui tu mai na dua na gauna makawa, ia oqo e dua na ka dina, ka sega ni dede, e na gauna e vakavinakataka kina na Kalou na nona inaki me baleti ira na dau caka ca kei ira na sega ni vakabauta na Kalou e vuravura. E sega walega ni ra vakaraitaka na parofita kei ira na sa vakauqeti na veika kece oqo, era sa vakadeitaki talega mai na vosa ni Turaga, kei ra na italai tabu era talai mai e na iserau ni Kalou, e na gauna oqo kei na gauna makawa.

Na Agilosi o Moronai, e na nona sikovi Josefa Simici e na 21 ni vula o Sepiteba, 1823, e wilika mai na ivolanikalou me baleta tiko na veilewai oqo, ka mai tukuna ni sebera ni vakayacori na veika era mai parofisaitaka na parofita, io e na rairai beka e na tabagauna oqo, ka sa voleka mai oqo na kena ivakatekivu, ka sa vakavakarau sara tu ga e na mata ni katuba. Mai na vei mala ni vosa oqo, au vinakata me’u kauta lesu na nomu vakasama e na ivola i Malakai na parofita wase e tolu, ka vakaoqo na veika e kai naki kina: “Mo dou raica mada, au na tala na noqui talatala, ka na caramaka ko koya na sala e mataqu,”. “Ia ko cei me na yalo dei e na siga ni nona lako mai? ia ko cei me na tu rawa ni sa rairai mai ko koya? Ni sa vaka na nona bukawaqa na dausava koula ko koya, ka vaka na nodra sovu na dausavaisulu, ia e na tiko ko koya me vakawaicalataka ka vakasavasavataka na siliva,” . “Ia ka’u na toro voleka vei kemudou me ia na veilewai, ia ka’u na kusarawa ni ivakadinadina na nodra ca na daucakaisausau, kei na dauveibutakoci, kei na daububului vakailasu, kei ira era butakoca nai voli ni tamata cakacaka, kei na yada, kei na luveniyali, kei ira era bureitaka vua na vulagi na ka sa dodonu me nona, ka ra sega ni rerevaki au, sa kaya ko Jiova ni lewe vuqa.” [Malakai 3:1–3, 5.]

E tukuni tale e na Malakai na ke na Wase 4—na veika kece e sa tukuna oti na parofita o Moronai—”Ia raica, sa lako mai na siga ko ya, ena waqa me vaka na lovo; ia ko ira kece era viavialevu, kei ira kece sa caka ca, era na vaka na vu-ni-sila: ia e na vakamai ira na siga ko ya sa lako mai, sa kaya ko Jiova ni lewe vuqa, me kakua kina ni lewe vuqa, me kakua kina ni vo vei ira na wakana se na tabana.” [Malakai 4:1.] A qai wilika tale o Moronai na ika 11 ni Wase ni ivola i Aisea na parofita ka kaya: “E na lewai ira vakadodonu ga na dravudravua, ka lewa vakadodonu e na vukudra na yalomalumalumu e vuravura: e na yaviti vuravura e nai titoko ni gusuna, ia e nai cegu ni tebenigusuna e na vakamatei ira nai valavala ca.” [Aisea 11:4.]

E na nodra Cakacaka na iApositolo wase e 3 tikina, 22 kei na 23d—e wilika talega na agilosi o Moronai me vaka e volai tu e na Veiyalayalati Vou—”Ena vakatubura cake vei kemudou ko Jiova na nomudou Kalou, maivei ira na wekamudou, e dua na parofita .… Ko koya dou na rogoca e na ka vakaaduaga ena vosataka vei kemudou, ia ena yaco, a tamata yadua sa na sega ni rogoca na parofita ko ya, ena vakarusai tani maivei ira na tamata.” Oqo e dua na vosa kaukaua, ka coka sara tiko ga na utona. E qai tukuna o Moronai na parofita oqo o Jisu Karisito e na ikarua ni nona lako mai; ka sebera ni yaco na veika e tukuni tiko e na ivolanikalou oqo, io e na vakarau sara ni yaco na nona lako mai na Luveni Tamata me mai veiliutaki e vuravura ka mai veilewai talega. E wilika talega mai o Moronai mai na ivola i Joeli na parofita wase 2 tikina e 28 kina 32, e kaya talega kina ni sa voleka ni yaco na parofisai mai na ivolanikalou oqo: “Ia ka’u na vakatakila na ka e veivakidacalataki mai lomalagi kei vuravura talega, a dra, kei na bukawaqa, kei na o kubou. Ia e na yaco, ko koya yadua sa na masuta na yaca i Jiova, e na bula: io, ena ia na veivakabulai mai na ulu-ni-vanua ko Saioni, kei Jerusalemi, me vaka sa kaya ko Jiova, ka vei ira talega na kena vo sa na kacivi ko Jiova.” [raica Josefa Simici–iTukutuku 1:36–41.]

E vaka vei au ni sega sara ga ni dua na ka bibi ni ulutaka e veivosakitaki tiko oqo e yali, ni da sega walega kina nodra itovo na tamada se kina vosa e volai tu se kina dua na sala e rawa ni vakadeitaki kina na vei ka e parofisaitaki, io me vakayadrai na noda via kila na veika oqo, ni agilosi saraga mai lomalagi e talai mai na iserau ni Kalou me mai vakadeitaka tale na parofisai vei ira na tamata e vuravura e na tabagauna oqo.

E so na vosa mai na ivolanikalou e wilika mai na agilosi era nanuma ni sa yaco oti e na nodra gauna na apositolo e na gauna makawa. Io era sega ni kila na kai vuravura me ra vakarokorokotaka. Na veika kece me baleta na iulutaga oqo sa biu tani ka sa vakaraitaki mai vakamatata na dina. E vakaraitaka na agilosi o Moronai vua na parofita o Josefa Simici ni se bera ni yaco na itukutuku e volai tu e na ivolanikalou, io e na yaco ga mai na kena gauna dodonu me na qai vakaraitaki kina, na kena matailailai, ni nona lako mai na Karisito, na kena vakayacori na veilewai kei na curumaki yani na gauna ni sautu e vakamacalataki tiko e ke, me vakavinakataki sara e na itabagauna oqo. E na vorati na kaukaua ni veimatanitu tawa kilikili kece e vuravura. Na matanitu era veiliutaki tiko kina na tui e na sega ni dei se na vakaleqai, era na veimatanitu kece, ka me tucake mai o Saioni ka tokara na nona i sulu vakaiukuuku, ka vakaisulu talega e na kaukaua, na vuku, vakaturaga ka vakavanua e vuravura. Me vaka ni na rusa yani na koro levu ko Papiloni ka sega ni tucake tale.⁴

E na kacabote na veiulunivanua, na uneune kei na vakaua e sa yaco … era ivakaraitaki taucoko e tukuna na iVakabula e na yaco ni bera na ikarua ni nona lako mai, dina ni tukuni me baleta na nona lako mai e na vaka na daubutako e na bogi, e na solia mai o koya e so na ivakaraitaki me ivakadeitaki ni nona na lako mai me vaka na kena dau se na senikau ni dau roro mai na vulai katakata. O ira na qaqarauni kei ira na vuku era na vakarorogo ki na ivakaraitaki ka vakarautaki ira me ra kakua ni vakakidacalataki se sega ni kila. E sega walega ni ivakaraitaki ni gauna na kena sa vunautaki na kosipeli vei ira na dravudravua, me ivakadinadina e na veimatanitu kece.⁵

O ira na Yalododonu Edaidai … era vakabauta na itukutuku e sa volai tu e na iVolanikalou Tabu, e na yaco na veika vakadomobula e na yaco e na vei vanua kece me ivakaraitaki ni karua ni lako mai na Karisito me mai veilewai. Era vakabauta na nona lewa na Kalou na kama, na uneune, na ua lelevu, na kacabote ni veiulunivanua, kei na cagi laba. O Koya era na kila ni iVakavuvuli ka lewa na veika kece kei na lawa, ka vakila talega na ligana e na veika kece. Eda vakabauta na nona lewa e na yaco me ra kila kina na tamata na nona kaukaua kei na nona inaki, me ra veivutunitaka kina na nodra ivalavala ca ka vakarautaki ira e na ikarua ni nona lako mai na Karisito me mai veiliutaki e na kilikili e vuravura.

E da vakabauta ni o Saioni—o ira na yalo savasava—era na vakabulai, ke ra vakamuria kece na veika e vakarota na Kalou; io, na kena veibasai, o Saioni talega e na talevi “e na veika rarawa, na mate ca, kei na mate dauveitauvi, na i seleiwau kei na yameyame ni bukawaqa sa kana voli e na noqu cudru, me vaka na nodra i valavala” (Vunau kei na Veiyalayalati 97:26). Me ra vakavulici na nona tamata me ra lako e na rarama ni dina kei na sala ni Kalou ni nodra vakabulai.

E da vakabauta na veika dredre, kei na ituvaki ni veika ca e na yaco vei ira na tamata e kauta mai na Turaga e na vuku ni luvedra, me vakatotolotaka na nodra veiqaravi vei ira na so, ka me vakaraitaka talega na nodra yalo vinaka, me ra lomani koya ka qaravi koya. Keimami vakabauta talega, ni ra mata ka ivakaraitaki ni otioti ni lewa, ka ra na vakavulici ira na tamata na qasenivuli me ra vakavakarautaki ira, me ra bula kilikili tiko me baleta na nona yaco mai na iVakabula me mai veiliutaki tale e vuravura, e na gauna e na tekiduru kece kina na duru ka vakatutusa kina na yame ni o Jisu na Karisito.

Ke sa vakadeitaki veikeda na lesoni oqo kei ira na tamata ni vanua, na rarawa bibi, na vakayali ni bula, cakacaka, rarawa e na levu ka vakarerevaki e na sega ni laki sega wale tuga na betena.⁶

Au … vakadinadinataka, ke me ra bula taka tiko na Yalododonu Edaidai na nodra lotu, ka maroroya na nodra veiyalayalati kei na Kalou kei ira talega na tacidra, doka na nodra itutu vakamatabete, ka vakarorogo e na yalo vakabauta ki na lawa ni Kalou, o ira me ra na imatai me ra lutu e na lewa ni koya sa Cecere sara, ni na tekivu na nona veilewai mai na nona vale.

Io, o ira na sa solia na nodra veiyalayalati vua na Turaga e na gauna ni nona papitaiso, ka sa varota na veiyalayalati oya, ka vakatutusa ni Yalododonu o koya ka mani sega, ka tamata ivalavala ca, ka dau vorata na nona veiyalayalati, ka dau ivalavala ca ni Papiloni, ni sa vakadeitaki tu ni na “Sega ni tauvi kemudou na nona mate ca,” ni sa volai tu ni ra na drovaka na tamata kilikili [raic Vakatakila 18:4; V&V 63:34]. Oqo na noqu ivakadinadina me baleta na veika oqo. Au dau vakanuinui e na vosa ni Turaga e na veika oqo, ka sega mai na nodra vosa na tamata, e sega walega ni agilosi, na Kalou Cerecere e sa vosa mai lomalagi e na nona tabagauna e vuravura, ka da kila ni dina nanona vosa.

Ni o keda vakatamata eda sega walega ni da vakavakarau tu me baleta na veilewai, me baleta talega na lagilagi keina na ikarua ni nona lako mai na Turaga, me da rawa talega ni drovaka na veika rerevaki e na yaco vei ira na dau valavala ca, ka taura na veivakadonui e dau soli vei ira na tamata yalo vakabauta, ka mo wili mo kilikili ni o sa tucake e na mata ni Turaga e na nona matanitu lagilagi, oya na noqu masu.⁷

Eda dau rogoca na bula e na gauna ni veivakararawataki. E da sa tiko e na gauna leqa, io au se sega ni vakila na gagata ni veika vakadomobula. E sega ni tarai au mai. Au vinakata me’u bula me mai kua ni tiko vei au. Au vinakata me’u bula me vodi vei au na veika rerevaki ni vuravura, ke me rawa vei au me’u bula, e na noqu talairawarawa ki na ivakaro ni Kalou kei na nona lawa e vakaraitaki mai me mai veidusimaki vei au. Veitalia na veika e na yaco vei au, kei na vakamuria tiko ga noqu cakacaka, ke’u veimaliwai tiko kei na Kalou, ke au na kilikili ki na veimaliwai kei ira na taciqu, ke’u na tucake ka sega ni ivalavala ca e matadra na kai vuravura, ka sega ni vakadukai, ka sega talega ni varota na lawa ni Kalou, na cava au kawaitaka kina na ka e na yaco vei au? Au na tu ga vakawawa, ke tiko vinaka na noqu vakasama kei na noqu itovo. E na veitalia ga vei aul. Au na sega ni kauta mai na leqa se vakakila na gagata ni veika rerevaki.

E tarai keda kece na liga ni Turaga, ka’u sa kila talega ni sa tiko e loma na ligana. Sega ni baleta ni ra sa valu tiko na tamata, sega ni baleta era sa via vakarusai ira na vei matanitu, se na nodra sa nakita tiko na tamata me ra naki ca taka na nodra galala na tamata tale e so, e sega ni vaka eda sa veitalanoataka oqo; io na liga ni Kalou e na sega ni tarovi rawa. E na lewa o koya e na veika e na yaco. E na lewa taucoko o koya na veika, e na sala o iko kei au daru na sega ni kila rawa, se na raica, e na vuku ni vinaka cecere.⁸

Na noda talairawarawa kina Kosipeli e na vakabula na vuravura mai na ivalavala ca, me sa kua na ivalu, na veileti se na veilewaitaki, me curumaki mai na gauna ni veiliutaki e na yabaki ruanaudolu. E na vakalesuyatale na vuravura kina kena itaukei dina, ka vakarautaka me ra mai taukena na yalododonu. Oqo na ivakavuvuli taucoko ni Kosiplei i Karisito, na kena yaga e na drodro mai e na kena vakadonui ka vakayacora na tamata.⁹

Na kosipeli na veivakabulai, ke me sega e na sega sara ni dua na ka e yaga me da taukena. Eda sega ni vakaisulu e na noda lako mai ivuravura ka da na lesutale e na ituvaki talega vaka oya. Ke meda sogona e vuqa sara na veika vakavuravura, e na sega ni yaga vei keda vakabibi na vakabalavutaki na bula eke, se na noda tovolea meda rawata na bula tawamudu e na bula mai muri. Io e vakavulica na tamata na kosipeli me yaloraramusumusu, yalovakabauta, yalodina ka kilikili e na mata ni Turaga, vei keda yadudau talega, ka me levu na sara na kena ivakavuvuli me vakayacori me rawa kina ni vakatetei na sautu kei na kilikili ka tauyavutaki e vuravura, na ivalavala ca, na veileti, na vakadave dra kei na veimataqali itovo ca kece e na muduki, ka na vakasavasavataki na vuravura me ra rawa ni ra vakaitikotiko kina na tamata vakalomalagi; me mai vakaitikotiko talega kina na Turaga na noda Kalou na ka e na vakayacora o koya e na yabakiudolu.¹⁰

Na Lotu i Jisu Karisito ni Yalododonu Edaidai … e raica ni tiki tiko ni nona lesilesi me ra vakarautaka na sala me baleta na na lagilagi ni nona na lako mai na Luveni Kalou e vuravura, me mai veiliutaki kina ka mai tiko kei ira na Nona tamata. Me tiki tiko ni nodra cakacaka ni vakavakarau, o ira na Yalododonu era vakabauta ni o Isireli, e na veimatanitu era dui tu kina e na vuravura oqo, era na soqoni lesutale ka vakatikori tale e na vanua yalataki vei ira na tamadra me na nodra me tawamudu.…

… O ira na sa taura na Kosipeli e vuaravura oqo … e na vakadeitaki vei ira se nba veivuke e na ke na vakayacori tiko na inaki ni Kalou. Era cakacakavata vatatiko kei koya me sega walega ni rawa kina na nodra vakabulai ni gauna ka tawamudu, na nodra vakabulai talega o Isireli taucoko kei ira talega na veimatanitu tani era na ciqoma na Kosipeli. O ira oqo era na vakayacora na parofisai e na gauna makawa. O Aisea na parofita, e na rarama ni veivakauqeti ni Kalou, e raici ira kei na nodra cakacaka ka kaya: “Sa na yaco e na gauna mai muri, ni na vakatudeitaki na ulu-ni-vanua ni vale i Jiova me sivia na veiulunivanua, e na vakacereceretaki ka me lolovira na veiulu-ni koro; la ra na drodro kina na veimatanitu kecega” (Aisea ii:2–3). Me baleta na veika oqo, a vosa tiko kina o Jeremaia e a taleva lesu kina na nona veiyalayalati vei ira na Isireli ni na qai yaco e na veisiga e muri: “ka’u na kauti kemudou, e dua mai na dua na koro, ka rua mai na dua na mataqali, ia ka’u na kauti kemudou mai ki Saioni, ka’u na solia vei kemudou nai vakatawa era sa vaka na yaloqu, era na vakani kemudou vakavuku ka vakayalomatua” (Jeremaia iii:14–15).¹¹

Na Turaga … e vakarota e dua na ivakaro, e tukuna kina vakaoqo, me ra kila kina na nona tamata: Me ra sa tekivu saraga mai e na imati ni aua me ra dau gugumatua mai vei ira kece na nodra meca, ni ra sa vakamuria tiko e na yalo vakabauta na Nona lawa e solia o Koya vei ira, ni a vakarota o koya me ra kaukaua tiko ga me yacova ni ra sa vakarusai kece na nona meca—me kua ni vakamalumalumutaki mai na veivala se e na yalo ni veileti se veivaluvaluti, me ra vakamalumalumutaki e na kaukaua ni dina tawamudu, na vakaturaga kei na kaukaua ni Kalou sa Cecere sara.… Na vakalevutaki ni nodra kaukaua, na kilikili kei na tamata dodonu ni veiyalayalati ni Kalou e dodonu me vakarabailevutaki se vakalevutaki me yacova ni na cuva kina na tamata e vuravura ka kila ni o Jisu na Karisito, ka ra sa tiko talega na tamata era vakavakarau tiko e na ikarua ni Nona lesutale mai e na kaukaua kei na lagilagi tale e vuravura [raica V&V 103:5–8].¹²

Na Lotu i Jisu Karisito ni Yalododonu Edaidai e sega ni Lotu me veitokonitaka na ka. E sega ni Lotu tani. E Lotu i Jisu Karisito ni Yalododonu Edaidai. E dua walega na Lotu e tiko oqo e vuravura e rawa ka tiko kina na yaca dodonu i Jisu Karisito kei na nona lewa vakalou. Au solia yani na ivakaro oqo e na kena rawarawa taucoko kei na yalodina e matamu, ki vei ira talega e vuravura, e na gaga sara na veika dina oqo, vakabibi vei ira na coqa tiko ka sa sega talega na betena me ra coqa tiko. Io na veika oqo e dina, e na dina tiko ga me yacova ni sa lako mai o koya e dodonu me sa mai veiliutaki e na veimatanitu kece e vuravura ki vei ira talega na gone yadua ni Kalou e vuravura taucoko ka ciqoma na yalewa e seqai vakawati me vakarautaki e na nona lako mai na tagane me mai watina.¹³