Ngaahi Mapé mo e Fakahokohoko Fakamataʻitohi ʻo e Hingoa ʻo e Ngaahi Feituʻú

ʻE lava ʻe he ngaahi mape ko ʻení ʻo tokoniʻi koe ke ke ʻilo lahi ange ki he ngaahi folofolá. ʻOku hanga ʻe hoʻo ʻilo ki he siokālafi ʻo e ngaahi fonua ʻoku fakamatala ki ai ʻa e ngaahi folofolá ʻo tokoniʻi koe ke ke ʻilo lahi ange ki he ngaahi meʻa naʻe hoko ʻi he folofolá

1. Mape ʻo e Fonua Tapú

2. Ko e Fononga atu ʻa ʻIsileli mei ʻIsipité mo ʻEnau hū atu ki Kēnaní

3. Ko Hono VaheVahe ʻo e Ngaahi Faʻahinga ʻe 12

4. Ko e ʻEmipaea ʻo Tēvita mo Solomoné

5. Ko e ʻEmipaea ʻo Asiliá

6. Ko e ʻEmipaea foʻou ʻo Pāpiloné (Nepukanesa) Pea mo e Puleʻanga ʻo ʻIsipité

7. Ko e ʻEmipaea ʻo Peasiá

8. Ko e ʻEmipaea ʻo Lomá

9. Ko e Māmani ʻo e Fuakava Motuʻá

10. Ko Kēnani ʻi he Taimi ʻo e Fuakava Motuʻá

11. Ko e Fonua Tapú ʻi he Taimi ʻo e Fuakava Foʻoú

12. Ko Selūsalema ʻi he Taimi ʻo Sīsuú

13. Ko e Ngaahi Fononga Fakafaifekau ʻa e ʻAposetolo ko Paulá

14. Ko e Anga ʻo e Māʻolunga ʻo e Fonua Tapú ʻi he Taimi ʻo e Tohi Tapú

ʻOku lava ʻe he lisi hokohoko fakamataʻitohi ʻo e ngaahi hingoa ʻo e ngaahi feituʻú ʻo tokoniʻi koe ke ke kumi ʻo ʻiloʻi ʻi he mapé ʻa e feituʻu ʻokú ke kumí. ʻOku fakahā atu ʻi he hingoa taki taha ʻa e fika ʻo e mape ʻoku tuʻu ai ʻa e feituʻu ko iá, pea hoko atu ai mo e feituʻu ʻi he mapé ʻa ia ʻoku maʻu ai iá, ʻa ia ko ha mataʻi tohi ia ʻoku ʻoatu fakataha mo ha mataʻi fika. Hangē ko ʻení, ʻoku fakahā atu ʻa e feituʻu ʻoku tuʻu ai ʻa Lapana (ʻAmani) ʻi he mapé ʻo pehē ko e 1:D5; pea ko e ʻuhinga ia ki he, mape fika 1, mo e sikuea D5. Te ke lava ʻo maʻu ʻa e ngaahi sikuea ʻi he mape taki taha, ʻaki haʻo vakai ki he ngaahi mataʻi tohi ʻi ʻolunga ʻi he mapé mo hono fetaulakiʻanga mo e mataʻi fika ʻi he tafaʻaki ʻo e mapé. ʻOku haʻi atu ʻi mui ʻa e ngaahi hingoa kehe ʻoku ui ʻaki ʻa e ngaahi feituʻú—hangē ko ʻení, naʻe toe ui foki ʻa Lapana ko ʻAmani. Ka ʻasi atu ha fakaʻilonga fehuʻi ʻi mui ʻi ha hingoa, ko hono ʻuhingá, ko e feituʻu ko ia ʻoku hā atu ʻi he mapé ko ha fakaʻapē pē ʻa e feituʻu ko iá, ka ʻoku ʻikai ko hano fakapapauʻi totonu ia ʻo hono tuʻungá.

ʻOku ʻoatu ʻi laló ni ha kī ki hono ʻiloʻi ʻo e ngaahi fakaʻilonga mo e ngaahi mataʻi tohi kehekehe ʻoku ngāue ʻaki ʻi he ngaahi mapé. ʻOku lava ke toe ʻoatu foki ʻe he ngaahi mape taki taha ha ngaahi kī ki hono fakamatalaʻi ʻo e ngaahi fakaʻilonga kehe ʻoku fekauʻaki mo e mape pē ko iá.

●

Ko e foʻi piliote lanu-kulokulá ʻokú ne fakafofongaʻi ʻe ia ha kolo lahi pe ko ha kolo siʻi. ʻOku ʻi ai ʻa e taimi ʻe niʻihi ʻoku ʻi ai ha laine ʻoku tuhu mei he foʻi pilioté ki he hingoa ʻo e koló pe feituʻú.

▲

ʻOku hanga ʻe ha kiʻi tapatolu ʻuliʻuli siʻisiʻi ʻo fakafofongaʻi ha moʻunga.

Tahi Maté

ʻOku ngāue ʻaki ʻa e faʻahinga mataʻi taipe ko ʻení (mataʻi tohi faka-ʻĪtali) ki he ngaahi feituʻu fakasiokākafi, hangē ko e ngaahi ʻōseni, ngaahi tahi, ngaahi anovai, ngaahi vaitafe, ngaahi moʻunga, ngaahi feituʻu maomaonganoa, ngaahi teleʻa, ngaahi toafa, mo e ngaahi ʻotu motu.

Selūsalema

ʻOku ngāue ʻaki ʻa e mataʻi taipe ko ʻení (mataʻi tohi faka-Lomá) ki he ngaahi kolo lalahi mo e ngaahi kolo iiki (pea ki he ngaahi feituʻu fakaikiiki ʻi he mape ʻo e kolo ko Selūsalemá).

Mōape

ʻOku ngāue ʻaki ʻa e mataʻi taipe ko ʻení (mataʻi tohi lalahi iiki) ki he ngaahi vahevahe fakapolitikale iiki, hangē ko e ngaahi feituʻu fonua, mo e ngaahi kakai, mo e ngaahi faʻahinga.

Siutea

ʻOku ngāue ʻaki ʻa e mataʻi taipe ko ʻení (mataʻi tohi lalahi) ki he ngaahi vahevahe fakapolitikale lalahi angé, hangē ko e ngaahi puleʻanga, ngaahi fonua, mo e ngaahi konitinēniti.