24. Kapaneume

ʻOku tuʻu ʻa Kapaneume ʻi he kauvai tokelau ʻo e Tahi ʻo Kālelí, pea ko e feituʻu mahuʻinga ia ki he ngāue fakafaifekau ʻa Sīsū ʻi Kālelí (Mātiu 9:1–2; Maʻake 2:1–5). Ko ha taulanga mahuʻinga mo lelei ia ki he toutaí pea mo e feituʻu fakakomēsiale mahuʻinga ia, pea naʻe nofo ai ʻa e kau Senitaile mo e kau Siu fakatouʻosi. Mahalo naʻe ʻikai tokolahi ange ʻi he kakai ʻe toko 1,000 ʻa e tokolahi ʻo e kakai ʻi ai ʻi he senituli ʻuluakí. Naʻe tuʻu ʻa Kapaneume ʻi he fetaulakiʻanga ʻo e ngaahi hala fefakatauʻaki mahuʻinga, pea maʻuiʻui mo moʻui ʻa e kelekele naʻe ʻātakiʻi iá. Naʻe hanga ʻe he kau sōtia Lomá ʻo langa ha ngaahi fale kaukauʻanga mo e ngaahi fale tukuʻanga koloa ʻi heni, pea naʻe tokoni ia ki he maau hono fokotuʻutuʻu fakasōsialé mo e ngaahi fale lelei naʻe langa maʻá e kakaí. Neongo ʻa e ngaahi mana lahi naʻe fai ʻi hení, ka naʻe hanga ʻe he tokolahi ʻo e kakaí ʻo fakafisinga ʻa e ngāue fakafaifekau ʻa e Fakamoʻuí. Naʻe hanga ai ʻe Sīsū ʻo fakamalaʻiaʻi ʻa e koló (Mātiu 11:20, 23–24). Naʻe ʻikai fuoloa kuo fakaʻauha ʻa Kapaneume pea ʻoku ʻikai ke toe nofoʻi ia.

Ngaahi Meʻa Mahuʻinga naʻe Hoko aí: Naʻe lau ʻa Kapaneume ko e “koló” ia ʻo e Fakamoʻuí (Mātiu 9:1–2; Maʻake 2:1–5). Naʻá ne fai ha ngaahi mana lahi ʻi he feituʻu ko ʻení. Hangē ko ʻení, naʻá ne fakamoʻui ha kakai tokolahi (Maʻake 1:32–34), kau ai ʻa e tamaioʻeiki ʻa ha ʻeikitau (Luke 7:1–10), mo e faʻē ʻi he fono ʻa Pitá (Maʻake 1:21, 29–31), mo e tangata pipiki naʻe tukutuku hifo mei he ʻato ʻo e falé (Maʻake 2:1–12), mo e tangata naʻe pipiki hono nimá (Mātiu 12:9–13). Naʻe kapusi heni ʻe Sīsū ʻa e ngaahi laumālie ʻuli tokolahi (Maʻake 1:21–28, 32–34), pea fokotuʻu hake ʻa e ʻofefine ʻo Sailosí mei he maté (Maʻake 5:22–24, 35–43), peá ne fai mo e malanga fekauʻaki mo e mā ʻo e moʻuí ʻi he fale lotu ʻi Kapaneume (Sione 6:24–59). Naʻe fekau ʻe he Fakamoʻuí kia Pita ke ʻalu ʻo toutaiʻi mai ha ika mei he Tahi ʻo Kālelí, ʻo fakaava hake hono ngutú, pea toʻo mei ai ha paʻanga maka ʻo totongi ʻaki ia ʻa e tukuhau (Mātiu 17:24–27).